ভারতকী জি২০ প্রসিদেন্সীগা মরী লৈনবা হীরমশিংদা খন্ননবা দিসেম্বর ৫দা পার্তী পুম্বগী মীফম অমা পাঙথোকখ্রে। প্রধান মন্ত্রী, শ্রী নরেন্দ্র মোদীনা ময়াই তাংবল লৌদুনা ফমখিবা মীফম অসিদা ভারত শিনবা থুংবদগী রাজনিতীগী লুচিংবশিংনা থৱায় য়াওনা শরুক য়াবা উবা ফংখি।
প্রধান মন্ত্রীনা হায় মদুদি ভারতকী জি২০ প্রসিদেন্সী অসি জাতি পুম্বগীনি অমসুং ভারতকী মপাঙ্গল মালেম পুম্বদা উৎনবা অতাংবা খুদোংচাবা অমনি। প্রধান মন্ত্রীনা ঙসি ভারতকীদমক মালেমদা খঙনীংবা পোক্নরি অমসুং মীৎয়েং চংনরি মসিনা ভারতকী জি২০ প্রসিদেন্সীগী মতিক ময়াইসু হেন্না হেনগৎহল্লি।
প্রধান মন্ত্রীনা তীমৱার্ক্কী মরু ওইবা অদু থম্লদুনা জি২০গী তোঙান-তোঙানবা থৌরমশিং শিনবদা লুচিংবা পুম্নমক্না মতেং পাংবীনবা হায়খি। মহাক্না জি২০ প্রসিদেন্সিনা অচৌবা মেত্রোশিংগী মথক্তা ভারতকী শরুক কয়া অসি উৎথোকপদা মতেং পাংগনি মসিনা ঐখোয়গী লৈবাক্কী শরুক অমমমগী তোপ-তোপ্পা মগুনশিং খঙহনগনি।
ভারতকী জি২০ প্রসিদেন্সী মনুংদা ভারত্তা লাক্কদবা মশিং য়াম্লবা বিজিতরশিংগী মতাংদা পল্লদুনা প্রধান মন্ত্রীনা জি২০গী মীফমশিং পাঙথোক্কদবা মফমশিংদা তুরিজম চাউখৎহন্নবা অমসুং লমদম অদুগী শেন্মীৎলোন শাহৌ পীনবা মতিক-ময়াই অদু শীজিন্ননবা হায়খি।
প্রধান মন্ত্রীনা ৱা ঙাংদ্রিঙৈদা শ্রী জে.পি. নদ্দা, শ্রী মাল্লিকরজুন খার্গে, কুমারি মম্তা বেনর্জী, শ্রী নভিন পতনায়ক, শ্রী অর্বিন কেজরিৱাল, শ্রী ৱাই.এস. জগন মোহন রেদ্দী, শ্রী সিতারাম য়েচুরী, শ্রী চন্দ্রবাবু নাইদু, শ্রী এম.কে. স্তেলিন, শ্রী ইদাপ্পাদি কে. পালানিস্বামি, শ্রী পাশুপাতিনাথ পারাস, শ্রী একনাথ শিন্দে অমসুং কে.এম. কাদের মোহিদীন য়াওনা তোঙান-তোঙানবা রাজনিতীগী লুচিংবশিং ভারতকী জি২০ প্রসিদেন্সীগী মতাংদা মখোয়গী মমল য়াম্লবা ৱাখল্লোনশিং ফোঙদোকখি।
গৃহ মন্ত্রী অমসুং শেল-থুম মন্ত্রীনা তেনতক্না ৱা ঙাংখি। ভারতকী জি২০ প্রসিদেন্সীগী হীরমশিং কোনশিল্লিবা অকুপ্পা ৱারোল য়াওবা প্রজেন্তেসনসু পীখি।
শ্রী রাজনাথ সিংহ, শ্রী অমিত শাহ, শ্রীমতি নির্মলা সিতারামন, দা. এস. জয়শঙ্কর, শ্রী পিয়ুশ গোয়ল, শ্রী প্রলহাদ জোশি, শ্রী ভুপেন্দ্র য়াদব অমসুং হান্নগী প্রধান মন্ত্রী শ্রী ঐচ.দি. দেবে গৌরা হায়রিবশিং অসিনা মীফম অদুদা শরুক য়াখি।
