জনুৱারি ২১ অমসুং জনুৱারি ২২দা নিউ দিল্লিদা পাংথোকপা পুলিসকী দিরেক্তর জেনরেলশিং/ইন্সপেক্তর জেনরেলশিংগী ৫৭শুবা ভারত পুম্নমক্কী মীফমদা প্রধান মন্ত্রী শ্রী নরেন্দ্র মোদী শরুক য়াখ্রে।
পুলিস ফোর্সশিং হেন্না মীকুপ-নাহুম শিংহন্নবা অমসুং মখোয় অনৌবা তেক্নোলোজিশিংগী ত্রেনিং পীনবা প্রধান মন্ত্রীনা পাউতাক পীখি।এজেন্সিশিংগী মরক্তা দেতা পীথোক-পীশিনগী থবক হেন্না ফগৎনবা নেসনেল দেতা গভর্নান্স ফ্রেমৱার্ককী মরুওইবা প্রধান মন্ত্রীনা ফোঙদোকখি। প্রধান মন্ত্রীনা হায়খি বাইওমেত্রিক্সগুম্বা তেক্নোলোজিগী পাম্বৈশিং ঐখোয়না মখা তানা শীজিন্নগদবনি, খোঙনা পেত্রোল্লিং চৎপগুম্বা মমাংঙৈগী পুলিসকী থবকশিং মখা তানা মপাঙ্গল কনখৎহনবশু মথৌ তাই। অরিবা ক্রিমিনেল লোশিং মুৎথৎকদবনি অমসুং রাজ্যশিং শীনবা থুংনা পুলিস ওর্গনাইজেসনশিংগী মান্নবা থাক অমা লৈহনগদবনি। ওফিসিএলশিং য়াম্না তোইনা চৎতুনা কংফালগী ঙমখৈশিং অমসুং সমুদ্র ঙাক-শেনবগী থবকশিং মপাঙ্গল কনখৎহনগদবনি।
প্রধান মন্ত্রীনা হায়খি খ্বাইদগী ফবা থবকশিং লৌথোক-লৌশিন তৌন্নবা রাজ্যগী পুলিস অমসুং সেন্ত্রেল এজেন্সিশিংগী মরক্তা মতেং পীনবা হেনগৎহনগদবনি। নৌনা থোরকপা খুদোংচাদবশিং খন্নবা অমসুং মখোয়গী মরক্তা থেংনবা খ্বাইদগী ফবা থবকশিং খন্ননবা দি.জি.পিশিং/আই.জি.পিশিংগী মীফমগী নমুনা অসি রাজ্য/জিলা থাক্তা পাংথোক্নবা হোৎনগদবনি।
শিংথানিঙাই ওইবা থবকশিং পাংথোকপগীদমক প্রধান মন্ত্রীনা পুলিস মেদলশিং য়েন্থোক্লবা মতুংদা মীফম অদু লোইশিনখি।
মীফম অদুদা পুলিসকী থবকশিং অমসুং লৈবাক্কী ঙাক-শেন য়াওনা তেরোরিজম থেংনবা, লানহৌবগী ইরাং লাকশিনবা অমসুং সাইবর সেকুরিতি য়াওনা হিরম কয়া খন্নখি। য়ুনিয়ন হোম মিনিস্তর, হোমগী রাজ্য মন্ত্রী, নেসনেল সেকুরিতি এদভাইজর, য়ুনিয়ন হোম সেক্রেতরি, রাজ্যশিং/য়ু.তিশিংগী দি.জি.পিশিং/আই.জি.পিশিং অমসুং সেন্ত্রেল পুলিস ওর্গনাইজেসনশিং অমসুং সেন্ত্রেল আর্মদ পুলিস ফোর্সশিংগী মকোকশিংশু মীফম অদুদা শরুক য়াখি। রাজ্যশিং/য়ু.তিশিংদগী চাউরাক্না ওফিসার ৬০০ মীফম অদুদা ভর্চুএল ওইনা শরুক য়াখি।
