ফার্স্ত লেদি, দোক্তর জিল বাইদেন,
দোক্তর পঞ্চানাথন,
মেহরোত্রা,
দোক্তর ৱিল্লিয়মস,
ইবেম্মাশিং অমসুং ইবুংঙোশিং,
ঐগী নুংশিরবা নহা ওইরিবা মরুপশিং,
ঙসি ৱাশিংতনদা লাকপদা ঐনা নহারোল অমসুং হৈথোই-শিংথোইরবা মীওই কয়া উনবা ফংবগী খুদোংচাবা ফংবদা ঐ হরাওই। তোঙান-তোঙানবা প্রোজেকশিংদা ভারতনা নেসনেল সাইন্স ফাউন্দেসনগা মতেং পীনরি, মসিনা মফম অসি অমুক্কা হেন্না অখন্নবা ওইহল্লে।
দোক্তর বাইদেন,
অদোমগী পুন্সি, অদোমগী থবকশিং অমসুং অদোমগী মাইপাকপশিং অসি মীওই খুদিংমক ইথিল পীনবা হৌরকফম অমা ওইরে। ঐখোয়গী হৌজিক অমসুং তুংগী মীরোলশিংগী হেন্না ফবা তুংলমচৎ অমা শেম্বা হায়বসি ঐখোয় পুম্নমক্কী থৌদাংনি।
হেন্না ফবা তুংলমচৎ অমগীদমক লাইরিক-লাইশু, স্কিল অমসুং অনৌবা থবক অসি তঙাইফদে অমসুং মাইকৈ অসিদা ভারত্তা ঐখোয়না থবক কয়া পায়খৎলে। ঐখোয়না নেসনেল ইজুকেসন পোলিসিদা ইজুকেসন অমসুং স্কিল্লিং অনি পুনশিল্লে। ঐখোয়না স্কুলশিংদা অতল তিনকরিং লেব ১০,০০০ লিংখৎলে। লেবশিং অদুদা অনৌবা থবক কয়া পুথোক্নবা তোঙান-তোঙানবা খুদোংচাবাকয়া ঐখোয়না অঙাংশিংদা ফংহল্লে। নহারোল ওন্ত্রেপ্রেনিউয়রশিং পুক্নিং থৌগৎনবা ঐখোয়না স্তার্দ অপ ইন্দিয়া মিসন হৌদোক্লে। ঐখোয়গী পান্দমদি চৎলিবা চহি ১০ অসি “তেক দিকেদ” নত্ত্রগা তেক্কেদ অমা শেম্বনি।
মরুপশিং,
ভারত অমসুং অমেরিকাগী মরক্তা চাউখৎপগী খোঙজেল চপ চানা থম্নবা হৈথোই-শিংথোইবগী পাইপলাইন অমা দরকার ওইরে। অমেরিকাদা মমিং লৈরবা মহৈলোয়শঙশিং অমসুং চাউখৎলবা তেক্নোলোজিশিং লৈরগা, ভারত্তা মালেমদা খ্বাইদগী মশিং য়াম্লবা নহারোলশিং লৈরি। মরম অদুনা, ভারত অমসুং অমেরিকাগী মরক্তা মতেং পাংনবা অসিনা মালেমগী চাউখৎপগী ইঞ্জিন অমা ওইগনি। অমেরিকাদা কম্মুনিতি কলেজশিংনা লৌরিবা থৌদাংগীদমক ময়াম পুম্নমক ঐনা থম্মোয় শেংনা থাগৎচরি।
মরুপশিং,
ভারত অমসুং অমেরিকাগী মরক্তা লাইরিক-লাইশু অমসুং রিছার্সকী লমদা অমনা অমগী মতেং পাংনবগী মতাংদা করিগুম্বা খর ফোঙদোকপা ঐ পাম্মী। মসিগী অপুনবা থবক অসিদা, সরকার, উদোগ, অখঙ-অহৈ, ওজাশিং অমসুং মহৈরোয়শিং শরুক য়াবা দরকার ওই। মসিগী মতাংদা ইন্দিয়া-য়ু.এস তিচর্স একচেঞ্জ প্রোগ্রাম অমা হৌদোক্নবা ঐখোয় খন্নরি।
মালেম শীনবা থুংনা লৈরিবা সাইন্তিস্তশি অমসুং ওন্ত্রেপ্রেনিউয়রশিং থবক তৌমিন্নবা হেনগৎহন্নবা ঐখোয়না ২০১৫ দা গ্লোবেল ইনিসিয়েতিপ ওফ একাদেমিক নেতৱার্ক(গিয়ান) হৌদোক্লে। থৌরম অসিগী মখাদা য়ু.এস.এগী ভারত্তা ওজা ৭৫০ হেন্না ঐখোয়না মাইপাক্না তরাম্না ওকখ্রে হায়না ঐনা অদোমগী মফমদা খঙহল্লি। ইজুকেসন অমসুং রিছার্সকা মরী লৈনবা য়ু.এস.এদা লৈবা হৌজিক থবক তৌরিবা অমসুং থবক্তগী পোথারবা লনাই মীওইশিং নিংথম থাগী ছুতি থাবা মতমদা ভারত্তা লাক্নবা ঐনা হায়জরি। মসিনা, মখোয়না ভারত খঙবা খক নত্তনা ভারতকী অনৌবা মীরোলশিংদা মখোয়গী লৌশিং পীবা ঙমগনি।
নহারোলশিংগী মরক্তা লৈরিবা অনৌবা ৱাখল্লোন অমসুং অনৌবা পুথোকপগী থৌনা অসি অঙকপনি হায়বা অদোমসু খঙলে। তোঙান তোঙানবা হিরমশিংদা লৈবাক অনিমক্না পুন্না হেক্কাথোনশিং পাংথোক্কনি হায়না ঐনা থাজৈ। মসিনা হৌজিক মায়োক্নরিবা খুদোংচাদবা কয়াগী পাম্বৈশিং ঐখোয়দা পীবতা নত্তনা তুংগীদমক অনৌবা ৱাখল্লোন কয়া পুথোকপশু ঙমহনগনি। লৈবাক অমনা অমগী ভোকেসনেল স্কিল ক্বালিফিকেসনশিং শকখঙনবা ঐখোয় খন্নরি।
মরুপশিং,
স্তুদেন্ত একচেঞ্জ প্রোগ্রামগী মখাদা অমেরিকাগী মহৈরোয়শিং ভারত্তা লাকপা ঐ পাম্মী, মখোয়না ভারত মশক খঙনবগী খুদোংচাবা ফংগনি। “নভাজো নেসন” গী নহারোলশিং অপুনবা ওইনা নৌবা ৱাখল অমা অমসুং প্রোজেক অমা শেমগৎনবা মখোয়গী মরুপশিংগা লোয়ননা ভারতকী নাগালেন্দা মীফম পাংথোক্কদবা নুমিৎ অদু কুইদ্রে হায়না ঐনা থাজৈ। নহা ওইরিবা মীওই অনি অসিনা ঐঙোন্দা অনৌবা ৱাখল্লোন কয়া পীবগীদমক ঐগী থম্মোয়দগী থাগৎচরি।
ঐনা অমুক হন্না ফার্স্ত লেদি দোক্তর জিল বাইদেন ঐগী থম্মোয়দগী থাগৎচরি। ঐনা নেসনেল সাইন্স ফাউন্দেসন অমসুং মফম অসিদা তিল্লিবা ময়াম পুম্নমক থাগৎচরি।
অদোম থাগৎচরি।
