ঙসি প্রধান মন্ত্রী শ্রী নরেন্দ্র মোদীনা লুচিংবা কেন্দ্রগী মন্ত্রীমন্দলনা নেসনেল মেদিকেল দিভাইসেস পোলিসি,২০২৩ অয়াবা পীখ্রে।
ভারত্তা মেদিকেল দিভাইসেস সেক্তর অসি ভারতকী অনা-লায়য়েংগী লমদা তঙাইফদ্রবা অমসুং থাদোক্নবা য়াদ্রবা শরুক অমনি। মশিং য়াম্লবা মেদিকেলগী খুৎলায়শিং অমসুং দাইগ্নোস্তিক কিতশিং, ভেন্তিলেতরশিং, রেপিৎ এন্তিজেন তেস্ত কিতশিং, রিএল-তাইম রিভর্স ত্রান্সক্রিপসন পোলিমেরেজ চেন রিক্সন(আর তি-পি সি আর) কিতশিং, আই.আর থর্মোমিতরশিং, পি.পি.ই কিতশিং অমসুং এন-৯৫ মাক্সশিং মশিং য়াম্না পুথোক্তুনা কোবিদ-১৯ লাইচৎ থেংন্নবা ভারতনা লৈবাক মনুং অমসুং মপান লৈবাকশিং মতেং পাংখিবা অদুনা ভারতকী মেদিকেল দিভাইস সেক্তরগী মতেং হেন্না ময়েক লাহল্লে।
ভারত্তা মেদিকেল দিভাইসেস সেক্তর অসি খোঙজেল য়াংনা চাউখৎলক্লিবা সেক্তর অমনি। ভারত্তা মেদিকেল দিভাইসেস সেক্তর অসি ২০৩০দা দোল্লর বিল্লিয়ন ১১(চাউরাক্না লুপা করোর ৯০,০০০) ওইগনি হায়না পানরি অমসুং মালেমগী মেদিকেল দিভাইসেস সেক্তরদা ভারতকী চাকথুং চাদা ১.৫ ওইগনি হায়না পানরি। ভারতকী মেদিকেল দিভাইসেস সেক্তর চাউখৎপগী লম্বীদা চৎলি অমসুং মশাগী ওক্নবা পুথোক্নবা অমসুং মালেমগী দরকার ওইবা ফংহন্নবা খুদোংচাবা কয়া মরাংকাইনা লৈরি।
মেদিকেল দিভাইসশিংগী পি.এল.আই স্কিম পায়খৎনবা ভারত সরকারনা থবক হৌখ্রে অমসুং হিমাচল প্রদেস, মধ্য প্রদেস, তামিল নাদু অমসুং উত্তর প্রদেসতা মেদিকল দিভাইসেস পার্ক মরি লিংখৎনবা মতেং পীখ্রে। মেদিকেল দিভাইসশিংগী পি.এল.আই স্কিমগী মখাদা হৌজিক ফাওবদা লুপা করোর ১২০৬ থাদগদবা অপুনবা প্রোজেক ২৬ অয়াবা পীখ্রে অমসুং মসিগী মনুংদা হৌজিক ফাওবদা লুপা করোর ৭১৪ থাদরকখ্রে। স্কিম অসিগী মখাদা প্রোজেক ১৪না পোৎথোক ৩৭ পুথোকপা হৌরে অমসুং লৈবাক অসিদা অফবা মখলগী মেদিকেলগী খুৎলায়শিং হায়বদি লাইনিয়ার এসেলেরেতর, এম.আর.আই স্কেন, সি.তি-স্কেন, মেম্মোগ্রাম, সি-আর্ম, এম.আর.আই কোইলস, এক্স-রে তুবশিং পুথোকপা হৌরে। তুংদা পোৎথোক ১২ পুথোকপা হৌরগনি। হন্দক অয়াবা পীখিবা অপুনবা প্রোজেক ২৬গী মনুংদা প্রোজেক ৫ পোৎথোক ৮৭ লৈবাক অসিদা শানবা কেতেগোরি বিগী মখাদা লৈরে।
সেক্তর অসি চাউখৎপা য়াংশিন্নবা অচুম্বা পোলিসি ফ্রেমৱার্ক অমা শেম্বা অমসুং সেক্তর অসিগী খুদোংচাবশিং মপুংফানা লৌবা হায়বসি তাঞ্জা অসিদা তঙাইফদবা ওইরে। সেক্তর অসি পুক্নিং থৌগৎনবা সরকারগী তোঙান-তোঙানবা দিপার্তমেন্তশিংনা থৌরম কয়া পায়খৎপা হৌরে। সেক্তর অসি মখল কয়া থোক্না লৈবা মরম্না, মেদিকেল দিভাইস ইন্দস্ত্রিগী চৎন-কাংলোনশিং, স্কিল হেনগৎহনবা অমসুং ললোন-ইতিক্কী থবক ফগৎহনবগী থবক অসি কেন্দ্র অমসুং রাজ্যগী থাকশিংদা তোঙান-তোঙানবা দিপার্তমেন্তশিংনা পায়খৎলে।
মীয়ামদা অনকপা মফমদা, মমল হোংবা, মগুন লৈবা অমসুং অনৌবা মেদিকেলগী খুৎলায়শিং ফংহন্নবা মীয়ামগী হকশেলগী পান্দম ফংবা ঙম্নবা সেক্তর অসি চাউখৎহন্নবা নেসনেল মেদিকেল দিভাইসেস পোলিসি,২০২৩না পান্দম থম্লি। অকনবা রিগুলেতোরি ফ্রেমৱার্ক অমা শেমগৎতুনা, ত্রেনিং পীদুনা, ইন্দস্ত্রিনা দরকার ওইবা হৈথোই-শিংথোইবা শিন্মীশিং পুথোক্নবা অৱাংবা থাক্কী ইজুকেসন পীদুনা মেনুফেকচরিংগী অফবা ফিবম অমা শেমগৎপনা সেক্তর অসিগী কান্নবা মপুংফানা লৌবা ঙমগনি। লৈবাক মনুংদা শেন থাদবা অমসুং মেদিকেল দিভাইস পুথোকপা অসিনা ভারত সরকারগী অত্মানির্ভর ভারত অমসুং মেক ইন ইন্দিয়া থৌরমশিং মতেং পাংগনি।
নেসনেল মেদিকেল দিভাইসেস পোলিসি,২০২৩গী মরুওইবা শক্তমশিং:
পান্দম: মথং চহি ২৫দা মালেমগী কৈথেলদা চাকথুং চাদা ১০-১২ ফাওবা হেনগৎহন্দুনা মেদিকেল দিভাইসশিং শাবা অমসুং অনৌবা পুথোকপদা মালেমগী লুচিংবা অমা ওইনবা পান্দম থম্লি। ২০৩০দা মেদিকেল দিভাইসেস সেক্তর অসি হৌজিক দোল্লর বিল্লিয়ন ১১ ওইরিবা অসি দোল্লর বিল্লিয়ন ৫০দা হেনগৎলকপদা থৌশিল অসিনা মতেং পাংগনি হায়বগী থাজবা থম্লি।
মিসন: মীওই খুদিংমক ফংহনবা, মমল হোংবা, মগুন লৈহনবা, অফবা লায়য়েং, হকচাং ফহনবা, সেকুরিতি, রিছার্স অমসুং ইন্নোবেসন অমসুং হৈথোই-শিংথোইবা মীওইশিংগী খুৎথাংদা মেদিকেল দিভাইস সেক্তর চাউখৎহন্নবা থৌশিল অসিনা লম্বী অমা শেম্বা।
মেদিকেল দিভাইস সেক্তর য়োকখৎনবা লাল্লোংশিং:
হিরম তরুক কোনশিনবা লাল্লোংশিংনা মেদিকেল দিভাইস সেক্তর লমজিংগনি:
- চৎন-কাংলোনশিং ফগৎহনবা: রিছার্স অমসুং ললোন-ইতিক্কী থবক লাইহন্নবা অমসুং মেদিকেল দিভাইসশিংগী লাইসেস পীনবা শিঙ্গল ৱিন্দো ক্লিয়ারেন্স সিস্তেম অমা শেম্নবা মরী লৈনবা দিপার্তমেন্তশিং হায়বদি এ.ই.আর.বি, এম.ই.আই.তি.ৱাই, দি.এ.ঐচ.দিগা থবক তৌমিন্নগনি অমসুং বি.এস.আইগী থৌদাং হেনগৎহনগনি অমসুং মমল লেপ্নবগী নিয়মশিং ইনগদবনি।
- ইনফ্রাস্ত্রকচর ফগৎহনবা: অচৌবা মেদিকেল দিভাইস পার্কশিং লিংখৎপা, নেসনেল ইন্দস্ত্রিএল কোরিদোর প্রোগ্রাম অমসুং নেসনেল লোজিস্তিক্স পোলিসি ২০২১গী মখাদা ইকোনোমিক জোনশিংগা নক্নবা মফমশিংদা মালেম থাক্কী কম্মন ইনফ্রাস্ত্রকচর ফেসিলিতি লৈবা ক্লস্তরশিং শেমগৎপা।
- আর অমসুং দি অমসুং ইন্নোবেস হেনগৎহনবা: ভারত্তা আর অমসুং দি অমসুং ইন্নোবেস হেনগৎহনবা থৌশিল অসিনা পান্দম থম্লি অমসুং ভারত্তা ফার্মা অমসুং মেদতেক সেক্তরদা আর অমসুং দি অমসুং ইন্নোবেসনগী নেসনেল পোলিসি অমা শেম্নবা দিপার্তমেন্তগী পান্দমদা মতেং পাংলে। থৌশিল অসিনা একাদেমিক অমসুং রিছার্স ইন্সতিতুৎশিংদা সেন্তর ফোর এক্সলেন্সশিং লিংখৎনবা অমসুং স্তার্দ-অপশিং য়োকখৎনবা পান্দম থম্লি।
- সেক্তর অসিদা শেন থাদনবা পুক্নিং চিংশিনবা: মেক ইন ইন্দিয়া, অয়ুস্মান ভারত য়োজনা, হিএল-ইন-ইন্দিয়া, স্তার্দ-অপ মিসনগা লোয়ন্না লনাই মীওইশিং শেন থাদরক্নবা থৌশিল অসিনা পান্দম থম্লি।
- হুমেন রিছোর্স দিবলপমেন্ত: ভেলু চেন শীনবা থুংনা হৈথোই-শিংথোইবা মীওইশিং হায়বদি সাইন্তিস্তশিং, রিগুলেতরশিং, হকশেলগী অখঙ-অহৈশিং, মেনেজরশিং, তেক্নিসিয়ানশিং লেপ্তনা ফংহন্নবা থৌশিল অসিনা পান্দম থম্লি:
- মেদিকেল দিভাইস সেক্তরদা থবক তৌরিবশিং স্কিল্লিং, রিস্কিল্লিং অমসুং অপস্কিল্লিংগীদমক স্কিল দিবলপমেন্ত অমসুং ওন্ত্রেপ্রেনিউয়রসিপ মিনিস্ত্রিদা লৈরিবা মচাকশিং ঐখোয়না শীজিন্নবা য়াগনি।
- তুংগী মেদিএল দিভাইস তেক্নোলোজিশিংগীদমক অহৈবা মীওইশিং পুথোকপা ঙম্নবা হৌজিক লৈরিবা ইন্সিতিতুৎশিংদা মেদিকেল দিভাইসশিংগী কোর্সশিং হাংদোকপদা থৌশিল অসিনা শৌগৎকনি।
- মালেমগী কৈথেলদা চাংদম্নবা ঙম্নবা মেদিকেল তেক্নোলোজিশিং শেমগৎনবা মপানগী একাদেমিক/ইন্দস্ত্রি ওর্গনাইজেসনশিংগা থবক তৌমিন্নবা।
- ব্রান্দ শেমগৎপা অমসুং ৱাখল তাহনবা: দিপার্তমেন্তগী মখাদা এক্সপোর্ত প্রোমোসন কাউন্সিল অমা শেমদুনা কৈথেলগা মরী লৈনবা ৱাফমশিং থেংন্নবা থৌশিল অসিনা পান্দম থম্লি:
- মেনুফেকচরিং অমসুং স্কিল্লিংগী থবক্তা মালেমগী খ্বাইদগী ফবা থবকশিংদগী তম্নবা থিজিনবা অমসুং প্রোজেকশিং হৌদোকপা অসিনা ভারত্তা অসিগুম্বা নমুনাশিং মাইপাক্না শীজিন্নবা য়াগনি।
- লৌশিং পীথোক-পীশিন তৌন্নবা অমসুং সেক্তর শীনবা থুংনা অকনবা মরী শেমগৎনবা তোঙান-তোঙানবা মরী লৈনবশিং পুনশিন্নবা অহেনবা ফোরমশিং শেমগৎপা।
অনা-লায়য়েংগী লমদা ভারত খক্তগী নত্তনা মালেমগী দরকার ওইবশিং ফংহনবা ঙম্নবা মেদিকেল দিভাইস ইন্দস্ত্রি মতেং পাংনবা থৌশিল অসিনা পান্দম থম্লি। অনাবশিংগী দরকার ওইবশিং ফংহনবা ঙম্নবা অনাবশিংদা মীৎয়েং থম্বা থৌরাং অমগা লোয়ন্না য়াংনা চাউখৎপগী লম্বী অমদা চৎনবা নেসনেল মেদিকেল দিভাইসেস পোলিসি,২০২৩ না পান্দম থম্লি।
