ঙসি ন্যু দিল্লীদা প্রধান মন্ত্রী নরেন্দ্র মোদীনা ২০১৮ বেচগী আই.পি.এস. প্রোবেসন্নরশিংগা উনখ্রে।
প্রোবেসন্নরশিংগা ৱারী শানবদা , প্রধান মন্ত্রীনা নহা ওইরিবা ওফিসরশিংদা ঐখোয়গী লৈবাক্কী য়াইফনবা কৎথোকপগা লোয়ননা চোকথবা নাইদনা থবক তৌনবা তকশিনখি।
মখোয়গী নোংম-নোংমগী থবকশিং কৎথোকপগা লোয়ননা অমসুং তৌফম থোকপশিং তৌনবা ওফিসরশিংদা প্রধান মন্ত্রীনা হায়খি। মহাক্না হায়খি, পুলিস ফোর্সকী মরুওইবা অদুদি মীচম মীয়ামগা শম্নবা অসিনি। ওফিসর খুদিংমক্না মীয়াম্না পুলিস ফোর্সকী মতাংদা খল্লিবা অদু খঙগদবনি অমসুং পুলিস ফোর্স অসি মীয়ামগা নক্নবা অমসুং ইরাই লাইনা তিন্নবা য়াবা ওইহনগদবনি।
প্রধান মন্ত্রীনা হায়খি পুলিসকী থৌদাং অসি মীহাৎ-মীপুন থোক্ত্রিঙৈদা মাংজৌননা থিংবনি। মতমগা চুনবা পুলিস ফোর্স অমা শেম্বদা তেক্নোলোজী অসি য়াম্না মরুওই।
এস্পিরেসনেল দিস্ত্রিক্তশিং অওনবা পুরকপা অমসুং খুন্নাইগী অহোংবা পুরকপদা পুলিসকী থৌদাং প্রধান মন্ত্রীনা খন্নখি। মহাক্না ২০১৮ বেচদা মশিং য়াম্লবা নুপী প্রোবেসন্নরশিং য়াওবদা থাগৎখি। মহাক্না হায়খি, পুলিস ফোর্সতা নুপী মশিং য়াম্না য়াওবা অসিনা পুলিসকী থবকশিং অমসুং লৈবাক শেমগৎপা অচৌবা কান্নবা ইথিল অমা পীগনি।
তুংগী য়াইফনবা ওফিসরশিং য়াইফ-পাউজেল পীরদুনা প্রধান মন্ত্রীনা ওফিসরশিংদা মখোয় মশামক থাজনবা হায়খি। মহাক্না হায়খি মশা-মরোমদোম থাজবা অমসুং নুংগী থৌনাগা লোয়ন্না ওফিসিয়েল ওইবা ত্রেনিংশিংনা ওফিসরশিংনা নোংম-নোংমগী থেংনরিবা শিংনবশিং মায়োক্নবা ঙমগনি।
