ভারতকী নহাশিংনা করিগুম্বা খরা অচৌবা থাক্তা তৌবা পাম্মি: পি.এম. মোদীনা মন কি বাত্তা ফোঙদোকখি
August 29th, 11:30 am
মরূপশিং, শান্ন-খোৎনবগী ৱাফম হেক পল্লকপদা নহারোল পুম্নমক মীৎমাঙদা মহৌশানা চোংথোরকই। ঐখোয়না নহা মীরোলসিদা নীংথিনা য়েংলুবা মতমদা ঐখোয়না অহোংবা অমা উবা ফংই। নহাশিংগী পুক্নিংদা অহোংবা অমা লাক্লে। অমদি ঙসিগী নহা ওইরিবা মীওইশিংনা অরিবা চৎনদ্রবা থৌওং অমদি মওং মতৌশিং থাদোক্তুনা পুম্নৌ নৌবা, খেন্নবা খরা তৌবা পাম্লি। ঙসিগী নহাশিংনা হান্না শেম শাদুনা থম্লম্লবা লম্মীদা চৎপা পাম্নদ্রে; মখোয়না অনৌবা লম্বী শেম্নিংলে। মখোয়না হান্না খঙনদ্রিবা লমখৈদুদা, অনৌবা পন্থুংদা, অনৌবা পান্দম অমদি অনৌবা লম্বী, অনৌবা মঙলান্দা খোঙ থাংজিন্নিংলি। নহা অমনা মপুক্নিংদা লেপখ্রবদি মদু ফংনবা হোৎনবদা করিগুম্বা অমত্তা লেম্না থাদে… অহিং নুংথিল নাইদনা হোৎনৈ। মতম খরগী মমাঙদা ভারতনা মাগী স্পেস সেক্তর হাংদোরকপাম তমদা… অতেনবা মতমগী মনুংদা নহা মীরোলসিনা তাঞ্জা অদু লাকখিবা ঐখোয়না উখ্রে। মদুগী কান্নবা ফংননবগীদমক, কলেজকী মহৈরোয়শিং অমসুং য়ুনিভর্সিতীদা অমদি প্রাইভেত সেক্তরদা থবক তৌরিবা নহাশিংনা ইখৌ লাংনা চোংথোরকখি। লাক্কদৌরিবা নুমিৎশিংদা মশিং য়াম্লবা সেতলাইত কয়াদি ঐখোয়গী নহা, মহৈরোয়, কলেজ, য়ুনিভর্সিতী অমসুং লেবতা থবক তৌরিবা মহৈরোয়শিংনা শেমবা ওইগনি হায়না ঐনা চেৎনা থাজৈ।