সিভিল সর্বিস নুমীৎনা লাকপদা প্রধান মন্ত্রী শ্রী নরেন্দ্র মোদীনা ঙসি সিভিল সর্বেন্তশিংগী মফমদা ৱা ঙাংখ্রে। থৌরম অসি এপ্রিসিয়েসন, ইভালুএসন অমসুং ইন্ত্রোস্পেক্সন অমনি হায়না মহাক্না হায়খি। প্রধান মন্ত্রীগী মনা অসি সিভিল সার্বেন্তশিংবু পুক্নিং থৌগৎপগী মায়কৈদা খোংথাং অমগুম মহাক্না সুগাইনা ফোংদোকখি অমসুং মনা ফংলবশিং অদুগী মফমদা নুংঙাইবা ফোংদোকখি। মনাশিং অসিনা সরকারগী প্রায়োরিতিশিং অদুসু থিন্দুনা তাক্লি হায়না মহাক্না হায়খি।
প্রধান মন্ত্রী ফসল বিমা য়োজনা, দীন দয়াল উপধ্যায় কৌশল য়োজনা, প্রধান মন্ত্রী অৱাস য়োজনা, অমসুং দিজিতেল পেমেন্তশিংগুম্বা মাংজিল থারিবা প্রোগ্রামশিং অসি ন্যু ইন্দিয়াগীদমক মরুওইবা প্রোগ্রামশিংনি হায়না প্রধান মন্ত্রীনা হায়খি।
প্রধান মন্ত্রীগী মনাশিং অমসুং শোত্থরিবা জিলাশিংগী ইনিসিয়েতিবশিংদা ঙসি ফোংখিবা লাইরিক অনি অদুসু মহাক্না পন্দুনা ঙাংখি।
শোত্থরিবা জিলাশিংগী হিরমদা ঙাংলদুনা প্রধান মন্ত্রীনা হায়খি মদুদি মসিগী জিলা ১১৫ অসিনা মখোয়গী রাজ্য অপুম্বগী গ্রোথ ইঞ্জিন ওইরগনি। চাউখৎ থৌরাংদা প্রজাশিংনা শরুক য়াবগী মরুওইবা অদুদা মহাক্না অকনবা ৱাফম থমখি। নিং-খা তম্বগী ৭৫সুবা চহি পালন, ২০২২ অসিনা ঐখোয়গী ফ্রীদম ফাইতরশিং অদুগী মংলানশিং অদু মংফাওহন্নবা থবক পায়খৎপদা পুক্নিং থৌগৎপা য়াই হায়না মহাক্না ফোংদোকখি।
স্পেস তেক্নোলোজি য়াওনা লৈরিবা তেক্নোলোজি পুম্নমক গবর্নান্স ফগৎহন্নবগীদমক শিজিন্নগদবনি হায়না প্রধান মন্ত্রীনা অকনবা ৱাফম থমখি।
মালেম পুম্বদা লৈরিবা তেক্নোলোজিশিংগা লোয়ননা চৎমিন্নবা অদু সিভিল সার্বেন্তশিংগীদমক মরু ওই হায়না মহাক্না হায়খি।
