রামকৃষ্ণ মথকী প্রসিদেন্ত শ্রীমান স্বামী সুবিরানন্দ জী মহারাজ, স্বামী দিব্যানন্দ জী মহারাজ, মফম অসিদা তিনবীরিবা ইকায়খু্ম্নজরিবশিং, অথোইবা মীথুংলেনশিং, ঐহাক্কী নহারোল মরূপশিং।
ময়াম পুম্নমকপু স্বামী বিবেকানন্দ জয়েন্তিগী অসিগুম্লবা শেংলবা তঞ্জা অসিদা, নেস্নেল য়ুথ দে অসিদা, হন্না-হন্না য়াইফ পাউজেল পীজরি।
লৈবাক মীয়ামগীদমক বেলুর মথকী শেংলবা মফম অসিদা লাকপা অসি তির্থয়াত্র অমদগী তারোই, অদুবু ঐহাক্কীদমক্তদি মসি মতম পুম্নমক্তা য়ুমদা লাকপগুম্বনি। ঐহাকপু ঙরাং নুমিদাং মফম অসিদা লৈবা য়াহনবিবগীদমক ঐহাক্না প্রসিদেন্ত স্বামী, মফম অসিদা লৈবিরিবা এদমিনিস্ত্রেতিবশিংগী লমন তোনশিঞ্জরে অদুগা সরকারগীসু লমন তোনশিঞ্জরে মরমদি সরকারগী প্রোতোকোল, সেক্যুরিতীনসু য়াদে। অদুবু ঐহাক্না হায়জববু সিস্তেম পায়রিবশিংনসু য়াবিরে। ঐহাক শেংলবা মফম অসিদা অহিং লেকপগী লাইবক ফবা অদু ফংজরে। মফম অসিদা, মফম অসিগী ঈশিং নুংশিৎতা স্বামী রাম কৃষ্ণ পারমহম্স, ইমা সার্দা দেবী, স্বামী ব্রহ্মানন্দ অমসুং স্বামী বিবেকানন্দ য়াওনা গুরু পুম্নমক্কী আইদেন্তিতী মফম অসিগা ফাওগনি।
মমাংদা মফম অসিদা লাকখিবা মতম অদুদা স্বামী অত্মস্থানন্দজীগী থৌজাল লৌরগা চৎচখি। অদুগা ঐহাক্না হায়জবা ঙমজরি মদুদি মহাক্না ঐহাকপু খুৎশা পায়রদুনা মীয়ামগী সেবা তৌবা অসিমক ইশ্বরগী সেবা তৌবনি হায়না লম্বী তাকপীখি। ঙসিদি মহাক মশা ওইনা শরুক য়াদ্রবসু মহাক্কী থবক, মহাক্কী লম্বী অদুনা মতম পুম্নমক্তা ঐখোয়গীদমক লম্বী তাক্লগনি।
মফম অসিদা লৈরিবা নহা ওইরিবা ব্রহ্মচারিশিংগী মরক্তা মীকুপ খরা লেন্নবা খুদোংচাবা অমা ফংজখি। ঐখোয় অয়াম্বদি মফম অসিদা বিবেকানন্দগী ৱাখল্লোন, বিবেকানন্দগী খোংজেল অমসুং বিবেকানন্দগী পর্সোনেলিতীনা মরম ওইদুনা চিংদুনা পুবিরক্লি। অদুবু মফম অসিদা লাক্লবা মতুংদা ইমা অন্না শার্দা দেবীগী অঞ্চলনা ঐখোয়দা মফম অসিদা লৈথনবা মমাগী নুংশিংবা অমা পীরি।
মরূপশিং,
স্বামী বিবেকানন্দ লৈবা অসি মীওই অমা খক্তা লৈবা নত্তে, মহাক্তি পুন্সীগী ইচেল অমগী, পুন্সীগী মওং মতৌগী মমিংগুম্বনি। মহাক্না দরিদ্রনরায়নগী সেবা অমসুং ভারত ভক্তি খক্তবু মহাক্কী পুন্সীগী পুম্নমক্নি অমসুং অরোইবনি হায়না লৌখি, হিংবসু হিংখি অমসুং হিংনবগীদমক ঙসিসু মীওই কোতি কয়াদা লম্বীসু উৎপীরি।
ময়াম পুম্নমক, লৈবাক অসিগী নহারোল পুম্নমক, ঐহাক্না থাজবগা লোয়ননা হায়জরি। খংনা নত্রগা খংদনা, লৈবাক অসিগী নহা খুদিংমক অসি বিবেকানন্দগী রিজোল্বকী সরুকশিংনি। মতম অসি অহোংবা লাক্লে, চহী তরাগী খুজিং অসি অহোংবা লাক্লে, চহী চা অসি অহোংবা লাক্লে, অদুবু স্বিমিজীগা রিজোল্বনা নহাশিংবু পুক্নিং থৌগৎলি অমসুং মীকপ থোকহল্লি। মহাক্না হোৎনরম্বা অসিনা লাক্কদৌরিবা জেনরেসনশিং মখা তানা পুক্নিং থৌগৎলগনি।
ঐখোয়না কয়ারক হন্না খনবা হৌরকই মদুদি ঐ ইথন্তা তৌরগা করি কান্নগদৌরিবনো। কনানসু ঐগী ৱা তাদে। ঐনা পাম্লিবা, ঐনা খল্লিবা অসিদা কনানসু পুক্নিং চংদে। ফিভম অসিদগী নহারোলশিংগী ৱাখল অদু মপান্দা পুথোরকপা য়াম্না দরকার ওই। অদুগা ঐহাক্তি মন্ত্র হেক্তা হায়রিবা অদুনি। মতম অমদা ঐহাক্না গুরুশিংদগী তমজখিবনি। ঐখোয় কৈদৌনুংদা ইথন্তা লৈতে। কৈদৌনুংদা ইথন্তা লৈতে। ঐখোয়গা লোয়ননা ঐখোয়নদি উবা ফংদবা ইশ্বর লৈরি। ঐখোয় কৈদৌনুংদা ইথন্তা লৈতে। ঐখোয়গী ইশ্বরনা মতম পুম্নমক্তা ঐখোয়গী নাক্তা লৈরি।
স্বামী জীনা হায়বিরম্বা ৱাফম অদু ঐখোয়না মতম পুম্নমক্তা নিংশিংবা তাই। মহাক্না হায়বিরম্মি মদুদি “করিগুম্বা ঐহাক্না ইনর্জেতিক ওইবা নহারোল চামা ফংলগদি ঐহাক্না ভারত অসি অহোংবা পুরক্কনি।” স্বামী জীনা মী চামা ফংলগদি ঐহাক অদু ওইরনি হায়বীরমদে… অসুম্না হায়বীরমদে, ভারত অহোংবা লাক্লগনি হায়বীরমদে। হায়বদি অহোংবা পুরক্নবগীদমক ঐখোয়গী ইনর্জী, করিগুম্বা খরা তৌনিংবগী অপাম্বা য়াম্না দরকার ওই।
স্বামীজীদি মীখা পোল্লিবা অমম্বা মতম অদুদা অদুগুম্বা নহারোল মরূপ ১০০ থিবীরম্বনি। অদুবু ২১শুবা চহী চা অসিবু ভারতকী চহী চা ওইহন্নবগীদম, অনৌবা ভারত শেমগৎনবগীদমক্তি ইনর্জেতিক ওইরবা নহারোল কোতি কয়া হিন্দুস্তানগী কাচি কোয়া থুদিংদা লেপ্লি। মালেমগী নহা খ্বাইদগী য়াম্না লৈবা লন অদুদি ভারতকী নাক্তা লৈরি।
মরূপশিং,
২১শুবা চহী চাগী ভারতকী অসিগুম্লবা লৈবাক অসিগী নহারোলশিংদগী খক্তা নত্তনা লৈবাক অসিগী নহারোলশিংদগী ভারত খক্তা নত্তনা মালেম পুম্বনা আশা চাউনা তৌরি। ময়াম পুম্নমক খংবীরিবা অদুনি লৈবাক অসিনা ২১শুবা চহীচাগীদমক, অনৌবা ভারত শেমগৎনবগীদমক অচৌবা সংকল্প পুরদুনা খোং থাংজিল্লি। সংকল্প অসি সরকার খক্তগী নত্তে, সংকল্প অসি লৈবাক অসিগী প্রজা কোতি ১৩০গীনি, লৈবাক অসিগী নহারোলশিংগীনি।
হৌখিবা চহী ৫গী এক্সপরিয়েন্সনা খংবা ঙম্লে মদুদি লৈবাক অসিগী নহাশিংগা শম্নবগী কেম্পেন অসি শোইদনা মায় পাক্কনি। মহাক্না হায়খি মদুদি মহী ৫গী মমাংদা ভারত অসি লু-নানবা ঙমগদ্র নত্রগা ঙমলোইদ্র হায়না নিংবা কায়বা অমা লৈরম্মি। অদুবু লৈবাক অসিগী নহাশিংনা থৌদাং লৌখি অমসুং মীৎয়েং অদু হোংদোকখি।
চহী ৪-৫গী মমাং ফাওবদা ভারত্তা দিজিতেল পেমেন্ত অসি অসুক য়াম্না শন্দোকখিনি হায়বা মীওই কয়া অমনা থাজখিদে। অদুবু ঙসিদি ভারত মালেমগী খোংজেল য়াংনা চংশিল্লক্লিবা দিজিতেল ইকোনোমীদা খুৎচেৎ পায়না লেপ্লি।
শেঞ্জা থুমজাগী মায়োক্তা চহী খরগী মমাং ফাওবা মতৌ করম্না লৈবাক অসিগী নহাশিং লম্বী-সরক্তা লৈরম্বগে হায়বা অদুসু ঐখোয়না উখ্রে। মতম অদুদি লৈবাক অসিদা সিম্তেম হোংদোকপা ৱারগনি খনখি অদুবু নহোরোলশিংনা অহোংবা অসিসু তৌদুনা উৎলে।
মরূপশিং,
হৌখিবা নুমীৎ খরা অসিদা লৈবাক অসিদা অমসুং নহাশিংগী মরক্তা য়াম্না খন্ন-নৈনরিবা অসি সিতিজনশিপ এমেন্দমেন্ত এক্তনি। এক্ত অসি করিনো, মসি পুরকপা করিগী দরকার ওইরিবনো? নহাশিংগী পুক্নিংদসু ৱাহং কয়া অমা মীওই খরনা হাঞ্জিনবিরে। নহারোল কয়া অমদি ভাব তারে, অদুবু হৌজিকসু তোকঙাদা থাজবা লৈরি। অসিগুম্লবা নহা পুম্নমকপু খংহনবা অসি ঐখোয় পুম্নমক্কী ইথৌদাংনি অমসুং মখোয়বু পেলহনবা অসিসু ঐখোয় পুম্নমক্কী তৌফম থোকপনি।
মরম অদুনা ঙসি নেস্নেল য়ুথ দে অসিদা ঐহাক্না অমুক হন্না লৈবাক অসিগী নহাশিংবু, ৱেস্ত বেঙ্গোলগী নহাশিংবু, অৱাং-নোংপোক্কী নহাশিংবু ঙসি শেংলবা মফম অসিদগী অমসুং নহাশিংগী মরক্তা লেপতুনা করিগুম্বা খরা হায়জনিংই।
মরূপশিং,
লৈবাক্কী সিতিজনশিপ পীনবগীদমক্তা ভারত সরকারনা নুমীদাং অমদা অনৌবা আইন অমা শেম্বা অদুগুম্বা নত্তে। ঐখোয় পুম্নমক্না খংবা মথৌ তাই মদুদি অতোপ্পা লৈবাক্তগী, ধর্ম অমা হেক্তগী মীওই অমা হেক্তা, ভারত্তা ইকায় খুম্নবা, ভারতকী সংবিধান্দা থাজবা থম্বানা ভারতকী সিতিজনশিপ লৌবা য়াই। মসিদা অপনবা অমত্তা লৈতে… ঐহাক্না অমুক হায়রিবা অসিনি, সিতিজনশিপ এক্ত, সিতিজনশিপ লৌথোক্নবা নত্তে, মসি সিতিজনশিপ পীনবা আইন্নি অমদি সিতিজনশিপ এমেন্দমেন্ত এক্ত অসি আইন অদুদা এমেন্দমেন্ত অমা খক্তনি। এমেন্দমেন্ত অসি করিনো? ঐখোয়না অহোংবা পুরক্লিবদি ভারতকী সিতিজনশিপ লৌনবা খুদোংচাবা হেঙ্গৎহল্লে। খুদোংচাবা অসি কনাগীদমক হেঙ্গৎহল্লিবনো? মখোয়শিং অদুগীদমক্তনি, মদুনা পাকিস্তান শেম্লবা মতুংদা মখোয়গী ধর্মনা মরম ওইদুনা ওৎপী নৈবিরবা, হিংবদা অৱাবা মায়োক্নরিবা, ইচল-ইচে অমসুং ইচানুপীশিংগী ইজৎ সেক্যুর ওইদ্রিবা।
মরূপশিং,
নিং তম্লবা মতুংদা, ইকায় খুম্নজরিবা মহাত্মা গান্ধীদগী হৌরগা মতম অদুগী অফাওবা লুচিংবশিংনা হায়রম্লিবদি ধর্মনা মরম ওইদুনা পাকিস্তান্দা মীওই মীনৈ চত্থরিবা মখোয়শিং অদুদা সিতিজনশিপ পীগদবনি।
হৌজিক ঐহাক্না অদোমগী মফমদা হংলিবা অসিনি মদুদি চংজরক্লবশিং অদুবু ঐখোয়না শিরুনবগীদমক অমুক হন্না হলহনখিগদরা? অমুক হন্না হলহনখিগদরা? ঐখোয়গী তৌফম থোকপা ইথৌদাং নত্তবরা, মখোয়সু ঐখোয়গা মান্ননা ঐখোয়গী সিতিজনশিপ ওইফম থোকপরা নত্রগা থোক্তবরা? করিগুম্বা মখোয়না আইনগা লোয়ননা, মরীগা লোয়ননা, নুঙাই য়াইফবা পুন্সী মহিং হিংবদা ঐখোয়দা নুঙাইগদরা নত্রগা নুঙাইরোইদরা… ঐখোয়না তৌফম থোকপরা নত্রগা থোক্তবরা। অতোপ্পগী য়াইফনবগীদমক থবক তৌবা অসি অফবরা নত্রগা ফত্তবরা? করিগুম্বা মোদী জীনা মসি তৌরগদি অদোম য়াওরিবা নত্রা… অদোম য়াওরিবা নত্রা… খুৎ থাংগৎতুনা হায়বিয়ু অদোম য়াওরিবা নত্রা।
ঐখোয়গী সরকারনা লৈবাক অসিবু নিং তম্বা ফংহনখিবা অথোইবা মচাশিং অদুগী অপাম্বা অদু খক্তমক পাংথোকপনি।
মহাত্মা গান্ধীনা হায়বিরম্বা থবক অদু ঐখোয়না পাংথোকচবনি… অদুগা সিতিজনশিপ এমেন্দমেন্ত এক্তা ঐখোয়না সিতিজনশিপ পীবা খক্তনি, কনাগীসু… কনাগীসু… সিতিজনশিপ মুনবা নত্তে।
মসিদসু নত্তনা ঙসিসু ধর্ম অমা হেক্তগী মীওই অমা হেক্তনা, লাইদা থাজবা থমগেরা নত্রগা থম্লোইগেরা… ভারতকী সংবিধান্দা থাজবা মীওইশিং অদুনা অপীবা প্রোসিদ্যুরগী মখাদা ভারতকী সিতিজনশিপ লৌবা য়াই। পাকিস্তান্দা লৈরিবা মাইনোরিতীশিংদা করম্বা মখলগী মীওৎ মীনৈ চত্থবগে হায়বদু হৌজিক ফাওবা মালেম অসিনসু খংলম্লোই। মীওইবগী হকপু মতৌ করম্না খোংগাওনরিবগে। ঐখোয়গী ইনিসিয়েতিব অসিগী মরম অমদি মসিনি।
হোয় অদুগা অৱাং-নোংপোক্কী রাজ্যশিংগী হায়রুরগদি অৱাং-নোংপোক অসি ঐখোয়গী প্রাইদনি। অৱাং-নোংপোক রাজ্যশিংগী সংস্কৃতি, মফম অদুগী চৎন লোনচৎ, মফম অদুগী দেমোগ্রাফী, মফম অদুগী কস্তম, মফম অদুগী পুন্সী মহিং, মফম অদুগী চাকচা-য়ুথক, মফম অদুগী দেমোগ্রাফী অদুদা আইন অসিদা শেমদোক শাদোকপা অসিদগী শোকহল্লোই, মসিগীসু কেন্দ্র সরকারনা খোংথাং লৌখৎলে।
মরূপশিং,
ঐখোয়গী সংস্কৃতি অমসুং ঐখোয়গী সংবিধান্না ঐখোয়দগী মসিমক থাজবা থম্লি মদুদি নাগরিক অমা ওইনা ইশাগী ইথৌদাং অদু পুকচেল শেংনা কত্থোকপগা লোয়ননা পাংথোক্কদবনি। নিং তম্বা ফংলবা মতুং চহী ৭০গী মতম অসিদা ঐখোয়না অধিকার… অধিকার অসি য়াম্না তারে। অধিকারগীদমক মীয়াম্বু খংহনবসু লৈখ্রে। অদুগা মদু দরকারসু ওইখি। অদুবু অধিকার খক্তা নত্তে হিন্দুস্তানি পুম্নমক্কী থৌদাংসু অদুক হক্না মরুওইবা তাই।
স্বামী বিবেকানন্দ জীনসু মসিমক পামলমখি, মহাক্না ভারত ইমাবু অচৌবা শক্তমদা উবা পামবীরম্মি। অদুগা ঐখোয় পুম্নমক্নসু মহাক্কী মংলানশিং অদু মংফাওহন্নবগীদমক ৱারেপ লৌরি। ঙসি অমুক হন্না স্বামী বিবেকানন্দ জীগী শেংলবা কুমহৈ অসিদা বেলুর মথকী অসিগুম্লবা শেংলবা মফম অসিদা ইকায় খুম্নজরিবা মুনিশিংগী মরক্তা মীকুপ খরা লৈজবগী লাইবক ফবা অদু ঐহাক্না ফংজরে। ঐখোয়গী সংবিধান্না নাগরিক অমা ওইনা ঐখোয়গী থৌদাং অদু মপুং ফাহন্নবা ঐখোয়দা আশা তৌরি। ভারত মচা খুদিংমক্কী থৌদাং অসি চপ মান্ননা মরু ওইগদবনি। লম্বী অসিদা চত্তুনা ঐখোয়না মালেমগী ফম্বাকথক্তা মসিগী অচুম্বা মফমদা ভারতপু উবা ফংগনি। মসিমক স্বামি বিবেকানন্দনা ভারত মচা পুম্নমক্কী মফমদা থমলম্বা থাজবা অদুনি। খুৎ অনিমক থাংগৎলদুনা খোংজেল হৌনা হায়বিয়ু…
ভারত ইমানা য়াইফরে!
ভারত ইমানা য়াইফরে!
ভারত ইমানা য়াইফরে!
হন্না-হন্না থাগৎচরি।
