PM Modi addresses Shree Kutchi Leva Patel Samaj in Nairobi via VC in Nairobi
প্রধান মন্ত্রী শ্রী নরেন্দ্র মোদীনা কেনিয়াগী নাইরোবীদা পাংথোকপা শ্রী কৎছী লেবা পতেল সমাজগী সিলভর জুব্লী থৌরমদা ঙসি ভিদিও কনফরেন্সকী খুত্থাংদা ৱা ঙাংখ্রে। মহাক্কী রারোলদা, প্রধান মন্ত্রীনা ইস্ত আফ্রীকাগী তোঙান তোঙানবা চাওখৎ থৌরমশিংদা কৎছী লেবা পতেল কম্যুনিতীনা লৌখিবা থৌদাংশিং অদু থাগৎপা ফোংদোকখি। কেনিয়াগী নিংতম ইহৌদা ইন্দিয়ন কম্যুনিতীগী মেম্বরশিংগী থৌদাং অদুবুশু মহাক্না নৌহৌনা নীংশিংখি। কৎছী সমাজনা মখল খুদিংগী চাওখৎ থৌরমদা অখন্ননা ২০০১দা কৎছদা থোকখিবা য়ুহা হাবা মতুংগী শেমজিন-শাজিনবা অমসুং নৌনা খুন্দা লৈতাহনবদা মখোয়না লৌখিবা থৌদাং অদুদা প্রধান মন্ত্রীনা থাগৎপা ফোংদোকখি। মতম অমদা মরুভুমী ওইরম্বা কৎছবু মকোকথোংবা লমকোয়বশিংগী মফম অমা ওইহল্লে হায়না প্রধান মন্ত্রীনা ফোংদোকখি।
মহাক্না গুজরাতকী মুখ্য মন্ত্রী ওইরিঙৈ মতমদা কৎছ রিজনগী মফম কয়াদা নর্মদাগী ইশিং ফংহন্নবা সরকারনা হোৎনখিবশিং অদু প্রধান মন্ত্রীনা ফোংদোকখি। রিজন অসিদা দিবেলপমেন্ত এক্তিবিতীশিং পায়খৎপদা কেন্দ্র অমসুং রাজ্য সরকারগী ওইবা ইঞ্জিন অনিগী মপাঙ্গল অদু প্রধান মন্ত্রীনা ফোংদোকখি। রিজন অসিনা হৌখিবা চহি খরা অসিদা লুপা কোতি লিশিং কয়াগী ইনভেস্তমেন্ত ফংখ্রে হায়না মহাক্না হায়খি। ভারত অমসুং আফ্রিকান লৈবাকশিংগী এঙ্গেজমেন্ত হেঙ্গৎলক্লে হায়না প্রধান মন্ত্রীনা অকনবা ৱাফম থমখি। ইন্দিয়া আফ্রিকা সম্মিৎ অমসুং আফ্রিকান দিবেলপমেন্ত বেঙ্ককী মীফম অমা হন্দক্তা ভারত্তা পাংথোকখি হায়না মহাক্না ফোংদোকখি। হৌজিক লৈরিবা সরকার অসিগী মতমগী মনুংদা রাষ্ট্রপতি, উপ রাষ্ট্রপতি অমসুং মহাক মশামক্না প্রধান মন্ত্রী অমা ওইনা তোঙান তোঙানবা আফ্রিকাগী লৈবাক কয়াদা থৌরম ২০ হেনবদা শরুক য়াখ্রে হায়না মহাক্না ফোংদোকখি। তিল্লিবা মীয়াম্বু অখন্ননা ভারত্তা লাকখিদ্রিবা মীওইশিংবু ইং ২০১৯গী জনুৱারীদা পাংথোক্কদৌরিবা কুম্ভ মেলাদা শরুক য়াদুনা ভারতকী কলচরেল অমসুং স্পিরিচুয়েল ত্রেদিসনগী এক্সপেরিয়েন্সকীদমকশু প্রধান মন্ত্রীনা বার্তন তৌখি। নাইরোবী-ৱেস্ত কমপ্লেক্সতা পাংথোকপা শ্রী কৎছী লেবা পতেল সমাজগী সিলভর জুব্লী থৌরমদা শরুক য়ারিবা পুম্নমকপু প্রধান মন্ত্রী শ্রী নরেন্দ্র মোদীনা হরাও-তয়াম্বা ফোংদোকখি।
