সি-২৯৫ এয়রক্রাফ ফেক্তরি শঙ্গাবা থৌরমদা প্রধান মন্ত্রীনা ফোঙদোকখিবা ৱারোল

The C-295 Aircraft facility in Vadodara reinforces India's position as a trusted partner in global aerospace manufacturing:PM

Make in India, Make for the World:PM

The C-295 aircraft factory reflects the new work culture of a New India:PM

India's defence manufacturing ecosystem is reaching new heights:PM

ইকায়খুম্নরবা পেদ্রো সাঞ্চেজ, গুজরাতকী রাজ্যপাল অচার্য়া দেব্রাত জি, ভারতকী দিফেন্স মিনিস্তর শ্রী রাজনাথ সিংহ জি, ফোরেন মিনিস্তর শ্রী এস. জয়সঙ্কর জি, গুজরাতকী চীফ মিনিস্তর শ্রী ভুপেন্দ্রভাই পতেল, স্পেন অমসুং রাজ্য সরকারগী মিনিস্তরশিং, এয়রবস অমসুং তাতা তিমগী মেম্বরশিং অমসুং ইবেম্মাশিং অমসুং ইবুংঙোশিং !

খুরুমজরি!

ব্যুনোস দিয়াস!

অহানবা ওইনা ঐগী মরুপ পেদ্রো সাঞ্চেজ ভারত্তা লাক্লি। ঙসিদগী, ভারত অমসুং স্পেসনগী মরক্তা লৈনরিবা মরীদা ঐখোয়না অনৌবা মাইকৈ অমা তাক্লে। ঐখোয়না সি-২৯৫ ত্রান্সপোর্ত এয়রক্রাফ শানবা ফেক্তরি শঙ্গারে। ফেক্তরি অসিনা ভারত-স্পেনগী মরীশিং ফগৎহনবতা নত্তনা মেক ইন ইন্দিয়া, মেক ফোর ৱার্ল্দগী ঐখোয়গী পান্দমশিং মপাঙ্গল হাপ্লগনি। এয়রবস অমসুং তাতা তিমদা ঐগী য়াইফ-পাউজেল পীজরি। হন্দক, ঐখোয়গী লৈবাক অসিগী শক্নাইরবা মপারি রতন তাতা জি লৈখিদ্রে। করিগুম্বা ঙসি রতন তাতা জি লৈরম্লবদি, ঐখোয় ময়ামগী মরক্তা মহাক্না খ্বাইদগী হরাওরমগনি। মহাক্কী থৱায়না ঈশ্বরগী মনাক্তা লৈখ্রবশু, ঙসিগী হরাওবা অসি মহাক ফাওরমগনি হায়না ঐনা খল্লি।

|

মরুপশিং,

সি-২৯৫ ত্রান্সপোর্ত এয়রক্রাফ ফেক্তরি অসিনা অনৌবা ভারতকী অনৌবা থবক শুবগী চৎনবীগী মমি তারে। অনৌবা ৱাখল শাগৎপদগী হৌরগা থবক পাংথোকপা ফাওবা, ভারতনা থবক পাংথোকপগী খোঙজেল ঙসি মফম অসিদা উরে। চহি অনিগী মমাংদা ওক্তোবরদা ফেক্তরি অসি শাবা হৌখিবনি। চহি অসিগী ওক্তোবর থাদগী ফেক্তরি অসিদগী এয়রক্রাফ পুথোক্নবা থৌরাং তৌরে। থৌরাং তৌবা অমসুং থবক পায়খৎপদা দরকার ওইদবা অপনবশিং লৈহন্দনবা ঐনা মতম পুম্নমক্তা মীৎয়েং চঙখি। ঐনা গুজরতকী চীফ মিনিস্তর ওইরিঙৈ মতমদা, বদোদারাদা বোম্বারদিয়ার ত্রেন কোচশিং শানবা ফেক্তরি অমা লিংখৎনবা ৱারেপ লৌখি। অকক্নবা মতমগী মনুংদা ফেক্তরি অদু লিংখৎখি। ঙসিদি ফেক্তরি অসিদা শাবা মেত্রো কোচশিং ঐখোয়না অতোপ্পা লৈবাকশিংদা থাদোক্লে। ফেক্তরি অসিদা শাবা এয়রক্রাফশু তুংদা মালেম শীনবা থুংনা য়োনগনি হায়বগী থাজবা ঐনা থম্লি।

|

মরুপশিং,

মমিং লৈরবা স্পেনগী কবি এন্তোনিও মাচাদোনা ইখি:

“লমকোয়বা অমগী, লম্বী লৈতে… চৎলিবা অদু লম্বীনি”।

মসিনা তাক্লি মদুদি ঐখোয়গী পান্দমশিং ফংনবা ঐখোয়না অহানবা খোঙথাং থাংলিবা অসি, লম্বী শেম্বা হৌরবনি। ঙসিদি, ভারতকী ঙাক-শেনগী পোৎলমশিং শানবা থবকশিং অনৌবা থাকশিং য়ৌরে। চহি ১০গী মমাঙদা, ঐখোয়না মরুওইবা ৱারেপ লৌরমদ্রবদি, ঙসিগী মাইপাকপা অসি য়ৌবা ঙম্লমলোই। মতম অদুদা, ভারত্তা দিফেন্সকী লমদা পাক-চাউরবা মেনুফেকচরিংগী মতাংদা কনাগুম্বা অমনা ৱাখলদা ফাওবা খল্লমদে। মতম অদুদা মপান লৈবাকশিংদগী লৈনবা হোৎনবা অসিনা মরুওইনা খন্নখি। অদুবু ঐখোয়না অনৌবা লম্বী অমা খল্লে, অনৌবা পান্দমশিং থম্লে অমসুং ঙসিদি ঐখোয়না ফলশিং উবা ফংলে।

|

মরুপশিং,

ওইথোকপা য়াবা অমা হেক্তা কান্নবা ওন্থোকপা, অচুম্বা থৌরাং অমসুং অচুম্বা মরুপ অসি তঙাইফদে। ভারতকী দিফেন্স সেক্তরদা অওনবা পুরকপা অসি অচুম্বা থৌরাং অমসুং অফবা মরুপকী খুদম অমনি। হৌখিবা চহি ১০দা, ভারত্তা অফবা দিফেন্স ইন্দস্ত্রি অমা লিংখৎনবা লৈবাক অসিনা ৱারেপ লৌখি। দিফেন্স মেনুফেকচরিংদা লনাই কাংবু শরুক য়াহল্লে, পব্লিক সেক্তর য়ুনিতশিং ফগৎহল্লে, ওর্দিনান্স ফেক্তরিশিং অচৌবা কম্পেনি তরেৎ ওন্থোক্লে, দি.আর.দি.ও অমসুং হাল ফগৎহল্লে অমসুং য়ু.পি অমসুং তামিল নাদুদা অচৌবা দিফেন্স কোরিদোর অনি শেমগৎলে। হায়রিবা থবকশিং অসিনা দিফেন্স সেক্তরদা অনৌবা থৌনা হাপ্লে। আইদেক্স (ইন্নোবেসন ফোর দিফেন্স এক্সলেন্স) গুম্বা স্কিমশিংনা স্তার্দঅপশিং মপাঙ্গল হাপ্লে অমসুং হৌখিবা চহি ৫-৬ তা ভারত্তা অনৌবা স্তার্দঅপ ১,০০০ রোম লিংখৎলে। হৌখিবা চহি ১০দা, ভারতকী দিফেন্স এক্সপোর্ত শরুক ৩০ হেনগৎলে। ঙসিদি, ঐখোয়না মালেমগী লৈবাক ১০০ হেনবদা ঙাক-শেনগী খুৎলায়শিং য়োল্লে।

মরুপশিং,

ঙসিদি, ঐখোয়না ভারত্তা স্কিল অমসুং থবকশিংদা অকনবা মীৎয়েং চঙলে। এয়রবস অমসুং তাতাগী ফেক্তরিনা লৈবাক অসিদা থবক লিশিং কয়া ফংহল্লগনি। প্রোজেক অসিনা মরম ওইদুনা লৈবাক অসিনা মশানা এয়রক্রাফ পার্ত ১৮,০০০ শাবা হৌরগনি। পার্ত অমা লৈবাক অসিগী অতোপ্পা মফমদা শাবা য়াই, অতোপ্পা পার্ত অমনা মফম অমদা শাগনি, হায়রিবা পার্তশিং অদু কনানা শাগনি? থবক অসিদা ঐখোয়গী মাইক্রো অমসুং স্মোল ইন্তরপ্রাইজেসশিংনা লমজিংগনি। মালেমগী অচৌবা এয়রক্রাফ কম্পেনিশিংগী পার্তশিং পীবা খ্বাইদগী চাউবা সপ্লাইয়র অমা ওইনবা ঐখোয় থৌরাং তৌরে। ভারত্তা অনৌবা এয়রক্রাফ ফেক্তরিনা অনৌবা স্কিল অমসুং অনৌবা ইন্দস্ত্রিশিংদা ইনোৎ অমা পীরগনি।

|

মরুপশিং,

থৌরম অসি ত্রান্সপোর্ত এয়রক্রাফ শাবা খক্তগী নত্তে হায়বা ঐ খঙই। হৌখিবা চহি ১০ দা, ভারতকী এভিএসন সেক্তরদা অমুক্তা ওইখিদ্রিবা মওংদা চাউখৎপা অমসুং অওনবা পুরকপা অদোম উরে। লৈবাক শীনবা থুংনা অপীকপা সহর কয়াদা ঐখোয়গী এয়র কন্নেক্তিবিতি হেনগৎলে। ভারত এভিএসন অমসুং এম.আর.ও (মেন্তেনেন্স, রিপিয়ার অমসুং ওভরহোল) গী মফম অমা ওইনা শেমগৎনবা ঐখোয়না থবক পায়খৎলি। মসিগী থবক অসিনা তুংদা সিবিল এয়রক্রাফকী মেন ইন ইন্দিয়াগী লম্বী শেমগনি। ভারতকী তোঙান-তোঙানবা এয়রলাইনশিংনা অনৌবা এয়রক্রাফ ১২০০ লৈনবা ওর্দর তৌখিবা অদু অদোম খঙলমগনি। মসিনা তাক্লিবদি তুংদা, ফেক্তরি অসিনা ভারত অমসুং মালেমগী দরকার ওইবা সিবিল এয়রক্রাফ দিজাইন তৌবা অমসুং শাবদা মরুওইবা থৌদাং অমা লৌগনি।

মরুপশিং,

ভারতকী থবকশিং অসিদা বদোদারা সহরনা কেতালিস্ত অমা ওইনা থবক তৌগনি। সহর অসি এম.এস.এম.ইশিংগী অকনবা মফম অমনি অমসুং মফম অসিদা ঐখোয়গী গাতি শক্তি য়ুনিভর্সিতিশু লৈরে। য়ুনিভর্সিতি অসিনা তোঙান-তোঙানবা হিরমশিংদা শীনফম কয়াগী মীওইশিং পুথোক্লি। বদোদারাদা ফার্মা সেক্তর, ইঞ্জিনিয়ারিং অমসুং হেভি মেছিন্নরি, কেমিকেলশিং অমসুং পেত্রোকেমিকেলশিং অমসুং পৱার অমসুং ইনর্জিগী খুৎলায়শিংগা মরী লৈনবা কম্পেনি কয়া লৈরি। হৌজিক লমদম অসি শীনবা থুংনা ভারত্তা এভিএসন মেনুফেকচরিংগী মরুওইবা মফম অমা ওইনবা থৌরাং তৌরে। ঐনা গুজরাত সরকার, চীফ মিনিস্তর ভুপেন্দ্রভাই পতেল অমসুং মহাক্কী কাংবু মখোয়গী অনৌবা উদ্যোগকী থৌশিলশিং অমসুং ৱারেপশিংগীদমক থাগৎপা ফোঙদোকচরি।

|

মরুপশিং,

বদোদারাগী অতোপ্পা অখন্নবা শক্তম অমা লৈজরি। মসি ভারতকী কলচরগী সহরনি, হেরিতেচগী সহর অমনি। ঐনা অদোম স্পেন্দগী মফম অসিদা তরাম্না ওকচরি। ভারত অমসুং স্পেনগী মরক্তা নাতকী মরীশিংগী অখন্নবা মরী অমা লৈনরি। স্পেনদগী লাকখিবা ফাদর কারলোস ভেল্লস গুজরাত্তা খুন্দাখি, মহাক্কী পুন্সিগী চহি ৫০ মফম অসিদা কৎথোকখি অমসুং মহাক্কী ৱাখল্লোনশিং অমসুং অইবশিংনা ঐখোয়গী নাত ইনাকখুনহলখি। ঐনা মহাক্কা কয়ারক উনবগী খুদোংচাবা ফংখ্রে। মহাক্কী থবকশিংগীদমক ঐখোয়না মহাক পদ্ম শ্রী পীদুনা ইকায়খুম্নবা উৎখ্রে। গুজরাত্তা ঐখোয়না মহাক নুংশিনা ফাদর ভেল্লস হায়না কৌনৈ অমসুং মহাক্না গুজরাতিদা লাইরিক ইখি। মহাক্কী লাইরিকশিংনা গুজরাতি সাহিত্য অমসুং ঐখোয়গী কলচর চাউখৎহল্লে।

মরুপশিং,

স্পেন্দা য়োগ য়াম্না পাম্নৈ হায়বা ঐ তারে। ভারতমচাশিংনা স্পেনগী ফুতবোল য়াম্না পাম্নৈ। ঙরাং রিএল মেদ্রিদ অমসুং বরসেলোনা অনি শান্নখিবা মেতচ অদু ভারত্তা পাক-শন্না ঙাংনখি অমসুং বরসেলোনানা মাইপাকখিবা অদু মফম অসিদা খন্ন-নৈনবগী হিরম অমা ওইখি।

|

মরুপশিং,

চীঞ্জাক, ফিল্মশিং অমসুং ফুতবোল অসি ঐখোয়গী লৈবাক অনিগী মরক্তা মীগা মীগা অকনবা মরীশিং লৈনবগী শরুক অমা ওইরি।  ২০২৬ অসি ভারত-স্পেসনগী কলচর, তুরিজম অমসুং এ.আইগী চহি ওইনা থৌরম পাংথোক্নবা ভারত অমসুং স্পেন্না ৱারেপ লৌবদা ঐ অপেনবা ফাওই।

মরুপশিং,

ভারত অমসুং স্পেনগী মরী অসি মাইথোং য়াম্বা প্রিজম অমগুম্বনি অমসুং মসি পাকথোক-চাউথোরক্লি। ঙসিগী থৌরম অসিনা ভারত অমসুং স্পেনগী মরক্তা অনৌবা অপুনবা প্রোজেক কয়া ইথিল পীগনি হায়না ঐনা থাজৈ। স্পেনগী ইন্দস্ত্রি অমসুং ইন্নোবেতরশিং ভারত্তা লাক্নবা ঐনা হায়জরি অমসুং ঐখোয়গী চাউখৎপগী খোঙচৎকী শরুক অমা ওইগদবনি। অমুক হন্না ঐনা প্রোজেক অসিগীদমক এয়রবস অমসুং তাতা তিমশিং থাগৎপা ফোঙদোকচরি।

অদোম থাগৎচরি।