নমস্কার!
ইকায়খুম্নরবী
প্রধান মন্ত্রী সৈখ হসিনা,
অসামগী চীফ মিনিস্তর হিমান্তা বিশ্বা শর্মা,
য়ুনিয়ন কেবিনেদকী ঐগী মরুপ, শ্রী হরদিপ পুরি,
অসামদগী লাকপা ভারত সরকারগী মিনিস্তর, শ্রী রামেশ্বর তেলি,
বাংলাদেস সরকারগী ইকায়খুম্নরবা মিনিস্তরশিং,
অমসুং থৌরম অসি শরুক য়ারিবা অতোপ্পশিং,
খুরুমজরি!
ঙসি ভারত-বাংলাদেসকী মরীগী পুৱারিদা অনৌবা পন্দুব অমা হাংদোক্লে। ইন্দিয়া-বাংলাদেস ফ্রেন্দসিপ পাইপলাইন অসি ঐখোয়না সেপ্তেম্বর ২০১৮দা মসিগী উরেপ-উয়ুং তমখিবনি। প্রধান মন্ত্রী সৈখ হসিনাগা লোয়ন্না ঙসি মসি শঙ্গাবগী খুদোংচাবা অমা ফংবা অসিদা ঐ হরাওই।
কোবিদ-১৯ লাইচৎ থেংনরবশু প্রোজেক অসিগী থবক মখা তানা শুবদশু অপেনবা পোকই। পাইপলাইন অসিনা বাংলাদেসকী অৱাংথংবা শরুক্তা লৈরিবা তোঙান-তোঙানবা জিলাশিংদা হায়-স্পিৎ দিজল মিল্লিয়ন মেত্রিক তন ১ পীবা ঙম্লগনি। পাইপলাইনা অসিনা থাউ পীবদা চাদিং হন্থহনবদা নত্তনা কার্বোন ফুদপ্রিন্তশু হন্থহল্লগনি। লৌউ-শিংউগী লমদা অহোঙবা মমলদা অমসুং অশোইবা লৈতনা দিজল ফংহনবগী অখন্নবা কান্নবশু ফংলগনি। মসিনা মফম অদুগী উদোগশিংদশু কান্নবা পীরগনি।
হৌজিক থেংনরিবা মালেমগী ফিবম অসিদা চাউখৎলক্লিবা ইকোনোমি কয়া মখোয়না চীঞ্জাক অমসুং ইনর্জি ৱাৎতনা ফংনবা হোৎনবদা অৱাবা কয়া মায়োক্নরি। ফিবম অসিদা, ঙসিগী থৌরম অসি হেন্না মরুওইবা অমনি।
মরুপশিং,
হৌখিবা চহি খর অসিদা, প্রধান মন্ত্রী সৈখ হসিনাগী লমজিং মখাদা, বাংলাদেস শিংথাবা য়ানা চাউখৎলে অমসুং মসিগীদমক ভারতমচা খুদিংমক্না চাউথোকচবা পোক্লি। বাংলাদেসকী চাউখৎপগী খোঙচৎ অসিদা ঐখোয়না মতেং পাংবা ঙম্বা অসিদা ঐখোয়শু হরাওই। মসিগী পাইপলাইন অসিনা বাংলাদেসকী চাউখৎপা মখা তানা য়াংশিনহনগনি অমসুং লৈবাক অনিগী মরক্তা চৎথোক-চৎশিনগী খুদোংচাবা হেনগৎলকপগী মতিক চারবা খুদম অমশু ওইরগনি হায়না ঐনা থাজৈ। ঐখোয়গী লম্বী-থোংগী য়ুম্বী খুদিংমক ঐখোয়না মপাঙ্গল কন্না থম্বা হায়বসি তঙাইফদে। ত্রান্সপোর্তকী হিরমদা ওইগেরা, ইনর্জিগী লমদা, ইলেক্ত্রিসিতিগী লমদা, নত্ত্রগা দিজিতেলগী লমদা, ঐখোয়না শম্নবা হেনগৎলিবমখৈ, ঐখোয়গী মীয়ামগী মরক্তা লৈনবা মরীশিং মপাঙ্গল কনখৎলক্কনি।
১৯৬৫ মমাঙদা লৈরম্বা রেল চেনবা অদুদা হঞ্জিনহন্নবা মহাক্কী পান্দমগী মতাংদা চহি খরগী মমাঙদা প্রধান মন্ত্রী সৈখ হসিননা ফোঙদোকখিবা অদু ঐ নিংশিংলি। মতম অদুগী হৌনা লৈবাক অনিনা হিরম অদুদা খুমাঙচাউশিল্লে। মদুগী ফল ওইনা, কোবিদ-১৯ লাইচৎ মনুংদা হায়রিবা রেল নেতৱাদর্ক অদু ফাওরগা ঐখোয়না বাংলাদেসতা ওক্সিজেন পীবা ঙমখি। মহাক্কী তুংগী শান্না উবা ঙম্বা পান্দম অদুগীদমক ঐনা থম্মোয় শেংনা প্রধান মন্ত্রী সৈখ হসিনা থাগৎপা পাম্মী।
মরুপশিং,
ঐখোয়না অমনা অমগী ইলেক্ত্রিসিতিগী লমদা মতেং পাংনবা য়াম্না মাইপাক্লে। ঙসিদি ভারতনা বাংলাদেসতা মেগা ৱাত ১১০০ হেনবগী ইলেক্ত্রিসিতি পীরি। মাইত্রি সুপর থর্মেল পৱার প্লান্তগী অহানবা য়ুনিতশু থবক হৌরে। মসি হৌখিবা চহিদা প্রধান মন্ত্রী সৈখ হসিননা ভারত্তা লাক্লম্বা খোঙচৎ মনুংদা শঙ্গারম্বনি। অনিশুবা য়ুনিত অথুবদা থবক হৌনবা হৌজিক ঐখোয় থবক পায়খৎলি।
ইনর্জিগী মতেং পাংনবগী মতাংদা খন্নবা মতমদা, ঐখোয়গী পেত্রোলিয়মগী ললোন-ইতিক অসি য়ু.এস দোল্লার বিল্লিয়ন ১ হেল্লে। হায়দ্রোকার্বোনশিংগী অপুনবা ভেলু চেন্দা ঐখোয়না মতেং পাংনবা অসি চাউথোকচনিঙাই ওইবা ৱাফম অমনি। মসি অপ-স্ত্রিম, মিদ-স্ত্রিম, নত্ত্রগা দাউন-স্ত্রিম ওইবা য়াই। মসিগী পাইপলাইন অসিনা, মতেং পাংনবা অসি হেন্না মপুংফাহনগনি।
প্রোজেক অসিদা শরুক য়ারিবা ওফিসিএল খুদিংমক, মরুওইনা নুমালিগর রিফাইনরি অমসুং বাংলাদেস পেত্রোলিয়ম কোর্পোরেসনগী ওফিসিএলশিং ঐনা থাগৎচরি।
ইকায়খুম্নরবী,
ঙসিগী শঙ্গাবা থৌরম অসি বঙ্গবন্ধু সৈখ মজিবুর রহমনগী মপোক নুমিৎকী নোংমগী মতুংদা পাংথোকপা অসি কয়াদা মপা চান্নবা অফবা নুমিৎ অমা ওইরে! বঙ্গবন্ধুগী ‘সোনার বাংলা’গী পান্দম অদুদা অপুনবা লমদম অমা চাউখৎপা অমসুং নুংঙাইবা য়াওরে। মসিগী প্রোজেক অসি মহাক্কী মঙলানগী চপ চারবা খুদম অমনি।
ইকায়খুম্নরবী,
অদোমগী লমজিংদগী ভারত-বাংলাদেসকী মতেং পাংনবগী হিরম খুদিংমক কান্নবা ফংলে। মসিগী প্রোজেক অসিশু মখোয়গী মনুংদা অমনি। থৌরম অসিদা শরুক য়াবগীদমক অদোম থাগৎচরি। প্রোজেক অসিদগী কান্নবা ফংগদৌরিবা মীওই খুদিংমক কয়ারক হন্না থাগৎচরি।
অদোম থাগৎচরি !
