ওগস্ত ২২, ২০২৪ দা ৱারি শান্নদুনা ভারত অমসুং পোলেন্দগী প্রধান মন্ত্রীশিংগী মরক্তা য়ানবা পুরক্লে অমসুং স্ত্রাতেজিক পার্তনরশিপ লিংখৎতুনা লৈবাক অনি মতেং পাংনবগী খোঙজেল অদু খঙলে অমসুং মখাগী মরুওইবা হিরমশিং অসিদা চহি ২০২৪-২০২৮ শীনবা থুংনা চহি মঙাগী এক্সন প্লান অমা পাংথোক্তুনা লৈবাক অনি মতেং পাংনবা লমজিংগনি:
রাজনিতিগী ৱারি শান্নবা অমসুং সেকুরিতিগী মতেং পাংনবা
ফোরেন মিনিস্তরশিংগী মরক্তা লৈবাক অনি চাংনাইনা উনগনি অমসুং মখোয়না উনবা মতমদা মখোয়না লৈবাক অনিগী অমসুং মালেমগী ওইবা ৱাফমশিং খন্নগনি।
য়ুনাইতেদ চার্তরগী ৱাখল্লোন অমদা লৈবাকশিংগী মরক্তা মতেং পাংন্নবা থবক থবক্কী ওইনা য়ুম্ফম ওইদুনা লৈবাক অমনা লৈবাক অমগী অনিংবশিং শৌগৎনবা লৈবাক অনিনা খন্নগনি।
মপান লৈবাকশিংগী ফম পায়রিবা দিপুতি মিনিস্তরগী থাক্তা লৈবাক অনিনা চহিগী ওইনা রাজনিতিগী ৱারি শান্নবা পাংথোক্কনি।
দিফেন্স ইন্দস্ত্রিশিংগী মরক্তা থবক তৌমিন্নবা হেনগৎনবা, মিলিতরিগী খুৎলায় মতমগা চুননা শেমগৎনবা অমসুং মরুওইবা ৱাফমশিং লোইশিন্নবা সেকুরিতি অমসুং দিফেন্সকী লমদা মতেং পাংন্নবা মরী লৈনবা ইন্সতিতুসনশিং চাং নাইনা খন্ন-নৈনবা লৈবাক অনিনা পুক্নিং থৌগৎকনি।
জোইন্ত ৱার্কিং গ্রুপ ফোর দিফেন্স কোওপরেসনগী মথংগী মীফম ২০২৪ দা পাংথোকপা হায়না লৈবাক অনিনা ৱারেপ লৌরে।
ললোন-ইতিক অমসুং শেন থাদবা
হায়-তেক, লৌউ-শিংউ, এগ্রিতেক, ফুদ তেক, ইনর্জি, ক্লাইমেত, গ্রিন তেক্নোলোজিশিং, ইনফ্রাস্ত্রকচর, স্মার্দ সিতিশিং, ঙাক-শেন, অনা-লায়য়েং, ফার্মাসিউতিকেলশিং, অমসুং মাইনিংদা লৈরিবা খুদোংচাবশিং খঙলদুনা, ২০২৪গী অরোইবদা পাংথোক্কদবা জোইন্ত কম্মিসন ফোর ইকোনোমিক কোওপরেসন(জে সি ই সি)গী মথংগী মীফমদা হায়রিবা সেক্তরশিং অসিদা মখা তানা মতেং পীন্নবা ওইথোকপশিং নাকল অনিনা খন্নগনি।
নাকল অনিনা চহি মঙা খুদিংগী জোইন্ত কম্মিসন ফোর ইকোনোমিক কোওপরেসন(জে সি ই সি)গী মীফমশিং পাংথোক্কনি অমসুং করিগুম্বা দরকার ওইরবদি হেন্না তোইনা মীফমশিং পাংথোকপগী খুদোংচাবা লৈরি।
লৈবাক অনিগী ললোন-ইতিক পাংথোকপা ঙম্নবা অমসুং লাইনা ললোন-ইতিক অমসুং শেন থাদবা ঙম্নবা খুদোংচাদবা খুদিংমক কোকহন্নবা লৈবাক অনিনা থবক তৌগনি।
সপ্লাই চেন খুদোংচাদবা মায়োক্নবা ঙম্বা হেনগৎহন্দুনা অমসুং ললোন-ইতিক্কী থবকশিংগা মরী লৈনবা খুদোংথিবশিং মায়োক্নদুনা লৈবাক অনিনা শেন-থুমগী সেকুরিতিদা মতেং পীনবা হেনগৎহনগনি।
ক্লাইমেত, ইনর্জি, মাইনিং, সাইন্স অমসুং তেক্নোলোজি
সার্কুলার ইকোনোমি অমসুং অমোৎপা ঈশিং শেংদোক্নবগীদমক তুংকোইনা চৎনবা য়াবা অমসুং মহৌশাগী অকোয়বগী ফিবম কায়হন্দবা তেক্নোলোজিগী পাম্বৈশিংগীদমক লৈবাক অনিনা মতেং পীনবা পাকথোক-চাউথোকহনগনি।
ইনর্জি ৱাৎতনবগীদমক লৈবাক অনিনা পুৱারি ওইনা ইনর্জি পীনরিবা অসি খঙলদুনা, মৈখু থাংদবা ইনর্জিগী থবকশিং খুমাঙচাউশিন্নবা অমসুং মহৌশাদা চৈথেং পীবা হন্থহন্নবা ক্লিন কোএল তেক্নোলোজিশিংদা মতেং পীন্নবা লৈবাক অনিনা পুন্না থবক তৌমিন্নগনি।
ইন্নোবেসনগী মরুওইবা থৌদাং খঙলদুনা অমসুং ক্রিতিকেল মিনরেলশিংগী মরুওইবা হেনগৎলকপদগী, লৈবাক অনিনা অৱাংবা থাক্কী মাইনিংগী থবকশিং, হায়-তেক মেছিনশিং, অশোই-অঙাম থোক্তনবা থবকশিং অমসুং মাইনিংগা মরী লৈনবা উদ্যোগশিংদা মতেং পীনবা হেনগৎলক্নবা থবক তৌমিন্নগনি।
অশোই-অঙাম থোকহন্দনা, তুংকোইনা অমসুং স্পেস অমসুং শেন্দোং তান্নবা স্পেস ইকোসিস্তেমশিং শীজিন্নবা হেনগৎলক্নবা কোওপরেসন এগ্রিমেন্ত অমা থম্নবা থবক তৌবদা লৈবাক অনিনা য়ানরে। মীওইবা অমসুং রোবোতনা থিজিনবা পুক্নিং থৌগৎপা হায়না মখোয়না য়ানরে।
ইন্তরনেসনেল ইনর্জি এজেন্সিদা ভারতনা শরুক য়ানিংবগী অপাম্বা লৈরিবা অদু পোলেন্দনা খঙখি।
পোৎ-চৈ পুথোক-পুশিন অমসুং চৎথোক-চৎশিন
লৈবাক অনিনা ত্রান্সপোর্ত ইনফ্রাস্ত্রকচরগী লমদা মতেং পীনবা হেনগৎহন্নবা খুদোংচাবশিং থিদোক্কনি।
মখা তানা ফ্লাইত য়ৌবা হেনগৎহন্দুনা অমসুং খন্ন-নৈনদুনা লৈবাক অনিগী মরক্তা চৎথোক-চৎশিন হেনগৎহন্নবা নাকল অনিনা থবক তৌগনি।
তেরোরিজম
মখল খুদিংমক্কী তেরোরিজম অমতা ওইনা য়ানিংদবা নাকল অনিনা অমুক হন্না ফোঙদোকখি অমসুং তেরোরিস্তকী থবকশিং পাংথোকপা শেন থাদবা, থৌরাং তৌবা মীওইশিং লৈবাক অমতনা চঙজফম পীদনবা ৱাফম থমখি। য়ু.এন সেকুরিতি কাউন্সিল ১২৬৭ সেঙ্কসন কম্মিতিনা লাউথোকখ্রবা গ্রুপশিংগা থবক তৌমিন্নবা লনাই মীওইশিং য়াওনা তেরোরিস্ত খুদিংমক্কী মথক্তা অকনবা থবকশিং লৈবাক অনিনা লৌখৎকনি।
সাইবর সেকুরিতি
শেন-থুম অমসুং খুন্নাই চাউখৎনবগীদমক সাইবর সেকুরিতিগী মরুওইবা অদু খঙলদুনা, লৈবাক অনিনা আই.সি.তিগা মরী লৈনবা হিরমশিংদা মতেং পাংনবা হেনগৎহনগনি অমসুং মালেমগী ওইনা মতেং পীনবা, লেজিসলেতিপ অমসুং চৎন-কাংলোনশিংগী পাম্বৈশিং, জুদিসিএল অমসুং পুলিসগী থবকশিং, সাইবর-এত্তেকশিং থিংবা, মাংজৌননা ঙাকথোকপা অমসুং থেংনবা, ৱাখল তাহনবা অমসুং তাকপী-তম্বীবগী থবকশিং, সাইন্তিফিক অমসুং তেক্নোলোজিগী রিছার্স অমসুং দিবলপমেন্ত, ললোন-ইতিক অমসুং শেন-থুমগী থবকশিংদা লৈবাক অনিনা নকশিন্ননা থবক তৌবা হেনগৎহনগনি।
হকশেল
নাকল অনিনা দরকার ওইবা হিরমশিংদা ই-পাউশিং শরুক য়ামিন্নবা, হকশেলগী অখঙ-অহৈশিংগী মরক্তা উনবা হেনগৎহন্দুনা, লৈবাক অনিমক্কী হকশেলগী লোয়শঙশিংগী মরক্তা মতেং পীনবা পুক্নিং থৌগৎতুনা হকশেলগী লমদা মতেং পাংনবা হেনগৎহনবগী মরুওইবা থৌদাং অদু লৈবাক অনিনা খঙলে।
মীগা-মীগা লৈনবা মরীশিং অমসুং নাতকী লমদা মতেং পীনবা
সোসিএল সেকুরিতিগী য়ানখিবশিং থবক ওইনা পাংথোক্নবা নাকল অনি পুন্না থবক তৌমিন্নগনি অমসুং হিরম অসিদা মখোয় মখোয়গী লৈবাক মনুংগী আইনগী থবকশিং মপুংফানা লোইশিন্নবা মখোয়না থবকশিং পায়খৎকনি।
লৈবাক অনিগী নাতকী মহৈলোয়শঙশিং অমসুং লুপশিংগী মরক্তা মতেং পীনবা হেনগৎহন্নবা লৈবাক অনিনা থবক তৌগনি। লৈবাক অনিগী কলাকারশিং, লোলগী অখঙ-অহৈশিং, পন্দিৎশিং অমসুং নাতকী মহৈলোয়শঙশিংগী মরক্তা চৎথোক-চৎশিন তৌবা নাকল অনিনা হেনগৎহনগনি। লৈবাকশিংগী থিঙ্ক তেঙ্কশিং অমসুং অখঙ-অহৈশিংগী মরক্তা মতেং পীনবা অমসুং ৱারি শান্নবা হেনগৎহন্নবা খুদোংচাবশিং লৈবাক অনিনা মশক খঙদোক্কনি।
অৱাংবা থাক্কী মহৈ তম্বদা মতেং পীনবা হেনগৎনবা নাকল অনি পুন্না থবক তৌমিন্নগনি অমসুং নাকল অনিগী য়ুনিভর্সিতিশিং মরী লৈনবা থবকশিং পাংথোক্নবা পুক্নিং থৌগৎকনি। লৈবাক অনিগী মহৈলোয়শঙশিংগী মরক্তা পুন্না থবক তৌমিন্ননবা লৈবাকশিংগী ওথোরিতিশিংদা পুক্নিং থৌগৎকনি।
লৈবাক অমনা অমবু মশক খঙবা অমসুং লৈবাক অনিগী নাতকী মরীশিং য়োকখৎনবা লাইরিক-লাইশু অমসুং লোল অমসুং নাতকী থৌরমশিং একচেঞ্জ তৌনবগী মরুওইবা অদু নাকল অনিনা থমখি। পোলেন্দদা ভারতকী মরমদা থিজিল্লিবশিং অমসুং হিন্দীনা লৌরিবা থৌদাং অমসুং ভারত্তা পোলিস লোল অমসুং নাতকী নৈনবশিং মখোয়না খঙখি অমসুং ভারতকী তোঙান-তোঙানবা য়ুনিভর্সিতিশিংদা পোলিস লোল তম্নবা ভারতকী এজেন্সিশিং অমসুং পোলিস নেসনেল এজেন্সি ফোর একাদেমি একচেঞ্জগী মরক্তা য়ানবা অমা পুরক্নবা থবক তৌবদা য়ানবা পুরক্লে।
তুরিজমগী লমদা মতেং পীনবা হেনগৎহন্দুনা লৈবাক অনিমক্তা লমকোয়বা মীওইশিং চৎথোক-চৎশিন তৌবা হেনগৎহন্নবা নাকল অনিনা মখা তানা থবক তৌগনি। থবকশিংগী মনুংদা তুরিজম মিসনশিং পাংথোকপা, ইনফ্লুয়েন্সরশিং অমসুং ত্রাবেল এজেন্সিশিংগী ফেমিলি ত্রিপশিং পাংথোকপা অমসুং লৈবাক অনিমক্তা তুরিজমগী মেলাশিং রোদসোশিং শরুক য়াবা য়াওরি।
দিপ্লোমেতকী মরী লৈনরকপা চহি ৭৫ মপুংফারকপগী থৌরম পাংথোক্নবা, দিপ্লোমেতি মিসনশিংনা শীন্দুনা লৈবাক অমনা লৈবাক অমদা নাতকী কুহ্মৈশিং পাংথোক্কনি। অসিগুম্বা কুহ্মৈশিংগী অখন্নবা থৌরমশিংগী তারিখশিং লৈবাক অনি খন্নরবা মতুংদা লেপকনি।
নাকল অনিনা মহৈরোয়শিং লৈবাক অমদগী লৈবাক অমদা চৎথোক-চৎশিন তৌনবগী থৌরম অমা শেমগৎকনি অমসুং নহারোলশিংগী মরক্তা অমনা অমবু মশক খঙবা ঙমহনগনি।
ভারত-ই.য়ু
শান্তি, তুংদু-লৈতাবা অমসুং নুংঙাই-য়াইফবা হেনগৎহনবদা মরুওইবা থৌদাং অমা লৌবগা লোয়ননা ই.য়ু অমসুং ভারত অসি মরুওইবা মালেমগী মরুপশিংনা হায়বা খঙবগা লোয়ননা, হৌজিক চৎথরিবা ইন্দিয়া-ই.য়ু ত্রেদ অমসুং ইনভেস্তমেন্তগী ৱারি শান্নবা অথুবা মতমদা লোইশিন্নবা, ইন্দিয়া-ই.য়ু ত্রেদ এন্দ তেক্নোলোজি কাউন্সিল থবক হৌনবা অমসুং ললোন-ইতিক, অৱাংবা থাক্কী তেক্নোলোজিশিং অমসুং সেকুরিতিদা ইন্দিয়া-ই.য়ু স্ত্রাতেজিক পার্তনরশিপ খুমাঙচাউশিন্নবা ইন্দিয়া-ই.য়ু কন্নেক্তিবিতি পার্তনরশিপ থবক ওইনা পায়খৎনবা লৈবাক অনিনা শৌগৎকনি।
মাঙলোমদা চঙশিনবা
থবকশিং হন্না য়েংশিন্নবা অমসুং অনৌবা পাউ খঙহন্নবা মরুওইবা থবক ওইনা চহিগী রাজনিতিগী খন্ন-নৈনবা পাংথোকপগা লোয়ননা এক্সন প্লান থবক ওইনা পাংথোকপা অসি লৈবাক অনিনা চাং নাইনা য়েংশিনগনি। মপান লৈবাক্কী ফম পায়রিবা লৈবাকশিংগী মিনিস্তরশিংনা এক্সন প্লান অসি অতোপ্পা চহি মঙা শাংদোকপগী থবক পায়খৎকনি।
