শিঞ্জো অবে – জাপানগী শক্নাইবা লুচিংবা, মালেমগী মতিক মগুন লৈবা ৱাঙাংলোই অমসুং ভারত-জাপান মরীগী অচৌবা থৌদাং লৌরম্বা মহাক অসি ঙসিদি ঐখোয়গী ইরক্তা লৈত্রে। জাপান অমসুং মালেম্না মীৎয়েং শান্না উবা ঙম্বা লুচিংবা অমা মাঙজরে। অমসুং ঐহাক্না চানরবা মরূপ অমা মাঙজরে।
ঐহাক্না গুজরাতকী মুখ্য মন্ত্রী ওইনা ইং ২০০৭কী জাপান খোঙচত্তা মহাক্কা অহানবা ওইনা উন্নখিবনি। অহানবা উন্নখিবা অদুদগী ঐখোয়গী মরূপ-মপাং ওইবগী মরীনা ওফিস অমসুং ওফিসিএল প্রোতোকোলগী পল কয়াগী ৱাংমা লানখি।
ঐখোয়না ক্যোতোগী তোজী লাইশঙদা চৎখিবা, শিনকান্সেনগী ঐখোয়গী ত্রেনগী খোঙচৎ, ঐখোয়না অহমদাবাদকী সাবরমতী আশ্রম, কাশীগী গঙ্গা আর্তীদা চৎমিন্নখিবা, তোকিয়োদা চা থকপগী নুংঙাইরবা থৌরম, ঐখোয়গী কাওবা ঙম্লরোইদবা মীকুপশিংগী লিস্ত অদুদি তশেংনা লোইবা নাইরোই।
অমসুং মাউন্ত ফুজীগী চিংখোঙদা লৈবা য়ামানাশীগী পর্ফেজচরদা লৈবা মহাক্কী য়ুমদা মহাক্না ঐহাকপু কৌদুনা ইকায় খুম্নখিববু ঐহাক্না কৈদৌনুংদা কাওবা ঙম্লোই।
ইং ২০০৭ অমসুং ২০১২গী মরক, অমসুং খ্বাইদগী অকোনবা ওইনা ইং ২০২০দা মহাক্না প্রধান মন্ত্রী ওইদ্রবা মতম ফাওবদা, ঐখোয়গী মরী অসি মহৌশাগুম্না চেৎনা অদুমক লৈখিবনি।
অবে সানগা উন্নবা খুদিংগী ৱাখল-লৌশিংদা ইথিল পীবনি। মহাক্কী মতম পুম্বদা অনৌবা ৱাখল্লোন খল্লি অমসুং লৈঙাকপা, শেন্মিৎলোন, নাৎ, ফোরেন পোলিসী অমসুং অতোপ্পা হীরম কয়াদা মমল নাইদ্রবা লৌশিং লৈ।
মহাক্কী পাউতাক্না ঐহাক্না গুজরাতকীদমক্তা শেন্মিৎলোনগী ৱারেপ লৌবদা ইথিল পীবীখি। অমসুং, গুজরাত-জাপানগী মতিক লৈরবা মরী শাগৎপদা মহাক্কী তেংবাংনা অচৌবা থৌদাং লৌখিবনি।
মতুংদা ভারত অমসুং জাপানগী মরক্তা স্ত্রেতেজিক পার্তনরশিপগী অমুক্তা ওইখিদ্রিবা মওংদা অওনবা পুরক্নবা মহাক্কা লোয়ননা থবক তৌমিন্নবগী খুদোংচাবা ঐহাক্না ফংখি। অখুবা, বাইলেতরেল ইকনোমিক্কী মরী অমদগী অবে সান্না পাক চাউবা, কম্প্রিহেন্সিব ওইবা অমদা ওন্থোকপদা মতেং পাংখি, মসিনা জাতিগী থৌশিলগী লম খুদিংমক কোনশিনবা খক্তা নত্তনা ঐখোয়গী লৈবাক অনিগী অমসুং রিজনেল সেক্যুরিতীগীদমক মরু ওইখি। মহাক্কী ওইনদি মসি লৈবাক অনিগী অমসুং মালেমগী মীয়ামগী খ্বাইদগী কান্নরবা মরীশিংগী মনুংদা অমা ওইখি। মহাক্না ভারতকা লোয়ননা – মহাক্কী লৈবাক্কী খ্বাইদগী অরুবা ৱাফম ওইরিবা – সিভিল ন্যুক্লিয়র এগ্রীমেন্ত য়ান্নবা পুরক্নবা ফিরেপ লৌখি অমসুং ভারত্তা হায় স্পীদ রেলগীদমক খ্বাইদগী ফবা তর্মশিং পীবদা মরু ওইবা থৌদাং লৌখি। নীংতম্লবা ভারতকী খোঙচৎতা খ্বাইদগী মরু ওইবা মাইলস্তোনশিং ফংখিবা অদুদা মহাক্না জাপান্না অনৌবা ভারতকী চাউখৎ খোঙজেল হেনগৎহন্নবা খুৎশম্ননা চৎমিন্ননবা হোৎনখি।
মহাক্না ভারত-জাপানগী মরীশিংদা শরুক তমখিবা অসিবু শকখঙবা ওইনা মঙোন্দা ইং কুমজা ২০২১দা অৱাংবা থাক্কী পদ্ম বিভুশন পীদুনা ইকাই খুম্নখি।
অবে সান্দা মালেমদা থোক্লিবা মরু ওইবা অমসুং মখল কয়াগী ত্রাঞ্জিসন অসিগী মতাংদা লৌশিং লৈখি, মহাক্কী মতম অদুদগী হেন্দোক্তুনা তুংলমচৎতা রাজনীতি, খুন্নাই, শেন্মিৎলোন অমসুং মালেমগী ওইবা মরীশিংদা মসিনা পীরিবা শাফু অদু মীৎয়েং শান্না উবা ঙমখি, লৌগদবা ফিরেপকী চোইসশিং অদু খঙবা ঙম্বগী লৌশিং, ৱাফম অমগী মায়োক্তা থৌনা লৈনা ৱারেপশিং লৌবা ঙম্বগী মতিক-ময়াই লৈ অমসুং মহাক্কা লোয়ননা মহাক্কী মীয়াম অমসুং মালেমবু পুবা ঙম্বগী অতাংবা গুন চেল্লি। মহাক্কী মরু ওইবা অমসুং মীয়াম্না য়ানরবা পোলিসীশিংনা – অবেনোমিক্স – জাপানিজকী শেন্মিৎলোন্দা মপাঙ্গল হাপখি অমসুং মহাক্কী মীয়ামগী ইনোভেসন অমসুং ওন্ত্রপ্রিনর্শিপকী ৱাখল্লোনবু নৌহৌনা ইথিল পীখি।
ঐখোয়দা মহাক্না পীবীরম্বা অথোইবা খুদোলশিং অমসুং মহাক্কী তুংকোইনা লৈহৌগদবা লেগেসী অমসুং মালেম্না মতম পুম্বদা লমন তোনশিন্দুনা লৈহৌরগদবশিংগী মরক্তা হোংলক্লিবা অহোংবশিং অমসুং ঐখোয়গী মতমদা লাক্কদবা খুদোংথিবা খঙদোকপা ঙম্বা অমসুং মদু মায়োক য়াবা ঙম্বা মহাক্কী লুচিংবা ওইবগী গুন অসি অমনি। ইং কুমজা ২০০৭তা ইন্দিয়ন পার্লিয়মেন্ততা পীখিবা মহাক্কী ইথিল পীনীংঙাই ওইবা ৱারোল অদুনা অথুবদা ইন্দো পেসিফিক রিজন্না কনতেম্পোরেরী পোলিতিকেল, স্ত্রেতেজিক অমসুং ইকনোমিক রিএলিতী ওইনবগী য়ুম্ফম থোনখি – চহিচা অসিদা মালেমবু লমজিংগদবা রিজন অমা ওইহনখি।
অমসুং মহাক্না য়াম্না লুন্না খঞ্জবা – সোভরেন্তী অমসুং তেরিতোরিএল ইন্তিগ্রিতীবু ইকাই খুম্নবা, ইন্তর্নেস্নেল লো অমসুং রুলশিং ঙাক্না চৎপা, মান্নবা ৱাখল্লোনগা লোয়ননা মালেমগী লৈনরিবা মরীদা শান্তি থম্বা অমসুং শেন্মিৎলোনগী থবক-থৌরম হেন্না হেনগৎহনবগী খুত্থাংদা পুন্না চাউখৎমিন্নবা – হায়রিবা ভেল্যুশিং অসিদা য়ুম্ফম ওইরগা তংদু লৈতাবা অমসুং শাফবা, শান্তি লৈবা অমসুং চাউখৎপা তুংলমচৎকীদমক ফ্রেমৱার্ক অমসুং আর্কিতেকচর শেমগৎপদা মাংজিল থাখি।
ক্বাদ, এসিয়ন-লেদ ফোরমশিং, ইন্দো পেসিফিক ওসীন্সকী থৌশিল, অফ্রিকা য়াওনা ইন্দো-পেসিফিক্কী ওইবা ইন্দিয়া-জাপান দিবেলপমেন্ত কোওপরেসন অমসুং কোলিসন ফোর দিজাস্তর রিসিলিএন্ত ইনফ্রাস্ত্রকচর পুম্নমক অসি মহাক্না শরুক তমখিবশিং অদুদগী কান্নবা ফংখি। তুমিন্না অমসুং ফেনফিয়র য়াওদনা অমসুং লৈবাক্কী য়ানীংদবা অমসুং মপাল লৈবাক্কী চীংনবা অদু কোকহন্দুনা ইন্দো পেসিফিক রিজন শিনবা থুংবদা ঙাকশেল, কন্নেক্তিবিতী, ইনফ্রাস্ত্রকচর অমসুং সস্তেনেবিলিতী য়াওনা মহাক্না জাপানগী স্ত্রেতেজিক ওইবা থবক-থৌরমদা অওনবা পুরকখি। মসিনা মরম ওইদুনা রিজন অসিনা মাগী তুংগী থবক-থৌরমদা হেন্না থাজবা থমখি অমসুং মালেম্না মাগী তুংলমচৎতা হেন্না থাজবা পোকহনখি।
চহি অসিগী মে থাদা চৎখিবা ঐহাক্কী জাপান খোঙচৎ অদুদা জাপান-ইন্দিয়া এসোসিএসনগী চিয়র পাইবতা ঙাইরিবা অবে সানগা উনবগী খুদোংচাবা ঐহাক্না ফংজখি। মহাক হান্নাগুম মশাগী – থৌনা লৈবা, শুমহৎনীংঙাই ওইবা, অমসুং য়াম্না লৌশিং লৈবা মতৌ অদু অদুমক হোংলমদে। ভারত- জাপানগী মরূপ মপাং ওইবগী মরী করম্না হেন্না চেৎশিনহনগনি হায়বা অসিগী মতাংদা অনৌবা ৱাখল্লোনশিং মঙোন্দা লৈখি। নুমিৎ অদুদা ঐহাক্না মঙোন্দা কাইনরসি হায়খিবা অদুনা ঐখোয়গী অরোইবা উনবা ওইরগনি হায়না ঐহাক্না খল্লুবা তৌরুদে।
মহাক্কী হরাও তয়াম্বা অমসুং লৌশিং লৈবা, চীং লেম্বা অমসুং পুকচেল চাউবা, মরূপ ওইবগী মরী অমসুং লমজিং-লমতাকপীবগী মতৌশিং অদুগীদমক মতম চুপ্পদা ঐহাক্না লমন তোনশিন্দুনা লৈহৌরগনি, অমসুং মহাকপু নীংশিংদুনা লৈহৌরগনি।
মহাক্না লৈখিদবা অসি ঐখোয়না ভারত্তা ঐখোয়গী মীওই অমা লৈখিদবগুম্না, মহাক্না পুকচেল চাউনা ঐখোয়বু লৌশিনবীখিবা মতৌ অদুগুম্না অৱাবা ফোঙদোক্লি। মহাক্কী মীয়ামদা ইথিল পীদুনা - মহাক্না খ্বাইদগী পামজবা অদু পাঙথোক্লগা অরোইবা তুমখুন তানখি। মহাক্কী পুন্সি অসি য়াম্না নুংঙাইতনা তেন্না হিংলম্মু হায়না তমলমখি অদুবু মহাক্কী লেগেসীদি মতম চুপ্পদা মুৎনাইদনা লৈহৌরগনি।
ভারতকী মীয়ামগী মহুৎ শিন্দুনা অমসুং ঐহাক ইশাগী ইহুৎ শিন্দুনা জাপান মীয়ামদা, মরু ওইনা শ্রীমতি অকি অবে অমসুং মহাক্কী ইমুং মনুংগী মীওইদা ঐহাক্না থমোয় শেংনা অৱাবা ফোঙদোকচরি। ওঁ শান্তি।
