য়োর এক্সেলেন্সী, রাস্ত্রপতী সিসি,
লৈবাক অনিমক্কী মন্ত্রীশিং অমদি মীথুংশিং
মিদিয়াগী মরূপশিং,
তাঞ্জা অসিদা, ঐনা রাস্ত্রপতী সিসি, অমদি ভারত্তা লেঙবিরক্লিবা মহাক্কী দেলিগেসনবু তরাম্না ওকচরি। রাস্ত্রপতী সিসিনা হয়েং ঐখোয়গী রিপব্লিক দেগী থৌরমদা অথোইবা মীথুং ওইনা শরুক য়াগদৌরি। মসি ভারত পুম্বগী চাউথোকচনিংঙাই অমদি নুংঙাইবা ৱাফম অমনি। ইজীপ্তকী লান্মীগী কন্তিঞ্জেন্ত অমনা ঐখোয়গী রিপব্লিক দেগী পেরেদতা শরুক য়াগদৌরিবা অমদি মসিগী মীংচৎ হাপ্লিবা অসিদসু ঐনা হরাওবা ফোঙদোকচরি।
মরূপশিং,
ভারত অমদি ইজীপ্ত মালেমগী খ্বায়দগী লিরবা খুন্থোকশিংগী মনুং চল্লি। ঐখোয়গী মরী চহি লিশিং কয়া শমথদুনা লাক্লি। চহি লিশিং মরি হেনবগী মমাঙদা, ইজীপ্তকা গুজরাতকী লোথাল হিথাংফমগগী মরক্তা লল্লোন ইতিক তৌনরম্মী। অদুগা মালেমসিদা অহোংবা কয়া লাকখ্রবসু, ঐখোয়গী মরী মরা চেৎনা লৈখি, অমদি ঐখোয়গী তেংবাংনবগী থৌওং হেন্না হেন্না মপাঙ্গল কনখৎলকখি।
ঐখোয়গী তেংবাংনবগী মরী হৌখিবা চহি খরসিদা হেন্না চেৎশিল্লক্লি। মসিগীদমক ঐনা ঐগী মরূপ রাস্ত্রপতী সিসিগী লুচিংবা অমা ওইবগী মতিংদা ক্রেদিৎ পীজরি।
চহি অসিদা, ভারতনা ইজীপ্তপু লৈবাকসিগী জি-২০ প্রেসিদেন্সী মনুংদা লৈবাকসিগী মীথুং ওইননবা ৱাফম থমজখি, মসিনা ঐখোয়গী অখন্নবা মরূপ মপাং ওইবগী মরী উৎলি।
মরূপশিং,
অরাবিয়ন সমুদ্রগী নাকল অমদা ভারত লৈরি অদুগা নাকল অমদনা ইজীপ্ত লৈরি। লৈবাক অনিগী মরক্তা স্ত্রেতেজিক ওইবা মওংদা তেংবাংনবনা লমদম অসোমদা ইং তপ্পা অমদি নুংঙাই য়াইফবা পুরকপদা মতেং ওইগনি। মরম অসিনা ঙসিগী মীফমসিদা, রাস্ত্রপতী সিসি অমদি ঐহাক্না নাকল অনিগী ওইবা খোঙবু ওইবগী মরীবু “স্ত্রেতেজিক পার্ত্নরসিপ”কী থাক্তা থাঙ্গৎনবা ফিরেপ লৌমিন্নরে। ইন্দিয়া-ইজীপ্ত স্ত্রেতাজিক পার্ত্নরসিপকী মখাদা, ঐখোয়না রাজনিতী, সিক্যুরিতী, শেন্মিৎলোন অমদি সাইন্তিফিক হীরমশিংদা হেন্না চাউনা তেংবাংননবগী মতম শাংবা ফ্রেমৱর্ক শেমগৎনবা ফিরেপ লৌমিন্নরে।
ভারত অমদি ইজীপ্ত মালেমসিদা শন্দোরক্লিবা তেরোরিজম অসিনা নুংনাংহল্লি। তেরোরিজম্না মীওইবা খুন্নাইদা লৈরিবা খ্বায়দগী তমথিবা শিংনবনি হায়বা ৱাফম ঐখোয়না অমত্তা ওইনা য়ানরি। লৈবাক অনিমক্না ঙমখৈ ৱাংমা লান্না চত্থবা তেরোরিজমগী থৌওংশিং লোইশিনখিনবা পুন্না হোৎনমিন্নবা মথৌ তাই হায়বা ৱাফমসু য়ানখি। অদুগী মসিগীদমক, ঐখোয়না মালেমগী কম্ম্যুনিতীশিংবু মীৎশিং নাশিংনা লৈহনবগী থবক লেপ্তনা তৌখিগনি।
ঐখোয়গী মরক্তা সিক্যুরিতী অমদি দিফেন্সকী লমদা তেংবাংনবা য়াবগী অচৌবা মতিংসু লৈরি। হৌখিবা চহি খরসিদা, ঐখোয়গী লান্মীশিংগী মরক্তা জোইন্ত এক্সরসাইজ ত্রেনিং অমদি কেপাসিতী বিল্দিংগী থবক থৌরমশিং মশক থোক্না হেনগৎলক্লি। ঙসিগী মীফমদা ঐখোয়না ঐখোয়গী দিফেন্স ইন্দস্ত্রীশিংগী মরক্তা তেংবাংনবগী মরী হেন্না কনখৎহন্নবা, অমদি কাউন্তর-তেরোরিজমগা মরী লৈনবা ঈ-পাউ অমদি ইন্তলিজেন্স তাথোক তাশিন তৌনবা ফিরেপসু লৌখি।
এক্সত্রিমিস্তকী ৱাখল্লোন অমসুং রেদিকেলাইজেসনগী থৌওংশিং শন্দোক্নবগীদমক সাইবর স্পেস শীজিন্নবা অসি অসুম অসুম হেনগৎলক্লিবা ফীভম অমনি। হীরম অসিদসু ঐখোয়না তেংবাংনগনি।
মরূপশিং,
কোবিদ লাইচৎ মনুংদা হকশেলগী ইনফ্রাস্ত্রকচর অমদি মালেমগী সপ্লাই চেন্দা শাথিনা অকায়বা পীখিবা ঐখোয়না নীংথিনা উখ্রে। রাস্ত্রপতী সিসি অমদি ঐহাক্না হায়রিবা শিংনবনা থল্লবা মতমদুদা ঈ-পাউ তোয়না ফাওনখি, অমদি লৈবাক অনিমক্না মথৌ তারকপা মতমদা অমনা অমগী খুদক্কী ওইবা তেংবাংশিং থাদোক থাজিন তৌনখি।
ঙসি, ঐখোয়না কোবিদ অমদি য়ুক্রেনগী ৱাথোক্না শোকহল্লবা চীঞ্জাক অমদি ফার্মাগী সপ্লাই চেন মপাঙ্গল কনখৎহন্নবগী মতাঙদা কুপ্না খন্নখি। হায়রিবা হীরমশিং অসিদা নাকল অনিমক্না শেল থাদবা অমদি লল্লোন ইতিক্কী থৌওং হেনগৎহনবগী মথৌ তাবা ৱাফমসু ঐখোয়না য়ানখি। লাক্কদৌরিবা চহি মঙাসিদা ঐখোয়গী নাকল অনিগী ওইবা ত্রেদ অসি দোলর বিলিয়ন ১২ ফাওবা য়ৌহন্নবা পুন্না হোৎনমিন্নবা হায়না ঐখোয়না ফিরেপ্নরে।
মরূপশিং,
ঐখোয়না ইজীপ্তপু সি.ও.পি.-২৭ মায় পাক্না পাঙথোকখিবা, অমদি ক্লাইমেৎ সেক্তরদা চাওখৎলক্লিবা লৈবাকশিংগী ইন্তরেসত ঙাক্নবা হোৎনখিবগীদমক্তা থাগৎলি।
ভারত অমসুং ইজীপ্তগী মরক্তা য়ুনাইতেদ নেসন্স অমদি অতৈ মালেমগী ফোরমশিংদা মতম শাংলবা অমদি অফবা তেংবাংনবগী মরী লৈরকই। মালেমগী য়েৎনবা ৱাফমশিংগী ৱারোইশিন পুরক্নবগীদমক দিপ্লোমেসী অমদি দাইলোগকী মথৌ তাবা ঐখোয় অনিমক্না য়ানরি।
এক্সেলেন্সী,
ঐনা অমুক্কা হন্না অদোম অমদি অদোমগী দেলিগেসনবু ভারত্তা তরাম্না ওকচরি। ঐনা অদোম অমদি ইজপ্তকী মীয়ামগী মফমদা অনৌবা চহিগী য়াইফ পাউজেলসু পীজরি।
অদোমবু ঙমখৈ লৈতনা থাগৎচরি!
