সরকারগী ওইবা খোঙচৎ অমগীদমক প্রধান মন্ত্রী শ্রী নরেন্দ্র মোদীনা পীরকপা চেবাউ অয়াবা পীদুনা, ওগস্ত ২০,২০২৪ দা মালেসিয়াগী প্রধান মন্ত্রী দাতো সেরি অনৱার ইব্রাহিম ভারত্তা লাকখি। মসি মালেসিয়াগী প্রধান মন্ত্রীনা খা-নোংপোক এসিয়াগী লৈবাক অমদা চৎপা অহানবা খোঙচৎনি অমসুং প্রধান মন্ত্রী অনিগী মরক্তা অহানবা ওইনা উনবনি অমসুং মখোয়না লৈবাক অনিগী অচেৎপা মরীশিং হেন্না ফগৎহন্নবা খন্নবদা অয়াবা পীখি। খন্ন-নৈনখিবা হিরমশিংগী মনুংদা ভারত-মালেসিয়াগী মরী পাকথোক-চাউথোকহনবা অমসুং হিরম কয়াদা মরী শেমগৎপা য়াওখি।
প্রধান মন্ত্রী অনৱার ইব্রাহিমগী অৱাংবা থাক্কী মীহুৎ কাংবুগী মনুংদা ফোরেন মিনিস্তর দাতো সেরি উতামা হাজি মোহমদ বিন হাজি হাসন; ইনভেস্তমেন্ত, ত্রেদ অমসুং ইন্দস্ত্রিগী মিনিস্তর তেংকু দাতুক সেরি জাফ্রুল অবদুল অজিজ; তুরিজম, আর্ত অমসুং কলচরগী মিনিস্তর দাতুক সেরি তিয়োং কিং সিং; দিজিতেল মিনিস্তর গোবিন্দ সিংহ দিও অমসুং হুমেন রিছোর্স মিনিস্তর স্তেভেন সিম য়াওখি।
প্রধান মন্ত্রী অনৱার ইব্রাহিম রাস্ত্রপতি ভাবন্দা ওফিএল ওইনা তরাম্না ওকখি অমসুং মহাত্মা গান্ধীগী মফমদা ইকায়খুম্নবা উৎনবা মহাক রাজ ঘাত্তা চৎখি। তুংদা প্রধান মন্ত্রী অনিগী মরক্তা লৈবাক অনিগী ওইবা ৱাফমশিংদা ৱারি শান্নখি। তুংদা, লৈবাক অনিগী মরক্তা চে-চাংশিং খুৎশীন্নবা থৌরমদা প্রধান মন্ত্রীশিং শরুক য়াখি। প্রধান মন্ত্রী নরেন্দ্র মোদীনা কৌবা চাক্লেন অমা প্রধান মন্ত্রী অনৱার ইব্রাহিম শরুক য়াখি। প্রধান মন্ত্রী অনৱার ইব্রাহিমনা ভারতকী রাস্ত্রপতি শ্রীমতি দ্রৌপতি মুর্মু উনখি। ভারতকী এক্সতর্নেল এফেয়ার্স মিনিস্তর দোক্তর এস. জয়সঙ্করনা প্রধান মন্ত্রী অনৱার ইব্রাহিম উনখি। প্রধান মন্ত্রী অনৱার ইব্রাহিমনা ইন্দিয়ান কাউন্সিল ওফ ৱার্ল্দ এফেয়ার্সতা ৱা ঙাংখি।
২০১৫ দা ভারত অমসুং মালেসিয়াগী মরক্তা শেমখিবা ইনহান্স স্ত্রাতেজিক পার্তনরশিপনা লৈবাক অনিগী মরীশিং মাইথোং য়াম্বা মরী অমা ওইহনবদা মতেং পাংখিবা অদু প্রধান মন্ত্রী অনিনা শক খঙবা উৎখি। ভারত অমসুং মালেসিয়াগী মরক্তা লৈনরিবা মরী অসি হিরম কয়াদা লৈনবা মপুংফারবা মরী অমনি হায়না খঙবগা লোয়ননা মরী অসি হেন্না পাকথোক-চাউথোকহনবগী মরুওইবা অদু থম্বগা লোয়ননা মরী অসি মখা তানা কমপ্রেহেন্সিপ স্ত্রাতেজিক পার্তনরশিপ অমদা পুখৎনবা অচেৎপা ৱাফম প্রধান মন্ত্রীশিংনা থমখি।
ভারত অমসুং মালেসিয়া অমসুং মসিগী মীয়ামগী মরক্তা মরুপ-মপাং ওইবা অমসুং শেন-থুমগী অচেৎপা মরীশিং লৈনবদা লুচিংবা অনিনা অপেনবা ফোঙদোকখি। লৈবাকশিং অসিগী মান্নবা পুৱারি লৈরিবা অমসুং মশিং য়াম্লবা ভারতমচাশিং মালেসিয়াদা লৈদুনা শেন-থুমগী চাউখৎপা পুরকপদা লৈবাক অনি অনি অসি থাজনবা মরুপশিং ওইরি।
রাজনিতি, দিফেন্স অমসুং সেকুরিতিগী মতেং পাংনবা, শেন-থুম অমসুং ললোন-ইতিক, দিজিতেল তেক্নোলোজিশিং, স্তার্দ-অপশিং, ফিনতেক, ইনর্জি, রিন্যুএবল ইনর্জি, হকশেল, অৱাংবা থাক্কী মহৈ তম্বা, নাত, তুরিজম অমসুং মীগা মীগা লৈনবা মরীশিং য়াওনা তোঙান-তোঙানবা হিরমশিংদা লৈবাক অনি মতেং পাংন্নবগী মতাংদা প্রধান মন্ত্রী অনিনা খন্নখি।
শীন্মীশিং থবক খনবা, থবক পীবা অমসুং অমুক হল্লকপা; অয়ুর্বেদা অমসুং অতোপ্পা মমাংঙৈগী লায়য়েং কাংলোনশিং; দিজিতেল তেক্নোলোজিশিং; নাত, কলা অমসুং হেরিতেচ; তুরিজম; পব্লিক এদমিনিস্ত্রেসন অমসুং লৈঙাক্কী অওনবশিং; য়ুথ অমসুং স্পোর্তস; অমসুং ইন্তরনেসনেল ফাইনান্সিএল সেন্তর সর্বিসেস ওথোরিতি, ইন্দিয়া অমসুং লাবুয়ান ফাইনান্সিএল সর্বিসেস ওথোরিতিগীগী শেন-থুমগী থবকশিংগী মতেং পীনবগী লমদা এম.ও.য়ুশিং খুৎশীন্নবগী থৌরমদা লুচিংবা অনিমক শরুক য়াখি।
গ্লোভেল সাউথকী লৈবাকশিংগী হায়নিংবা ৱাফমশিং, অপাম্বশিং অমসুং মরুওইবশিং ফোঙদোক্নবা মফম অমা পীনবা ভারতনা ভোইস ওফ গ্লোভেল সাউথ সম্মিৎ(ভি ও জি এস এস) য়ুম্বু ওইদুনা পাংথোকখিবা অদুদা মালেসিয়ানা থাগৎপা ফোঙদোকখি। ভোইস ওফ গ্লোভেল সাউথ সম্মিৎ(ভি ও জি এস এস)কী মীফমগী ইদিসন অহুম্মক শরুক য়াবগীদমক ভারতনা মালেসিয়া থাগৎপা ফোঙদোকখি।
লৈবাক অনিগী মরক্তা মখা তানা অৱাংবা থাক্কী খোঙচৎশিং পাংথোকপদা প্রধান মন্ত্রী অনিনা অপেনবা ফোঙদোকখি। নকশিন্ননা ৱারি শান্নবগী মরুওইবা থম্লদুনা, জোইন্ত কম্মিসন ওফ মিতিংস(জে সি এম) অমসুং ফোরেন ওফিস কন্সলতেসনশিং চাংনাইনা পাংথোকপা য়াওনা, লৈবাক অনিনা পাম্নবা হিরমশিংদা চাংনাইনা উনবা অমসুং ৱারি শান্নবা হায়না লুচিংবশিংনা য়ানখি।
মখা তানা লৈবাক অনিগী মরীশিং মপাঙ্গল কনখৎহন্নবা লৈবাক অনিগী সংসদশিংগী মরক্তা উনবা অমসুং চৎথোক-চৎশিন তৌনবা হেনগৎহনবদা প্রধান মন্ত্রী অনিনা পুক্নিং থৌগৎখি।
লৈবাক অনি অসি চাউখৎহনবদা নহারোলশিংগী মরুওইবা অদু প্রধান মন্ত্রী অনিনা শক খঙখি অমসুং লৈবাক অনিমক্কী নহারোলশিংগী মরক্তা চৎথোক-চৎশিন তৌনবা পুক্নিং থৌগৎপা হায়না মখোয়না য়ানখি।
লৈবাক অনিগী ললোন-ইতিক্কী থবকশিংদা প্রধান মন্ত্রী অনিনা অপেনবা ফোঙদোকখি অমসুং লৈবাক অনিগী অচেৎপা মরী হেন্না ফগৎহনবদা ললোন-ইতিক অসি য়াম্না মরুওইবা অমনি হায়বা খঙখি অমসুং লৈবাক অনিগী ললোন-ইতিক্কী থবক দোল্লার বিল্লিয়ন ১৯.৫ য়ৌরকপদা তরাম্না ওকখি। লৈবাক অনিমক কান্নবা ফংনবা চুনগদবা মওং অমদা লৈবাক অনিগী ললোন-ইতিক মখা তানা ফগৎহন্নবা মখোয়না লৈবাক অনিগী উদ্যোগশিং পুক্নিং থৌগৎখি। হিরম অসিগী মতাংদা, অৱাংবা থাক্কী সি.ই.ও ফোরম মখোয়না তরাম্না ওকখি অমসুং ওগস্ত ১৯,২০২৪ দা নিউ দিল্লিদা ৯শুবা সি.ই.ও ফোরম পাংথোকখিবদা থাগৎপা ফোঙদোকখি।
লৈবাক অনিগী মরক্তা শেন থাদবা হেনগৎলকপদা প্রধান মন্ত্রী অনিনা তরাম্না ওকখি অমসুং তোঙান-তোঙানবা হিরমশিংদা মতেং পাংনবা অমসুং শেন থাদবা পুক্নিং থৌগৎখি।
অসিয়ান-ইন্দিয়া ত্রেদ ইন গুদস এগ্রিমেন্ত(এ আই তি আই জি এ) হেন্না মপুংফানবা, নুংঙাইনবা, লাইহন্নবা অমসুং ললোন-ইতিক খুদোংচাহন্নবা মসি হন্না য়েংশিনবগী থবক শৌগৎপা অমসুং য়াংশিনহনবদা নাকল অনিনা অয়াবা পীখি অমসুং মসি ২০২৫ ফাওবদা লোইশিন্নবা পান্দম থমখি অমসুং মসিনা ভারত অমসুং অসিয়ানগী মরক্তা সপ্লাই চেনশিং হেন্না মপাঙ্গল কনখৎহনগনি।
লৈবাক অনিগী হৌজিক হৌজিক্কী শেন-থুমগী মরুওইবশিংদা মমি তাহনবগী মরুওইবা অদু খঙলদুনা, মালেসিয়া-ইন্দিয়া কমপ্রেহেন্সিপ ইকোনোমিক কোওপরসন এগ্রিমেন্ত(এম আই সি ই সি এ)গী ২শুবা অপুনবা কম্মিতি মীফম পাংথোক্নবা খন্ন-নৈনবদা প্রধান মন্ত্রী অনিনা তরাম্না ওকখি।
লৈবাক অনিগী ললোন-ইতিক অমসুং শেন থাদবদা লৈবাক অনিগী শেন শীজিন্নবা পুক্নিং থৌগৎনবা রিজার্ব বেঙ্ক ওফ ইন্দিয়া অমসুং বেঙ্ক নেগারা মালেসিয়াগী মরক্তা মতেং পীনবদা প্রধান মন্ত্রী অনিনা থাগৎপা ফোঙদোকখি অমসুং ললোন-ইতিক্কী শেন পীথোক-পীশিন তৌনবদা ভারতকী রুপি অমসুং মালেসিয়াগী রিঙ্গিত শীজিন্নবা হেনগৎহন্নবা লৈবাক অনিমক্কী উদ্যোগশিংদা পুক্নিং থৌগৎখি।
দিজিতেলগী মতেং পাংননবা, দিজিতেল তেক্নোলোজিশিংগী মতাংদা এম.ও.য়ু খুৎয়েক পীনবদা প্রধান মন্ত্রী অনিনা তরাম্না ওকখি অমসুং দিজিতেল পব্লিক ইনফ্রাস্ত্রকচর, দিজিতেল বি২বি পার্তনরশিপ, দিজিতেল কেপাসিতি বিল্দিং, সাইবর সেকুরিতি, অনৌবা তেক্নোলোজিশিং হায়বদি ফাইব-জি, ক্বানতম কম্পুতিং, ক্লাউদ কম্পুতিং, ইন্তরনেত ওফ থিংসগী লমদা লৈবাক অনিগী মরক্তা মতেং পীন্নবা মালেসিয়া-ইন্দিয়া দিজিতেল কাউন্সিল লিংখৎপদা পুক্নিং থৌগৎখি।
লৈবাক অনিমক্তা দিজিতেল ইকোনোমিগী মরুওইবশিং অদু প্রধান মন্ত্রী অনিনা শক খঙখি অমসুং ভারতকী য়ুনিফাইদ পেমেন্তস ইন্তরফেস(য়ু পি আই)গী মাইপাকপা অদু খঙখি অমসুং ভারত অমসুং মালেসিয়াগী মরক্তা পেমেন্ত সিস্তেমশিংগী মতাংদা হৌজিক ৱারি শান্নরিবা অসিদা থাগৎপা ফোঙদোকখি।
ইন্দিয়া-মালেসিয়া স্তার্দ-অপ এল্লাইন্স অমগী মখাদা স্তার্দ-অপ ইন্দিয়া অমসুং ক্রেদল ফন্দ ওফ মালেসিয়াগী মরক্তা হৌজিক ৱারি শান্নরিবা অসিদা লুচিংবশিংনা তরাম্না ওকখি। স্পেস, ন্যুক্লিয়ার ইনর্জি, সেমিকন্দক্তরশিং, তিকাশিং অমসুং অতোপ্পা মশক খঙলবা হিরমশিং য়াওনা সাইন্স অমসুং তেক্নোলোজিগী লমদা মতেং পীনবা হায়না প্রধান মন্ত্রী অনিনা য়ানখি।
ইনহান্স স্ত্রাতেজিক পার্তনরশিপকী মরুওইবা য়ুম্বীশিংগী মনুংদা অমা ওইনা লৈবাক অনিগী ঙাক-শেন অমসুং সেকুরিতিগী লমদা অকনবা মতেং পাংনবগী মতাংদা প্রধান মন্ত্রী অনিনা খন্নখি। চাং নাইনা চৎথোক-চৎশিন তৌনবা অমসুং ৱারি শান্নবা, এক্সরসাইজশিং অমসুং কেপাসিতি বিল্দিংগী মতেং পীনদুনা মখা তানা দিফেন্সকী মতেং পীনবা হায়না প্রধান মন্ত্রী অনিনা য়ানখি।
দিফেন্স ইন্দস্ত্রি মতেং পীনবা অমসুং দিফেন্স আর অমসুং দি মতেং পাংনবগী থবক মখা তানা পাকথোক-চাউথোকহনবা হায়না নাকল অনিনা য়ানখি।
প্রধান মন্ত্রী অনিনা তেরোরিজম য়ানিংদবা ফোঙদোকখি অমসুং মখল খুদিংমক্কী তেরোরিজম লৈবাকশিংনা য়াদবা য়াদবা হায়না য়ানবা পুরকখি। লৈবাক অমতনা তেরোরিস্তশিং চঙজফম পীদনবা প্রধান মন্ত্রী অনিনা ফোঙদোকখি অমসুং লৈবাক্কী আইনশিং অমসুং মালেমগী য়ানখিবশিংগী মতুংইন্না তেরোরিজমগী থবক তৌবা মীওইশিং অথুবা মতমদা ৱায়েন্নবা পুন্না থবক তৌমিন্নবা হায়না য়ানখি।
তেরোরিজম অমসুং লৈবাক লান্না ত্রাইম চৎথবা অনিগী মরক্তা লৈনরিবা মরীশিং মশক খঙবা অমসুং নিংথিনা য়েংশিনবা হায়না লুচিংবশিংনা য়ানখি। ই-পাউ পীথোক-পীশিন তৌনবা অমসুং তেরোরিজম থেংনবা অমসুং অতোপ্পা মহৌশাগী লৈরক্লবা অমসুং মহৌশাগী নত্তবা শিংনবশিং থেংন্নবা খ্বাইদগী ফবা থবকশিংগী মতাংদা মতেং পীনবা হেনগৎহনবা হায়না লৈবাক অনিনা য়ানখি।
অৱাংবা থাক্কী মহৈ-মশিং তম্বগী লমদা মতেং পীনবা হেনগৎহনবা হায়নশু প্রধান মন্ত্রী অনিনা য়ানখি। কেপাসিতি বিল্দিংদা লৈবাক অনি অকনবা মরী লৈনরিবা অসি পল্লদুনা, সাইবর সেকুরিতি, এ.আই অমসুং মেছিন লার্নিংগী লমদা মালেসিয়া মীওইশিংগীদমক ইন্দিয়াস তেক্নিকেল এন্দ ইকোনোমিক কোওপরেসনগী মখাদা অখন্নবা সিত ১০০ খাকপদা মালেসিয়ানা তরাম্না ওকখি।
ভারতকী অয়ুস মিনিস্ত্রিগী মখাদা ইন্দিয়াস ইন্সতিতুৎ ফোর ত্রেনিং এন্দ রিছার্স ইন অয়ুর্বেদা(আই তি আর এ)না মালেসিয়াগী য়ুনিভর্সিতি তুনকু অবদুল রহমনদা অয়ুর্বেদা চিয়ার লিংখৎপা য়াওনা লৈবাক অনিগী মরী মখা তানা ফগৎহনবদা প্রধান মন্ত্রী অনিনা য়ানখি। ফার্মাকোপোইসিয়া কোওপরেসনগী লমদা অথুবা মতমদা এম.ও.য়ু অমদা খুৎয়েক পীনবা হায়না নাকল অনিনা য়ানখি।
য়ুনিভর্সিতি মালায়াদা ভারতকী মরমদা থিজিন্নবা তিরুবাল্লাবার চিয়ার লিংখৎনবা ৱাফম খন্নবদা লৈবাক অনিনা তরাম্না ওকখি।
অপুনবা রিছার্স অমসুং দিবলপমেন্ত, কেপাসিতি বিল্দিং অমসুং লৌউ-শিংউদা দিজিতেল তেক্নোলোজিশিং শীজিন্নবা য়াওনা লৌউ-শিংউগী লমদা মতেং পীনবা হেনগৎহন্নবা লুচিংবা অনিনা থাজবা ফোঙদোকখি।
লৈবাক অনিগী মরক্তা মতম শাংনা লৈরক্লবা নাতকী মরীশিং খঙলদুনা ওদিও-ভিজুএল কো-প্রদক্সনদা মতেং পীনবা পাকথোক-চাউথোকহন্নবা ৱাফম প্রধান মন্ত্রী অনিনা য়ানখ্রে।
তুংকোইনা চৎনবা য়াবা ইনর্জি অমসুং অইং-অশাগী খল হোংলকপদা চুশিন্নবা ঙম্নবগী মতাংদা মতেং পীনবা হেন্না ফগৎহন্নবা ৱাফমশিং প্রধান মন্ত্রী অনিনা য়ানখ্রে। ইন্তরনেসনেল সোলার এল্লাইন্স অমসুং কোলিএসন ফোর দিজাস্তর রিসিলিয়েন্ত ইনফ্রাস্ত্রকচর লিংখৎনবা ভারতনা পায়খৎলিবা থবকশিং মালেসিয়ানা তরাম্না ওকখি। অইং-অশাগী খল হোংলক্লিবা অসিনা পীরবা অৱাবশিং থেংননবা মালেমগী ওইবা অপুনবা থবক অমা দরকার ওইরে হায়বা প্রধান মন্ত্রী অনিনা য়ানখি অমসুং মসি থেংননবা লৈবাক অনিনা পুন্না থবক তৌমিন্নবা হায়না য়ানখি।
মসিগী ফাউন্দিং মেম্বর অমা ওইনা ইন্তরনেসনেল বিগ কেত এল্লাইন্স শরুক য়ানবা মালেসিয়ানা ৱারেপ লৌরকপদা ভারতনা তরাম্না ওকখি। এল্লাইন্স অসিগী ফ্রেমৱার্ক এগ্রিমেন্তগী মতাংদা অথুবা মতমদা ৱারি শান্নবা লোইশিন্নবা প্রধান মন্ত্রী অনিনা পুক্নিং থৌগৎখি।
মালেসিয়াগী শেন্মিৎলোন্দা মালেসিয়াদা লৈরিবা ভারতমচাশিংনা মখা তানা মরুওইবা থৌদাং কয়া লৌরিবা অসিদা প্রধান মন্ত্রী অনিনা তরাম্না ওকখি। লৈবাক অনিগী মরক্তা হৈথোই-শিংথোইবা শিন্মীশিং চৎথোক-চৎশিন তৌনবা মখা তানা ফগৎহনবা হায়না মখোয়না য়ানখি।
লৈবাক অনিমক্না ভিসাগী চৎন-কাংলোনশিং কোমথোকপা য়াওনা লৈবাক অনিগী মরক্তা তুরিজম অমসুং মীগা মীগা চৎথোক-চৎশিন তৌনবা হেনগৎহন্নবা হন্দক থবক কয়া পায়খৎলকপদা প্রধান মন্ত্রী অনিনা তরাম্না ওকখি। তুরিজমগী মতেং পীনবা হেনগৎহনবা, তুংকোইনা চৎনবা য়াবা তুরিজমগী খ্বাইদগী ফবা থবকশিং শরুক য়ামিন্নবা অমসুং লৈবাক অনিগী মরক্তা তুরিজম হেনগৎলক্নবা খুদোংচাবশিং মশক খঙদোকপা মতেং পীনবা হেনগৎহন্নবা প্রধান মন্ত্রী অনিনা য়ানখি। ভারতনা ২০২৬ তা মালেসিয়াদা কোইবা চৎনবা মফম অমা ওইনা লাউথোক্লে অমসুং চহি অদুদা ভারতকী অহেনবা লমকোয়বা মীওইশিং লাক্নবা মালেসিয়ানা তরাম্না ওকখি।
মীয়াম চৎথোক-চৎশিন তৌনবদা লৈবাক অনিগী মরক্তা লৈনরিবা চৎথোক-চৎশিনগী থবক অসি য়াম্না মরুওইবা অমনি হায়না লুচিংবা অনিমক্না য়ানখি অমসুং লৈবাক অনিগী মরক্তা নোংথক্তা চৎথোক-চৎশিনগী থবকশিং হেন্না ফগৎহন্নবা মখা তানা খন্ন-নৈনবা লৈবাক অনিগী সিবিল এভিএসন ওথোরিতিশিংদা পুক্নিং থৌগৎখি।
য়ুনাইতেদ নেসন্স কনভেসন্সন ওফ লো ওফ সি(য়ু এন সি এল ও এস) ১৯৮২ দা পীরিবা মালেমগী আইনশিংদা য়ুম্ফম ওইদুনা, নিংতম্না সমুদ্রদা চৎথোক-চৎশিন তৌবা অমসুং লৈবাকশিং লান্না পাইবা অমসুং আইন্না য়াবা ললোন-ইতিক পাংথোক্নবগী থবকশিং ইকায়খুম্নবা উৎনবা মখোয়গী থাজবা অদু লুচিংবা অনিনা অমুক হন্না থমখি। য়ুনাইতেদ নেসন্স কনভেসন্সন ওফ লো ওফ সি(য়ু এন সি এল ও এস) ১৯৮২ য়াওনা মালেমগী লৈবাকশিংনা য়ানরবা মালেমগী আইনশিংগী খুৎথাংদা য়ানদবা খুদিংমক শান্তি ওইনা ৱারোইশিন পুরক্নবা লৈবাকশিংদা লুচিংবা অনিনা তকশিনখি।
অসিয়ানদা ভারতকী কমপ্রেহেন্সিপ স্ত্রাতেজিক পার্তনরশিপকী মরুওইবা অদু পল্লদুনা, অসিয়ান্না ময়াইদা লৈহন্নবা ভারতনা মপুংফানা শৌগৎপদা মালেসিয়ানা তরাম্না ওকখি অমসুং ২০২৫ তা মালেসিয়ানা অসিয়ানগী চিয়ারমেন ওইগদৌরিবা অসিদা ভারতনা শৌগৎপা ফোঙদোকখি। হৌজিক লৈনরিবা কমপ্রেহেন্সিপ স্ত্রাতেজিক পার্তনরশিপ মখা তানা ফগৎহন্নবা অসিয়ান্না লমজিংবা থবকশিংগী খুৎথাংদা অসিয়ান অমসুং ভারতকী মরক্তা হেন্না থবক তৌমিন্নরকপদা মালেসিয়ানা তরাম্না ওকখি।
য়ু.এন.এস.সি, য়ু.এন.ঐচ.আর.সি অমসুং অতোপ্পা মালেমগী লুপশিং য়াওনা য়ু.এনদা মতেং পীনবা অমসুং পুন্না থবক তৌমিন্নবা হেনগৎহনবা হায়না প্রধান মন্ত্রী অনিনা য়ানখ্রে। শান্তি অমসুং চাউখৎপা পুরক্নবা নিয়মদা য়ুম্ফম ওইবা মালেমগী সিস্তেম অমা লৈহনবা তঙাইফদে হায়না লুচিংবা অনিনা ফোঙদোকখি। য়ু.এন সেকুরিতি কাউন্সিল য়াওনা মালেমগী লুপশিংদা হেন্না শরুক য়াহন্দুনা হৌজিক্কী মতমগী অচুম্বশিং মমি তাহন্নবা মালেমগী লুপশিংগা পু্ন্না থবক তৌমিন্ননবা মখোয়না ৱাশক লৌখি। পর্মনেন্ত অমসুং নন-পর্মনেন্ত কাংলুপশিং অনিমক্তা য়ু.এন.এস.সি পাকথোক-চাউথোকহনবা য়াওনা চাউখৎলক্লিবা লৈবাকশিং শরুক য়াবা হেনগৎহন্নবা মীৎয়েং অমগা লোয়ননা কাউন্সিলগী মেম্বর ওইবা হেনগৎহনবা অসিনা হৌজিক মালেম্না থেংনরিবা অৱাবশিং থেংনবদা হেন্না কান্নবা পীগনি। শেমদোক্লবা য়ুনাইতেদ নেসন্স সেকুরিতি কাউন্সিলদা ভারতনা লেংদবা মেম্বর ওইবদা মালেসিয়ানা শৌগৎপা ভারতনা থাগৎপা ফোঙদোকখি।
খোঙচৎ অসিদা মহাক অমসুং মহাক্কী মীহুৎ কাংবু তরাম্না ওকপগীদমক প্রধান মন্ত্রী অনৱার ইব্রাহিমনা প্রধান মন্ত্রী শ্রী নরেন্দ্র মোদী থাগৎপা ফোঙদোকখি। লৈবাক অনিনা খুদোংচাগদবা মতম অমা য়েংলগা তুংদা মালেসিয়াদা লাক্নবা ভারতকী প্রধান মন্ত্রীদা চেবাউ পীখি।
