প্রধান মন্ত্রী নরেন্দ্র মোদী অমসুং মালদিবসকী রাস্ত্রপতি ইব্রাহিম মোহমদ সোলীনা ৱারী শানরবা মতুংদা প্রেসতা পীখিবা অপুনবা ৱারোল

মালদিবসকী রাস্ত্রপতি ইব্রাহিম মোহমদ সোলী তরাম্না ওকচরি অমসুং রাস্ত্রপতি ৱাশক লৌবগী থৌরম শরুক য়ানবা মালদিবসতা লাকপগীদমক ভারতকী প্রধান মন্ত্রী নরেন্দ্র মোদী থাগৎচরি।

থবক পাইবা হৌবগী থৌরম শরুক য়ানবা মহাক্তা চেবাউ পীরকপদগীদমক প্রধান মন্ত্রী মোদী রাস্ত্রপতি সোলীবু থাগৎখি। গনতন্ত্র মাইপাকপগীদমক ভারতকী মীয়াম্না পীরকপা থাগৎপা অমসুং য়াইফ-পাউজেলশিং মহাক্না মালদিবসকী মীয়ামদা পাউদমখি। গনতন্ত্র অসি শান্তি, নুংঙাইবা অমসুং তংদু-লৈতানা হিংনবগী তঙাইফদবনি।

লুচীংবা অনিনা ভারত অমসুং মালদিবসকী মরক্তা লৈনরিবা মরি অদু খঙজিনখি, সোলীনা মালদিবসকী রাস্ত্রপতি ওইনা খল্লকপদগী মতেং পীনবা অমসুং মরূপ-মপাং ওইবগী মরি অদু হেন্না ফগৎহন্নবা খন্নখি।

লুচীংবশিং উনবা অদুদা, ভারত মহাসাগরদা শান্তি অমসুং ঙাকশেনগী থবক লেংদনা থম্বগী মরুওইবা অদু য়ানখি অমসুং লমদম অসি তংদু-লৈতানা লৈনবা লৈবাকশিং অসিনা পাম্লিবশিং অদু খঙমিন্নখি।

লমদম অসিদা অমসুং মফম অমদা হেক্তা তেরোরিজম থেংননবা মতেং পীনবা হেনগৎনবা লুচীংবা অসিনা থাজবা পীনখি।

মহাক্না ওফিস পায়রকপা মতমদা লৈবাক অদুদা থেংনরিবা শেন-থুমগী ফিবম ফত্তবা অদু রাস্ত্রপতি সোলীনা প্রধান মন্ত্রী মোদীদা পাউদমখি। অনৌবা সরকার অসিনা মালদিবসকী মীয়ামদা ৱাশকখিবশিং অদু ফংহনবা ঙম্নবা ভারতনা চাউখৎ-থৌরাংগী লমদা পাংবা য়াবা মতেং পাংনবা লুচীংবা অনিনা ৱা তানখি। ঈথৎ লৈবাক অসিদা হাওসিং অমসুং ইনফ্রাস্ত্রকচর শেমগৎপা অমসুং ঈশিং অমসুং সিৱেরেজগী থবকশিং ফগৎহন্নবা রাস্ত্রপতি সোলীনা তকশিনখি।

মালদিবসকী তুংকোইনা লৈহৌগদবা খুন্নাইগী অমসুং শেন-থুমগী চাওখৎপা পুরক্নবা ভারতনা মতেং পীগনি হায়না প্রধান মন্ত্রী মোদীনা রাস্ত্রপতি সোলীদা থাজবা পীখি। পাংবা য়াবা হিরম খুদিংদা ভারতনা মতেং পাংনবা শেম-শাদুনা লৈরি হায়না মহাক্না ফোঙদোকখি অমসুং মালদিবসকী দরকার ওইবশিং লেপথোক্নবা লৈবাক অনিনা অথুবদা উননবা খঙহনখি।

লৈবাক অনিমক কান্নবা ফংমিন্ননবা ভারতকী কম্পেনিশিংনা মালদিবসতা শেন থাদনবগী খুদোংচাবশিং হেন্না পাকথোক-চাউথোকরকপদা প্রধান মন্ত্রী মোদীনা তরাম্না ওকখি। লৈবাক অনিমক্কী মীয়াম্না লৈবাক অমদগী লৈবাক অমদা তোইনা চৎথোক-চৎশিন তৌনরিবা অসি খঙলদুনা , ভিসা লৌবা থবক লাইহন্নবা লুচীংবা অনিনা য়ানখি।

মহাক্কী খুদোংচাবা মতম অমা য়েংলগা সরকারগী ওইনা ভারত্ত লাক্নবা রাস্ত্রপতি সোলীদা প্রধান মন্ত্রী মোদীনা চেবাউ পীখি। রাস্ত্রপতি সোলীনা চেবাউ অদু তরাম্না লৌখি।

মখা তানা ৱা খন্ননবা অমসুং রাস্ত্রপতি সোলীনা ভারত্তা লাক্কদৌরিবা অসিগী শেম শানবা মালদিবসকী মপান থৌরম মন্ত্রী নবেম্বরগী ২৬দা ভারত্তা লাক্কনি।

তুংদা প্রধান মন্ত্রী নরেন্দ্র মোদীনা মালদিবসতা সরকারগী খোঙচৎ ওইনা লাক্কনি হায়বগী থাজবা রাস্ত্রপতি সোলীনা থমখি। মদুগী চেবাউ অদু প্রধান মন্ত্রী মোদীনা হরাওনা লৌখি।