হৌখিবা থা ২দা তরুকশুবা ভন্দে ভারত লমথাখ্রে
“ঙসি রাজস্থান্না মাগী অহানবা ভন্দে ভারত এক্সপ্রেস ফংলে। মসিনা কন্নেক্তিবিতীদা চাউনা হেনগৎহল্লগনি অমসুং তুরিজমদা শাহৌ পীরগনি”“ভন্দে ভারতনা ‘ভারতনা অহানবা মতম চুপ্পদা অহানবা’ হায়বা ৱাখল্লোন মঙফাওনবা ঙমহল্লি”“ভন্দে ভারত ত্রেন অসি চাউখৎপা, মোদর্নিতী, তংদু লৈতাবা অমসুং মরোমদোম লেপচবা ঙম্বগা পাঙ্খক ওইরক্লি”“লাইবক থীবদি রেলৱেগুম্বা প্রজাশিংগী মরু ওইবা অমসুং তঙাই ফবা লম অসিবু রাজনিতী তৌফম ওন্থোকখি”“রাজস্থানগী রেলৱে বজেৎ অসি ২০১৪দা করোর ৭০০ ওইরম্বদগী চহি অসিদা করোর ৯৫০০ হেন্না ওইহন্দুনা ২০১৪দগী শরুক ১৪ হেনগৎহনখি”“ভারত গৌরব সির্কিৎ ত্রেনশিংনা লেপ্পা লৈতনা এক ভারত – শ্রেস্থ ভারতকী ৱাখল্লোন মপাঙ্গল কনখৎহল্লি”“রেলৱেগুম্বা কন্নেক্তিবিতীগী ইনফ্রাস্ত্রকচর মপাঙ্গল কল্লবা মতমদা লৈবাক্না মপাঙ্গল কল্লি। মসিনা লৈবাক্কী মীচম প্রজাদা কান্নবা পী, লৈবাক্কী লায়রবা অমদি মিদল ক্লাস্তা কান্নবা পী”প্রধান মন্ত্রী, শ্রী নরেন্দ্র মোদীনা ঙসি ভিদিও কনফরেন্সকী থোংদা অহানবা ভন্দে ভারত এক্সপ্রেস ত্রেন লমথাখ্রে।
থৌরম অদুদা ৱা ঙাংলদুনা প্রধান মন্ত্রীনা থৌনা ফরবা লমদম রাজস্থানবু জয়পুর দিল্লীগী মরক্তা চৎথোক-চৎশিন তৌবদা লায়হনবা খক্তা নত্তনা তীর্থরাজ পুস্কর অমসুং অজমের শরিফগুম্বা লাইফমশিংদা চৎপদা মতেং পাংদুনা রাজস্থানগী তুরিজম ইন্দস্ত্রীদা শাহৌ অমসু পীগদবা মাগী অহানবা ভন্দে ভারত ত্রেন ফংজবদা নুংঙাইবা ফোঙদোকখ্রে।
হৌখিবা থা অনিদা দিল্লী-জয়পুর ভন্দে ভারত এক্সপ্রেস য়াওনা লৈবাক অসিদা ভন্দে ভারত ত্রেন তরুক লমথাবগী খুদোংচাবা ফংখিবা অদু প্রধান মন্ত্রীনা নীংশিংখি অমসুং মুম্বাই-সোলাপুর ভন্দে ভারত এক্সপ্রেস, মুম্বাই-শিরিদি ভন্দে ভারত এক্সপ্রেস, রানী কমলাপতি-হজরৎ নিজাম্মুদিন ভন্দে ভারত এক্সপ্রেস, সিকন্দরাবাদ-তিরুপতি ভন্দে ভারত এক্সপ্রেস অমসুং চেন্নাই কোইম্বতুর ভন্দে ভারত এক্সপ্রেস অসি খুদম ওইনা পীখি। প্রধান মন্ত্রীনা হায়খি মসি হেক হৌদোকপদগী হৌনা ভন্দে ভারত এক্সপ্রেসতা প্রজা চাউরাক্না লাখ ৬০রোমনা মসিদা চৎথোক-চৎশিন তৌরি। প্রধান মন্ত্রীনা হায়খি, “ভন্দে ভারতকী খোঙজেল অসিনা মাগী মপুং ওইবা অখন্নবা মগুন ওইরি অমসুং মসিনা মীয়ামগী মতম মাংহন্দবা ঙম্লি”। স্তদী অমগী মতুং ইন্না ভন্দে ভারত এক্সপ্রেসতা চৎথোক-চৎশিন তৌবা মীওইশিংনা খোঙচৎ খুদিংদা পুং ২৫০০ কনবা ঙমখি হায়না প্রধান মন্ত্রীনা ফোঙদোকখি। মহাক্না হায়খি, ভন্দে ভারত এক্সপ্রেস অসি মেন্যুফেকচরিং স্কিল, সেফতী, খোঙজেল য়াংবা অমসুং ফজবা দিজাইন য়েংলগা দিবেলপ তৌখি। প্রজাশিংনা ভন্দে ভারত এক্সপ্রেসপু থাগৎনরক্লি হায়না নৌনা ফোঙদোক্লদুনা প্রধান মন্ত্রীনা হায়খি এক্সপ্রেস ত্রেন অসি ভারত্তা শাজবা অহানবা সেমি ওতোমেতিক ত্রেন ওইরি অমসুং মালেমগী অহানবা কম্পেক্ত অমসুং ইফিসিএন্ত ত্রেনশিংগী মনুংদা অমা ওইরি। শ্রী মোদীনা হায়খি, “ভন্দে ভারত অসি লমদম অসিদা শাজবা সেফতী কবচ সিস্তেমগা কম্পেতিবল ওইবা অহানবা ত্রেন ওইরি”। মহাক্না হায়খি মসি এক্সত্রা ইঞ্জিন য়াওদনা সহ্যাদ্রি ঘাত য়ৌবা ঙম্বা অহানবা ত্রেন ওইরি। মহাক্না হায়খি, “ভন্দে ভারত এক্সপ্রেসনা ‘ভারত হান্না মতম চুপ্পবদা অহানবা’ হায়বা ৱাখল্লোন মঙফাওনবা ঙমহল্লি”। প্রধান মন্ত্রীনা ভন্দে ভারত এক্সপ্রেসনা চাউখৎপা, মোদর্নিতী, তংদু লৈতাবা অমসুং ‘আত্মনির্ভর’গা পাঙ্খক ওইবদা নুংঙাইবা ফোঙদোকখি।
রেলৱেজগুম্বা মরু ওইবা অমসুং প্রজাশিংগী তঙাই ফদবা লম অসিবু রাজনিতী তৌফম ওন্থোক্লমখিবদা প্রধান মন্ত্রীনা নুংঙাইতবা ফোঙদোকখি। মহাক্না হায়খি নীংতম্বা মতমদা য়াম্না অচৌবা রেলৱে নেৎৱার্ক অমা ফজখি অদুবু রাজনিতীগী ওইবা কান্নবশিংনা নীংতম্বা ফংদ্রিঙৈগী চহিশিংদা মতমগা চুনবা ওইহনবগী মথৌ তাবা অদুবু নমথদুনা লাকখি। রেলৱে মন্ত্রী লৌবদা সেলেক্সন তৌবা, ত্রেনশিং লাউথোকপা অমসুং থবক তৌবদা ফাওবা রাজনিতী উবা ফংখি। রেলৱেজতা থবকশিং পীগনি হায়না থাজহন্দুনা লম লৌশিনবগী থবক চত্থরমখি অমসুং মতম শাংনা অনমেন ক্রোসিস কয়া লৈরমখি অমসুং লুনানবা অমদি সেফতীদা মীৎয়েং চংলমখিদে। ২০১৪গী মতুংদা মীয়াম্না মপুং ফাবা মেজোরিতীগা লোয়ননা তংদু লৈতাবা সরকার অমা খল্লবা মতমদা ফীভম অসিদা অওনবা অমা লাকখি, মহাক্না হায়খি, “রাজনিতীগী ওইবা প্রেসর হন্থখ্রবা মতমদা রেলৱেজনা নীংতম্বা ফংখি অমসুং অনৌবা পনখৈশিং য়ৌনবা চংশিনখি”।
প্রধান মন্ত্রীনা হায়খি কেন্দ্রদা লৈরিবা সরকারনা রাজস্থানবু অনৌবা খুদোংচাবশিংগী লমদম অমা ওইহন্নবা হোৎনরি। মহাক্না হায়খি কেন্দ্র সরকারনা কন্নেক্তিবিতীগীদমক অমুক্তা তৌখিদ্রিবা মওংদা থবক পাইখৎখি, মসি শেন্মীৎলোনগী মরু ওইবা শরুক তুরিজমনা ওইবা রাজস্থানগুম্বা রাজ্যগী ওইনদি য়াম্না মরু ওই। শ্রী মোদীনা হায়খি ফেব্রুৱারীদা দিল্লী মুম্বাই এক্সপ্রেসৱেগী দিল্লী দৌসা লালসোৎ সেক্সন কত্থোকখিবা অদু পনখি। সেক্সন অসিনা দৌসা, অলৱার, ভারতপুরম সাৱাই মধোপুর, তোঙ্ক, অমসুং কোতি জিলাশিংদা কান্নবা পীরগনি। প্রধান মন্ত্রীনা হায়খি কেন্দ্র সরকারনা রাজস্থানগী ঙমখৈগী মফমশিংদা কিমি ১৪০০ হেন্না শাংবা লম্বীদা অমসুং রাজ্য অসিদা প্রপোজ তৌখিবা কিমি ১০০০ হেন্না শাংবা লম্বীশিংদা থবক পাইখৎলি।
রাজস্থানগী কন্নেক্তিবিতীদা মরু ওইবা মীৎয়েং চংলিবা অসিগী মতাংদা প্রধান মন্ত্রীনা তরঙ্গা হিলদগী অম্বাজী ফাওবগী রেলে লাইন্দা থবক তৌবা হৌরে হায়না ফোঙদোকখি।মসিগী লাইন অসি চহিচা কয়া পন্দুনা লাক্লবা দিমান্দ অমনি অমসুং মসি হৌজিক্তি থুংহনবা ঙম্লি। মহাক্না উদয়পুর-অহমদাবাদ লাইনগী ব্রোদ গেজিং তৌবা লোইশিনখ্রে অমসুং রেলৱে নেৎৱার্ক্কী চাদা ৭৫ হেনবদি ইলেক্ত্রিফাইদ তৌখ্রে হায়না ফোঙদোকখি। শ্রী মোদীনা হায়খি রাজস্থানগী রেলৱে বজেৎ অসি ২০১৪দা করোর ৭০০ ওইরম্বদগী চহি অসিদা করোর ৯৫০০ হেন্না ওইহন্দুনা শরুক ১৪ হেনগৎহনখি হায়না ফোঙদোকখি। রেলৱে লাইনশিং দব্লিং তৌবগী খোঙজেল শরুক অনি হেনগৎহনখি। গেজ ওন্থোকপা অমসুং দব্লিং তৌবনা দুঙ্গরপুর, উদয়পুর, ছিত্তোরগর, পালি অমসুং সিরোহিগুম্বা ত্রাইবেলগী মফমশিংদা কান্নবা পীখি। স্তেসন কয়া অমৃত ভারত রেলৱে য়োজনাগী মখাদা অপগ্রেদ তৌরি হায়না মহাক্না মখা তাখি।
লমকোইবশিংগী খুদোংচানবা সরকারনা সর্কিৎ ত্রেন মখল কয়া চেলহল্লি হায়না প্রধান মন্ত্রীনা ফোঙদোকখি অমসুং খোঙচৎ ৭০ হেনবদা হৌজিক ফাওবগী ওইনা পেসেঞ্জর লিশিং ১৫ হেন্না পুখিবা ভারত গৌরব সর্কিৎ ত্রেনশিংগী খুদম পীখি। প্রধান মন্ত্রীনা হায়খি, “অয়োধ্যা-কাশী, দক্ষিন দর্শন, দ্বার্কা দর্শন, সিখ পিলগ্রিমেজ সাইৎশিং ওইরবসু ভারত গৌরব সর্কিৎ ত্রেনশিংনা মফম কয়াদা চেনখি”। তোংখিবা মীওইশিংদগী সোসিএল মেদিয়াদা ফংখিবা পোজিতিব ফীদবেক্কী মতাংদা প্রধান মন্ত্রীনা হায়খি ত্রেনশিং অসি লেপ্পা লৈতনা এক ভারত – শ্রেস্থ ভারতকী ৱাখল্লোন মপাঙ্গল কনখৎহল্লি।
প্রধান মন্ত্রীনা ৱান স্তেসন ৱান প্রোজেক্ত কেম্পেনগী মতাংদা পল্লদুনা হায়খি ইন্দিয়ন রেলৱেজনা চহি খরা অসিদা লৈবাক শিনবা থুংবদা রাজস্থানগী লোকেল প্রদক্তশিং য়ৌহন্নবা খোঙথাং অমগা লৌখৎখি। মহাক্না হায়খি ইন্দিয়ন রেলৱেজনা রাজস্থানগী জয়পুরগী ফৈজুপ, সঙ্গানেরি ব্লোক প্রিন্তকী মোমপাক ফীদক, গুলাপকী পোৎলমশিং অমসুং অতোপ্পা হেন্দিক্রাফশিং য়াওবা ৱান স্তেসন ৱান প্রদক্ত স্তোল ৭০রোম হাংখি অমসুং স্তোলশিং অসিদা য়োল্লি। মহাক্না হায়খি রাজস্থানগী অপীকপা আর্তিসেনশিং অমসুং হেন্দিক্রাফমেনশিংনা মার্কেৎ য়ৌনবা অনৌবা পাম্বৈ অমা ফংখি। ৱারোল পীবা লোইশিনবদা প্রধান মন্ত্রীনা হায়খি মসি চাউখৎ-থৌরাংদা মীপুম খুদিংমক্না শরুক য়াবগী খুদম অমনি। “রেলগুম্বা কন্নেক্তিবিতীগী ইনফ্রাস্ত্রকচরনা মপাঙ্গল কল্লবা মতমদা লৈবাক অদু মপাঙ্গল কল্লি। মসিনা লৈবাক্কী মীচম প্রজাশিংদা কান্নবা পীরি অমসুং লৈবাক্কী লায়রবা অমসুং মিদল ক্লাসতা কান্নবা পীরি” হায়না প্রধান মন্ত্রীনা ৱারোল পীবা লোইশিনখি অমসুং মোদর্ন ভন্দ ভারত ত্রেন্না রাজস্থানগী চাউখৎ-থৌরাং খোঙজেল য়াংশিনহনবদা মরু ওইবা থৌদাং লৌগনি হায়না থাজবা ফোঙদোকখি।
বেকগ্রাউন্দ
হৌদোকপগী ত্রেন অসি জয়পুর অমসুং দিল্লি কেন্ত রেলৱে স্তেসন অনিগী মরক্তা চেনগনি। এপ্রিল ১৩, ২০২৩দগী বন্দে ভারত এক্সপ্রেস চাং নাইনা অজমর অমসুং দিল্লি কেন্তকী মরক্তা চেনবা হৌগনি অমসুং জয়পুর, অলৱার অমসুং গুরগাউন্দা লেপকনি।
অনৌবা ভন্দে ভারত এক্সপ্রেস অসিনা দিল্লি কেন্ত অমসুং অজমরগী মরক্কী অরাপ্পা অসি পুং ৫:১৫দা চেনগনি। হায়রিবা রুত অসিদা হৌজিক খ্বাইদগী য়াংবা ত্রেন অমা ওইনা, শতাব্দী এক্সপ্রেসনা পুং ৬:১৫ চঙনা দিল্লি কেন্ততগী অজমর ফাওবা চেল্লি। দিল্লি কেন্ত অমসুং অজমের শম্ননবা ত্রেন অসি চপ মান্নবা লম্বেলদা চেল্লিবা শতাব্দী এক্সপ্রেসকা চাংদম্নবদা অনৌবা ভন্দে ভারত এক্সপ্রেসনা মিনিত ৬০ য়াংখৎকনি।
অজমের-দিল্লি কেন্ত ভন্দে ভারত এক্সপ্রেস অসি হায় রাইজ ওভরহেদ ইলেক্ত্রিক(ও ঐচ ই) তেরিতোরিদা চেনবা মালেমগী অহানবা সেমি হায় স্পিৎ পেসেঞ্জর ত্রেন ওইরগনি। ত্রেন অসিনা রাজস্থানগী মরুওইবা লমকোয়ফমশিং হায়বদি পুস্কার, অজমের, অজের শরিফ দার্গহ য়ৌবগী খুদোংচাবা হেনগৎহল্লগনি। চৎথোক-চৎশিনগী খুদোংচাবা হেনগৎলকপা অসিনা লমদম অসিগী শেন-থুমগী ফিবমশু ফগৎলগনি।
