In Pictures: PM Modi's visit to UAE

য়ুনাইতেদ অরাব ইমিরেতসকী রাস্ত্রপতি, ইকায়খুম্নরবা সৈখ মোহমদ বিন জয়েদ অল নাহয়ান অমসুং ভারতকী প্রধান মন্ত্রী শ্রী নরেন্দ্র মোদী ফেব্রুৱারি ১৩,২০২৪ দা অবু ধাবীদা উনখ্রে। রাস্ত্রপতি, ইকায়খুম্নরবা সৈখ মোহমদ বিন জয়েদ অল নাহয়াননা য়ু.এ.ইদা প্রধান মন্ত্রী শ্রী নরেন্দ্র মোদী তরাম্না ওকখি অমসুং ফেব্রুৱারি ১৪,২০২৪ দা দুবাইদা ৱার্ল্দ গভর্নমেন্ত সম্মিৎ ২০২৪দা ৱা ঙাংনবা হায়জবদা য়ারকপগীদমক মহাক্না থাগৎপা ফোঙদোকখি।

খোঙচৎ অসি হৌখিবা চহি ৯দা প্রধান মন্ত্রী শ্রী নরেন্দ্র মোদীনা য়ু.এ.ইদা লাকপদা ৭শুবা খোঙচৎনি হায়বা লুচিংবা অনিনা ফোঙদোকখি। প্রধান মন্ত্রীগী য়ু.এ.ইগী ইকোন কোনবা খোঙচৎ অদু দিশেম্বর ১,২০২৩ দা য়ু.এন.এফ.সি.সি কোপ২৮ মীফম শরুক য়ানবা দুবাইদা লাকখিবা অদুনা ওইখি। মহাক্না মফম অদুদা মীফমগী নাকলদা য়ু.এ.ইগী রাস্ত্রপতি, ইকায়খুম্নরবা সৈখ মোহমদ বিন জয়েদ অল নাহয়ানগা উনখি। খোঙচৎ মনুংদা, “য়ু.এ.ই কন্সেসস”তা “কোপ ফোর এক্সন”দা লমজিংবগীদমক ভারতনা কোপ২৮গী প্রসিদেন্সি ভারতনা থাগৎপা ফোঙদোকখি। “ত্রান্সফোর্মিং ক্লাইমেত ফাইনান্স” হায়বা হিরমদা কোপ২৮ প্রসিদেন্সিগী সেসন্দা য়ু.এ.ইগী রাস্ত্রপতিগা লোয়ননা প্রধান মন্ত্রী শরুক য়াখি অমসুং মীফমগী নাকলদা “গ্রিন ক্রেদিদস প্রোগ্রাম’দা অৱাংবা থাক্কী থৌরম অমা পুন্না পাংথোকমিন্নখি।

হৌখিবা চহি ৮দা রাস্ত্রপতি, ইকায়খুম্নরবা সৈখ মোহমদ বিন জয়েদ অল নাহয়াননা ভারত্তা মরিরক লাকখিবা, মহাক্কী ইকোন কোনবা খোঙচৎ ওইনা ১০শুবা ভাইব্রেন্ত গুজরাত সম্মিৎতা চীফ গেস্ত ওইনা শরুক য়ানবা জনুৱারি ৯-১০,২০২৪ দা লাকখিবা অদু লুচিংবশিংনা ফোঙদোকখি অমসুং থৌরম অদুদা প্রধান মন্ত্রী শ্রী নরেন্দ্র মোদীগা লোয়ননা শেন থাদবগী মতাংদা এম.ও.য়ু কয়া খুৎশিনবা অদু শরুক য়াখি।

২০১৭ দা রাস্ত্রপতি, ইকায়খুম্নরবা সৈখ মোহমদ বিন জয়েদ অল নাহয়ানগী ভারত খোঙচৎ মনুংদা কমপ্রেহেন্সিপ স্ত্রাতেজিক পার্তনরশিপ অমগী থাক্তা পুখৎলবা ভারত-য়ু.এ.ই লৈবাক অনিগী মরী লুচিংবা অনিনা খন্নখি। তোঙান-তোঙানবা হিরমশিংদা খুমাঙচাউশিনবদা মখোয়না অপেনবা ফোঙদোকখি অমসুং হৌখিবা চহি খর অসিদা লৈবাক অনিগী মরুপ-মপাং ওইবা মরী পাকথোক-চাউথোক্লে হায়না ফোঙদোকখি।

মখাগী অসি খুৎশীন্নবদা রাস্ত্রপতি, ইকায়খুম্নরবা সৈখ মোহমদ বিন জয়েদ অল নাহয়ান অমসুং প্রধান মন্ত্রী শ্রী নরেন্দ্র মোদী শরুক য়াখি :

I. বাইলেতরেল ইনভেস্তমেন্ত ত্রিতি
II. ইন্দিয়া-মিদল ইস্ত-য়ুরোপ ইকোনোমিক কোরিদোরগী ইন্তর-গভর্নমেন্তেল ফ্রেমৱার্ক এগ্রিমেন্ত
III. দিজিতেল ইনফ্রাস্ত্রকচর প্রোজেকশিংদা মতেং পীন্নবা মেমোরেন্দম ওফ অন্দরস্তেন্দিং
IV. ইলেক্ত্রিসিতি ইন্তরকন্নেক্নস অমসুং ললোন-ইতিক্কী লমদা মেমোরেন্দম ওফ অন্দরস্তেন্দিং
V. গুজরাতকী লোথালদা লৈরিবা নেসনেল মেরিতাইম হেরিতেচ মিউজমগা মতেং পীননবা মেমোরেন্দম ওফ অন্দরস্তেন্দিং
VI. য়ু.এ.ইগী নেসনেল লাইব্রেরি অমসুং আর্কাইবস অমসুং ভারতকী নেসনেল আর্কাইবসকী মরক্তা কোওপরেসন প্রোতোগোল
VII. ইন্সতেন্ত পেমেন্ত প্লেতফোর্মশিং-য়ু.পি.আই(ভারত) অমসুং এ.এ.এন.আই(য়ু.এ.ই) শম্ননবগী য়ানচে
VIII. দেবিদ/ক্রেদিদ কার্দ-রুপে(ভারত) অমসুং জয়ৱান(য়ু এ ই) শম্ননবা য়ানচে

খোঙচৎ অসিগী মাংওইননা, রাইতস লিমিতেদনা অবু ধাবী পোর্তস কম্পেনি অমসুং গুজরাত মেরিতাইম বোর্দনা অবু ধাবী পোর্ত কম্পেনিগা য়ানচে খুৎয়েক পীনখি। য়ানচেশিং অসিনা লৈবাক অনিগী মরক্তা হিথাংফমগী মচাকশিং শেমগৎপা অমসুং মখা তানা চৎথোক-চৎশিন হেনগৎহনবদা মতেং পাংগনি।

শেন-থুম অমসুং ললোন-ইতিক্কী মতেং পাংনবা হেনগৎহন্নবা অমসুং মতেং পাংনবা য়াবা অনৌবা হিরমশিং থিদোক্নবা লৈবাক অনিনা হোৎনরিবশিং লুচিংবা অনিনা থাগৎখি। মে ১,২০২২ দগী কমপ্রেহেন্সিপ ইকোনোমিক পার্তনরশিপ এগ্রিমেন্ত(সেপা) চৎনবা হৌবদগী য়ু.এ.ই-ভারতকী ললোন-ইতিক্কী মরীশিং চাউখৎলকপা উবদা মখোয়না তরাম্না ওকখি। মসিগী ফল ওইনা, চহি ২০২২-২৩গী ওইনা য়ু.এ.ই অসি ভারতকী অহুমশুবা খ্বাইদগী চাউবা ললোন-ইতিক্কী মরুপ অমা ওইরে অমসুং ভারতকী অনিশুবা খ্বাইদগী চাউবা মপান্দা পোৎ-চৈ থাদোকপা লৈবাক ওইরে। ২০২২-২৩দা য়ু.এস দোল্লর বিল্লিয়ন ৮৫ য়ৌদুনা ভারত অসি য়ু.এ.সিগী অনিশুবা খ্বাইদগী চাউবা ললোন-ইতিক্কী মরুপনি।

পান্দম থমখিবা চহি ২০৩০ য়ৌদ্রিঙৈদা লৈবাক অনিগী ললোন-ইতিক দোল্লর বিল্লিয়ন ১০০ য়ৌরকপদা লুচিংবশিংনা হরাওবা ফোঙদোকখি। লৈবাক অনিগী ললোন-ইতিক্কী মরীগী মরুওইবা অমা ওইরিবা য়ু.এ.ই-ইন্দিয়া সেপা কাউন্সিল(য়ুআইসিসি) হাংদোকপদা লুচিংবা অনিনা থাগৎপা ফোঙদোকখি।

হিরম কয়াদা লৈবাক অনিমক্তা মখা তানা শেন থাদবা হেনগৎহনবদা বাইলেতরেল ইনভেস্তমেন্ত ত্রিতিনা অচৌবা থৌদাং অমা লৌগনি হায়না লুচিংবশিংনা ফোঙদোকখি। ২০২৩দা ভারত্তা খ্বাইদগী য়াম্না শেন থাদবা লৈবাক য়ু.এ.ই ওইরি অমসুং এফ.দি.আই খ্বাইদগী য়াম্বদা ৭শুবা মফমদা লৈরি। ভারতনা য়ু.এ.ইগা বাইলেতরেল ইনভেস্তমেন্ত ত্রিতি অমসুং কমপ্রেহেন্সিপ ইকোনোমিক পার্তনরশিপ এগ্রিমেন্ত খুৎয়েক পীনরে অমসুং মসিদা লৈবাক অনিগী মরক্তা অৱাংবা থাক্কী শেন-থুমগী থবক তৌমিন্নবগী মমি তারে।

মালেমগী শেন-থুম চাউখৎপা হেনগৎহন্নবা অমসুং খুদোংথিবশিং মায়োক্নবা ঙম্নবা থবক ফজনা পাংথোকপা অমসুং মরম চানা থবক তৌবা মালেমগী ললোন-ইতিক্কী থবক অমগী মরুওইবা লুচিংবা অনিনা থমখি অমসুং নিয়মগী মতুংইনবা ললোন-ইতিক্কী থবকশিং পাংথোক্নবা পান্দমদা ফেব্রুৱারি ২৬-২৯,২০২৪ দা অবু ধাবীদা পাংথোক্কদৌরিবা ১৩শুবা দব্লিউ.তি.ও মিনিস্তরশিংগী মীফমগী মরুওইবা পনখি।

মখা তানা লৈবাক অনিগী ললোন-ইতিক চাউখৎহনগদৌরিবা অমসুং জেবেল অলি হিথাংফম শীজিন্নদুনা সেপা শীজিন্নবা হেনগৎহন্নবা মফম অমা ওইনা থবক তৌনবা জেবেল অলিদা ভারত মার্ত শেমগৎনবা ৱারেপ লৌখিবদা লুচিংবশিংনা তরাম্না ওকখি। মালেমগী পোৎ লৈরিবা মীওইশিং য়ৌহন্নবা অমসুং মখোয়গী পোৎথোকশিং মিদল ইস্ত, অফ্রিকা অমসুং য়ুরেসিয়া শীনবা থুংনা অফবা মফম অমা পীদুনা ভারত মার্তনা ভারতকী মাইক্রো, স্মোল অমসুং মেদিয়ম সেক্তরশিং শৌগৎকনি।

ফাইনান্সিএল সেক্তরদা অৱাংবা থাক্কী শেন-থুমগী থবকশিং পাংথোকপগীদমক লুচিংবা অনিনা থাগৎপা ফোঙদোকখি। নেসনেল পেমেন্তস কোওপরেসন ওফ ইন্দিয়া(এন পি সি আই)না য়ু.এ.ইগী সেন্ত্রেল বেঙ্কগা পুন্না থবক তৌমিন্নদুনা য়ু.এ.ইগী দোমেস্তিক কার্দ সিস্তেম জয়ৱান হৌদোকপগীদমক প্রধান মন্ত্রী মোদীনা সৈখ মোহমদ বিন জয়েদ অল নাহয়ান থাগৎপা ফোঙদোকখি। লৈবাক অনিগী ঙমখৈ লান্না শেন থাদোক-থাজিন তৌবা য়ানবা ইন্সতেন্ত পেমেন্ত প্লেতফোর্মশিং-য়ু.পি.আই(ভারত) অমসুং এ.এ.এন.আই(য়ু.এ.ই) শম্নহন্নবা য়ানচে খুৎয়েক পীনবদা মখোয়না তরাম্না ওকখি।

থাউ, গ্যাস অমসুং রিনিউএবল ইনর্জি য়াওনা ইনর্জিগী লমদা লৈবাক অনি মতেং পীনবা হেনগৎহন্নবা লম্বীশিং লুচিংবা অনিনা খন্নখি। মথংশীৎনা ১.২ এম.এম.তি.পি.এ অমসুং ০.৫ এম.এম.তি.পি.এগীদমক এদনোক গ্যাস অমসুং ইন্দিয়ান ওইল কোওপরেসন লিমিতেদ অমসুং গ্যাস ওথোরিতি ওফ ইন্দিয়া লিমিতেদ(গেল)গী মরক্তা অনৌবা মতম শাংনা এল.এন.জি পীনবা য়ানচে অনি খুৎয়েক পীনখিবদা মখোয়না থাগৎখি। হায়রিবা য়ানচেশিং অসি লৈবাক অনিগী মরক্তা ইনর্জিগী মতেং পাংনবগী অনৌবা যুগ অমা হৌবনি অমসুং অহেনবা খুদোংচাবশিং মশক খঙদোক্নবা লুচিংবা অনিমক্না কম্পেনিশিংগী পুক্নিং থৌগৎখি। হায়দ্রোজেন, সোলার ইনর্জি অমসুং গ্রিদ শম্নবগী মতাংদা মখা তানা মতেং পাংনবা হেনগৎহন্নবা হায়না নাকল অনিমক্না য়ানখি।

লৈবাক অনিগী মরক্তা ইনর্জিগী মতেং পাংনবগী অনৌবা যুগ অমা হৌদোকপা ওইনা ঙসি ইলেক্ত্রিসিতি ইন্তরকন্নেক্সন অমসুং ললোন-ইতিক্কী লমদা এম.ও.য়ু লৈনখিবা অদু লুচিংবশিংনা থাগৎখি অমসুং মসিনা কোপ২৮ মনুংদা প্রধান মন্ত্রী শ্রী নরেন্দ্র মোদীনা হৌদোকখিবা গ্রিন গ্রিদস-ৱান সন ৱান ৱার্ল্দ ৱান গ্রিদ থবক ওইনা পাংথোকপা ঙমহল্লগনি। এম.ও.য়ু অসিনা মখা তানা লৈবাক অনিগী মরক্তা ইনর্জিগী মতেং পাংনবা অমসুং চৎথোক-চৎশিনগী থবক ফগৎহল্লগনি হায়বগী থাজবা মখোয়না ফোঙদোকখি।

মহাক মশামক্না মতেং পাংবা অমসুং অবু ধাবীদা বাপস লাইশঙ শানবা লম পীবগীদমক প্রধান মন্ত্রীনা রাস্ত্রপতি সৈখ মোহমদ বিন জয়েদ অল নাহয়ান থাগৎপা ফোঙদোকখি। বাপস লাইশঙ অসি য়ু.এ.ই-ভারত মরুপ-মপাং ওইবা, অচেৎপা চৎনবীশিংগী মরীশিং অমসুং নুংশিননা হিংমিন্নবা, খাংবা কনবা অমসুং শান্তি ওইনা পুন্না হিংমিন্নবগী মতাংদা য়ু.এ.ইনা মালেমদা পীরিবা থাজবা হরাও-তয়াম্বা ফোঙদোকপনি হায়না নাকল অনিনা থমখি।

লৈবাক অনিগী নেসনেল আর্কাইবশিংগী মরক্তা মতেং পাংনবগী চৎন-কাংলোন  অমসুং হেরিতেচ অমসুং মিউজমশিংগী লমদা মতেং পীননবা এম.ও.য়ু: গুজরাতকী লোথালদা লৈরিবা মেরিতাইম হেরিতেচ কমপ্লেক্স শৌগৎনবা লৈবাক অনিগী মরক্তা থবক তৌমিন্নবনা আর্কাইবকী মচাকশিং অমুক হেন্না শেমজিনবা অমসুং ঙাক-শেন্দুনা থম্বগী লমদা লৈবাক অনিগী মরক্তা মতেং পাংননবা থবক পায়খৎকনি। লোয়ননা চহিচা কয়া কুইরবা ভারত-য়ু.এ.ই মরি অমসুং পুৱারিগী লনশিং ঙাক-শেনবদা মতেং পাংগনি।

মিদল ইস্তকী অহানবা আই.আই.তি ওইরবা অবু ধাবীদা লৈবা আই.আই.তি দিল্লিদা ইনর্জি ত্রান্সসিসন অমসুং স্তেনেবিলিতিগী অহানবা মাস্তর প্রোগ্রাম হৌদোকপা লুচিংবা অনিনা থাগৎপা ফোঙদোকখি। অৱাংবা থাক্কী তেক্নোলোজিশিং, আর্তিফিসিএল ইন্তিলিজেন্স অমসুং স্তেনেবল ইনর্জিদা মীৎয়েং থমদুনা ইজুকেসন অমসুং রিছার্সকী লমদা মতেং পাংননবা লৈবাক অনিমক্না থাজবা পীনখি।

য়ু.এ.ই-ইন্দিয়া কলচরেল কাউন্সিল ফোরম লিংখৎপা অমসুং লৈবাক অনিমক কাউন্সিলগী মেম্বর ওইবগী মতাংদা খুমাঙচাউশিনবা লুচিংবা অনিনা হন্না য়েংশিনখি। লৈবাক অনিমক কান্নবা ফংনবা কলচর অমসুং লৌশিংগী কুতনিতিগী থৌদাংগী লমদা মখোয়না তকশিনখি।

লমদম অসিদা মখা তানা চৎথোক-চৎশিনগী থবকশিং ফগৎহন্নবা পান্দমদা ভারত অমসুং য়ু.এ.ইনা লুচিংদুনা ইন্দিয়া-মিদল ইস্ত-য়ুরোপ ইকোনোমিক কোরিদোরগী ইন্তর-গভর্নমেন্তেল ফ্রেমৱার্ক এগ্রিমেন্তগী ভারত অমসুং য়ু.এ.ইগী মরক্তা ইন্তরগভর্নমেন্তেল ফ্রেমৱার্ক অমা শেম্নবা এম.ও.য়ু অমা লৈনবদা লুচিংবশিংনা তরাম্না ওকখি। ফ্রেৱার্ককী মরুওইবা মচাকশিংগী মনুংদা লোজিসতিক্স প্লেতফোর্ম অমা শেমগৎপা অমসুং থবক তৌবা, দিজিতেল ইকোসিস্তেম অমা লৈহনবা, মখল খুদিংমক্কী কার্গো, বব্লক, কন্তেন্নরশিং অমসুং লিকুইত বব্লকশিংগী সপ্লাই চেন সর্বিস লৈহনবা য়াওরি। মসিনা  ইন্দিয়া-মিদল ইস্ত-য়ুরোপ ইকোনোমিক কোরিদোরগী মখাদা অহানবা য়ানচে ওইগনি অমসুং মসি নিউ দিল্লিদা পাংথোকখিবা জি-২০ মীফমগী নাকলদা হৌদোকখিবনি।

দিজিতেল ইনফ্রাস্ত্রকচর সেক্তরদা পুন্না মশক খঙদোক্নবা, থিজিন্নবা অমসুং শেন থাদনবগী লমদা থিজিন্নবা এম.ও.য়ু অমা খুৎয়েক পীনবদা লুচিংবা অনিনা তরাম্না ওকখি। এম.ও.য়ু অসি য়ু.এ.ইগী ইনভেস্তমেন্ত মিনিস্ত্রি অমসুং ভারতকী ইলেক্ত্রোনিক্স অমসুং ইনফোর্মেসন তেক্নোলোজি মিনিস্ত্রি অনিগী মরক্তা খুৎয়েক পীনখিবনি অমসুং য়ু.এ.ই অমসুং ভারত্তা সরকার অমসুং লনাই লুপশিংগী মরক্তা থবক তৌমিন্ননবা পান্দম থম্লি। মসিনা ভারত্তা সুপরকম্পুতর ক্লস্তর অমা লিংখৎনবা অমসুং ভারত্তা দেতা সেন্তর প্রোজেকশিং হৌদোক্নবা ওইথোকপা য়াবশিং মশক খঙদোক্নবা পান্দম থম্লি।

মহাক অমসুং ভারতকী মীহুৎ কাংবু তরাম্না ওকপগীদমক প্রধান মন্ত্রী শ্রী নরেন্দ্র মোদীনা রাস্ত্রপতি সৈখ মোহমদ বিন জয়েদ অল নাহয়ান থাগৎপা ফোঙদোকখি।