তাইম্স নাউ সমিৎতা ৱা ঙাংবদা প্রধান মন্ত্রী মোদীনা হায়খি তেক্স থিরিবশিংনা পোৎলুম পুদনবা হোৎনবা মহাক্কী সরকারনা পাম্মি। মহাক্না হায়খি থৌরাংশিংদা য়ুম্ফম ওইবা ভারতকী তেক্স সিস্তেম অসি হৌজিক মীয়ামগী শাফগদবা তেক্স সিস্তেম অমা ওইহল্লে।
প্রধান মন্ত্রীনা অওনবশিং হায়বদি জি.এস.তি., চহি অসিগী বজেৎতা ওপস্নেল ইনকম তেক্স স্লেবশিং হৌদোকপা অমসুং কোর্পোরেৎ তেক্স হন্থবগী মতাংদা ৱা ঙাংখি। মহাক্না হায়খি চাদা ১৪.৪ ওইরিবা জি.এস.তি. রেত অসি সরকারনা চাদা ১১.৮দা হন্থহল্লে। ইনকম তেক্স খোৎপগী মতাংদা অমসুং মীয়ামদা খুদোংচাদবা থোক্তনবা সরকারনা পায়খৎলিবা থবকশিং প্রধান মন্ত্রীনা ফোংদোকখি।
তেক্স পীবগী মরুওইবা অমসুং মসিনা কমদৌনা ইনফ্রাস্ত্রকচরশিং অমসুং মীয়ামগী তঙাইফদবশিং শেমগৎপগে হায়বগী মতাংদা প্রধান মন্ত্রী মোদীনা ফোংদোকখি। লৈবাক্কী চাউখৎ-থৌরাংগীদমক তেক্স পীনবা মীয়ামদা তকশিল্লদুনা প্রধান মন্ত্রী মোদীনা হায়খি মীওই করোর অহুম হেন্না ললোন-ইতিক নত্ত্রগা লমকোয়বগীদমক মপানদা চৎলি। মীওই কয়া কারশিং লৈরি। অদুবু মীওই করোর ১৩০গী মনুংদা শুপ্নগী মীওই করোর ১.৫ খক ইনকম তেক্স থিরি। মহাক্না হায়খি কয়াদা থাজনীংঙাই ওইদ্রিবনো অদুবু অশেংবদি লৈবাক অসিদা শুপ্নগী মীওই ২,২০০ খক্না চহি অমদা লুপা করোর তাল্লি।
