এন.সি.সি.না ভারতকী খুন্নাইগী ওইবা পুন্সিদা থকশি-খাসিগী ৱাখল্লোন লৈহনবগী মরু ওইবা থৌদাং য়ারিঃ প্রধান মন্ত্রী
ভারতনা দিফেন্সকী খুৎলায়গী কৈথেল অমা ওইবগী মহুত্তা খুৎলাই পুথোকপা মরু ওইবা লৈবাক অমা ওইনা ওইরক্লগনিঃ প্রধান মন্ত্রীআর্মী, এয়র ফোর্স অমসুং নেভীনা ঙমখৈ অমসুং সমুদ্র মপানগী মফমশিংদা থবক তৌনবা কেদেৎ লাখ ১দা ত্রেনিং পীরি, মসিগী অপুনবগী অহুম থোকপগী অমদি নুপীমচা কেদেৎনিঃ প্রধান মন্ত্রীপ্রধান মন্ত্রী, শ্রী নরেন্দ্র মোদীনা ঙসি নই-দিল্লীগী করিয়প্পা লম্পাক্তা পাংথোকপা নেস্নেল কেদেৎ কোর (এন.সি.সি.)গী রেল্লী অমদা ৱা ঙাংখ্রে। কেন্দ্রগী ঙাক-শেল মন্ত্রী, দিফেন্স স্তাফকী চীফ অমসুং অর্ম্দ সর্ভিস অহুমগী মকোকশিংনা থৌরম অসিদা শরুক য়াখি। প্রধান মন্ত্রীনা গার্দ ওফ হোনরবু য়েংশিনখি অমসুং এন.সি.সি.গী কন্তিঞ্জেন্তশিংনা মার্চ পাস্ত চৎপবুসু য়েংশিন্দুনা থৌরমগী মনুংদা পাংথোকপা নাৎকী কুমহৈশিংসু মিৎয়েং তাখি।
থৌরম অসিদা ৱা ঙাংবদা, প্রধান মন্ত্রীনা খুন্নাইগী পুন্সিরোলদা থকশি-খাসি লৈবা লৈবাক অমনা হীরম খুদিংদা নীংথিবা ওইগনি হায়খি। মহাক্না হায়খিবদা ভারতকী খুন্নাইগী পুন্সিদা থকশি-খাসিগী ৱাখল্লোন লৈহনবদা এন.সি.সি.না অচৌবা থৌদাং য়ারি হায়খি। এন.সি.সি.না খ্বাইদগী অহুমশুবা চাউবা য়ুনিফোর্ম শেৎপা লুপ অমা ওইদুনা মীয়াম্না ইকায় খুম্নবা নোংম-নোংমগী হেনগৎলক্লি হায়খি। এন.সি.সি.গী কেদেৎশিংনা মফম খুদিংমক্তা লৈদুনা ভারতকী থৌনা ফবা অমসুং মথৌ নীংথিনা পাংথোকপগী চৎনবীবু খুমাং চাউশিনহল্লি অমসুং ঐখোয়গী সংবিধানগী ফজবশিংবু মীয়ামদা খঙহল্লি। মসিগা মান্নবা অমা ওইনা, অকোয়বা অমসুং ঈশিং য়োকশিনবগী মরী লৈনবা প্রোজেক্তশিংদসু এন.সি.সি.না শরুক য়ারি। প্রধান মন্ত্রীনা এন.সি.সি.না কোরোনাগুম্বা অৱা-অনা তাবগী ইরাং মনুংদা তেংবাংবগীদমক্তা মখোয়বু থাগৎপা ফোংদোকখি।
ঐখোয়গী সংবিধান্দা পল্লিবা থৌদাংশিং অসিবু পাংথোকপা অসি লৈবাক মীয়াম খুদিংগী তৌফম থোকপা মথৌনি হায়না প্রধান মন্ত্রীনা ফোংদোকখি। মসিগী থৌদাংশিং অসিবু মীয়াম্না অমসুং মীয়ামগী লুপশিংনা ইন্দুনা চৎলকপা মতমদা খুদোংচাবা খুদিংবু মাই-পাকপনা মাইয়োক্নবা ঙমগনি হায়খি। শ্রী মোদীনা মীয়ামগী ৱাখল্লোন্দা মশাগী থৌদাং খঙজবা অমসুং সেক্যুরিতী ফোর্সশিংগী মরক্তা থৌনা ফবগী মতৌগী অপুনবা অসিনা লৈবাক্কী চাউরবা শরুক অমদা অয়েৎপা পীরম্বা নাক্সাল অমসুং মাওগী থৌওংশিংগী য়াংলেন শরু থুদেকপা ঙমখ্রিবনি হায়খি। হৌজিক্তি, নাক্সালিজম্না অয়েৎপা পীরম্বগী থৌওংশিং অসি লৈবাক্কী অকক্নবা অপিকপা মফম অমদগী হেন্দ্রে অমসুং মসিনা শোকহল্লম্বা নহাশিংসু খৎন-চৈনবগী লম্বী থাদোক্তুনা মীয়াম মরক্তা তিন্দুনা চাউখৎপগী লমজেলদা য়াওনখ্রে।
প্রধান মন্ত্রীনা কোরোনাগী মতম অসি য়াম্না শিংননীংঙাই ওইখি, অদুবু মসিনা লৈবাক অসিদা মহৌশাগা মান্নদবা থবক কয়া পাংথোকপগী খুদোংচাবা কয়া পুরকখিদুনা লৈবাক্কী তৌবা-ঙম্বগী মতিকপু হেন্না ফগৎহন্দুনা মরোমদোম লেপচবা ঙমহনখি অমসুং পংলৈদা লৈরম্বদগী খ্বাইদগী ফবা ওইবসু ঙমখি। মসিগী মরক অসিদা নহাশিংগী অচৌবা থৌদাং য়াওখি হায়না প্রধান মন্ত্রীনা হায়খি।
প্রধান মন্ত্রীনা এন.সি.সি.গী ঙমখৈ অমসুং সমুদ্র তোর্বানগী মফমশিংদা পাক-থোক চাউথোকপগী থৌরাংশিংবু মীয়ামদা তমখি অমসুং অসিগুম্বা জিলা ১৭৫দা এন.সি.সি.না অনৌবা থৌদাং লৌগদবগী মতাংদা ওগস্ত ১৫দা লাউথোকখিবা অদুবুসু নীংশিংখি। আর্মী, এয়র ফোর্স অমসুং নেভীনা ঙমখৈ অমসুং সমুদ্র মপানগী মফমশিংদা থবক তৌনবা কেদেৎ লাখ ১দা ত্রেনিং পীরি, মসিগী অপুনবগী অহুম থোকপগী অমদি নুপীমচা কেদেৎনি হায়না প্রধান মন্ত্রীনা পাউদমখি। এন.সি.সি.গী ত্রেনিং ইনফ্রাস্ত্রকচরসু মপাঙ্গল হেনগৎহল্লে। নোংমৈ কাপ্পগী সাইমুলেতর অমখক লৈরম্বা অদুদগী হেনগত্তুনা হৌজিক্তি ৯৮ লৈরে। মাইক্রো-ফ্লাইৎ সাইমুলেতরগী মশিংসু ৫দগী ৪৪দা হেনগৎখ্রে অমসুং হি-হোনবগী সাইমুলেতর মশিংনা ১১দগী ৬০ য়ৌখ্রে।
প্রধান মন্ত্রীনা ফিল্দ মার্শেল, করিয়প্পাগী মফমদা মহাক্কী মপোক নুমিৎ অসিদা ইকায় খুম্নবা উৎলদুনা মসিগী থৌরম পাংথোকফম অসিসু মহাক্কী মমিং লৌদুনা থোনবনি হায়খি। আর্ম্দ ফোর্সশিংদসু নুপী কেদেৎশিংগী অনৌবা খুদোংচাবা কয়া লৈরক্লি হায়না মহাক্না হায়খি। ইকুই কুইদবগী হৌখিবা মতম খরদসু, এন.সি.সি.গী মরক্তা নুপী কেদেৎকী মশিংসু ৩৫%গী চাংদা হেনগৎলে হায়বগী পেঞ্জবগা লোয়ননা মহাক্না পাউদমখি। প্রধান মন্ত্রীনা ইং ১৯৭১গী বঙ্গলাদেশকী লান্দা মাই পাকখিবগী চহি ৫০ শুরকপা অসিদা আর্ম্দ ফোর্সকী মফমদা ইকায় খুম্নবা উৎখি। প্রধান মন্ত্রীনা কেদেৎশিংনা নেস্নেল ৱার ম্যুজিয়মদা চত্তুনা নৌনা মওং শেমদোক্লবা গেল্লেন্তরী এৱার্দ পোর্তেলগসু মরী লৈনজনবা হায়খি। এন.সি.সি.গী দিজিতেল প্লেৎফোর্ম অসিসু ৱাখল্লোন লান্নবগী প্লেৎফোর্ম অমা ওইনা অথুবা মতম অসিদা ওইরক্লি হায়না মহাক্না ফোংদোকখি।
চহি কয়া ফারকপগী থৌদোকশিংগী মতাংদা ৱাফম ফোংদোকপা ওইনা, প্রধান মন্ত্রীনা হন্দক্কী চহি অসিদা ভারতনা নিং-তম্বা ফংবগী ৭৫শুবা চহিদা চঙলকপা, নেতাজী সুভাস চন্দ্র বোসকী ১২৫শুবা মপোক কুমওন তারকপগী মতাংশিং অসিবু পনখি। মহাক্না এন.সি.সি.গী কেদেৎশিংনা নেতাজীগী শীংথানিংঙাই ওইরবা খুদমশিংদগী ইথিল লৌনবা হায়খি। শ্রী মোদীনা কেদেৎশিংনা ভারতকী নিং-তম্বগী চহি ১০০ ফারকপগী মথংগী চহি ২৫-২৬ অসিগী মতাংদা নীংথিনা খঙদুনা লৈনবসু হায়খি।
প্রধান মন্ত্রীনা ভারতনা ভাইরস অসিবু অমসুং লৈবাক্কী ঙাক-শেনবগী হীরমগা মরী লৈনবা শিংনবশিংবু থেংনবা ঙম্বগী মতিক্কী মতাংদা কুপ্না পাউদমখি। লৈবাক অসিদা মালেমগী লানগী খ্বাইদগী ফবা মেছিনশিংগী মরক্তা চনবা মেছিন অমা লৈ হায়নসু হায়খি। য়ু.এ.ই., সাউদি অরাবীয়া অমসুং গ্রীসকী তেংবাংগা লোয়ননা হন্দক্তা অনৌবা রাফাএল এয়রক্রাফপু নোংথক্তা থাউ হানখিবগী থৌদোক অদুনা গল্ফকী লৈবাকশিংগা লৈনরিবা ফজরবা মরীগী শক্তম উৎলি হায়খি। মসিগা মান্নবা অমা ওইনা, ভারতনা দিফেন্সকা মরী লৈনবা খুৎলায় মখল ১০০ হেন্না শানবা ৱারেপসু লৌখ্রে। মসিগী থৌওং অমসুং এয়রফোর্সনা তেজাস ফাইতর প্লেন ৮০গী ওর্দর পীখিবা, আর্তিফিসিএল ইন্তেল্লিজেন্সকা মরী লৈনবা লাল্লোন্দা মিৎয়েং চঙলিবা অসিনা ভারতপু দিফেন্সকী খুৎলাইগী কৈথেলগী মহুত্তা পোত্থোক পুথোকপা মরু ওইবা লৈবাক অমা ওইহনবা ঙম্লগনি।
প্রধান মন্ত্রীনা কেদেৎশিংনা ভোকেল ফোর লোকেলদা তেংবাংনবসু হায়খি। খাদিবু নহাশিংগী পাম্নবা ব্রান্দ ওইহনবা অমসুং ফেশন, লুহোংবা, কুমহৈ অমসুং অতোপ্পা লমশিংদা লমশিংদা লোকেলগী পোত্থোক্তা মিৎয়েং চঙবগী মতাংদসু মহাক্না পনখি। মশাদা থাজবা লৈবা নহাশিং অসি মরোমদোম লেপচবা ঙম্বা ভারতকীদি য়াম্না মরু ওইবনি হায়খি। মসিগীদমক্তা, সরকারনা হকশেল ফনা লৈবা, এজুকেসন অমসুং স্কিলগী হীরমদা থবক কয়া অমা পাংথোক্লি। অতল তিঙ্করিং লেবতগী মতমগা চানবা এজুকেসনগী ইন্সতিত্যুৎ অমসুং স্কিল ইন্দিয়া অমদি মুদ্রা স্কিম ফাওবগী মরক্তা অনৌবা অহোংবা অমসুং চাউখৎপা কয়া অমা উবা ফংলে। হকশেল ফনা লৈবা অমসুং শান-খোৎনবা অসিসু এন.সি.সি.গী অখন্নবা প্রোগ্রামশিং য়াওনা ফিৎ ইন্দিয়া অমসুং খেলো ইন্দিয়া ইহৌগী খুত্থাংদা হান্না অমুক্তা তোঔখিদ্রিবা মওংদা খুমাং চাউইশিনহল্লি হায়না প্রধান মন্ত্রীনা হায়খি। অনৌবা নেস্নেল এজুকেসন পোলিসী অসিনা এজুকেসনগী অপুনবা পথাপ অসিবু মহৈরোইশিংগী তঙাই ফদবগী মতুং ইন্না মখোয়গী অপাম্বা সবজেক্ত খনবা য়াবগী খুদোংচাবা লৈহন্দুনা মহৈরোয়দা অহেনবা মিৎয়েং চঙবা থৌওং ওইহন্নবা হোৎনরি হায়না প্রধান মন্ত্রীনা হায়খি। শেমদোকপগী থৌওংশিং অসিনা পীরিবা কান্নবশিং অসিগী খুদোংচাবা কয়া অসি নহাশিংনা লৌরকপা মতমদা লৈবাক অসি চাউখৎকদবনি হায়না প্রধান মন্ত্রীনা হায়খি।
