প্রধান মন্ত্রী শ্রী নরেন্দ্র মোদীনা ঙসি নই দিল্লীদা হান্নগী মপাল থৌরম পুবা মন্ত্রী সুশ্মা স্বরাজকী ময়ুমদা লাক্তুনা মফমদা ইকাই খুম্নবা উৎখ্রে।
মহাক্না লৈখিদবদা অৱাবা ফোংদোক্লদুনা প্রধান মন্ত্রীনা হায়খি, “ভারতকী রাজনিতীদা অথোইবা পন্দুপ অমা লোইশিনখ্রে। ভারতনা শক্নাইরবা লুচিংবা অমনা লৈখিদবদা অৱাবা ফোংদোক্লি মহাক্না মহাক্কী মপুন্সি অদু মীয়ামগী সেবা অমসুং লাইরবশিংগী পুন্সিগী য়াইফনবগীদমক কত্থোকখি। সুশ্মা স্বরাজজী অসি মীওই কোতি কয়াবু পুক্নিং থৌগৎপীরম্বশিংগী মরক্তা অমা ওইবীরম্মি।
সুশ্মাজী অসি অচুম্বা ঙাংবা অমসুং থোইদোক হেন্দোকপা পর্লিয়ামেন্তরিয়ান অমা ওইবীরম্মি। মহাকপু পার্তীগী মনুংদসু লুনা ৱাংনা খন্নখি অমসুং ভক্তি তৌনখি।
থোইদোক হেন্দোকপা এদমিনিস্ত্রেতর অমা ওইনা সুশ্মাজীনা মহাক্না পায়রম্বা মন্ত্রালয় খুদিংমক্তা অৱাংবা থাক অমা ঙাক্তুনা থমলম্মি। তোঙান তোঙানবা লৈবাকশিংগা লোয়ননা ভারতকী মরী হেন্না ফগৎহনবদা মহাক্না মরুওইবা থৌদাং লৌখি। মন্ত্রী অমা ওইনা ঐখোয়না মহাক্কী থৌজাল হৈবা মতৌ অদুসু উবা ফংখি, মালেমগী মফম অমা হেক্তদা খুদোংথিবা তারবা ভারত মচাশিংবু তেংবাংখি।
হৌখিবা চহী ৫দা মপাল থৌরম পুবা মন্ত্রালয়দা সুশ্মাজীনা চোকথবা লৈতনা তৌখিবা থবক অদু ঐহাক্না কাওবা ঙম্লোই। মহাক্কী হকচাংগী ফিভম ফৎখিদবা মতমদা ফাওবা, মহাক্না মহাক্কী থবক্তা অচুম্বা পুরক্নবগীদমক হোৎনবা য়াবা হোৎনখি অমদি মহাক্কী মন্ত্রালয়গী ৱাফমশিং পন্থদুনা থমখিদে।
সুশ্মাজীনা লৈখিদবা অসি লনাইগী মাংজবা অমনি। ভারতকীদমক মহাক্না তৌরম্বা পুম্নমক অদুগীদমক মহাকপু নুংশিনা নীংদুনা লৈহৌরগনি। ঐহাক্না মসিগী লাইবক থিরবা পুংফম অসিদা মহাক্কী ইমুং মনুং, তুংইনবশিং অমসুং নিংজবশিংগী অৱাবদা শরুক য়াজরি। ওম শান্তি।”
হান্নগী মপাল থৌরম পুবা মন্ত্রী শ্রীমতী সুশ্মা স্বরাজ ঙরাং নুমিদাং নই দিল্লীদা লৈখিদ্রে।
