ভারতকী প্রধান মন্ত্রী শ্রী নরেন্দ্র মোদীনা চেবাউ পীবদগী, স্পেনগী রাস্ত্রপতি পেদ্রো সাঞ্চেজ সরকারগী ওইবা খোঙচৎ অমদা ওক্তোবর ২৮-ওক্তোবর ২৯, ২০২৪ দা ভারত্তা লৈরি। হন্দক্কী অসিনা রাস্ত্রপতি সাঞ্চেজগী অহানবা ভারতকী খোঙচৎনি অমসুং চহি ১৮ গী মতুংদা স্পেন সরকারগী রাস্ত্রপতি অমনা ভারত্তা লাকপা অহানবনি। মহাক্কা লোয়ননা ত্রান্সপোর্ত অমসুং মোবিলিতি মিনিস্তর অমসুং ইন্দস্ত্রি অমসুং তুরিজম মিনিস্তর অমসুং অৱাংবা থাক্কী ওফিসিএল অমসুং ললোন-ইতিক্কী মীহুৎ কাংবু অমা লোয়নরকখি।
খোঙচৎ অসিনা লৈবাক অনিগী মরী অমুক হিঙ্গৎহল্লে, মসিদা অনৌবা ইনোৎ হাপ্লে অমসুং তোঙান-তোঙানবা হিরমশিংদা লৈবাক অনিগী মরক্তা মতেং পীনবা হেনগৎহন্নবা অনৌবা যুগ অমগী থৌরাং তৌরে হায়না লুচিংবা অনিনা ফোঙদোকখি। ২০১৭ দা প্রধান মন্ত্রী শ্রী নরেন্দ্র মোদীগী স্পেন খোঙচৎ মতুংদগী লৈবাক অনিগী মরীশিং ফগৎলকপদা মখোয়না অপেনবা ফোঙদোকখি। লৈবাক অনিগী মরী মখা তানা ফগৎহন্নবা অমসুং রাজনিতি, শেন-থুম, সেকুরিতি, দিফেন্স, মীগা মীগা লৈনবা মরী অমসুং নাতকী মতেং পাংনবা য়াওনা হিরম খুদিংমক্তা মতেং পীন্ননবা লুচিংবা অনিমক্না মখোয়গী কাংবুদা পাউতাক পীখ্রে।
রাস্ত্রপতি সাঞ্চেজ নাত অমসুং চৎনবীগী থৌরম অমগা লোয়ননা তরাম্না ওকখি অমসুং বদোদারাদা প্রধান মন্ত্রীগা লোয়ননা মীহুৎ কাংবু থাক্তা ৱারি শান্নখি। মহাক্না মুম্বাইদশু চৎখি অমসুং মফম অদুদা মহাক্না শক্নাইরবা ললোন-ইতিক্কী লুচিংবশিং, নাতকী মীওইশিং অমসুং ভারতকী সেনিমাগী মীহুৎশিংগা ৱারি শান্নখি।
বদোদারাদা এয়বস স্পেন অমসুং তাতা এদভান্স সিস্তেমস লিমিতেদনা সি-২৯৫ এয়রক্রাফ পুন্না থোক্নবা ফাইনেল এশেমব্লি লাইন প্লান্ত রাস্ত্রপতি সাঞ্চেজ অমসুং প্রধান মন্ত্রীনা মোদীনা পুন্না শঙ্গাখি। প্লান্ত অসিনা ২০২৬ দা অহানবা মেদ ইন ইন্দিয়া সি-২৯৫ এয়রক্রাফ পুথোক্কনি, ভারত্তা এয়রক্রাফ ৪০ শাগনি। এয়রবস স্পেন্না ভারত্তা পাইবা য়ারবা ফিবমদা লৈরবা এয়রক্রাফ ১৬ ভারত্তা পীগনি, মসিগী মনুংদা এয়রক্রাফ ৬ ইন্দিয়ান এয়ফোর্সতা মাংজৌন্না ফংহনখ্রে।
রাজনিতি, দিফেন্স অমসুং সেকুরিতিগী মতেং পাংনবা
1. লুচিংবা অনিনা লৈবাক অনিগী মরক্তা লৈনরিবা মরুপ-মপাং ওইবা মরীশিং হন্না য়েংশিনখ্রে অমসুং গনতন্ত্র, নিংতম্বা, আইন্দা য়ুম্ফম ওইবা লৈঙাক, অফবা অমসুং থোং মান্নবা মালেমগী শেন্মিৎলোন অমা, তুংকোইনা চৎনবা য়াগদবা অমসুং অৱাবা মায়োক্নবা ঙম্বা গ্রহ অমা, নিয়মশিংদা য়ুম্ফম ওইবা মালেমগী লৈঙাক অমসুং ফগৎলবা অমসুং শেমদোক্লবা মালেমগী লুপশিংদা থাজবা থমদুনা ফগৎলক্লিবাম মরীশিংগী য়ুম্ফম থোল্লিবা অসি ফোঙদোকখি। মতেং পাংনবা অসিগী ময়াই ওইনা লৈবাক অনিগী মরক্তা লৈনরিবা মতম কুইরবা পুৱারিগী মরীশিং অমসুং মরুপ-মপাংগী মরীশিং মখোয়না শিংথাখি।
2. চাংনাইনা অৱাংবা থাক্তা উনবা অসিনা মরী অসিদা অনৌবা ইনোৎ পীরে হায়না লুচিংবা অনিমক্না ফোঙদোকখি। ফোরন, ইকোনোমি অমসুং ললোন-ইতিক অমসুং দিফেন্স মিনিস্ত্রিশিংগী মরক্তা লৈবাক অনি মপুংফানা মতেং পীনরিবা অসি মখোয়না পনখি অমসুং দিফেন্স, সেকুরিতি, সাইবর সেকুরিতি, ললোন-ইতিক অমসুং শেন-থুমগী ৱাফমশিং, নাত অমসুং তুরিজম, ইজুকেসন অমসুং মীগা মীগা লৈনবা মরীশিংদা লৈবাক অনি মতেং পাংনবা মখল কয়া থোক্নবা অমসুং মপাঙ্গল কনখৎহন্নবা নাকল অনিগী এজেন্সিশিং/মিনিস্ত্রিশিংগী মরক্তা চাংনাইনা ৱারি শান্নবগী মরুওইবা অদু ফোঙদোকখি।
3. লৈবাক অনিগী মরক্তা দিফেন্স ইন্দস্ত্রি চাউখৎলকপগী খুদম অমা ওইনা সি-২৯৫ এয়রক্রাফ প্রোজেক খুমাঙচাউশিনবদা লুচিংবা অনিমক্না অপেনবা ফোঙদোকখি। মসি ফগৎলক্লিবা অসিগা লোয়ননা, স্পেনগী দিফেন্স ইন্দস্ত্রিগী অৱাংবা থাক্কী থবকশিং অমসুং চাংদম্নবা শরুক য়াবা ঙম্বা অমসুং মেক ইন ইন্দিয়াগী থবকশিংদা ইন্দস্ত্রি অসিনা লৌরিবা থৌদাং শকখঙখি, ভারত্তা মসিগা মান্নবা অপুনবা প্রোজকশিং অতোপ্পা হিরমশিংদা লিংখৎনবা মখোয় মখোয়গী লৈবাকশিংগী দিফেন্স মিনিস্তরশিংগী পুক্নিং থৌগৎখি।
শেন-থুম অমসুং ললোন-ইতিক্কী মতেং পাংনবা
4. লৈবাক অনিমক্কী অফবা শেন-থুমগী ফিবম্না মতেং পাংদুনা, হন্দক লৈবাক অনিগী ললোন-ইতিক অমসুং শেন থাদবা চাউখৎলকপদা রাস্ত্রপতি সাঞ্চেজ অমসুং প্রধান মন্ত্রী মোদীনা তরাম্না ওকখি অমসুং লৈবাক অনিগী ললোন-ইতিকশিংগী মরক্তা অচেৎপা মরীশিং লৈনবা তকশিনখি।
5. স্পেনগী শেন-থুমগী ফিবম ফগৎলকপদা প্রধান মন্ত্রী মোদীনা রাস্ত্রপতি সাঞ্চেজ থাগৎপা ফোঙদোকখি। ভারতকী শেন-থুম য়াংনা চাউখৎলকপদা রাস্ত্রপতি সাঞ্চেজনা প্রধান মন্ত্রী মোদী থাগৎপা ফোঙদোকখি অমসুং ললোন-ইতিক নুংঙাইনবা ফিবম অমা শেমগৎপগীদমক সরকারগী তোঙান-তোঙানবা থবকশিং থাগৎপা ফোঙদোকখি। ভারত্তা লৈরিবা স্পেনগী কম্পেনি ২৩০ রোমগী খুৎথাংদা মেক ইন ইন্দিয়াগী থবকশিং মতেং পাংনবা রাস্ত্রপতি সাঞ্চেজনা থাজবা পীখি। মনিংতম্বা নিয়মশিংদা য়ুম্ফম ওইবা মালেমগী লৈবাকশিংগী ললোন-ইতিক্কী থবক অমা লৈহন্নবা অমসুং লৈবাক অনিমক্তা ললোন-ইতিক নুংঙাইগদবা শেন থাদবগী ফিবম অমা শেমগৎনবা হোৎনবদা মখোয়না শৌগৎপা অদু লুচিংবা অনিমক্না অমুক হন্না ফোঙদোকখি।
6. ইনর্জি, রিন্যুএবল ইনর্জিশিং, ন্যুক্লিয়ার, স্মার্দ গ্রিদশিং, চীঞ্জাক শেম-শাবা, অনা-লায়েং অমসুং হকশেলগী থবকশিং, ওতোমেতিপ অমসুং ত্রেনশিং, লম্বীশিং, হিথাংফমশিং অমসুং ত্রান্সপোর্ত নেতৱার্ক মেনেজমেন্ত য়াওনা ত্রান্সপোর্ত ইনফ্রাস্ত্রকচরগুম্বা হিরমশিংদা স্পেনগী কম্পেনিশিংগী হৈথোই-শিংথোইবা অদু শকখঙখি, হায়রিবা হিরমশিং অসিদা মখা তানা মতেং পাংনবদা লুচিংবা অনিনা তরাম্না ওকখ্রে। ইনফোর্মেসন তেক্নোলোজি, ফার্মাসিউতিকেলশিং, ওতোমোবাইল অমসুং ওতো পার্তশিংগুম্বা হিরমশিংদা স্পেনগী ইকোনোমিদা ভারতকী কম্পেনিশিংনা পাংলিবা মতেং অসি রাস্ত্রপতি সাঞ্চেজনা তরাম্না ওকখ্রে। ভারত অমসুং স্পেন্না অমনা অমদা শেন থাদনবা য়ানবা ‘ফাস্ত ত্রেক মেকানিজম’ অমা লিংখৎপদা লুচিংবা অনিনা তরাম্না ওকখ্রে।
7. ২০২৩ দা পাংথোকখিবা ভারত-স্পেন ‘জোইন্ত কম্মিসন ফোর ইকোনোমিক কোওপরেসন’ (জে সি ই সি)গী ১২শুবা মীফমদা লৌখিবা ৱারেপশিং লুচিংবা অনিনা খঙজিনখি অমসুং ২০২৫ গী অঙনবা শরুক্তা স্পেন্দা জে.সি.ই.সিগী মথংগী মীফম পাংথোকপা য়ানরে। মতাং অসিদা, মরুওইবা হিরমশিং হায়বদি রিন্যুএল ইনর্জি, তেক্নোলোজি অমসুং স্তেনেবল ইনফ্রাস্ত্রকচরদা মতেং পাংন্নবা লাল্লোং মশক খঙদোকপা অমসুং শেন-থুমগী মরীশিং হেন্না চেৎশীনহনবগী মরুওইবা অদু মখোয়না য়ানরে। অর্বান স্তেনেবল দিবলপমেন্তগী লমদা অথুবা মতমদা মেমোরেন্দম ওফ অন্দরস্তেন্দিং অমা থম্নবা লুচিংবা অনিনা থাজবা পীনখ্রে।
8. লৈবাক অনিগী মরক্তা ললোন-ইতিক অমসুং শেন থাদবগী মতেং পীনবা চাউখৎনবা ওক্তোবর ২৯.২০২৪ দা মুম্বাইদা পাংথোকপা ইন্দিয়া-স্পেন সি.ই.ও ফোরম অমসুং ইন্দিয়া-স্পেন ব্যুজিনেস সম্মিৎগী অনিশুবা মীফম লুচিংবা অনিনা তরাম্না ওকখ্রে।
9. লৈবাক অনিগী মরী চাউখৎনবা ইন্নোবেসন অমসুং স্তার্দঅপকী থবকশিংগী মরুওইবা অদু লুচিংবা অনিনা খঙখি অমসুং নাকল অনিমক্না পাম্নবা অসিগুম্বা খুদোংচাবশিং খঙদোক্নবা তাকশিনখ্রে। রাইজিং অপ ইন স্পেন অমসুং স্তার্দঅপ ইন্দিয়া ইনিসিয়েতিপগুম্বা ফ্রেমৱার্কশিংগী খুৎথাংদা তুংদা অসিগুম্বা পীথোক-পীশিনগী থবকশিং হেন্না পাংথোক্নবা মখোয়না মরী লৈনবা এজেন্সিশিংগী পুক্নিং থৌগৎখ্রে।
10. রেল ত্রান্সপোর্তকী লমদা এম.ও.য়ু অমা খুৎয়েক পীনবা অমসুং কস্তমসকী থবকশিংদা মতেং পীনবগী এগ্রিমেন্ত অমা অমা খুৎয়েক পীনবদা লুচিংবা অনিমক্না অপেনবা ফোঙদোকখ্রে।
11. শেন-থুম অমসুং ললোন-ইতিক চাউখৎহনবা অমসুং লৈবাক অনিমক্কী মীয়ামগী মরক্তা খঙবা হেনগৎহন্নবা তুরিজম্না লৌরিবা থৌদাং লুচিংবশিংনা খঙজিনখি অমসুং মসি মখা তানা চাউখৎহন্নবা য়ানখ্রে। স্পেন অমসুং ভারতকী মরক্তা দাইরেক্ত ফ্লাইত লৈহন্নবা এয়রলাইনশিংনা থৱায় য়াওবা উৎলিবা অসিদা লুচিংবা অনিমক্না তরাম্না ওকখ্রে।
২০২৬ অসি কলচর, তুরিজম অমসুং এ.আইগী ইন্দিয়া-স্পেন চহি ওইনা থৌরম পাংথোকপা
12. ভারত অমসুং স্পেনগী মরক্তা লৈনরিবা অচেৎপা মরী অমসুং লৈবাক অনিগী মীয়ামগী মরক্তা লৈনরিবা মতম কুইরবা মরুপ-মপাংগী মরী য়েংলদুনা, ২০২৬ অসি কলচর, তুরিজম অমসুং এ.আইগী ইন্দিয়া-স্পেন চহি ওইনা থৌরম পাংথোকপা হায়না প্রধান মন্ত্রী মোদী অমসুং রাস্ত্রপতি সাঞ্চেজনা য়ারে।
13. চহি অসিগী মনুংদা, নাকল অনিমক্না মখোয়গী ম্যুজিয়মশিংদা, কলা, মেলাশিং, ফিল্ম, কুহ্মৈশিং, সাহিত্য, আর্কিতেকশিংগী মীফমশিং অমসুং খন্ন-নৈনবদা অতোপ্পগী নাতকী মচাকশিং হেনগৎহন্নবা নাকল অনিনা ঙমজবা থবকশিং পায়খৎকনি।
14. মতৌ অশুম্না, লমকোয়বা মীওইশিং মশিং হেনগৎনবা, অমনা অমদা শেন থাদবা হেনগৎনবা অমসুং হোস্পিতেলিতি, আর্কিতেকচর, ইন্সাং মথেল, য়োনফম, সহর অমসুং খুঙ্গংগী তুরিজমগী হিরমশিং অখঙবশিং শরুক পীথোক পীশিন তৌন্নবা লম্বী থিনবা অখন্নবা মীৎয়েং চঙগনি অমসুং মসিনা লৈবাক অনিমক চাউখৎনবা খুদোংচাবশিং ফংগনি।
15. জি-২০ নিউ দিল্লি লিদর্স দিক্লারেসনগী মতুংইন্না, অফবা থবক্তা এ.আই শীজিন্নবগী অমসুং হিরম কয়াদা মসি চুম্না শীজিন্ননবা ভারত অমসুং স্পেন্না মরুওইবা থৌদাং অমা লৌগনি। অফবা থবক্তা এ.আই শীজিন্নবা পুক্নিং থৌগৎনবা চহি অসিদা লৈবাক অনিমক্না থৌরমশিং পাংথোক্কনি অমসুং শেন-থুমগী লমদা এ.আইগী অনৌবা থবকশিং শীজিন্ননবা থবক পায়খৎকনি।
16. থবক অসিগী মরুওইবা অদু খঙনবা, চহি অসি লৈবাক অনিমক্তা খ্বাইদগী কান্নবা মওংদা মরী লৈনবশিংনা থৌরম পাংথোক্নবা লুচিংবা অনিনা পাউতাক পীখ্রে।
নাত অমসুং মীগা-মীগা লৈনবা মরীশিং
17. লৈবাকশিং নকশিন্ননবা হোৎনবদা নাতকী মরীশিংনা লৌরিবা থৌদাংশিং লুচিংবা অনিনা থাগৎপা ফোঙদোকখ্রে অমসুং ভারত অমসুং স্পেনগী ইনাকখুল্লবা অমসুং মখল কয়াগী নাতকী লনশিং থাগৎপা ফোঙদোকখ্রে। মতম কয়াগী মমাঙদগী ভারত অমসুং স্পেনগী মরক্তা নাতকী থৌরমশিং অমনা অমদা উৎতুনা লাক্লিবা অমসুং স্পেনিস ইন্দোলোজিস্তশিং অমসুং ইন্দিয়ান হিস্পানিস্তশিংনা লৌরিবা থৌদাং মখোয়না থাগৎপা ফোঙদোকখ্রে। ঈশৈ, জগোয়, থিয়েতর, সাহিত্য, ম্যুজিয়মশিং অমসুং ফেস্তিবেলশিং লৈবাক অনি পীথোক-পীশিন তৌনবা হেনগৎহন্নবা কলচরেল একচেঞ্জ প্রোগ্রাম অমা খুৎয়েক পীনবদা মখোয়না তরাম্না ওকখ্রে।
18. লৈবাক অনিমক্না নাতশিং অমসুং লোলশিং থিজিনবদা থৱায় য়াওবা হেনগৎলকপদা লুচিংবা অনিমক্না থাগৎপা ফোঙদোকখ্রে। ভারত্তা পাম্নবা মপান লৈবাক্কী লোলশিংগী মনুংদা স্পেনিস য়াওরি। ভারত-স্পেন নাতকী মতেং পাংনাব হেনগৎহন্নবা মখোয়না তকশিনখি অমসুং নিউ দিল্লিদা ইন্সতিতুতো সেরভান্তেস অমসুং বাল্লাদোলিদতা কাসা দে লা ইন্দিয়া য়াওনা লৈবাক অনিমক্কী নাতকী লুপশিংগী মরক্তা মতেং পাংনবা হেনগৎহন্নবা তকশিনখ্রে।
19. হিন্দীদা আই.সি.সি চিয়ারশিং লিংখৎপা অমসুং বল্লাদোলিদ য়ুনিভর্সিতিদা ইন্দিয়ান স্তদিজ লিংখৎপদা লুচিংবা অনিনা তরাম্না ওকখ্রে। নেসনেল ইজুকেসন পোলিসি( এন ই পি) ২০২০ গী মখাদা ভারতনা লাইরিক-লাইশুগী লমদা অওনবশিং পুরক্লে। হিরম অসিদা, ভারতকী মহৈলোয়শঙশিংগা লোয়ননা লাইরিক-লাইশু অমসুং থিজিনবগী থবক্তা মতেং পাংনবা হেনগৎহন্নবা প্রধান মন্ত্রীনা মমিং লৈরবা স্পেনগী য়ুনিভর্সিতিশিংগী পুক্নিং থৌগৎখ্রে লোয়ননা জোইন্ত/দুএল দিগ্রিগী খুৎথাংদা মহৈলোয়শঙশিং মরী শেমগৎনবা অমসুং ভারত্তা ব্রাঞ্চ কেম্পসশিং লিংখৎনবা ওইথোকপা য়াবশিং থিদোক্নবা পুক্নিং থৌগৎখ্রে।
20. স্পেন-ইন্দিয়া কাউন্সিল ফাউন্দেসন অমসুং ওবজার্ভর রিছার্স ফাউন্দেসন্না পুন্না মুম্বাইদা শীনবা ৪শুবা স্পেন-ইন্দিয়া ফোরমদা রাস্ত্রপতি সাঞ্চেজনা মরুওইবা ৱারোল থমখ্রে। ইন্সতিতুসন অসিনা পাংথোক্লিবা মরুওইবা থবক লুচিংবশিংনা থাগৎপা ফোঙদোকখ্রে, ভারত অমসুং স্পেনগী সিবিল সোসাইতিশিং, কম্পেনিশিং, থিং তেঙ্কশিং, লৈঙাকশিং অমসুং য়ুনিভর্সিতিশিংগী মরক্তা লৈনবা মরীশিং মপাঙ্গল কনখৎহন্নবা লৌরিবা থৌদাং থাগৎখি। মসিনা মখোয়গী মেম্বরশিংগী মরক্তা অমসুং মসিগী থবকশিংগী মরক্তা অচেৎপা মরী অমা থমদুনা লৈবাক অনিগী মরীশিং ফগৎহনবদা মতেং পাংলে অমসুং মখোয়গী লৌশিং হেনগৎহন্নবা লৈবাক অনি পুনশিনহল্লে।
21. আই.সি.সি.আরনা স্পেনগী মীয়ামদা খুদোল ওইনা পীখিবা গুরুদেব রবিন্দ্রনাথ তেগোরগী মীতম বল্লাদোলিদতা থম্বদা লুচিংবা অনিনা তরাম্না ওকখ্রে অমসুং মাদ্রিদকী ইন্সতিতুতো সরবান্তেসকী ভোল্তশিংদা তেগোরগী হন্দোক্লবা লাইরিকশিং থম্বা অসি লৈবাক অনিগী মীয়াম মরক্তা নাতকী মরী লৈনবা হেনগৎলকপগী খুদম অমনি।
22. ২০২৩ দা ভারতনা সেমিন্সি ইন্তরনেসনেল ফিল্ম ফেস্তিবেলদা গেস্ত কন্ত্রি ওইনা অমসুং স্পেনগী শক্নাইরবা দিরেক্তর কারলোস সাউরাদা ইফি সত্যজিত রে লাইফতাইম এচিভমেন্ত পীদুনা, ফিল্ম অমসুং ওদিও-ভিজুএলশিংগী লমদা মতেং পাংনবা হেনগৎলকপা অসি নাকল অনিনা খঙলে। ভারত অমসুং স্পেনদা ফিল্ম অমসুং ওদিও-ভিজুএলশিংগী অচৌবা ইন্দস্ত্রিশিং লৈরিবা অসি খঙলদুনা, ওদিও-ভিজুএল কো-প্রদক্সন এগ্রিমেন্ত ফগৎহন্দুনা লৈবাক অনিগী মরক্তা মতেং পাংনবা হেনগৎহনবা হায়না লুচিংবা অনিনা য়ানরে অমসুং ফিল্মশিং পুন্না পুথোকমিন্নবা পুক্নিং থৌগৎনবা লৈবাক অনিগী মরক্তা মতেং পাংনবা হেনগৎনবা জোইন্ত কম্মিসন অমা শেম্বদা তরাম্না ওকখ্রে।
23. লৈবাক অনিগী মরক্তা মীগা-মীগা লৈনবা মরীশিং অমসুং কন্সুলারগী থবকশিং ফগৎনবা, স্পেনগী বরসেলোনাদা ভারতকী অহানবা কন্সুলেত জেনেরেল থবক হৌখিবা অমসুং বেঙ্গালুরুদা স্পেনগী কন্সুলেত জেনেরেল হাংদোক্নবা ৱারেপ লৌখিবদা লুচিংবা অনিনা তরাম্না ওকখ্রে।
ইয়ু অমসুং ভারতকী মরীশিং
24. ইন্দিয়া-ই.য়ু স্ত্রাতেজিক পার্তনরশিপ মপাঙ্গল কনখৎহন্নবা অমসুং ফ্রি ত্রেদ এ্রগ্রিমেন্ত, ইনভেস্তমেন্ত প্রোতেক্সন এগ্রিমেন্ত অমসুং জিওপোলিতিকেল ইন্দিকেসন্স এগ্রিমেন্তগী ই.য়ু-ইন্দিয়া ৱারি শান্নবা খুমাঙচাউশিনহন্নবা প্রধান মন্ত্রী মোদী অমসুং রাস্ত্রপতি সাঞ্চেজনা অমুক হন্না থাজবা পীখ্রে।
25. ই.য়ু-ইন্দিয়া কন্নেক্তিবিতি পার্তনরশিপগী পান্দমশিং মপুংফানা থবক ওইনা পাংথোক্নবা মখোয় পুন্না থবক তৌমিন্নবা হেনগৎহনবা হায়না মখোয়না য়ানরে অমসুং ভারত অমসুং য়ুরোপকী মরক্তা চৎথোক-চৎশিন ফগৎনবা ইন্দিয়া-মিদল ইস্ত-য়ুরোপ ইকোনোমিক কোরিদোর প্রোজেক (আই এম ই ই সি)গী খুদোংচাবশিং মশক খঙলে। ললোন-ইতিক, শেন থাদবা, তেক্নোলোজি, ইনর্জি, লোজিস্তিক্স, হিথাংফমশিং অমসুং ইনফ্রাস্ত্রকচর শেমগৎপদা লমদম অসিগী লৈবাকশিংগী মরক্তা মতেং পাংনবগী খুদোংচাবশিং মখোয়না খঙদোক্লে।
মালেমগী থৌদোক-ৱাথোকশিং
26. য়ুক্রেন্দা লাল চৎথরিবা অসিদা লুচিংবা অনিনা কন্না নুঙনাংবা ফোঙদোকখ্রে অমসুং মালেমগী আইনশিং অমসুং য়ু.এন চার্তরগী ফিদমশিং অমসুং মনিংতম্বা অমসুং ঙমখৈগী অপুনবা শক্তম ইকায়খুম্নবগা লোয়ননা অপুনবা, খুদক্তা অমসুং তুংকোইনা চৎনবা য়াগদবা শান্তি পুরকপগী তঙাইফদবা অদু অমুক হন্না ফোঙদোকখ্রে। মুক্নরিবা অসি তুংকোইবা অমসুং শান্তি ওইবা ৱারোইশিন অমা পুরক্নবা মরী লৈনবশিংগী মরক্তা ৱারি শান্নবা অমসুং কুতনিতিগী থবকশিংগী মরুওইবা অদু মখোয়না ফোঙদোকখি। মুক্নবা অসি ৱারি শান্নদুনা য়ানবা পুরক্নবা পান্দমদা পায়খৎপা থবকশিং শৌগৎনবা পাউ ফাওনবা হায়না লৈবাক অনিনা য়ানরে।
27. মিদল ইস্ততা শান্তি পুরক্নবা মখোয়গী অচেৎপা থাজবা অদু মখোয়না ফোঙদোক্নখ্রে অমসুং নোংচুপ এসিয়াদা সেকুরিতিগী ফিবমদা মুক্নবা হেনগৎলকপদা মখোয়না নুঙনাংবা ফোঙদোকখ্রে অমসুং মরী লৈনবশিং তপথনা লৈনবা খঙহনখ্রে। ৱাফম খুদিংমক ৱারি শান্নবা অমসুং কুতনিতিগী খুৎথাংদা ৱারোইশিন পুরক্নবা মখোয়না তকশিনখ্রে। ওক্তোবর ৭,২০২৩ দা ইজরেলদা চৎথখিবা তেরর এত্তেক লুচিংবা অনিনা অমতা ওইনা য়ানিংদবা ফোঙদোকখ্রে অমসুং গাজাদা মীচম মীয়াম কয়া লৈখিদবা অমসুং অৱাবা কয়া মায়োক্নরিবা অসি খঙলে অমসুং অথুবা মতমদা লোইশিন্নবা তকশিনখ্রে। ফাজিন্দুনা থম্লিবশিং খুদক্তা থাদোক্নবা, খুদক্তা নোংমৈ কাপ্নবা লেপ্নবা অমসুং গাজাদা অৱা-তেংবাংগী পোৎলমশিং শোইদনা য়ৌহন্নবা মখোয়না খঙহনখ্রে। খুদক্তা মীচম মীয়ামগী পুন্সি ঙাক-শেনবগী দরকার ওইবা অদু মখোয়না থমখ্রে অমসুং লৈবাকশিংনা মালেমগী আইনশিং ঙাক্না চৎনবা তকশিনখ্রে। লৈবাক অনি থোক্না খায়দোকপা, পেলেস্তাইনগী মনিংতম্বা অমসুং চৎনবা য়াবা লৈবাক অমা লিংখৎপা, নাকল অনিমক্না খঙলবা ঙমখৈগী মনুংদা লৈবা, ইজরেলগা লোয়ননা শান্তি অমসুং সেকুরিতি লৈহনবা অমসুং পেলেস্তাইন্না য়ু.এনগী মেম্বর ওইবদা মখোয়না শৌগৎপা হায়না মখোয়গী থাজবশিং লুচিংবশিংনা অমুক হন্না ফোঙদোকখ্রে।
28. লেবানন অমসুং ব্ল লাইন পরিংদা মুক্নবা অমসুং হিংশা হেনগৎলকপদা নুঙনাংবা নাকল অনিমক্না অমুক হন্না ফোঙদোকখ্রে অমসুং য়ু.এন.এস.সি রিজোলুসন ১৭০১ মপুংফানা থবক ওইনা পাংথোক্নবা মখোয়গী থাজবা অমুক হন্না পীখ্রে। লান্মী য়াম্না মতেং পাংলিবা লৈবাকশিং ওইনা, য়ুনিফিলদা খুৎ থারকপদা মখোয়না য়ানিংদবা ফোঙদোকখ্রে অমসুং পিছকিপ্পরশিং অশোই-অঙাম থোকহন্দবা অসি য়াম্না মরুওইবনি হায়না মখোয়না ফোঙদোকখি। য়ু.এনগী মফমশিং হিংশাগী থবক থোকহন্দবা অমসুং মখোয়গী ৱারেপশিং খুদিংমক্না ইকায়খুম্নবা উৎকদবনি।
29. নিয়মশিংদা য়ুম্ফম ওইবা মালেমগী ওর্দর, লৈবাক অমনা অমগী মনিংতম্বা ইকায়খুম্নবা অমসুং য়ানদবশিং শান্তি ওইনা ৱারোইশিন পুরকপা অমসুং রিজনেল ইন্সতিতুসনশিংনা শৌগৎতুনা, মনিংতম্বা, অথিংবা লৈতবা, খুদিংমক কোনশিনবা, শান্তি লৈবা অমসুং নুংঙাই-য়াইফবা ইন্দো-পেসিফক অমা লৈহন্নবা নাকল অনিনা তকশিনখ্রে। য়ুনাইতেদ নেসন্স কনভেন্সন ওন লো ওফ সি (য়ু এন সি এল ও এস) ১৯৮২ অমসুং মালেমগী আইনশিং ঙাক্তুনা অথিংবা লৈতনা ললোন-ইতিক পাংথোকপা অমসুং মনিংতম্না জহাজ চৎথোক-চৎশিন তৌবগী মরুওইবা অদু মখোয়না ফোঙদোকখ্রে। ইন্দো-পেসিফিক্তা সমুদ্রগী শরুক য়েংশিন্নবা, ঙাক-শেন্নবা, তুংকোইনা চৎনবা য়ানবা, সেকুরিতি অমসুং চাউখৎ-থৌরাংগী অপুনবা থবকশিং পায়খৎনবা ইন্দো-পেসিফিক ওসিন্স ইনিসিয়েতিপ (আই পি ও আই) শরুক য়ানবা স্পেন্না ভারত্তা চেবাউ পীরকপা অদু নাকল অনিনা খঙলে। ভারতকী ইন্দো-পেসিফক ভিজন অমসুং ইন্দো-পেসিফিক্তা মতেং পাংনবগী ই.য়ু স্ত্রাতেজিগী মরক্তা অমনা অমনা মতেং পাংনবা অদু মখোয়না খঙলে।
30. ভারত অমসুং লেতিন অমেরিকা লৈবাকশিংগী মরক্তা রাজনিতি অমসুং ললোন-ইতিক্কী মরীশিং ফগৎলক্লিবা অমসুং লৈবাক অসিগা স্পেনগা পুৱারি, শেন-থুম অমসুং নাতকী মরীশিং লৈনরিবা অসি য়েংলগা, লমদম অসিদা শেন থাদবা অমসুং চাউখৎ-থৌরাংগী লমদা নাকল অহুম মতেং পাংনবগী ওইথোকপশিং অদু লুচিংবা অনিমক্না খঙলে। এসোসিয়েত ওবজার্ভর অমা ওইনা, ইবেরো-অমেরিকয়ান কনফরেন্স শরুক য়ানবা ভারতকী চেরোল অদু স্পেন্না তরাম্না ওকখ্রে অমসুং মসিনা লেতিন অমেরিকাগী লৈবাকশিংগা লৈনরিবা মরীশিং মপাঙ্গল কনখৎহন্নবা মফম অমা পীরগনি। ২০২৬ দা স্পেনদা পাংথোক্কদৌরিবা ইবেরো-অমেরিকান সম্মিৎকী থবক লোইশিন্নবা নাকল অনিমক্না থাজবা পীরে অমসুং মসিনা স্পেনগী প্রো তেম্পর সেক্রেরিয়েতকী থবকশিংদা ভারতনা থৱায় য়াওনা শরুক য়াগনি।
মালেমগী লৈবাকশিং অমসুং মালেমগী লুপশিং মতেং পাংনবা
31. য়ু.এন সেকুরিতি কাউন্সিল অমসুং অতোপ্পা মালেমগী লুপশিং য়াওনা য়ুনাইতেদ নেসন্সকী মনুংদা মতেং পাংনবা অমসুং পুন্না থবক তৌমিন্নবা হেনগৎহনবদা লুচিংবা অনিমক য়ানরে। মালেমগী শান্তি অমসুং চাউখৎপা পুরক্নবা নিয়মশিংদা য়ুম্ফম ওইবা মালেমগী লৈঙাক অমা লৈহনবগী মরুওইবা অদু মখোয়না তকশিনখ্রে। হৌজিক থেংনরবা ফিবমশিং মমি তাবা, য়ু.এন.এস.সি য়াওনা মালেমগী লুপশিংদা মশিং য়াম্না মীহুৎ শরুক য়ানবা, মপুংফানা থবক তৌনবা, গনতন্ত্রিক ওইনবা, মরম চানা অমসুং অরোন-অথুপ লৈতনা থবক তৌনবা মালেমগী লুপশিং চাউখৎহন্নবা মখোয়না থাজবা পীনখ্রে। ২০৩১-৩২ তার্মগী স্পেন্না য়ু.এন.এস.সিগী কেন্দিদেত ওইবদা ভারতনা শৌগৎপা ফোঙদোকখ্রে অমসুং ২০২৮-২৯ তার্মগী ভারতনা য়ু.এন.এস.সিগী কেন্দিদেত ওইবদা স্পেন্না শৌগৎপা ফোঙদোকখ্রে।
32. চাউখৎ-থৌরাং পায়খৎনবা ২০২৫ দা স্পেনগী সেভিল্লাদা পাংথোক্কদৌরিবা ফাইনান্সকগী মরিশুবা মালেমগী মীফমদা লুচিংবা অনিমক্না থাজবা থম্লি অমসুং মসিনা স্তেনেবল দিবলপমেন্ত গোলশিং ফংনবা অৱাৎপা লৈরিবশিং মেনখৎনবা মরুওইবা থবকশিং মশক খঙদোক্নবা অচৌবা খুদোংচাবা অমা পীরগনি।
33. গ্লোবেল সাউথকী মরুওইবা অমসুং অরুবা ৱাফমশিং অপুনবা ওইনা অমসুং মাইপাক্না খন্নখিবা জি-২০ মাইপাক্না চিয়ারমেন ওইখিবদা রাস্ত্রপতি সাঞ্চেজনা প্রধান মন্ত্রী মোদী থাগৎপা ফোঙদোকখ্রে। জি-২০গী পর্মিনেন্ত ইনভাইতি অমা ওইনা স্পেন্না মরুওইবা থবক কয়া মতেং পাংখিবদা প্রধান মন্ত্রী মোদীনা থাগৎপা ফোঙদোকখ্রে।
34. স্তেনেবল ইনর্জি চাউখৎনবা অমসুং অইং-অশাগী খল হোংলকপা চুশিন্নবা ঙম্নবা মতেং পাংনবা হেনগৎহনবা হায়না লুচিংবশিংনা য়ানরে। অইং-অশাগী খল হোংলকপা থেংন্নবা মালেমগী থবকশিং য়াংনা পায়খৎপগী দরকার ওইবা অদু মখোয়না খঙলে অমসুং পেরিস এগ্রিমেন্তগী তেম্পেরেচর গোল ফংনবা মতেং পাংনবা ক্লাইমেত ফাইনান্সকী অনৌবা গোল অমা য়াওনা পান্দম অমা ফংবা ঙম্নবা হন্দক বাকুদা পাংথোক্কদৌরিবা ক্লাইমেত সম্মিৎ (কোপ ২৯) মতুংইন্না মতেং পীন্নবা থাজবা পীনরে। মালেম শীনবা থুংবগী অইং-অশাগী খল হোংলকপদগী খুদোংচাদবা হেনগৎলক্লিবা থেংন্নবা লৈবাকশিংগী থবকশিংদা মতেং পাংনবা হেনগৎহনবগী দরকার ওইবা অদু মখোয়না ফোঙদোকখ্রে। রিন্যুএল ইনর্জিগী লমদা এম.ও.য়ু অথুবা মতমদা লোইশিন্নবগী থাজবা লুচিংবা অনিনা ফোঙদোকখ্রে। স্পেন্না গ্রিন ত্রান্সিসন অমা পুরকপদা ভারতনা থাগৎপা ফোঙদোকখ্রে অমসুং ইন্তরনেসনেল সোলার এল্লাইন্সতা স্পেন তরাম্না ওকখ্রে। পান্দম থমখিবা চহিদগী ঙনখৎনা রিন্যুএল ইনর্জিগী পান্দমশিং ভারতনা ফংখিবদা রাস্ত্রপতি সাঞ্চেজনা থাগৎপা ফোঙদোকখ্রে। অইং-অশাগী খল হোংলকপদগী থেংনরিবা অৱাবশিং কোকহন্নবা মালেমগী অপুনবা থবক অমা দরকার ওইরে হায়বা লুচিংবা অনিনা য়ানরে। নাকল অনিমক্না কোপ২৮ গী থবকশিং মপুংফানা পাংথোক্কনি।
35. খুদোংথিনিঙাই ওইবা লৈবাকশিং, সহরশিং অমসুং মীয়াম ইকং থেংন্নবা থৌরাং তৌনবা অমসুং চুশিন্নবা ঙম্নবা পাম্বৈশিং পায়খৎনবা থবক পায়খৎনবা মফম অমা ওইনা, ২০২২ দা লিংখৎখিবা ইন্তরনেসনেল দ্রাউথ রিসিলিয়েন্স এল্লাইন্সতা শরুক য়ানবা স্পেন্না ভারত্তা চেবাউ পীরকখ্রে।
36. তেরোরিস্ত প্রোক্সিশিং শীজিন্নবা অমসুং ঙমখৈ লান্না তেরোরিজম চৎথবা য়াওনা মখল খুদিংমক্কী তেরোরিজম অমসুং হিংশাগী থবকশিং লুচিংবা অনিমক্না অমতা ওইনা য়ানিংদবা ফোঙদোকখ্রে। মালেমগী শান্তি অমসুং তংদু-লৈতাবদা তেরোরিজম্না অচৌবা শিংবা অমা ওইরে হায়বা লুচিংবা অনিনা য়ানরে অমসুং থিন্থবা তৌদনা তেরোরিস্ত এক্তেকশিংদা চেন্নবশিং চৈরাক পীনবা তকশিনখ্রে। মখোয়গী মখাদা লৈবা লমশিং তেরোরিস্তকী থবকশিংদা শীজিন্নবা থিংনবা খুদক্তা থবক পায়খৎনবা মখোয়না লৈবাক খুদিংমক্তা তকশিনখ্রে য়ু.এন গ্লোবেল কাউন্তর-তেরোরিজম স্ত্রাতেজি অমসুং য়ু.এন সেকুরিত কাউন্সিলগী ৱারেপশিং থবক ওইনা পায়খৎপগী দরকার ওইবা অদু তকশিনখ্রে। অল কাইদা, আইসিস/দেস, লাস্কার-ই-তাইবা (এল ই তি), জেস-ই-মোহমদ (জে ই এম) অমসং মখোয়গী প্রোক্সি গ্রুপশিং য়াওনা য়ু.এন.এস.সিনা অথিংবা থমখ্রবা তেরোরিস্ত গ্রুপশিংগী মথক্তা অকনবা থবকশিং লৌখৎনবা মখোয়না তকশিনখ্রে। তেরোরিজমগী চৈথেং ফংলবশিং শৌগৎনবা অমসুং মখোয় শক্তি পীনবা স্পেন্না পায়খৎলিবা থবকশিং প্রধান মন্ত্রী মোদীনা থাগৎপা ফোঙদোকখ্রে।
37. খোঙচৎ অসিদা মহাক অমসুং মহাক্কী কাংবু তরাম্না ওকখিবদা রাস্ত্রপতি সাঞ্চেজনা প্রধান মন্ত্রী মোদী থাগৎপা ফোঙদোকখ্রে অমসুং তুংদা স্পেনদা লাক্নবা মহাক্না প্রধান মন্ত্রীদা চেবাউ পীখ্রে।
