ঙসি শিঙ্গাপুরগী উপ-প্রধান মন্ত্রী অমসুং শেন-থুম মন্ত্রী হেং ৱি কিতনা প্রধান মন্ত্রী নরেন্দ্র মোদী উনখি।
উপ-প্রধান মন্ত্রীনা প্রধান মন্ত্রী লি সিয়েন লুং অমসুং মিনিস্তর ইমেরিতস গো চোক তোংগী ৱাফমশিং পাউদমখি। মখোয়গা মহাক্কা উনখিবগী থৌদোক প্রধান মন্ত্রী মোদীনা নিংশিংখি অমসুং মখোয়দা মহাক্কী য়াইফ-পাউজেল য়ৌহন্নবা উপ-প্রধান মন্ত্রীদা হায়জখি।
মমাং থাদা নিউ য়োর্কতা য়ুনাইতেদ নেসন্সতা মহাত্মা গান্ধীগী ১৫০শুবা মপোক নুমিৎকী অখন্নবা থৌরমদা প্রধান মন্ত্রী লি সিয়েন লুং শরুক য়াবগীদমক প্রধান মন্ত্রী মোদীনা মহাক্কী থাগৎপা ফোংদোকখি।
ভারতনা পায়খৎলিবা অওনবা খোঙথাংশিং উপ-প্রধান মন্ত্রী কিতনা পনখি অমসুং মসিনা মরুওইনা ভারতকী ইনফ্রাস্ত্রকচর সেক্তরদা মখা তানা শেন থাদবা হেনগৎহনগনি হায়না ফোংদোকখি। ফিনতেক য়াওনা তেক্নোলোজি সেক্তরদা ভারত অমসুং শিঙ্গাপুরগী মরক্ত মতেং পীনবা হেনগৎলক্লিবা অসি মহাক্না ফোংদোকখি।
লৈবাক অনিগী মরক্ত ললোন-ইতিক অমসুং শেন থাদবা হেনগৎলকপদা প্রধান মন্ত্রী মোদীনা হরাওবা ফোংদোকখি। মহাক্না হায়খি শিঙ্গাপুরদা রুপে অমসুং বিম এপ্প হৌদোকপা অসিনা শেন-থুম লৌথোক-লৌশিনগী থবকশিংদা নুংঙাইহল্লে। শিঙ্গাপুরগী মহৈরোইশিং শরুক য়াদুনা চেন্নাইদা অনিশুবা অপুনবা হেক্কাথোন মাইপাক্না পাংথোকখ্রে। হায়রিবা অফবা থবকশিং অসি লৈবাক অনিগী মরক্ত ললোন-ইতিক অমসুং মরুপ-মপাং ওইবা অমসুং মীওইশিং নক্নবগী খুদম্নি।
