প্রধান মন্ত্রীনা ওফিসর ত্রেনীশিংগা লোইননা হরাও তয়াম্না ৱারী ৱাতাই শানখ্রে
ইন্দিয়ন ফোরেন সর্ভিস (আই.এফ.এস.)কী ২০২১ বেৎচকী ওফিসর ত্রেনীশিংগা প্রধান মন্ত্রী শ্রী নরেন্দ্র মোদীগা ঙসিগী অঙনবদা লোক কল্যান মার্গ ৭দা উনখ্রে।
হরাও তয়াম্না য়াম্না য়াংনা শানখিবা ৱারী অদুদা প্রধান মন্ত্রীনা আই.এফ.এস. ওফিসর ত্রেনীশিংবু সর্ভিস অসি চঙলকখিবগীদমক থাগৎখি অমসুং মখোয়না মালেমগী থাক্তা ভারতকী মহুৎ শিন্নবগী খুদোংচাবা অমা ফংলগনি হায়খি। মখোয়না সর্ভিস অসিদা চঙলকখিবগী মরমশিংগী মতাংদা মহাক্না খন্ন-নৈনখি।
২০২৩বু মালেমগী মিলেৎকী চহিগী মতাংদা ৱারী শারদুনা, মিলেৎপু হেন্না পামহন্দুনা ঐখোয়গী লৌমীশিংদা মতৌ করম্না মখোয়না কান্নবা ফংহনগদগে হায়বগী মতাংদা কুপ্না খন্নখি। মিলেৎশিং অসিনা মতৌ করম্না অকোইবদা শোক্তবা অমসুং হকচাংদা কান্নবা পীবা পোৎলম অমা ওইরিবনো হায়বগী মতাংদা খন্নখি। মহাক্না লাইফ (লাইফস্তাইল ফোর এনভাইরোনমেন্ত)কী মতাংদা ৱারী শাখি অমসুং মতৌ করম্না মীওই অমনা হিংবগী মওং হোংদুনা অকোইবদা কান্নবা ফংহনবা য়াবগে হায়বগী মতাংদসু ফোংদোকখি। ওফিসর ত্রেনীশিং অসিনা হন্দক চহিগী নীংখা তমখিবা নুমিৎকী ৱারোলদা পুথোকখিবা পঞ্চ প্রানগী মতাংদা খন্নখি অমসুং মখোয়বু ফংনবগীদমকা আই.এফ.এস. ওফিসরশিংনা করি তৌবা য়াবগে হায়বদু খঙহনখি।
প্রধান মন্ত্রীনা ওফিসর ত্রেনীশিংবু মথংগী চহি ২৫গীদমক মঙম শান্না খন্দুনা থৌরাং তৌনবা, হায়রিবা মতম অসিগী মনুংদা মখোয়না মতৌ করম্না লৈবাক অসিগী চাউখৎনবা হোৎনবা য়াবগে হায়বগী মতাংদা হৌদোকখি।
