১. ২০১৯গী নবেম্বর ০৪দা ইন্দিয়া-অসিয়ান অমসুং ইস্ত এসিয়া সমিৎ ২০১৯গী নাকলদা প্রধান মন্ত্রী শ্রী নরেন্দ্র মোদীনা ভিয়েতনামগী প্রধান মন্ত্রী ঙুয়ে সুৱান ফুক্কা উনখ্রে।
২. লৈবাক অনিগী মরক্ত লৈনরিবা পুৱারী অমসুং মহৌশাগী মরূপ-মপাং ওইবা মরিশিং লুচিংবা অনিনা অমুক হন্না খন্নখি অমসুং ভারত-ভিয়েতনামগী মরী অসি কলচর অমসুং সিবিলাইজেসনগী অকনবা য়ুমফম অমদা শাগৎপনি হায়না থমখি অমসুং লমদম অসিগী ওইনা অমসুং মালেমগী ওইনা মতেং পাংনরিবা অদু খঙজিনখি।
৩. হন্দক লৈবাক অনিগী মরক্তা অৱাংবা থাক্কী ৱাফমশিং খন্নদুনা দিফেন্স, সেক্যুরিতী, শেল-থুম, ললোন-ইতিক অমসুং মীগা-মীগা চৎথোক-চৎশিন তৌনবগী লমদা মতেং পীনবা হেনগৎলক্লিবা অসি মীফম মনুংদা খন্নখি।
৪. দিফেন্স অমসুং সেক্যুরিতীগী লমদা মতেং পীনবা হেনগৎলক্লিবা অসি খঙজিল্লদুনা, নাকল অনিমক্না সমুদ্রগী শরুক্তা মতেং পীনবা হেনগৎহনবা হায়না য়ানখি। লুচিংবা অনিনা এক্সত্রিমিজম অমসুং তেরোরিজমগী অকিবশিং খন্নখি অমসুং মসিগী খুদোংচাদবা অসি থেংননবা পুন্না থবক তৌমিন্নবা হায়না য়ানখি।
৫. শান্তি, সেক্যুরিতী, তংদু-লৈতাবা অমসুং নুংঙাই-য়াইফবা পুরক্নবা মনীংতম্বা, অরোন-অথুপ লৈতবা অমসুং পুন্না চাউখৎমিন্নবা ইন্দো-পেসিফিক লমদম অমা লৈহন্নবা মখোয়না পায়খৎলিবশিং অদু লুচিংবা অনিনা থমখি। য়ুনাইতেদ নেসন্স কনভেন্সন ওন লো ওফ সী (য়ু.এন.সি.এল.ও.এস.) য়াওনা মালেমগী আইনশিংদা য়ুম্ফম ওইবা কাংলোন অমা শেমগৎনবা লুচিংবা অনিনা য়ানখি। মসিনা সাউথ চাইনা সীদা মনীংতম্না জহাজ চৎপা, মথক্ত ফ্লাইত পাইবা অমসুং ললোন-ইতিক চৎথবা হেনগৎহনগনি।
৬. ২০২০দা ভিয়েতনাম্না অসিয়ানগী চেয়রমেন ওইবা মতম অমসুং ২০২০-২১গী ওইনা লৈবাক অসিনা য়ু.এন.এস.সি.গী নন-পর্মনেন্ত মেম্বর ওইরিঙৈদা পুন্না থবক তৌমিন্ননবা ভারতনা শেম-শারিবা অদু প্রধান মন্ত্রী মোদীনা পাউদমখি।
