Innovation, integrity and inclusion have emerged as key mantras in the field of management: PM
Focus is now on collaborative, innovative and transformative management, says PMTechnology management is as important as human management: PM Modiপ্রধান মন্ত্রী, শ্রী নরেন্দ্র মোদীনা ঙসি ভিদিও কনফরেন্সিংগী খুত্থাংদা আই.আই.এম. সম্বলপুরগী পর্মানেন্ত কেম্পসকী উরেপ উয়ুং তমখ্রে। ওরিশাগী রাজ্যপাল অমসুং মুখ্য মন্ত্রীনা কেন্দ্রগী মন্ত্রী শ্রী রমেশ পোখ্রিয়াল ‘নিশাঙ্ক’, শ্রী ধরমেন্দ্র প্রধান অমসুং শ্রী প্রতাপ চন্দ্র সারঙ্গীগা লোয়ননা থৌরম অদুদা শরুক য়াখি।
থৌরম অদুদা ৱা ঙাংবদা, প্রধান মন্ত্রীনা আই.আই.এম. সম্বলপুরগী পর্মানেন্ত কেম্পস অসিনা ওরিশাগী কলচর অমসুং রিসোর্সপু মশক তাকপদা নত্তনা মেনেজমেন্তকী মতাংদা ওরিশাবু মালেমগী থাক্তা মশক খঙহল্লগনি হায়না হায়খি। হন্দক্কী মতম খরা অসিদা মমাংদা মলতি-নেস্নেল কম্পেনীশিংনা ভারত্তা লাকপগী চৎনবী অদুগী ওন্ন-তৈনবদা ভারতকী মলতি নেস্নেল কম্পেনী কয়া লৈরকপগী চৎনবী অমা উবা ফঙলে হায়না মহাক্না হায়খি। তাইয়র ২ অমসুং ৩গী মনুং চনবা শহরশিংনা স্তার্ত-অপ কয়া থোক্লকপগী মওং উবা ফংলে অমসুং ভারতনা হন্দক্কী চরাংনরবা মতমশিং অসিদা ‘য়ুনিকোর্ন’ মশিং য়াম্বা, লৌউ-শিংউবগী সেক্তরদা খোঙজেল য়াঙনা শেমদোকপগী থৌওং কয়া পাংথোকপা উবা ফংলে। অসিগুম্বা ফিভম অসিদা, প্রধান মন্ত্রীনা মহৈরোইশিংনা মখোয়গী কেরিয়র অসিবু লৈবাক্কী অপাম্বগা চান্নহন্নবা ৱাফমসু থমখি। হৌজিক্কী অনৌবা দিকেদ অসিদা ব্রান্দ ইন্দিয়াবু মালেম শিনবা থুংনা মমিং চৎহনবা অসিগী মখোয়গী থৌদাংনি হায়না প্রধান মন্ত্রীনা মখা তানা হায়খি।
প্রধান মন্ত্রীনা লৈবাক অসিগী লোকেলনা মালেমগী থাক্তা কাখৎহন্নবা হোৎনবদা মহৈরোইশিংনা লৌগদবা থৌদাংশিংগী মতাংদা মহাক্না য়াম্না কুপ্পা ৱাফমসু থমখি। সম্বলপুরগী মফম অসিদা লৈরিবা লোকেলগী মতিকশিং অসি য়েংলদুনা মফম অসিদা তুরিজমগী থৌওং হেনগৎহন্নবা অনৌবা ৱাখল্লোন কয়া পুথোক্নবসু মহাক্না মহৈরোইশিংদা হায়খি। মতিক য়াম্না লৈবা লোকেলগী পোত্থোকশিং, হায়বদি লোকেলগী হেন্দিক্রাফ, তেক্সতাইল অমসুং ত্রাইবেলগী কলাগুম্বা পোত্থোকশিং অসিগী মতাংদা থবক কয়া মহৈরোইশিংনা পাংথোক্নবা ৱাফমসু থমখি। লমদম অসিদা মরাং কায়না ফংলিবা মীনরেল অমসুং অতোপ্পা রিসোর্সশিংবু নীংথিনা শেন্নবা থবক-থৌরম কয়া পাংথোক্নবসু হায়খি মরমদি হায়রিবশিং অসিনা আত্মানির্ভর ভারত কেম্পেন্দা তেংবাংগদৌরিবনি। লোকেলবু মালেমগী থাক্তা লৈহনবা অসিনা আত্মানির্ভরতা মিসন, লোকেলগী পোত্থোকশিং অমসুং মালেমগী মরক্তা খুৎশম্নবগী থৌওংশিংগী মরক্তা থোং ওইগদৌরিবা অসিনা মসিগী মতাংদা আই.আই.এম.গী মহৈরোইশিংনা লোকেলবু মালেমগী থাক্তা লৈহনলকপা ঙম্নবা অনৌবা মওংগী ৱারোইশিন কয়া পুরকপগী তঙাই ফদবা লৈ হায়না মহাক্না মখা তানা হায়খি। “নখোয়না অনৌবা থৌওংনা অপুনবা পুরকপা অমসুং মনুং চনবগী মন্ত্রগা লোয়ননা নখোয়গী মেনেজমেন্ত স্কিলশিং উৎকদবনি”, হায়না শ্রী মোদীনা হায়খি।
এদিতিব প্রিন্তিং, পোত্থোক পুথোকপগী থৌওং, লোজিস্তিক্স অমসুং সপ্লাই চেন শেন্নবগী থৌওংদা অহোংবা লৈরকহল্লিবা অনৌবা তেক্নোলোজীশিং অসিনা লৈহল্লক্লিবা অনৌবা মেনেজমেন্তকী শিংনবশিং অসিগী মতাংদা প্রধান মন্ত্রীনা ৱাফম কয়া থমখি। মসিনা তেক্নোলোজীশিং অসিনা দিজিতেল কন্নেক্তিবিতী অমসুং মফম অমা হেক্তদগী থবক তৌবা হায়বা ৱাখল্লোন অসিগা পুন্সিন্নদুনা মালেম অসিবু গ্লোবেল ভিলেজ ওইহল্লে। হৌখিবা থা খরা অসিদা ভারতনা খোঙজেল থুবা শেমদোকপগী থৌওং কয়া পায়খৎখ্রে অমসুং ওইরক্লিবা অহোংবশিং অসিগা মান্ননা চৎনবা হোৎনবতা নত্তনা মখোয়দগী হেন্দোক্না চৎনবা হোৎনখি হায়না প্রধান মন্ত্রীনা হায়খি।
থবক্কী মওং-মতৌশিংদা অহোংবা লাক্লিবা অসিনা মেনেজমেন্ত স্কিল্সকী দীমান্দশিংদা চৈথেং পীরে অমসুং তোপ-দাউন নত্ত্রগা তোপ-হেভী মেনেজমেন্ত স্কিল্সকী মহুৎসু খুৎশম্নবা, অনৌবা থৌওং পুথোকপা অমসুং শেমদোকপগী মেনেজমেন্তকী থৌওংনা শিল্লে হায়খি। বোৎস অমসুং অল্গোরিথম কয়া লৈরকপা অসিদগী তেক্নোলোজীকেল মেনেজমেন্ত অসিসু হ্যুমেন মেনেজমেন্তকা চপ মান্ননা মরু ওইরে।
কোবিদকী ইরাং অসিবু ভারত্তা অসুক য়াম্না চাউবা মওংদা অনৌবা থৌওং পাংথোকপা অমসুং খুৎশম্নদুনা মতৌ করম্না মাইয়োক্নখিগে হায়বগী মতাংদা মহৈরোইশিংনা থিজিন হুমজিন্নবা শ্রী মোদীনা মহৈরোইশিংদা হায়খি। অসিগুম্বা তেল্লবা মতম অসিদা কেপাসিতী অমসুং কেপেবিলিতীবু মতৌ করম্না পাকথোক-চাউথোকহনখিবগে হায়বগী মতাংদা নৈনবা হায়খি। লৈবাক অসিনা খুদোংচাদবা অমগী মতম খরগী ওইবা ৱারোইশিন পুথোকপগী থৌওং পাংথোকপা লেপ্তুনা অশাংবা মতমগী ৱারোইশিন পুরকপদা মিৎয়েং চঙলকপা অসিদা মহাক্না নুংঙাইবা ফোংদোকখি। অনৌবা থৌওং পাক্তক্ননা পাংথোকপা, থৌরাং য়াৎপা অমসুং মসিবু থবক ওইনা তসেংনা ওন্থোকপগী ৱাফম্বু শন্দোক্না তাক্নবগীদমক্তা মহাক্না জন ধন একাউন্ত অমসুং লৈবাক অসিদা এল.পি.জি. কন্নেক্সন পীবগী থৌওংনা ইং ২০১৪দা ৫৫% ওইরম্বদগী ঙসিনা ৯৮% ওইরিবা অসি মতৌ করম্না ওইরকপগে হায়বগী খুদম অমা ওইনা পীখি। “মেনেজমেন্ত হায়বা অসি অচৌবা কম্পেনীশিংবু শেন্নবা খক্তা নত্তে, তৌইগুম্বশিং মেনজেমেন্ত হায়বদি পুন্সিবু শেন্নবা হায়বনি”, হায়না প্রধান মন্ত্রীনা হায়খি।
প্রধান মন্ত্রীনা হায়খিবদা অফবা মেনেজর অমা ওইগে হায়রবদি লৈবাক অসিগী মাংদা তাদুনা লৈরিবা শিংনবশিং অসিবু নীংথিনা খঙবা অসি য়াম্না মরু ওইবনি হায়খি। মসিগীদমক্তা, অৱাংবা থাক্কী মহৈ-মশিংগী ইন্সতিত্যুসনশিং অসিনা মখোয়গী হৈ-শিংবা হীরম অদুদা খক্তা মিৎয়েং চঙদনা পাকথোক-চাউথোকপা মিৎয়েং অমা লৈবগী তঙাই ফদবা লৈ। নেস্নেল এজুকেসন পোলিসী অসিনা পাকথোক-চাউথোকপা, মলতি-দিসিপ্লিনরী অমসুং অপুনবা থৌওংগা লোয়না মতমগী মতুং ইন্না প্রোফেস্নেল এজুকেসনগী মরক্তা লৈরকখিবা অয়েৎপশিং লৌথোক্নবা থৌওংদা য়ুম্ফম ওইবনি হায়না প্রধান মন্ত্রীনা মখা তানা হায়খি।
