প্রধান মন্ত্রী শ্রী নরেন্দ্র মোদীনা ভিদিও কন্ফরেন্সিংগী খুত্থাঙদা প্রধান মন্ত্রী অৱাস য়োজনাগী মখাদা য়ু.পি.গী বিনিফিসিয়রী লাখ ৬ হেনবগী শেলগী তেংবাং থাদোকখ্রে। মহাক্না বিনিফিসিয়রীশিংগা ৱারী ৱাতায় শানখি। কেন্দ্রগী রুরেল দেভেলপমেন্ত মন্ত্রী, উত্তর প্রদেশকী গভর্নর অমসুং উত্তর প্রদেশকী মুখ্য মন্ত্রী থৌরমদুদা শরুক য়াখি।
প্রধান মন্ত্রীনা বিনিফিসিয়রীশিংদা প্রকাস পুরবকী থৌরমগা মরী লৈননা য়াইফ-পাউজেল পীখি। শ্রী মোদীজিনা গুরু গোবিন্দ সিংহ জীগী মফমদা মহাক্কী প্রকাস পুরব নুমিত্তা কোক নোনখি। য়াইফরবা থৌরম অসিদা মহাক্না লৈবাক মীয়ামদা য়াইফ-পাউজেল পীখি। গুরু সাহিব মহাক্কী মফমদা থৌজাল উৎখি অমদি মহাক্কী থৌগল তৌজনবা তাঞ্জা পীখি হায়না মহাক্কী ৱাখলদা ফাওই হায়না মহাক্না ফোঙদোকখি। গুরু সাহেবকী পুন্সি অমসুং পাউজেলনা থৌগল অমসুং অচুম্বগী লম্বীদা চৎপা মতমদা থেংনগদবা শিংনবশিং মায়োক্ননবা ঐখোয়দা পুক্নিং থৌগৎলি। অসিগুম্বা থাক্কী পাঙ্গল অমসুং থৌনা অসি থৌগল অমসুং অচুম্বগী ৱাখল্লোন্দগী থোরকই, অমদি লৈবাক অসিনা গুরু গোবিন্দ সিংহ জীনা উৎপিরম্বা লম্বী পরিংদা চৎলি হায়না প্রধান মন্ত্রীনা হায়খি।
হান্না পানরমদবা থাক্তা থবক পায়খৎলিবা অসি লায়রবা, চাকথুং ফিথুংদ্রবা অমদি তুহৎপিরবশিংগী পুন্সিদা অহোংবা পুরক্নবগীদমক পায়খৎপনি হায়না প্রধান মন্ত্রীনা ফোঙদোকখি। মহাক্না পি.এম. অৱাস য়োজনা চহী মঙাগী মমাঙদা অগ্রাদা হৌদোকখিববু মহাক্না নীংশিংখি। স্কিম অসিনা ভারতকী খুঙ্গঙগী মশক হোংদোকপা হৌরকখি। স্কিম অসি মীওই লাখ কয়াগী মঙলানগা মরী লৈনৈ অমদি খ্বায়দগী হেন্না লায়রবশিংদসু মখোয় য়ুম অমগী মপু ওইবা ঙমগনি হায়না থাজবা পীরি।
লায়রবশিংগী য়ুম শাবদা উত্তর প্রদেশনা খ্বায়দগী খোঙজেল য়াঙনা চেনবা স্তেতশিংগী মরক্তা অমা ওইবদুদা প্রধান মন্ত্রীনা নুংঙাইবা ফোঙদোকখি। ঙসিদি স্তেত অসিগী ইমুং লাখ ৬না মখোয়গী বেঙ্ক একাউন্তা পুন্না লুপা করোর ২৬০০ হেনবগী শেন্ফম ফংলগনি। ইমুং লাখ ৬সিগী মনুংদা ইমুং লাখ ৫না মখোয়গী অহানবা ইন্সতোলমেন্ত ফংলগনি হায়বদি ইমুং লাখ ৫সিনা ঙাইজরকপদু ফংলগনি। মতৌ অসুম্না ইমুং লিশিং ৮০না মখোয়গী অনিসুবা ইন্সতোলমেন্ত ফংখিবসিনা তাকপদি মথংগী নিংথমথা ফাওবদদি মখোয়গী ময়ুম ফংলগনি হায়না প্রধান মন্ত্রীনা ফোঙদোকখি।
আত্মনিরভর ভারত অসি লৈবাক মীয়ামগী মশান মশাবু থাজজবগা হকথেংননা মরী লৈনৈ অমদি মীওই অমগী মশাগী য়ুম লৈজবা হায়বসিনা মশানা মশাবু থাজজবা শরুক কয়া হেনগৎহল্লি। মশাগী য়ুম অমা লৈজবনা পুন্সিদা থাজবা পুরকই অমদি লায়রবগী লৈয়াৎনুংদগী থোরক্নবগী থাজবসু পী হায়না প্রধান মন্ত্রীনা হায়খি।
মমাঙগী লৈঙাক্কীম তমদা লায়রবশিংনা মখোয়গী ময়ুম শাবদা লৈঙাক্তগী মতেং ফংগনি হায়না থাজখিদে হায়না প্রধান মন্ত্রীনা ফোঙদোকখি। হান্নগী স্কিমগী মখাদা শাবা য়ুমশিংগী ফীভমসু মতিক চারমদে হায়নসু মহাক্না হায়খি। লায়রবশিংনা অরানবা খুজিল থৌরাংগী চৈনা খাঙবা তারম্মি হায়না প্রধান মন্ত্রীনা হায়খি। হায়রিবা খুদোংচাদবা অসিবু য়েংলগা পি.এম. অৱাস য়োজনা অসি লৈবাকসিনা নীং তম্বগী চহী ৭৫ মপুং ফাদ্রিঙৈদা লায়রবা ইমুং খুদিংদা য়ুম অমমম শাবিনবা পান্দমদা হৌদোকখিবনি। হৌখিবা চহী খরসিদা খুঙ্গঙগী মফমশিংদা য়ুম করোর ২ শাখ্রে, পি.এম. অৱাস য়োজনাগী মখাদা য়ুম করোর ১.২৫ শাদুনা কেন্দ্র লৈঙাক্না লুপা করোর লাখ ১.৫গী শেন্ফম পুথোকখি। মমাঙগী লৈঙাক্কী মতমদা স্তেতশিংদগী পাউখুম মতিক চানা ফংখিদবগী ৱাফমসু প্রধান মন্ত্রীনা নীংশিংখি। উত্তর প্রদেশতা গ্রামিন অৱাস লাখ ২২ শাগদৌরি, মসিগী মনুংদা লাখ ২১.৫কী অয়াবা হান্না পীখ্রে। ইমুং লাখ ১৪.৫দি অয়াম্বনা হৌজিক পাল্লিবা লৈঙাম অসিগী মখাদা মখোয়গী ময়ুম ফংখ্রে।
প্রধান মন্ত্রীনা হায়খিবদা, হৌখিবা মতমদা থেংনখিবা পামদবা ৱাফমশিং য়েংলগা ময়ুম অমা ফংজবগী থাজবা মাঙখ্রবা লায়রবা ইমুংশিংদা অহেনবা মীৎয়েঙ থমবা, অনিসুবদা এলোকেসন্দা লৌথুপ লৌকোই লৈহন্দবা, অহুমসুবদা নুপীদা য়ুম্বু ওইহন্দবা, মরিসুবদা তেক্নোলোজীগী মতেংনা য়েংশিনবা অমদি অরোয়বদা তঙায় ফদনা চঙদ্রবা য়াদ্রবা মচাকশিং য়ুম অমদা লৈহনবা হায়রিবা ৱাফমশিং অসি ঙাক্নবা হোৎনখি। হাউজিং য়ুনিতশিং অসিনা কচ্চা য়ুমদা লৈরম্বা মীওইশিং, লোকেল শিন্মীশিং, অপীকপা লৌমীশিং অমসুং য়ুম অমা শাবগী ৱাখল লৈজদ্রবা লম লৈজদবা মীওইশিংদা কান্নবা পীরি। শ্রী মোদীনা য়ুনিতশিং অসি ইমুংগী নুপীগী মিংদা অয়াম্বনা লৈহন্দুনা স্কিম অসিদা য়াওরিবা নুপী মপাঙ্গল কলহনবগী মশক মওংশিংগী মতাঙদা পনখি। লম লৈজদবা ইমুংশিংনা লমগী চে চাং ফংলি অমদি শেন্ফম পুম্নমক শেঞ্জা থুমজা থিংনবগীদমক বিনিফিসিয়রীশিংগী একাউন্ততা হকথেংননা ত্রান্সফর তৌরি।
থৌরাংশিং অসি খুঙ্গঙ অমসুং ময়োল্লমশিংদা ফংলিবা খুদোংচাবশিংগী খেন্নবা হন্থহন্নবা অমদি খুঙ্গঙগী মীয়ামগী পুন্সি ময়োল্লমশিংদা লৈবা মীওইশিংগুম্না লায়থোকহন্নবা হোৎনবনি হায়না প্রধান মন্ত্রীনা ফোঙদোকখি। মরম অদুনা খোঙহাম খুৎহাম্ফম, মৈ, ঈশিং, গ্যাস কনেক্সননচিংবা তঙাই ফদনা চঙদ্রবা য়াদ্রবা মচাকশিংসু প্রধান মন্ত্রি অৱাস য়োজনাগী মখাদা হাপচিল্লে। মসিগী পান্দমদি লায়রবা মীওই অমনা তঙাই ফদনা চঙদ্রবা য়াদ্রবা মচাকশিংগীদমক কোইচেন চেন্নদনবনি।
খুঙ্গঙগী মীয়ামগী পুন্সি মহিং ফগৎহনবদা পি.এম. স্বামিত্ব য়োজনানা চাউনা অহোংবা পুরক্লগনি হায়বা ৱাফম প্রধান মন্ত্রীনা থমখি। অদুগা য়ু.পি. অসি থৌরাংসিবু পায়খৎলিবা মাঙজিন থাবা স্তেতশিংগী মরক্তা অমনি। স্কিম অসিগী মখাদা খুঙ্গঙগী মীওইশিংনা মখোয়গী লম য়ুমগী মপু ওইবগী চে চাংশিংগা লোয়ননা ফংহনগনি। য়ু.পি.গী খুঙ্গঙ লিশিং কয়াদা সর্ভে তৌননবা দ্রোনশিং শীজিন্নদুনা মীয়ামগী লনথুমশিং লৈঙাক্কী মফমদা রেজিস্তর তৌদুনা লৈনবা অমদি লমগী চয়েৎনবা থোকহন্দনবা মেপ্পিং তৌরি। স্কিম অসিগী খ্বাইদগী চাউনা কান্নবা হায়রগদি খুঙ্গঙগী মীওইশিংনা মখোয়গী ময়ুম বন্ধান থমদুনা বেঙ্কতগী শেল পুবা য়ারগনি। মসিনা খুঙ্গঙগী লনথুমশিংগী মমল হেনগৎহল্লগনি। থবক অসি স্তেত অসিগী খুঙ্গঙ লিশিং ৮.৫ হেনবদা লোইশিল্লে অমদি মীয়াম্না সর্ভে লোইরবা মতুংদা লমদমদুদা ‘ঘরোনি’ হায়না কৌনবা দিজিতেল সর্তিফিকেত ফংলি। উত্তর প্রদেশতা অসিগুম্বা সর্তিফিকেত লিশিং ৫১গী মথক্তা য়েন্থোকখ্রে হায়না প্রধান মন্ত্রীনা পাউদমখি।
স্কিম কয়া অমা খুঙ্গঙশিংদা য়ৌবদগী খুদোংচাবা হেনগৎলকপদা নত্তনা খুঙ্গঙগী শেন্মিৎলোনগী খোঙজেলসু য়াঙ্খৎলক্লি হায়না প্রধান মন্ত্রীনা হায়খি। প্রধান মন্ত্রী গ্রাম সরক য়োজনাগী মখাদা শেমখিবা লম্বীশিংনা খুঙ্গঙগী মীওইশিংগী পুন্সিবু হেন্না নুংঙাইহল্লি হায়না মহাক্না ফোঙদোকখি। ওপ্তিকেল ফাইবর তিংদুনা খুঙ্গঙ লাখ ৬ হেনবদা অয়াঙবা ইন্তর্নেত ফংহন্নবা থবক লৌখৎলি হায়না মহাক্না হায়খি। প্রোজেক্ত অসিনা খুঙ্গঙগী মীওইশিংদা থবক পীবগী অহেনবা খুদোংচাবসু ফংহনগনি। কোরোনাগী মতমদা লংফৈদগী ময়ুমদা হন্নরকখিবা শিন্মীশিংদা ঙাক্লৌ পীননবা পায়খৎপা গরিব কল্য়ান রোজগার অভিয়ানগী খুত্থাঙদা মেন্দে করোর ১০গী থবক পীদুনা য়ু.পি.না খ্বাইদগী মকোক থংবদা লৈরি। মসিনা খুঙ্গঙগী মীওইশিংগী পুন্সি হিংবদা লায়হল্লি হায়না মহাক্না ফোঙদোকখি। মহাক্না অয়ুস্মান ভারত স্কিম, নেসনেল ন্যুত্রিসন মিসন, উজালা স্কিম্নচিংবা য়ু.পি.দা অনৌবা মশক অমা পীরিবা হিংবদা কোমহন্নবগী থৌরাং কয়াগী মতাঙদসু পনখি। মহাক্না এক্সপ্রেসৱেগুম্বা ইন্ফ্রাস্ত্রকচর প্রোজেক্তশিং অমসুং য়ু.পি.দা কম্মিসন তৌখিবা এইমসকুম্বা প্রোজেক্তশিংগী মতাঙদা পল্লদুনা মখোয়শিং অসিনা য়ু.পি.দা চাউখৎপগী লমজেল খোঙজেল য়াঙ্খৎহন্বদা মতেং ওইগনি হায়না ফোঙদোকখি। মরম অসিননি ঙসি য়ু.পি.দা অচৌবা কম্পেনী কয়ানা শেল থাদনবা লাক্লিবসি হায়না মহাক্না ফোঙদোকখি। লোকেল খুৎহৈবশিংদা কান্নবা পীরিবা ‘ৱন দিস্ত্রিক্ত ৱন প্রদক্ত’ থৌরাংগী খুত্থাঙদা কম্পেনী মচাশিং লিংখৎনবগী খুদোংচাবশিংসু পীরি হায়না মহাক্না মখা তাখি।
