লৈবাকসিগী খুঙ্গঙগী য়ুমথোঙ করোর ১০ অরুবা পাইপকী ঈশিংগী খুদোংচাবা ফংহল্লে
গোৱানা অহানবা হর ঘর জল সর্তিফাইদ তৌরবা স্তেত ওইরেদদ্রা নগর হবেলি অমসুং দামন অমদি দিউনা হায়রিবা ফীভম অসি ফংবা অহানবা য়ুনিয়ন তেরিতরী ওইরেলৈবাকসিগী তোঙান তোঙানবা স্তেতশিংগী খুঙ্গঙ লাখ অমা ও.দি.এফ. প্লস ওল্লে“মসিদগী হেন্না ফবা অমৃৎকালগী অহৌবা অমা লৈররোই”“লৈবাকসিগীদমক করিসু খন্দবা মীওইশিংদি লৈবাকসিগী হৌজিক্কী অমদি তুংগী ফীভম মাঙহনবদা করিসু নাচুংদে।অসিগুম্বা মীওইশিংনা ৱাজাও কয়াদি শোয়দনা ঙাঙলমগনি, অদুবু কৈদৌঙৈদসু ঈশিংগীদমক অচৌবা মঙলানগা লোয়ননা থবক তৌবা ঙম্লোই”“হৌখিবা চহি ৭০ হেনবদা য়ুমথোঙ করোর ৩খক্তমক পাইপকী ঈশিং ফংহনখিবগা চাংদম্নবদা শুপ্নতগী চহি ৩দা খুঙ্গঙগী য়ুমথোঙ করোর ৭তা ফংহল্লে”“ফীভম অসি ঐনা মমাঙদা রেদ ফোর্ত্তগী হ্যুমেন সেন্তর্দ দেভেলপমেন্তকী মতাঙদা থমখিবা ৱাফমদুগী খুদম্নি”“মীয়ামগী পাঙ্গল, নুপীগী পাঙ্গল, অমসুং তেক্নোলোজীগী পাঙ্গলনা জল জীবন মিসনবু মথৌ হাপ্লিবনি”খুরুমজরি, গোৱাগী মুখ্যমন্ত্রী শ্রী প্রমোদ সাৱন্ত জী, কেন্দ্র জল শক্তি মন্ত্রী গজেন্দ্র সিংহ সেখাৱৎ জী, গোৱা লৈঙাক্কী মন্ত্রীশিং, অতৈ মীথুংশিং, ইচে ইচল অমসুং ইচিন ইনাওশিং, ঙসি অসি য়াম্না মরুওইবা অমদি শেংলবা নুমিৎ অমনি। লৈবাক শিনবা থুংনা শ্রীকৃষ্ণ জন্মস্থমিগী কুমহৈ পাঙথোক্লি। লৈবাক মীয়ামগী মফমদা, মালেম শিনবা থুংনা লৈরিবা ভগবান শ্রীকৃষ্ণবু নীংজবা মীয়ামগী মফমদা য়াইফ-পাউজেল পীজরি। জয় শ্রীকৃষ্ণ।
ঙসিগী থৌরম অসি গোৱাদা পাঙথোক্লি। অদুবু ঙসি ঐনা লৈবাক মীয়ামগা লোয়ননা লৈবাক মীয়ামগী মফমদা অচৌবা মায় পাকপা অহুমগী মরমদা পাউদমজগে। ৱাফম অসি লৈবাক পুম্বগী ওইনা থমজগে। ভারতকী হায়রিবা মায় পাকপশিং অসিগী মরমদা লৈবাক মীয়াম্না খঙবা মতমদা, মখোয় শোয়দনা চাউথোকচবা পোক্কনি, মরুওইনা ঐখোয়গী ইমাশিং অমসুং ইচে ইচলশিংনা চাউথোকচবা পোক্কনি হায়না ঐনা থাজৈ। অমৃৎকালগা মরী লৈনবা অচৌবা পান্দমগী লমদা থবক পায়খৎলিবসিগা মরী লৈননা ঐখোয়না ঙসি মরুওইবা পন্দোল অহুম ফংবা ঙম্লে। অহানবা পন্দোলদি – ঙসি লৈবাকসিগী খুঙ্গঙগী য়ুমথোঙ করোর ১০ অরুবা পাইপকী ঈশিং ফংলে। মসি য়ুমথোঙ খুদিংদা ঈশিং ফংহন্নবগী লৈঙাক অসিগী থৌরাংগী অচৌবা মায় পাকপা অমনি। মসি পুম্নমক্না হোৎনমিন্নবগী অচৌবা খুদম অমনি। মায় পাকপা অসিগীদমক লৈবাক মীয়ামগী মফমদা, মরুওইনা ইমা অমদি ইচে ইচলশিংগী মফমদা নুংঙাইবা ফোঙদোকচরি।
মরূপশিং,
লৈবাকসিনা অমদি মরুওইনা গোৱানা ঙসি মায় পাকপা অমা ফংবা ঙম্লে। ঙসিদি গোৱা হর ঘর জল সর্তিফাই তৌরবা লৈবাকসিগী অহানবা স্তেত ওইরে। দদ্রা নগর হবেলি অমসুং দামন অমদি দিউসু হর ঘর জল সর্তিফাই তৌরবা অহানবা য়ুনিয়ন তেরিতরী ওইরে। হৌখিবা চহি খরসিদা লৈবাকসিগী অচৌবা মিসন খুদিংদা গোৱানা মরুওইবা শক্লোন লৌদুনা লাক্লি। ঐনা গোৱাগী মীয়ামদা, প্রমোদ জী অমসুং মহাক্কী কাঙবু, গোৱা লৈঙাক, লোকেল সেল্ফ-গভর্নমেন্তশিং পুম্নমক্কী মফমদা য়াইফ পাউজেল পীজরি। অদোম্না হর ঘর জল মিসনবু খুমাঙ চাওশিনহল্লিবা মতৌ অসিনা লৈবাক পুমববু পুক্নিং থৌগৎলগনি। লাক্কদৌরিবা থা খরসিদা অতোপ্পা স্তেত কয়া অমসু লিস্ত অসিদা চল্লগনি হায়বা ৱাফমসিদা ঐ নুংঙাইবা পোকই।
মরূপশিং,
লৈবাকসিগী অহুমসুবা মায় পাকপা অসিদি স্বচ্ছ ভারত অভিয়ানগা মরী লৈনৈ। চহি খরগী মমাঙদা লৈবাক মীয়ামগী হোৎনজমলনা লৈবাকসিবু ওপন দিফেকেসন ফ্রী ওইরে হায়না লাউথোকখ্রে। মসিগী মতুং তারকপদা, খুঙ্গঙশিংবু ও.দি.এফ. প্লস ওইহন্নবা ঐখোয়না ফিরেপ লৌখি। মসিগী ৱাহন্থোক্তি, কম্ম্যুনিতী তোইলেৎ, প্লাস্তিক ৱেস্ত মেনেজমেন্ত, গ্রে ৱাতর মেনেজমেন্ত, গোবর্ধন প্রোক্ত অসিনচিংবা ফীভমশিং চাওখৎহনবনি। হীরম অসিদা লৈবাকসিনা মরুওইবা পন্দোল অমা ফংবা ঙম্লে। হৌজিক্তি লৈবাকসিগী তোঙান তোঙানবা স্তেতশিংগী খুঙ্গঙ লাখ অমা হেনবা ও.দি.এফ. প্লস ওইরে। হায়রিবা মরুওইবা পন্দোল অহুম অসিবু ফংবা ঙম্লবা স্তেত পুম্নমক, খুঙ্গঙ পুম্নমক্কী মফমদা য়াইফ পাউজেল পীজরি।
মরূপশিং,
ঙসিদি মালেমগী চাউর-চাউরবা লূপশিংনা ২১শুবা চহিচাগী মালেমগী খ্বাইদগী চাউবা শিংনবসি ঈশিংগী সিক্যুরিতী অসিনা ওইগনি হায়রি। ঈশিংগী খুদোংচাদবনা চাওখৎলবা ভারতকী পান্দম ফংবদা অচৌবা খুরৌ অমা ওইরক্লবা য়ারি। ঈশিং ফংদবনা, মীচম মীয়ামদা, লায়রবা, ময়ায় ওইবা থাক্কী মীওই কাঙলুপ, লৌমী অমসুং ইন্দস্ত্রী-লল্লোন ইতিক্তা চাউনা অপনবা ওইরি। হায়রিবা অচৌবা শিংনবা অসি থেংননবগী থৌগলনা লমচিংদুনা পুং কুনমরি চুপ্না থবক তৌবগী মথৌ তারি। ঐখোয়গী লৈঙাক অসিনা হৌখিবা চহি নিপানসিদা হায়রিবা ৱাখল্লোন অসিনা লমজিংদুনা ঈশিং সিক্যুরিতীগী থবক থৌরমশিং মপুং ফানা পায়খৎনবা হোৎনদুনা লাক্লি। লৈঙাক শেমবদা কা হেন্না হোৎনবা চঙদ্রবসু লৈবাক শেমগৎপদদি হেন্না কন্না হোৎনবা চঙই হায়বসি অচুমবা ৱাফম্নি। অদুগা মসি মীপুম খুদিংমক্না পুন্না হোৎনমিন্নবনা ওইথোক্কদৌরিবনি। ঐখোয় পুম্নমক্না লৈবাক শেমগৎননবা পরিংদা চৎলি, মরম অসিনা লৈবাকসিগী হৌজিক্কী অমদি তুংগী পুন্সিদা থেংনগদৌরিবা শিংনবশিংগী পাম্বৈ পুথোক্না লেপ্পা লৈতনা হোৎনরি। লৈবাক্কীদমক করিসু খন্দবা মীওইশিংদি লৈবাকসিগী হৌজিক্কী অমদি তুংগী ফীভমদা কায়থরকপদা করিসু নাচুংলোই। অসিগুম্বা মীওইশিং অসিনা ঈশিংগী মতাঙদা অচৌবা ৱাফম কয়া ফোঙদোক্লমবদি য়াই অদুবু ঈশিংগীদমক অচৌবা মঙলানগা লোয়ননা থবক অমত্তা পায়খৎলক্লোই।
মরূপশিং,
নীংতমবগী অমৃৎকালসিদা ঈশিংগী সিক্যুরিতীনা ভারতকী চাওখৎ লমজেলদা খুরৌ ওইহন্দনবা হৌখিবা চহি ৮সিদা ঈশিং মরাং কায়না ফংহনবা হায়বসিদা মরুওইবা মীৎয়েঙ চঙদুনা লাক্লি। কেত্চ দি রেন, অতল ভুজল য়োজনা, লৈবাক্কী দিস্ত্রিক্ত খুদিংদা অমৃৎ সরোবর ৭৫ শেমগৎপা, তুরেলশিং শম্নহনবা, নৎত্রগা জল জীবন মিসন ওইরবসু পুম্নমকসিগী পান্দমদি লৈবাক মীয়ামদা ঈশিং মরাং কায়না ফংহনবনি। নুমিৎ খরনিগী মমাঙদা ভারতকী রামসর সাইত হায়বদি ৱেৎলেন্দ ৭৫ শুরে হায়বা পাউ অমা লাকখি। মসিগী মনুংদা মফম ৫০দি হৌখিবা হৌখিবা চহি ৮সিদা হাপচিল্লকখিবনি। হায়বদি ঈশিং মরাং কায়না ফংহন্নবগীদমক ভারতনা মমায় মরীদা থবক পায়খৎলি অমদি মসিগী মহৈ মায়কৈ খুদিংদা উবা ফংলি।
মরূপশিং,
ঈশিং অমসুং অকোয়বগী ফীভমগী মরমদা পায়খৎলিবা থৌরাংশিং জল জীবন মিসনগী য়ুমথোঙ করোর ১০গী পন্দোল অসিদসু মমি তারি। মসিদগী হেন্না ফবা অমৃৎ কালগী খোঙহৌ অমা লৈররোই। শুপ্নতগী চহি ৩সিদা খুঙ্গঙগী য়ুমথোঙ করোর ৭তা পাইপকী ঈশিং শমখ্রে। মসি ইচম চমবা মায় পাকপা অমা নত্তে। নীংতম্লবা মতুংগী চহি ৭০ হেনবসিদা শুপ্নতগী য়ুমথোঙ করোর ৩দা পাইপকী ঈশিং ফংহল্লমখিবনি। ঈশিংগীদমক অতোপ্পা মফমদা তাঙদুনা লৈবা লৈবাকসিদা খুঙ্গঙগী য়ুমথোঙ করোর ১৬লোম লৈ। খুঙ্গঙগী য়াম্লবা মীয়ামবু অসিগুমবা তঙাই ফদনা চঙদ্রবা য়াদ্রবা ফীভমসিগীদমক মরোমদোম লান্থেংনহন্নবা হুন্দোক্লমবা য়ারোই। মরম অসি না চহি ৩গী মমাঙদা ঐনা লাল কিলাদগী য়ুমথোঙ খুদিংদা পাইপকী ঈশিং ফংহনগনি হায়না লাউথোকখি। অনৌবা লৈঙাক লাক্লবা মতুংদা জল শক্তিবু তোঙানবা মন্ত্রালয় অমা ওইহনখি। মিসন অসিদা লুপা করোর লাখ ৩ লিশিং ৬০ হেন্না শীজিন্নখ্রে। চহিচাসিগী খ্বাইদগী তমথিবা লাইচৎনা খুরৌ ওইরগসু মিসন অসিগী খোঙজেলদি তপথখিদে। অসুম্না লেপ্পা নাইদনা হোৎনবসিনা মরম ওইরগা হৌখিবা চহি ৭০রোমসিদা তৌখিবা থবক্কী শরুক অনি হেন্না হৌখিবা চহি ৩সিদা পাঙথোকপা ঙম্লে। মসি ঐনা মমাঙদা লাল কিলাদা মীওইবদা য়ুম্ফম ওইবা চাওখৎ থৌরাংগী মতাঙদা থমখিবা ৱাফমদুগী খুদম অমনি। য়ুমথোঙ খুদিংদা ঈশিং ফংলবা মতমদা মদুগী খ্বাইদগী কান্নবসি ঐখোয়গী ইচে ইচলশিংনা ফংলি, খুদোংচাদবা মায়োক্নরমবা মীওই কাঙলুপসিনা ফংলি, লাপ্না ঈশিং হোনবগী মায়োক্তা চঙশিল্লিবা ঐখোয়গী খোঙজঙ হেন্না মপাঙ্গল কনশিনহল্লি। ঈশিংগা মরী লৈনবা খুদোংচাদবশিংনা খ্বাইদগী হেন্না শোকহল্লিবসি ঐখোয়গী ইমা, ইচে ইচলশিংনি, মরম অসিনা মিসন অসিগী ময়ায়দা ঐখোয়গী ইচে-ইচল, ইচানুপীশিংবু থম্লি। অরুবা পাইপকী ঈশিং ফংলবা য়ুমথোঙশিংদা লৈবা নুপীশিংগী মতম মাঙলরোই। ইমুংগী অঙাঙশিংসু ফত্তবা ঈশিং থকপদগী নাবগী চাং হন্থহল্লগনি।
মরূপশিং,
জল জীবন মিসন, তশেং তশেংবা মীয়ামগী লৈঙাক, খুঙ্গঙ মনিং তমহন্নবগী লৈখিদ্রবা বাপুনা মঙজরমবা মঙলানগী অথোইবা খুদম অমনি। ঐ নিংশিংলি, ঐনা গুজরাত্তা লৈরিঙৈ কচ্ছ দিস্ত্রিক্তকী ইমা, ইচে ইচলশিংদা ঈশিংগী ফীভম ফগৎহন্নবগী থৌদাং শিন্নখি। চাংয়েং অসি চাউনা মায় পাকখি অমদি মালেমগী থাক্কী মনাসু ফংখি। হায়রিবা চাংয়েং অদুনা ঙসি জল জিবন মিসনবু থৌদুনা চৎলি। জল জিবন মিসন অসি লৈঙাক্কী থৌরাংখক নত্তনা খুন্নাইসিনা খুন্নাইগীদমক পায়খৎপা থৌরাং অমা ওইরে।
মরূপশিং,
জল জিবন মিসন মায় পাক্লিবসিগী মরুওইবা য়ুম্বী মরি লৈ। অহানবদা মীয়াম্না শরুক য়াবা, অনিসুবদা স্তেকহোল্দর পুম্নমক্না শরুক য়ামিন্নবা, অহুমসুবদা রাজনিতিগী ফিরেপ, অদুগা মরিশুবদা মচাক মথুমশিং মওং চুম্না শীজিন্নবনি।
ইচিল ইনাওশিং,
জল জীবন মিসন্দা পঞ্চায়ৎশিংনা, গ্রাম সভাশিংনা, খুঙ্গঙগী মীওইশিংনা শরুক য়াশিল্লকপা, মখোয়দা থৌদাং শিন্নবগী মওং অসি মশানা অচৌবা ৱাফম অমনি। য়ুমথোঙ খুদিংদা পাইপকী ঈশিং ফংহন্নবগী থৌরাং অসিদা খুঙ্গঙগী মীওইশিংগী মতেং লৌরি। খুঞ্জাশিংনা মখোয়গী খুঙ্গঙগী ঈশিং মরাং কায়না ফংহন্নবগী ভিলেজ এক্সন প্লান শেমজরি। ঈশিংগী মমলসু খুঞ্জাশিংনা লেপচরি। ঈশিং চাংয়েং তৌবদসু খুঞ্জাশিংনা শরুক য়ারি, খুঞ্জা নুপী লাখ ১০ হেনবদা মসিগী ত্রেনিং পীখ্রে। পানি সমিতীদসু য়ামদ্রবদা চাদা ৫০দি নুপীশিংগী মফম খাক্লি। ত্রাইবেল মফমশিংদা খোঙলৈ থুনা থবক পায়খৎনবগীদমক অহেনবা মীৎয়েঙ চঙলি। জল জীবন মিসনগী অনিসুবা য়ুম্বীদি স্তেকহোল্দরশিংনা শরুক য়াবনি। স্তেত লৈঙাক, পঞ্চায়ৎ, এন.জি.ও., মহৈ মশিংগী লোয়শঙশিং, লৈঙাক্কী তোঙান তোঙানবা লোয়শঙ অমসুং মন্ত্রালয়শিং পুল্লগা থবক তৌমিন্নরি। মসিনা লৈমায়দা থবক পায়খৎপদা য়াম্না চাউনা কান্নবা পীরি।
মরূপশিং,
জল জীবন মিসন্না মায় পাকপগী অহুমসুবা মরুওইবা য়ুম্বীদি লৈঙাক্কী ফিরেপ্নি। হৌখিবা চহি ৭০দা ফংবা ঙমখিবা ফীভমদুদগী শরুক কয়া হেন্না চহি ৭ ফাদবা মতমসিদা পায়খৎখ্রে। অরায়বা পান্দমদি নত্তে, অদুবু ভারত মচাশিংনা খোঙফম চেৎনা লেপখিবদা ফংবা ঙম্লোইদবা পান্দম অমত্তা লৈতে। কেন্দ্র লৈঙাক, স্তেত লৈঙাকশিং, পঞ্চায়ৎশিং পুম্নমক্না মিসন অসিবু খোঙজেল য়াঙনা মপুং ফাহন্নবা থবক পায়খৎলি। জল জীবন মিসন্না মচাক মথুমশিং মওং চুম্না শীজিন্নবদু চপ চানা মীৎয়েঙ থম্লি। মনরেগানচিংবা জল জীবন মিসন্দা খোঙজেল হাপ্লিবা থৌরাংশিংদগীসু মতেং লৌরি। মিসন অসিগী মখাদা পায়খৎলিবা থবকশিং, খুঙ্গঙগী মফমশিংদা অনৌবা মওং অমদা থবক পীনবগী খুদোংচাবসু ফংহল্লি। মিসন অসিগী কান্নবা অমা হায়রগদি য়ুমথোঙ খুদিংদা পাইপকী ঈশিং য়ৌরবা মতমদা, সেচুরেসনগী ফীভম ফংলবা মতমদা ফুরুপ খেন্নবগী অচৌ মচা খায়বগী চৎনবীসু মাঙখ্রগনি।
মরূপশিং,
অভিয়ান অসিগী মখাদা ঈশিংগী অনৌবা সোর্সশিং শেমগৎলি, তেঙ্ক শেমগৎলি, ঈশিং ত্রীতমেন্ত প্লান্ত শেমগৎলি, পম্প হাউস শেমগৎলি, পুম্নমকসিগী জিও তেগ্গিংসু তৌরি। ঈশিংগী থাবা অমসুং ক্বালিতী য়েংশিন্নবগীদমক মতমগা চুনবা তেক্নোলোজী হায়বদি ইন্তর্নেৎ ওফ থিংংসকী পাম্বৈসু শীজিন্নবা হৌরক্লি। হায়বদি মীয়ামগী পাঙ্গল, নুপীশিংগী পাঙ্গল অমসুং তেক্নোলোজীগী পাঙ্গলনা পুল্লগা জল জীবন মিসনবু মথৌ হাপ্লি। লৈবাক পুমবদা পায়খৎলিবা থৌরাং অসিনা মরম ওইরগা ঐখোয়না য়ুমথোঙ খুদিংদা ঈশিং ফংহন্নবগী পান্দম ঐখোয় শোয়দনা ফংবা ঙমগনি হায়না ঐনা চপ চানা থাজৈ।
অমুক্কা হন্না গোৱা, গোৱা লৈঙাক, গোৱাগী মীয়ামগী মফমদা ঙসিগী য়াইফরবা তাঞ্জা অসিদা অমদি অচৌবা মায় পাকপা অসিগীদমক নুংঙাইবা ফোঙদোকচরি, য়াইফ-পাউজেল পীজরি, অমদি চহি অহুমগী মমাঙদা লাল কিলাদা মঙখিবা মঙলান অদু গ্রাম পঞ্চায়ৎ অমসুং লৈবাক মীয়ামগী মতেঙগা লোয়ননা মঙফাওনবা ঙম্লগনি হায়না লৈবাক মীয়ামগী মফমদা থাজবা থমজরি। ঐনা অমুক্কা হন্না কৃষ্ণ জন্মস্থমিগী য়াইফ-পাউজেল পীজবগা লোয়ননা ঐগী পাউজেল তেনশিঞ্জরি। হন্না হন্না থাগৎচরি।
