প্রধান মন্ত্রী, শ্রী নরেন্দ্র মোদীনা ঙসি ফোনদা পোলেন্দগী প্রেসিদেন্ত, হিস এক্সেলেন্সী অন্দ্রে দুদাগা ৱারী শানখ্রে।
প্রধান মন্ত্রীনা য়ুক্রেনদগী ভারত মচাশিং লৌথোকপদদা পোলেন্দনা পাংলকখিবা মতেংশিং, অমসুং য়ুক্রেনদগী পোলেন্দদা চংলক্লিবা ভারত মচাশিংগীদমক্তা ভিজাগী মথৌ তাবা অদুবু কোমথোকপগী থৌওং অদুগীদমক্তা প্রেসিদেন্ত অন্দ্রে দুদাবু থমোই শেংনা থাগৎপা ফোংদোকখি। মহাক্না অসিগুম্বা য়াম্না ৱারবা মতম অসিদা ভারত মচাশিংদা পোলিশ সিতিজনশিংনা তরাম্না ওকপীবা অমসুং মতেং পাংবীবগীদমক্তা মহাক্কী মাইকৈদগী অখন্ননা তাগৎপা ফোংদোকখি।
লৈবাক অনি অসিগী মরক্তা মহৌশাদগী লৈরকপা নুংশি-চান্নবগী মরী অদুবু পল্লদুনা, প্রধান মন্ত্রীনা ২০০১দা গুজরাতকী জুহার হাখিবগী মতাংদা পোলেন্দনা পাংখিবা মতেং অদুবু নিংশিংখি। মহাক্না অনিশুবা লাঞ্জাওগী মতমদা পোলিশ ইমুংশিং অমসুং মখোয়গীনি হায়বদা কনা লৈজদ্রবা নহা ওইরিবা অঙাংশিংবু কনবদা জাম্নাগরগী মহারাজানা লৌখিবা য়াম্না শিংথানিংঙাই ওইবা থৌদাং অদুবুসু নিংশিংখি।
প্রধান মন্ত্রীনা প্রেসিদেন্ত দুদাদা রোদ ত্রান্সপোর্ত অমসুং হাইৱেজ অমসুং সিভিল এভিয়েশনগী রাজ্য মন্ত্রী, জেনরেল (দা.) ভি.কে.সিং (রিতায়র তৌরবা)বু ভারত মচাশিং লৌথোক্নবা হোৎনরিবশিং অদুবু য়েংশিন্নবা মহাক্কী অখন্নবা দুত ওইনা পোলেন্দদা লৈগনি হায়না মহাক্না খঙহনখি।
প্রধান মন্ত্রীনা থোক্লিবা খৎন-চৈনবগী থবকশিং অদুবু য়াম্না থুনা লেপ্নবা অমসুং ৱারী-ৱাতাই শানদুনা শন্দাইননবগীদমক্তা ভারতনা তত্তনা তৌখিবা আপীল অদুবু অমুক্কসু হন্না হায়খি। মহাক্না লৈবাকশিংগী সোভরেনতী অমসুং তেরিতোরিয়েল ইন্তেগ্রিতীবু ইকাইখুম্নবগী মরু ওইবগী মতাংদসু য়াম্না মরু ওইনা পনখি।
