হর-হর মহাদেব
বনারসকী মীয়াম পুম্নমকপু বনারসকী পাউখোল্লোইনা খুরুমজরি। থৌরম অসিগা মরী লৈনরিবা দোক্তর ময়াম, মেদিকেল স্তাফ, পেরা-মেদিকেল স্তাফ, অনা লায়েংশঙদা খ্বাইদগী মরুওইনা থবক তৌরিবা, লুনা নান্না থম্লিবা, ঐখোয়গী মরুপ পুম্নমক, ইচিন ইনাউ পুম্নমক, কোরোনা তিকাগা মরী লৈনবা মীয়াম পুম্নমক, কোরোনা তিকা ফংলিবা মীয়াম পুম্নমক, ঐনা অদোম পুম্নমকপু তরাম্না ওকচরি। তশেংবদি অসিগুম্বা মতমসিদা ঐহাক অদোমগী মরক্তা লৈফম থোকপনি। অদুবু ফীভম্না য়াদবদগী ঐখোয় ভর্চুএল ওইনা উনবা ফংলি। অদুবু ৱাফম অমদি কাসিদা হেক তৌবা য়াবমখৈ তৌনবগীদমক হোৎনরি হায়বসিমদি অচুম্বনি।
মরূপশিং,
ইং ২০২১ হৌরকপসি য়াম্না অফবা হোৎনজমলগা লোয়ননা হৌখি। অদুগা কাসিগী মরমদা হায়নবা ৱাফমদি কাসিগা হেক থেংনরুবদা য়াইফবা অসি মহৈ য়াল্লি মতিং পাল্লি হায়নৈ। অসিগুম্বা ময়াই অসিননি ঙসি ঐখোয়গী লৈবাকসিদা মালেমগী খ্বাইদগী চাউবা কোরোনাগী তিকা থাবগী থবক চঙশিল্লিবসি। থৌরাং অসিগী অহানবগী তাঙ্কক অনিদা লৈবাক মীয়াম করোর ৩০দা তিকা থাগনি। ঙসিদি লৈবাকসিদা লৈরিবা ফীভম, লৈবাকসিগী তৌবা ঙম্বগী মতিংনা লৈবাক অসিনা মশানা তিকা পুথোকচরি। অমখক্তা নত্তনা ভারত্তা শাবা তিকা অনি পুথোক্লি। ঙসি পায়খৎলিবা থৌরাংসিনা লৈবাকসিগী কাচিন কোয়া শিন্বা থুংনা তিকা য়ৌহল্লি অমদি ঙসিগী মালেমগী খ্বাইদগী মরুওইবা ৱাফমসিদা ভারতনা মরোমদোম লেপচবা ঙমজরি। মসিদসু নত্তনা ভারতনা লৈবাক কয়াদসু মতেং পাংলি।
মরূপশিং,
হৌখিবা চহী খরসিদা বনারস অমসুং অকোয়বগী মফমশিংদা মেদিকেল ইনফ্রাস্ত্রকচরদা চাউনা অহোংবা লাক্লিবসিনা পুর্বাঞ্চল অপুম্বদা কোরোনাগী মতমসিদা কান্নরি। হৌজিক্তি বনারসতা তিকাগীদমক খোঙজেল য়াঙনা মাঙদা চঙশিল্লি। ঐঙোন্দা পাউদম্লকপগী মতুং ইন্না অহানবা তাঙ্কক্তা বনারসতা হকশেলগী থৌমী চাউরাক্না লিশিং ২০লোম তিকা থাগদৌরি। মসিগীদমক তিকা থাফম ১৫ শেমখি। অসিগুম্বা থৌরাং অসিগীদমক ঐনা দোক্তর, নর্স অমসুং মেদিকেল স্তাফ পুম্নমকপু থাগৎচরি, য়োগীজীগী লৈঙাকপু থাগৎচরি, দিপার্তমেন্ত পুম্নমক্কী মরূপশিংবু থাগৎচরি।
মরূপশিং,
বনারসতা পায়খৎলিবা থৌরাংসিদা অদোমগী ৱাখল্লোন করি লৈবিবগে, খুদোংচাদবা মায়োক্নবগা লৈবরা হায়বা খঙনবগীদমক ঐনা ময়ামগী মরক্তা লাক্লিবনি। ঐখোয়না ভর্চুএল ওইনা ৱারী শানসি। ঐ ঙসি ভাসন পীননপা লাকপা নত্তে। অদুগা কাসিগী মীয়ামদগী ফংলিবা ফীদবেক অসিনা মফম অতৈদসু কান্নগনি হায়না ঐনা খল্লি। অদোম ইশানা তিকা অসিসু ফংলি অদুগা তিকা থাবগী থৌরমদসু মায়পুননা হোৎনরি, হায়বদি মখল খুদিংমক্কী মীওইশিং মসিদা য়াওরি। অদুগা ঐঙোন্দা পাউদম্লকপদা ঐগা ইহান হান্না ৱারী ৱাতায় শাননবা তাঞ্জা ফংলিবা অসি বরানসি দিস্ত্রিক্ত হোস্পিতালগী মেত্রন ইচল পুস্পাজী শোয়দনা ওইরমগনি।
মোদী জী – পুস্পা জী খুরুমজরি।
পুস্পা জী – ইকায়খুম্নরবা প্রধানমন্ত্রীবু ঐনা খুরুমজরি। ঐগী মিং পুস্পা দেবী কৌই। ঐনা দিস্ত্রিক্ত ৱুমেন হেল্থ সেন্তরগী মেত্রন ওইনা থবক পুজরি সার, ঐনা মেত্রন ওইনা থবক তৌরক্লিবসি চহী অমা ফারে।
মোদী জী – ঙসি খ্বাইদগী অহানবা ওইনা ঐনা অদোমগী মফমদা নুংঙাইবা ফোঙদোকচরি মরমদি অদোম অহানবা তাঙ্কক্তা তিকা থাবা ফংলিবা ময়ামগী মরক্তা অমনি। কোরোনাগী মমিং তাবদা মীয়াম্না মিপাইনরম্বা মতম অমা লৈরম্মি। হৌজিক ঐনা পুস্পা জীদগী খঙবা পাম্লিবসি ঙসি লৈবাকসিদা মীয়াম্না ঙাঙনরিবা, ঐনসু তারিবশিং অসিদা অদোম্না করি হায়বিনিংবগে হায়বসিনি।
পুস্পাজী – ঐনা খ্বাইদগী অহানবা ওইনা ঐগী হকশেলগী থৌমীশিংগী মায়কৈদগী কোরোনাগী তিকাগীদমক অদোমবু হন্না হন্না থাগৎচরি। থৌরাং অসিদা অদোম্না খ্বাইদগী অহান্বা ওইনা হকশেল লোয়শঙবু খন্বিরি অমদি অহান্বা তাঙ্কক্তা ১৬.০১দা ইহান হান্না ঐঙোন্দা তিকা থাখি। ঐ তিকা থাদোক্লে অদুগা ঐ ইশানা ইশাবু য়াম্না লাইবক ফবীনি হায়না খঞ্জরি। ঐনা লাইবক ফবীনি খঞ্জরিবসিগী মরমদি ঐ তিকা থাদোক্লে অমদি ইশাবু শাফরে হায়বা ৱাখল্লোন অমা ফাওজরি, ঐগী ইমুং মনুং পুম্নমকসু শাফরে হায়না খঞ্জরি, খুন্নাইসিসু শাফরে হায়না খল্লি। মসিগা লোয়ন-লোয়ননা সার, ঐনা ঐগী নর্সিং স্তাফ, পেরা-মেদিকেল স্তাফ পুম্নমকপু তিকা অসি থাদোক্নবা পুক্নিং চিংশিঞ্জরি, ঐনা হায়জরি মসিদগী ঐঙোন্দা সাইদ ইফেক্ত অমত্তা থেংনদে। তিকা থারুবদগী ঐঙোন্দা মখল অমতগী নুংঙাইতবা লৈতে। অতোপ্পা মখলগী হিদাক কাপ্পগুম মসিদসু চপ মান্ননা ফাওই। অদোম খুদিংমকসু শাফনা লৈনবগীদমক, অদোমগী ইমুং মনুং অমদু খুন্নাই শাফনা লৈনবগীদমক থোকপীরক্তুনা তিকা অসিবু থাদোকপিয়ু।
মোদীজী – পুস্পাজী অদোমগুম্বা মশিং য়াম্লবা কোরোনা লান্মীশিং অমসুং লৈবাক মীয়াম করোর ১৩০গী মায় পাকপনি, ভারত্তা শাবা তিকা অসি ঐখোয় পুম্নমক্কী চাউথোকচনিংঙাইনি। অদোমদা নুংঙাইতবা, ইচম চম্বা নুংঙাইতবা অমত্তা লৈতে হায়না অদোম্না হায়বিখি, অদুদি অদোম্না থেংনখিবা পুম্নমক অফবা ঙাক্তনি হায়না কনাগুম্বা মীওই অমা হেক্তদা হায়বা ঙমগদৌরিবরা?
পুস্পাজী – হোয়।
মোদীজী – হায়বিয়ু পুস্পাজী।
পুস্পাজী – হোয় সার?
মোদীজী – ঐনা হায়রিবসি তাবিরিবা নত্ত্রা?
পুস্পাজী – হোয় সার।
মোদীজী – চুম্নগী তিকা থাবগা চপ মান্ননা অদোমদা ফাওই হায়না হায়বিরি। কনাগুম্বা মীওই খরগী পুক্নিংদদি চিংনবা খরা লৈরি। অদোমদি মেদিকেলগী লমদা থবক তৌবিরিবনি অদুগা অদোম ইশানা তিকা অসি থাদোকপিরি। অদুদি মীয়ামদা থাজহন্নবা ৱাফম খরা অদোম্না হায়বিয়ু।
পুস্পাজী – য়েংবিয়ু মসি অদোমগীদমক্তা য়াম্না মরুওইবা তিকানি হায়না মীয়ামদা থাজহনগনি। অদুগা ঐখোয়গী ইকায়খুম্নরবা প্রধান মন্ত্রীগী লমজিং মখাদা থা মাপলগী মনুংদা কান্নখ্রবা তিকা অসি ফংহনবিদুনা ভারত্তা খ্বাইদগী হান্না তিকা থাবা হৌরি। অদুগা তিকা অসি থাদোকপনা অদোম শাফনা লৈহনগদৌরিবনি অমদি তিকা অসি থারুরগা সাইদ ইফেক্ত লাক্কনি অমদি ঐখোয়দা অমাঙদা থোক্লক্কনি হায়বনচিংবা চিংনবা অমত্তা পুক্নিংদা থমবিগনু। থৌরাংসিগী মখাদা পুম্নমক্না তিকা থাদোকপিয়ু অদোমগী পুক্নিংদা চিংনবা লৈতনা তিকা থাদোকপিয়ু।
মোদীজী – পুস্পাজী, অদোম্না য়াম্না মরীক চুম্না হায়বিখ্রে। তিকা অমা শেম্বদা ঐখোয়গী সাইন্তিস্তশিংগী চাউরবা হোৎনজমল য়াওরি অমদি মসিদা মপুং ফারবা সাইন্তিফিক ওইবা ৱাফম লৈজরি। অদোমসু তাবিরমগনি, হৌরকপা মতমদা তিকা করিগীদমক্তা থুনা পুথোক্ত্রিবনো হায়না ঐঙোন্দা প্রেসর কয়া লৈখি। করমবা মতমতা তিকা থাদোক্কনি? রাজনিতিদা ৱাফম কয়া হায়নখি অদুগা ঐনা পীবা অমত্তা ঙায়রবা পাউখুমদি সাইন্তিস্তশিংনা হায়বদুমক ঐখোয়না তৌগনি হায়বসিনি। ৱাফমসি ঐখোয় রাজনিতি কাঙবুগী ৱাফম নত্তে ঐখোয়না লেপকদবা নত্তে। অদুগা ঐখোয়গী সাইন্তিস্তশিং অমসুং মখোয়গী থৌওং মপুং ফানা লোইরবা মতুংদা ঐখোয়না কদাইৱাইদগী হৌসিগে হায়বা ৱাফম থমখিবনি। মদুদা ঐখোয়না নুমিৎ খুদিংগী অনাবা কয়াগীদমক থৌদাং লৌরিবা মখোয়গীদমক ইহান হান্না খনখি। করিগুম্বা মখোয়না শাফনা লৈরবদি লেমহৌরিবা খুন্নাইগীদমক মখোয়না থৌদাং লৌগনি হায়বসিনি। অদুগা শাংলবা মতম চঙনা চত্থরক্লিবা অরুবা থৌওং অমসুং সাইন্তিফিক ওইনা থিজিন হুমজিল্লবা মতুংদা হৌজিক তিকা পুথোরক্লবা মতমসিদা খ্বাইদগী হান্না হকশেলগী লমদা থবক তৌরিবা ময়ামদা অহানবা খুদোংচাবা পীনবা লেপখিবনি; কনাগুম্বা খরনদি ঐখোয়গীসু খরা থুনা হৌবিয়ু হায়না শাউবসু য়াওরি; অদুবু ঐগী ৱাখল্লোন্দি অদোম্না খ্বাইদগী হান্না তিকা অসি ফংহনবা হায়বসিনি হেক ঙম্লিবমখৈ থুনা লোইশিন্নবা ৱাখল থাদবিদুনা মাঙদা চঙশিনবিয়ু। তাঙ্কক কয়াদা তিকা অসিগী শাথিবা সাইদ ইফেক্ত লৈতে হায়বা ৱাফম ফংলবা মতুংদা পাস তৌখিবনি। মরম অসিনা লৈবাক মীয়াম্না ঐখোয়গী সাইন্তিস্তশিং অমদি দোক্তরশিংদা থাজবা থম্বিয়ু অদুগা অদোমগুম্বা মেদিকেলগী লমদা লৈবা মীওইশিংনা হায়রবদি মীয়াম্নসু থাজবা হেল্লি। পুস্পাজী অদোমগীদমক নুংঙাইবা ফোঙদোকচরি। অদোম শাফনা লৈবিয়ু অদুগা থৌগলসু মখা চত্থবিখো।
মোদীজী – রানী জী খুরুমজরি।
রানী কুৱর শ্রিভাস্তব – খুরুমজরি সার। ইকায়খুম্নরবা প্রধান মন্ত্রীবু ঐনা কাসি মীয়াম পুম্বগী মায়কৈদগী হন্না হন্না খুরুমজরি। সার, ঐগী মিং রানী কুৱর শ্রিভাস্তব কৌই। ঐ দিস্ত্রিক্ত ৱুমেন হোস্পিতালদা এন.এম. ওইনা চহী তরুক থবক তৌরক্লি।
মোদীজী – হৌখিবা চহী তরুকসিদা অদোম্না তিকা কয়াম থাখ্রে? নোংমদা কয়া য়াম্না থারমগনি?
রানী কুৱর শ্রিভাস্তব – সার, নোংমদা ঐখোয়না চাউরাক্না হিদাক ১০০রোম কাপ্পি, তিকা ১০০রোম মীয়ামদা থাই।
মোদীজী – অদুদি হৌজিক ফাওবদা লৈরিবা অদোমগী রেকোর্দ অদু হন্দক্কী তিকা থাবসিদা থুগাইরগনি। মরমদি অদোম্না মী ময়াম অমা তিকা থাগদৌরিবনিনা হান্নগী রোকোর্দ অসি থুগাইরগনি।
রানী কুৱর শ্রিভাস্তব – সার, হন্দক্তি ঐ য়াম্না নুংঙাই, কোবি-১৯গুম্বা অকিবা ফংলবা লাইচৎ অসিগী তিকা থানবগী তাঞ্জা ফংবসিদা ঐ ইশানা ইশাবু লাইবক ফবীনি হায়না ফাউজৈ। মসিগীদমক্তা ঐ ইশানা ইশাবু লাইবক ফভীনি হায়না নীংজৈ।
মোদীজী – অদুদি মীয়াম্নসু অদোমবু য়াইফরোল পীবিরমগনি।
রানী কুৱর শ্রিভাস্তব – হোয় সার, -য়াইফ-থৌজাল কয়া ফংই। ঐগা লোয়ন-লোয়ননা সার থুনা, থা তরাগী মনুংদা কোরোনাগী তিকা পুথোক্তুনা মীয়ামদা ফংহনবিবগীদমক্তা মীয়াম্না অদোমবু খ্বাইদগী হেন্না য়াইফ-থৌজাল পীনরি।
মোদীজী – মদুদা ঐগী মঙম লৈতে। অমরোমদা অদোমগী মঙম লৈ মরমদি অদোম্না য়ুমদা হনবদা কোরোনা পুদুনা হল্লবজাৎলা হায়না শোয়দনা চিংনবা, পাখৎপা ফাওবিরমগনি? পুম্নমকসিগী মরক্তা অদোম্না থৌনা ফনা থবক তৌখি, ইচঙ থৌনা লেপখি, লায়রবশিংগী, অনাবশিংগী থৌগল তৌখি। অতোপ্পা অমনা ঐখোয়গী সাইন্তিস্তশিংনি। মখোয়না থাজবা লোয়ননা; করিনোসু খঙদবা, কমদৌবনোসু খঙদ্রিবা, মশক খঙদবা য়েক্নবা অমা ওইরিবা কোরোনাবু; লেবোরেতরীদা মতুং ইন্নদুনা অহিং নুংথিল নাইদনা হোৎনখিবা; ঙসিগী অনৌবা মতমগী রিসিশিং ওইরিবা সাইন্তিস্তশিংনি। মখোয় পুম্নমক্না তৌখিবা থবক্তুনা ওইরকপনি। মরম অসিনা তিকা অসিগী ক্রেদিত ঐগী নত্তে, অদোম পুম্নমক্কীনি। অদোম্না য়াম্না থাজবগা লোয়ননা ফোঙদোক্লিবা ৱাফমসি তাবদা নুংঙাই। মীয়ামগী থাজবা হেনগৎহন্বিয়ু, থবক মাঙদা চঙশিনবিয়ু। ঐনা রানীজীবু য়াইফ-পাউজেল পীজরি। থাগৎচরি।
রানী কুৱর শ্রিভাস্তব – থাগৎচরি সার, খুরুমজরি।
মোদীজী – খুরুমজরি দোক্তর।
দোক্তর ভি. সুক্লা – খুরুমজরি সার। ঐ দোক্তর ভি. সুক্লা, চীফ মেদিকেল ওফিসর, পন্দিত দীনদয়াল উপধ্যায় বরানসিনা ইশা অমসুং ঐগী হেল্থ সেন্তরগী মায়কৈদগী ইকায়খুম্নরবা প্রধান মন্ত্রীজীবু নোল্লুক্না খুরুমজরি।
মোদীজী – সুক্লাজী, করি করি থেংনবিবগে খরা হায়বিয়ু, ঐখোয়গী কাসি মীয়াম নুংঙাইরিবা নত্ত্রা?
দোক্তর ভি. সুক্লা – সার, য়াম্না নুংঙাইরি। মীপুম খুদিংদা থৌনা অমা লাক্লে। তেনখ্রবা মতমসিদা চাউখৎলক্লিবা লৈবাক অমা ওইজরগসু চাউখৎলবা লৈবাকশিংগা চাংদম্নবদা মখোয়দগী হান্না তিকা পাথোক্লি। ঐখোয়গী মেদিকেল ফুরুপ অমসুং হকশেলগী থৌমীশিংদি অদোম্না মখোয়বু ইহান হান্না তিকা থাদোক্নবা থৌরাং লৌখৎপীরকপগীদমক্তা হেন্নদুনা চাউথোকচবা ফাওজরি। মসিগীদমক্তা ঐখোয়না চাউথোকচৈ অমদি অদোমগী মফমদা লমন তোনশিঞ্জরে।
মোদীজী – ঐগী ইফমদা অদোমগী লমন য়াম্না তোনশিল্লবনি, তশেংবদি অদোম্না শিংথানিংঙাই ওইবা থবক তৌরি। চাউখ্রবা লাংফম অসিদগী লৈবাক অসিবু কনবদা কোরোনা লান্মীশিংগী চাউরবা থৌদাং লৈ হায়বসি ঐনা হন্না-হন্না হায়রি। হায়বিয়ু সুক্লাজী।
দোক্তর ভি. সুক্লা – চাউখ্রবা হকশেল লোয়শঙ অসিবু খ্বাইদগী হান্না তিকা থাদোক্নবা অদোম্না থাজবা পীখিবসিনা ঐখোয়দা অনৌবা থৌনা অমা পোকহল্লি অমদি শরুক অনি হেন্না ঐখোয়না ঐখোয়গী ইথৌদা পুক্নিং লুপখি অমদি প্রধান মন্ত্রী মশামক্না লাইচৎ অসিদগী অমদি অতৈ লায়নাশিংদগী মীয়ামবু কন্নবগীদমক হোৎনবিদুনা প্রধান মন্ত্রী অমসুং সাইন্তিস্তশিংনা খ্বাইদগী হান্না হকশেলগী থৌমীশিংদা তিকা থাননবা খনগৎপিরক্লিবা অসিনা অদুমক তিকা অসি কান্নগনি অমদি চিংননিংঙাই লৈরোই হায়বসি তাকচরবনি হায়বসি মীয়ামদা লাউরিবনি।
মোদীজী – ঐখোয়না হৌখিবা চহী মরি-মঙাসিদা লু নানবগী থৌরাং লৌখৎলিবা, থক্ননবা অরুবা ঈশিংগী থৌরাং, খোঙহাম খুৎহাম্ফমগী থৌরাং লৌখৎলিবশিং অসিনা মরম ওইরগা লৈবাকসিগী খ্বাইদগী লায়রবশিংসু লায়না অসিদগী লাপ্না লৈননবা পাম্বৈ ওইখিবসি তাইবঙ মপুংগী থৌজালনি। থৌরাং অসিনা নাকোয়ননা ঐখোয়গী লৈবাকসিগী লায়রবা মীয়াম অমদি অহল ওইরবা মীওইশিংনা কোরোনাগী মায়োক্তা থেংননবা থৌনা পোকহল্লি। মদুগী মহৈনা মফমসিদা মী শিবগী চাং য়াম্না হন্থরি। অদু ওইরবদি লু নান্বা, খোঙহাম খুৎহাম্ফম নৎত্রগা ঈশিং ওইরবসু হায়রিবা পুম্নমকসিনা মতেং ওইখি। সুক্লাজী অদোমদি লুচিংবা অমনি, অদোমগী মখাদা চাউরবা কাঙবু অমা থবক তৌরিবনি। থাক কয়াগী মীওইশিংনা থবক তৌরিবনি। পুম্নমক অসিগী থাজবগী চাং অসি কমদৌবিবগে? খোঙবু পুম্মক্না কয়া য়াম্না থাজবিবগে?
দোক্তর ভি. সুক্লা – য়াম্না থাজৈ। ময়াম পুম্নমক মপুং ফানা অপেনবা পোক্নরি। কনাগুম্বা অমত্তদা করিগুম্বা মখল অমত্তগী চিংনবা লৈতে। তিকা থাবা হৌদ্রিঙৈগী মাঙওইননা ঐখোয়না হীরমসিগী মতাঙদা কুপ্না খন্ন নৈনখ্রে অমদি ময়াম পুম্নমক থোরক্তুনা চত্থগদৌরিবা থৌরাং অসি চহী চুপ্পা পাঙথোক্তুনা লাক্লিবা ইচম চমবা তিকা থাবগী থৌওংগুম্বনি, তিকা থারবা মতুংদা অপীকপা সাইদ ইফেক্ত, খজিক খরা নাবা নৎত্রগা লাইহৌ মচা খর তৌবা, লোক থুংবনচিংবা অসি অদুম চৎনবা ৱাফম্নি, মসিগুম্বা থেংনবদা করিসু চিংননিংঙাই লৈতে হায়না ময়ামদা ৱাখল তাহনখ্রে। তিকা অসি থারবা মতুংদসু অসিগুম্বা লাইওং মচা মশু খরা লাকপা য়াই অদুবু মদুদা করিসু চিংননিংঙাই লৈতে। করিগুম্বা কনাগুম্বগী পুক্নিংদা চিংনবা লৈরবসু নুমিৎ অদুদা ঐখোয়না অহানবা ওইনা ঐখোয়গী সেন্তরদা কাপথোকখি অমদি নুমিৎ অদুদা মফমসিদা মীওই ৮২দা তিকা থাখি। মসিনা মীয়ামবু থাজহনবদা চাউনা কান্নখি অমদি মীয়াম্না থোরক্তুনা মসিবু শন্দোক্লি।
মোদীজী – ঐখোয়না মালেমসিদা চিংনগনু, তিকা থাদোকউ; হায়বগী মহুত্তা অদোমগী ৱাহৈ অমনা, মেদিকেল শিন্ফমদা লৈবা মীওই অমনা হায়রবসি অনাবা মীওইশিংনা থাজৈ। মরম অসিনা অদোমগী মফমদসু মীয়াম্না ৱাহং কয়া কোক চীকপমখৈ হংলক্লমগনি, মদুদা অদোম্না কমদৌনা পানবিবগে?
দোক্তর ভি. সুক্লা – সার, তিকা থাবা খুদিংদা লাইওং মচা মশু খরদি অদুম্মক লাকই হায়বসি ঐখোয়না মীয়ামদা খঙহল্লি। ঙরাং ফাওবদা লৈবাকসিদা মীওই লাখ ১০রোম তিকা থাখিবসিদা লাইওং মচা মশু খরা উত্থোরকপা মীওই মশিং য়াম্না য়ামদে। মফমসিদা ঐখোয়না তিকা থাখ্রিবা ময়ামসি তিকা থারবা মতুংদা পুঙ্খায় অমা ফমহন্দুনা থম্মি, মদুগী মতুংদা মখোয় মখোয়গী মথৌদা হন্নখি। মফমসিদা শিৎ শেংবগী শিন্মীশিংসু তিকা থারবা মতুংদা থুনা মথৌ তৌনখি। ঐখোয় পুম্নমকসু ঐখোয়গী ইথৌ তৌনরি। অদুগা ফীভম লুনা নারিবা মীওইশিং, থম্মোয়গী অনাবা লৈবা মীওইশিং, নীংশা হোনবগী মরীদা নাবা মীওইশিং, কেন্সর নাবা মীওইশিং; মখোয়দসু তিকা থাগদৌরিবনি, করিগুম্বা মখোয়দা লাইবক থিবা থৌদোক থোক্লবসু, মীওই করোর কয়াগী মরক্তা অমা অনি য়াওরকপদুদি মদু তিকা থাবগা মরী লৈনহল্লোইদবনি। মসি ইচম চম্বা থৌওং অমনি, তিকা অমত্তনা কনাগুম্বা মীওই অমবু মপুং ফানা ঙাকথোকপা ঙম্বা নত্তে মরম অসিনা অসিগুম্বা থৌদোক মচা খরবু তিকা থাবগা মরী লৈনহল্লোইদবনি। তিকা অসি শাফরবা তিকানি, লৈবাকসিদা মসিগী কান্নবা ফংলিবশিং অসিদগী হেন্না মালেমগী মফম অমদা ফংবা নত্তে। মীওই লাখ ১০ তিকা থাদোক্তুনা শাফনা লৈরি। মসি ঐখোয়গী লাইবক ফবনি অমদি ঐখোয়না মালেমদা পীনিংবা পাউজেলদি লাইচৎ অসিগী মায়োক্তা ভারতনা পায়খৎলিবা তিকা থাবগী থৌরাং অসিদগী হেন্না চাউবা থৌরাং অমত্তা লৈবাক অমত্তনা পায়খৎপা ঙমদ্রি হায়বসিনি।
মোদীজী – ফরে সুক্লাজী অদোম্না য়াম্না থাজরিবা, অদোম্না ইচঙ থৌনা মশিং য়াম্লবা মীওইশিং অদোমগী লায়েংশঙদা তিকা থারিবসুগুম অতৈ লায়েংশঙশিংদসু অদোমগী মফমদুদা মীওই ১০০দা কয়াম থুনা তিকা থাবা ঙমগনি হায়বসি লেপথোকপিয়ু হায়বা ৱাফমসি থমজরি। হিদান্নবিয়ু, ঐখোয়গী লায়েংশঙদা মী ১০০ লৈরবসু মথঙগী রাউন্দদদি থবক থুনা চঙশিনগে হায়বনচিংবা ফীভম শেমগৎপিয়ু। অসুম্না তৌরবদা চহী ৫০গী মথক্তা লৈরিবা মীয়ামগী তিকা থাবগী থবক ঐখোয়না থুনা হৌবা ঙমগদৌরিবনি। অদোম্না পান্দম চাউনা থমদুনা মীশিং য়াম্না তিকা থাবগী থবক পায়খৎলিবসিগীদমক অদোমবু থাগৎপদা মতিক চাই। অদুগা অদোমগী মতৌ তমদুনা অতৈসু মখোয় মখোয়গী ইন্সতিত্যুৎশিংদা, মখোয়গী লায়েংশঙশিংদা লৈরিবা ঐখোয়গী মাঙজিন থাবা লান্মীশিংবু মতেং পাংবিরবদি হেন্না ফগনি। সুক্লাজী অদোম অমসুং অদোমগী কাঙবুগী মফমদা নুংঙাইবা ফোঙদোকচরি। থাগৎচরি।
মোদীজী – রমেস জী খুরুমজরি।
রমেস চন্দ্র রাই – খুরুমজরি সার, ঐনা ইকায়খুম্নরবা প্রধান মন্ত্রী জীবু কোক নোন্না খুরুমজরি। ঐ রমেস চন্দ্র রাই, পন্দিত দীনদয়াল উপধ্যায় স্তেত হোস্পিতালদা সিনিয়র লেব তেক্নিসিয়ন ওইনা থবক পুজবনি।
মোদীজী – অদোম তিকা থাদোকপিরবরা?
রমেস চন্দ্র রাই – হোয় সার, অহানবা তাঙ্কক্তা ঐখোয়বু তিকা থাদোক্নবগী তাঞ্জা ফংজবসি ঐগী লাইবক ফবনি।
মোদীজী – ৱাহ! হৌজিক্তি অতৈনসু থাজবা হেনগৎলম্লগনি। তেক্নিসিয়নগী লমগী মকোক থোংবা মীওই অমনা তিকা অসি থাদোক্লবদি অতৈসু মশা মথন্তনা থাজবা হেনগৎলক্লগনি।
রমেস চন্দ্র রাই – তশেংবনি সার। ঐখোয়দি ময়ামদা অদোম্না অহানবা দোজ কাপ্লবনিনা অনিসুবা দোজকীদমক্তা থৌরাং তৌদুনা লৈবিরো হায়নফাও হায়রিবনি। অদোম, অদোমগী ইনুং মনুং, খুন্নাইবু অমদি লৈবাকসিবু শাফনা থম্বিয়ু হায়রিবনি সার।
মোদীজী – অদোম্না থাজবগা লোয়ননা মাঙদা চঙশিন্দুনা অদোমগী কাঙবু পুম্নমক্তা ইথিল পীরি, মখোয়দা থাজবা হেনগৎলবরা?
রমেস চন্দ্র রাই – হোয় সার। ময়াম্না ইচঙ থৌনা থৌরক্তুনা অহানবা তাঙ্কক্তা মীওই ৮১ তিকা থাদোকখ্রে। মীওই ১৯ অমদি মরম খরদগী অতোপ্পা মফমদা চৎখি। ঙসিসু মফমসিদা তিকা থাবগী থবক মপুং ফানা চত্থরি সার।
মোদীজী – রমেস জী অদোমগীদমক্তা ঐনা য়াইফরোল পীজরি, অদোমগী কাঙবু পুম্নমক্কী মফমদসু য়াইফরোল পীজরি। অদোমবু হন্না হন্না থাগৎচরি।
মোদীজী – শৃঙ্খলা জী খুরমজরি।
শৃঙ্খলা চৌহান – সার, ঐ শৃঙ্খলা চৌহানগী মায়কৈদগী অদোমবু খুরুমজরি। সার, সি.এচ.সি. হাথী বজার, পি.ঐচ.সি. সেবাপুরী, ঐচ.দব্লিউ.সি. বর্গীদা এ.এন.এম. ওইনা থৌ পুজরি।
মোদীজী – অহানবদা অদোমবু ঐনা হন্না হন্না থাগৎচরি মরমদি সেবাপুরিদা সেবা তৌদুনা অদোমনা সেবাপুরীগী মিংচৎ হেনগৎহল্লি অমদি অদোমগী ইমুংগী মিংচৎ হেনগৎহল্লি। অদোম্না নীংথিনা থৌগল তৌবিরি। অদুগা অসিগুম্বা লাংফমগী মতমসিদা থৌগল তৌবশিংদি মন্তিক্নবা য়াদনা মমল নাইদ্রবা মীওইশিংনি। অদুগা মালেমগী খ্বাইদগী চাউবা তিকা থাবগী থৌরাং অসি অদোমগুম্বা কয়াগী মতেংনা পাঙথোক্লিবনি। হৌজিক ফাওবদা অদোম্না মীওই কয়া তিকা থাখ্রে? অদোম্না নোংমদা মীওই কয়াদা তিকা থাবগে?
শৃঙ্খলা চৌহান – সার, ইহান হান্না অহান্বা তাঙ্কক্তা, জনুৱারী ১৬, ২০২১দা ঐনা কোবিসীল্দগী অহানবা দোজ ইশানা কাপচখি অদুগা নুমিত্তুদা ভেক্সিনেতর অমা ওইনা মীওই ৮৭তসু তিকা কাপখি।
মোদীজী – অদোম্না তিকা থাদোকখিবা নুমিত্তুদা অদোম্না থবক ময়াম অমসু তৌবিরিবা?
শৃঙ্খলা চৌহান – হোয় সার।
মোদীজী – ফৈনে অদুদি ! মীওই ৮৭তা তিকা থাবা হায়বসি থবক মচা মশুসু নত্তে। অদু ওইরবদি ময়ামদুনা অদোমবু য়াইফ-থৌজালসু পীবিরমগনি।
শৃঙ্খলা চৌহান – হোয় সার। মতমদুদা মথৌ তৌরিবা ময়ামবু তিকা থারবা মতুংদা মমৈদা ঐ ইশামকসু তিকা থাহনখি সার।
মোদীজী – ফৈ। ঐনা অদোমগী মফমদা য়াইফ-পাউজেল পীজরি। অদোম পুম্নমক্কী হোৎনজমলনা অমুক্কা হন্না অদোম পুম্নমক শাফনা লৈরবদি খুন্নাইগী অতৈ কাঙলুপশিংসু অদোম্না লায়না তিকা থাবা ঙম্লগনি হায়না ঐনা থাজৈ। ঙসি অদোম ময়ামগা ৱারী ৱাতায় শাননবগী তাঞ্জা ফংলি। তিকা থাবগী থৌরাংসিদসু কাসি মীয়ামগা উনবা ফংজরিবা, মখোয়গা ৱারী ৱাতায় শানবা ফংলিবা অমদি মরুওইনা থবক অসিবু হকথেংননা পানরিবা মেদিকেল ফ্রেতরনিতীগী মীয়ামগা উনবগী তাঞ্জা ফংলিবা, মখোয়গা ৱারী শানবগী তাঞ্জা ফংলিবা অসিদা পুক্নিংদা নুংঙাইবা ফাওই। ঐগীদমক্তা মসি লাইবক ফবগী পুংফম্নি। ঐনা অমুক্কা হন্না কাসি মীয়ামদা হায়জনিংবদি অহানবা তাঙ্কক্তা তিকা থাগদৌরিবা ময়ামসু থুনা চাদা চাম্মা লোইশিনবিয়ু অদুগা চহী ৫০গী মথক্তা লৈবা মীয়ামসু খুদোংচাবা ফংহন্নবা মথঙগী তাঙ্কক্কী থবক চঙশিন্নবা অমদি কাসিগী থৌগল্লোয় অমা ওইনা ঐখোয়না থবক অসি থুনা মপুং ফাহনসি হায়বসিনি।
ঐনা ময়াম পুম্নমক্কী মফমদা য়াইফ-পাউজেল পীজরি।
