നിക്ഷേപത്തിനും ബിസിനസ് അവസരങ്ങൾക്കുമുള്ള ഒരു അഭിവൃദ്ധി പ്രാപിക്കുന്ന കേന്ദ്രമെന്ന നിലയിൽ സംസ്ഥാനത്തിന്റെ അപാരമായ സാധ്യതകൾ ഈ പരിപാടി അനാവരണം ചെയ്യുന്നു: പ്രധാനമന്ത്രി
രാജ്യത്തിന്റെ വികസനത്തിൽ കിഴക്കൻ ഇന്ത്യ ഒരു വളർച്ചാ എഞ്ചിനാണ്, ഒഡീഷ ഇതിൽ ഒരു പ്രധാന പങ്ക് വഹിക്കുന്നു: പ്രധാനമന്ത്രിഇന്ന്, കോടിക്കണക്കിന് ആളുകളുടെ അഭിലാഷങ്ങളാൽ നയിക്കപ്പെടുന്ന വികസനത്തിന്റെ പാതയിലേക്ക് ഇന്ത്യ നീങ്ങുന്നു: പ്രധാനമന്ത്രിഒഡീഷ ശരിക്കും മികച്ചതാണ്, ഒഡീഷ പുതിയ ഇന്ത്യയുടെ ശുഭാപ്തിവിശ്വാസത്തെയും മൗലികതയെയും പ്രതീകപ്പെടുത്തുന്നു, ഒഡീഷ അവസരങ്ങളുടെ നാടാണ്, ഇവിടുത്തെ ജനങ്ങൾ എപ്പോഴും മികച്ച പ്രകടനം കാഴ്ചവയ്ക്കാൻ അഭിനിവേശം കാണിച്ചിട്ടുണ്ട്: പ്രധാനമന്ത്രിഇന്ത്യ ഹരിത ഭാവിയിലും ഹരിത സാങ്കേതികവിദ്യയിലും ശ്രദ്ധ കേന്ദ്രീകരിക്കുന്നു: പ്രധാനമന്ത്രിഇരുപത്തൊന്നാം നൂറ്റാണ്ടിലെ ഇന്ത്യയെ സംബന്ധിച്ചിടത്തോളം, ഈ യുഗം ബന്ധിപ്പിച്ച അടിസ്ഥാന സൗകര്യങ്ങളെയും മൾട്ടി-മോഡൽ കണക്റ്റിവിറ്റിയെയും കുറിച്ചുള്ളതാണ്: പ്രധാനമന്ത്രിഒഡീഷ ടൂറിസത്തിന് വളരെയധികം സാധ്യതകൾ നൽകുന്നു: പ്രധാനമന്ത്രിയുവ പ്രതിഭകളുടെ വലിയ കൂട്ടവും സംഗീത മേളകൾക്കായി വലിയൊരു പ്രേക്ഷകരും ഉള്ളതിനാൽ, അഭിവൃദ്ധി പ്രാപിക്കുന്ന കൺസേർട്ട് സമ്പദ്‌വ്യവസ്ഥയ്ക്ക് ഇന്ത്യയിൽ വലിയ സാധ്യതകളുണ്ട്: പ്രധാനമന്ത്രിഭുവനേശ്വറിലെ 'ഉത്കർഷ് ഒഡീഷ'- മേക്ക് ഇൻ ഒഡീഷ കോൺക്ലേവിൽ പ്രധാനമന്ത്രി നടത്തിയ പ്രസംഗം
ജയ് ജഗന്നാഥ്!
ഒഡീഷ ഗവർണർ ശ്രീ ഹരിബാബു, ജനകീയനായ മുഖ്യമന്ത്രി ശ്രീ മോഹൻ ചരൺ മാജി ജി, കേന്ദ്രമന്ത്രിസഭയിലെ എൻ്റെ സഹമന്ത്രിമാർ, ഒഡീഷ ഗവൺമെന്റിലെ മന്ത്രിമാർ, എംപിമാർ, എംഎൽഎമാർ, വ്യവസായ-വ്യാപാര രംഗത്തെ പ്രമുഖരായ സംരംഭകർ, പരിപാടിയിൽ പങ്കെടുക്കുന്ന രാജ്യത്തേയും ലോകത്തെയും നിക്ഷേപകർ, ഒഡീഷയിലെ എൻ്റെ പ്രിയ സഹോദരീസഹോദരന്മാരേ!
ജനുവരി മാസത്തിൽ, അതായത് 2025-ൻ്റെ തുടക്കത്തിൽ ഒഡീഷയിലേക്കുള്ള എൻ്റെ രണ്ടാമത്തെ സന്ദർശനമാണിത്. കുറച്ച് ദിവസങ്ങൾക്ക് മുമ്പ്, ഞാൻ ഇവിടെ പ്രവാസി ഭാരതീയ ദിവസ് പരിപാടിയിൽ പങ്കെടുത്തിരുന്നു. ഇന്ന്, നിങ്ങളുടെ ഇടയിൽ, ഉത്കർഷ് ഒഡീഷ കോൺക്ലേവിൽ ഞാൻ വന്നിരിക്കുന്നു. എന്നോട് പറഞ്ഞതു പ്രകാരം ഒഡീഷയിൽ നടന്ന ഏറ്റവും വലിയ ബിസിനസ് ഉച്ചകോടിയാണ് ഇത്. മുമ്പത്തേതിനേക്കാൾ 5-6 മടങ്ങ് കൂടുതൽ നിക്ഷേപകർ ഇതിൽ പങ്കെടുക്കുന്നുണ്ട്. ഈ അത്ഭുതകരമായ സംഭവത്തിന് ഒഡീഷയിലെ ജനങ്ങളെ, ഒഡീഷ ഗവൺമെന്റിനെ ഞാൻ അഭിനന്ദിക്കുന്നു. ഈ പരിപാടിയിലേക്ക് നിങ്ങളെ ഏവരേയും ഞാൻ സ്വാഗതം ചെയ്യുന്നു.
സുഹൃത്തുക്കളേ,
കിഴക്കൻ ഇന്ത്യയെ രാജ്യ വികസനത്തിൻ്റെ വളർച്ചാ യന്ത്രമായി ഞാൻ കരുതുന്നു. ഒഡീഷയ്ക്ക് അതിൽ പ്രധാന പങ്കുണ്ട്. ആഗോള വളർച്ചയിൽ ഇന്ത്യക്ക് വലിയ പങ്കുണ്ടാകുമ്പോൾ കിഴക്കൻ ഇന്ത്യക്ക് അതിൽ നിർണായക സംഭാവനയുണ്ടായിരുന്നു എന്ന വസ്തുതയ്ക്ക് ചരിത്രം സാക്ഷിയാണ്. കിഴക്കൻ ഇന്ത്യയിൽ പ്രധാന വ്യാവസായിക കേന്ദ്രങ്ങളും തുറമുഖങ്ങളും വ്യാപാര കേന്ദ്രങ്ങളും ഉണ്ടായിരുന്നു, ഒഡീഷയ്ക്കും അതിൽ പ്രധാന പങ്കുണ്ട്. തെക്കുകിഴക്കൻ ഏഷ്യയിലെ പ്രധാന വ്യാപാര കേന്ദ്രമായിരുന്നു ഒഡീഷ. ഇവിടുത്തെ പ്രാചീന തുറമുഖങ്ങൾ ഒരു തരത്തിൽ ഇന്ത്യയിലേക്കുള്ള കവാടങ്ങളായിരുന്നു. ഇന്നും ഒഡീഷയിൽ എല്ലാ വർഷവും ബലി ജാത്ര ആഘോഷിക്കപ്പെടുന്നു. ഈയിടെ ഇന്തോനേഷ്യൻ പ്രസിഡൻറ് വന്ന് ഒഡീഷ എൻ്റെ ഡിഎൻഎയിൽ ഉണ്ടെന്ന് പോലും പറഞ്ഞു.
സുഹൃത്തുക്കളേ,
ഒഡീഷയെ തെക്കുകിഴക്കൻ ഏഷ്യയുമായി ബന്ധിപ്പിക്കുന്ന പാരമ്പര്യം ഈ ഒഡീഷ ആഘോഷിക്കുന്നു. ഇപ്പോൾ 21-ാം നൂറ്റാണ്ടിൽ, ഒഡീഷ അതിൻ്റെ മഹത്തായ പൈതൃകത്തെ പുനരുജ്ജീവിപ്പിക്കുന്നതിൽ ഏർപ്പെട്ടിരിക്കുകയാണ്. അടുത്തിടെ സിംഗപ്പൂർ പ്രസിഡൻ്റ് ഒഡീഷ സന്ദർശിച്ചിരുന്നു. ഒഡീഷയുമായുള്ള ബന്ധത്തിൽ സിംഗപ്പൂർ വളരെ ആവേശത്തിലാണ്. ഒഡീഷയുമായുള്ള വ്യാപാരത്തിൻ്റെയും പാരമ്പര്യത്തിൻ്റെയും ബന്ധം ശക്തിപ്പെടുത്താൻ ആസിയാൻ രാജ്യങ്ങളും താൽപര്യം പ്രകടിപ്പിച്ചിട്ടുണ്ട്. സ്വാതന്ത്ര്യലബ്ധിക്കുശേഷം മുമ്പെങ്ങുമില്ലാത്തവിധം സാധ്യതകളുടെ നിരവധി വാതിലുകളാണ് ഇന്ന് ഈ മേഖലയിൽ തുറന്നിരിക്കുന്നത്. ഇവിടെയുള്ള എല്ലാ നിക്ഷേപകരോടും അഭ്യർത്ഥിക്കാൻ ഞാൻ ആഗ്രഹിക്കുന്നു, നമ്മുടെ മുഖ്യമന്ത്രി പറഞ്ഞത് ആവർത്തിക്കാൻ ഞാൻ ആഗ്രഹിക്കുന്നു - ഇതാണ് സമയം, ശരിയായ സമയം. ഒഡീഷയുടെ ഈ വികസന യാത്രയിലെ നിങ്ങളുടെ നിക്ഷേപം നിങ്ങളെ വിജയത്തിൻ്റെ പുതിയ ഉയരങ്ങളിലെത്തിക്കും, ഇതാണ് മോദിയുടെ ഉറപ്പ്.
സുഹൃത്തുക്കളേ,
കോടിക്കണക്കിന് ജനങ്ങളുടെ അഭിലാഷങ്ങളാൽ നയിക്കപ്പെടുന്ന അത്തരമൊരു വികസന പാതയിലൂടെയാണ് ഇന്ന് ഇന്ത്യ നീങ്ങുന്നത്. ഇത് AI യുടെ കാലഘട്ടമാണ്. ആർട്ടിഫിഷ്യൽ ഇൻ്റലിജൻസ് ചർച്ച ചെയ്യപ്പെടുന്നു, എന്നാൽ ഇന്ത്യയെ സംബന്ധിച്ചിടത്തോളം ഇത് AI മാത്രമല്ല, ഇന്ത്യയുടെ അഭിലാഷമാണ്, നമ്മുടെ ശക്തി. ജനങ്ങളുടെ ആവശ്യങ്ങൾ നിറവേറ്റപ്പെടുമ്പോൾ അഭിലാഷങ്ങൾ വളരുന്നു. കഴിഞ്ഞ ദശകത്തിൽ കോടിക്കണക്കിന് രാജ്യക്കാരെ ശാക്തീകരിച്ചതിൻ്റെ നേട്ടമാണ് ഇന്ന് രാജ്യം കാണുന്നത്. ഒഡീഷയും ഈ അഭിലാഷത്തെ പ്രതിനിധീകരിക്കുന്നു. ഒഡീഷ മികച്ചതാണ്. പുതിയ ഇന്ത്യയുടെ ശുഭാപ്തിവിശ്വാസത്തിൻ്റെയും മൗലികതയുടെയും പ്രതീകമാണ് ഒഡീഷ. ഒഡീഷയിൽ അവസരങ്ങളുണ്ട്, മികച്ച പ്രകടനം കാഴ്ചവെക്കാനുള്ള ആവേശം ഇവിടുത്തെ ജനങ്ങൾ എപ്പോഴും പ്രകടിപ്പിച്ചിട്ടുണ്ട്. ഗുജറാത്തിൽ ഒഡീഷയിൽ നിന്ന് വരുന്ന സഹപ്രവർത്തകരുടെ കഴിവുകളും കഠിനാധ്വാനവും സത്യസന്ധതയും ഞാൻ നേരിട്ട് അനുഭവിച്ചിട്ടുണ്ട്. അതിനാൽ, ഇന്ന് ഒഡീഷയിൽ പുതിയ അവസരങ്ങൾ സൃഷ്ടിക്കപ്പെടുമ്പോൾ, ആരും സങ്കൽപ്പിക്കാത്ത വികസനത്തിൻ്റെ ഉയരങ്ങളിൽ ഒഡീഷ വളരെ വേഗം എത്തുമെന്ന് ഞാൻ ഉറച്ചു വിശ്വസിക്കുന്നു. മുഖ്യമന്ത്രി മോഹൻ ചരൺ മാജിയുടെ മുഴുവൻ സംഘവും ഒഡീഷയുടെ വികസനം ത്വരിതപ്പെടുത്തുന്നതിൽ ഏർപ്പെട്ടിരിക്കുന്നതിൽ എനിക്ക് സന്തോഷമുണ്ട്. ഭക്ഷ്യ സംസ്കരണം, പെട്രോകെമിക്കൽ, തുറമുഖ വികസനം, ഫിഷറീസ്, ഐടി, വിദ്യാഭ്യാസം, ടെക്സ്റ്റൈൽ, ടൂറിസം, ഖനനം, ഹരിത ഊർജം തുടങ്ങി എല്ലാ വ്യവസായങ്ങളിലും ഒഡീഷ ഇന്ത്യയിലെ മുൻനിര സംസ്ഥാനങ്ങളിലൊന്നായി മാറുകയാണ്.
സുഹൃത്തുക്കളേ,
ഇന്ന്, ലോകത്തിലെ മൂന്നാമത്തെ വലിയ സമ്പദ്‌വ്യവസ്ഥയായി ഇന്ത്യ അതിവേഗം നീങ്ങുകയാണ്. അഞ്ച് ട്രില്യൺ ഡോളർ സമ്പദ്‌വ്യവസ്ഥയുടെ നാഴികക്കല്ലും വിദൂരമല്ല. കഴിഞ്ഞ ദശകത്തിൽ, ഇന്ത്യയുടെ ശക്തി ഉൽപ്പാദനരംഗത്തും ഉയർന്നുവരാൻ തുടങ്ങി. ഇപ്പോൾ ഇന്ത്യയുടെ സമ്പദ്‌വ്യവസ്ഥയുടെ വികാസത്തിന് രണ്ട് പ്രധാന സ്തംഭങ്ങളുണ്ട്, ഒന്ന് നമ്മുടെ നൂതന സേവന മേഖലയാണ്, മറ്റൊന്ന് ഇന്ത്യയുടെ ഗുണനിലവാരമുള്ള ഉൽപ്പന്നങ്ങളാണ്. അസംസ്കൃത വസ്തുക്കളുടെ കയറ്റുമതിയിൽ മാത്രം രാജ്യത്തിൻ്റെ ദ്രുതഗതിയിലുള്ള പുരോഗതി സാധ്യമാകില്ല. അതുകൊണ്ടാണ് നമ്മൾ ഒരു പുതിയ കാഴ്ചപ്പാടോടെ പ്രവർത്തിച്ച് ആവാസവ്യവസ്ഥയെ മുഴുവൻ മാറ്റുന്നത്. ഇവിടെ നിന്ന് ധാതുക്കൾ വേർതിരിച്ചെടുത്ത് ലോകത്തെ ഏതെങ്കിലും രാജ്യത്തേക്ക് കയറ്റുമതി ചെയ്യുകയും, അവിടെ മൂല്യവർദ്ധനവിലൂടെ പുതിയ ഉൽപ്പന്നം നിർമ്മിച്ച് ആ ഉൽപ്പന്നം ഇന്ത്യയിൽ തിരിച്ചെത്തുന്ന പ്രവണത മോദിക്ക് സ്വീകാര്യമല്ല. ഇന്ത്യ ഇപ്പോൾ ഈ പ്രവണത മാറ്റുകയാണ്. ഇവിടെയുള്ള കടലിൽ നിന്ന് സീ ഫുഡ് വേർതിരിച്ചെടുത്ത ശേഷം ലോകത്തിലെ മറ്റേതെങ്കിലും രാജ്യങ്ങളിൽ സംസ്കരിച്ച് വിപണികളിൽ എത്തുന്നു. ഇന്ത്യയും ഈ പ്രവണതയും മാറ്റുകയാണ്. ഒഡീഷയിൽ ലഭ്യമായ വിഭവങ്ങളുമായി ബന്ധപ്പെട്ട വ്യവസായങ്ങൾ ഇവിടെ സ്ഥാപിക്കണം എന്ന ദിശയിലാണ് നമ്മുടെ ഗവൺമെന്റ് പ്രവർത്തിക്കുന്നത്. ഇന്നത്തെ ഉത്കർഷ് ഒഡീഷ കോൺക്ലേവ് ഈ ദർശനം സാക്ഷാത്കരിക്കാനുള്ള ഒരു മാധ്യമം കൂടിയാണ്.
സുഹൃത്തുക്കളേ,
ഇന്ന് ലോകം സുസ്ഥിരമായ ജീവിതശൈലിയെക്കുറിച്ച് സംസാരിക്കുന്നു, ഹരിത ഭാവിയിലേക്ക് നീങ്ങുന്നു. ഇന്ന് ഹരിത തൊഴിലുകളുടെ സാധ്യതകളും വളരെയധികം വർദ്ധിച്ചുകൊണ്ടിരിക്കുകയാണ്. കാലത്തിൻ്റെ അനിവാര്യതയ്ക്കും ആവശ്യങ്ങൾക്കും അനുസരിച്ച് നാം സ്വയം മാറണം, അതിനനുസരിച്ച് പൊരുത്തപ്പെടണം. ഈ ചിന്തയോടെ, ഹരിത ഭാവിയിൽ, ഹരിത സാങ്കേതികവിദ്യയിൽ ഇന്ത്യ വളരെയധികം ശ്രദ്ധ കേന്ദ്രീകരിക്കുന്നു. സൗരോർജ്ജം, കാറ്റ്, ജലം, ഹരിത ഹൈഡ്രജൻ, ഇവയെല്ലാം വികസിത ഇന്ത്യയുടെ ഊർജ്ജ സുരക്ഷയെ ശക്തിപ്പെടുത്തും. ഒഡീഷയിൽ ഇതിന് നിരവധി സാധ്യതകളുണ്ട്. ഇന്ന് രാജ്യത്ത്, ദേശീയ തലത്തിൽ ഹരിത ഹൈഡ്രജൻ മിഷനും സൗരോർജ്ജ മിഷനും ഞങ്ങൾ ആരംഭിച്ചു. ഒഡീഷയിലും, പുനരുപയോഗ ഊർജ്ജവുമായി ബന്ധപ്പെട്ട വ്യവസായത്തെ പ്രോത്സാഹിപ്പിക്കുന്നതിനായി വലിയ നയപരമായ തീരുമാനങ്ങൾ എടുക്കുന്നു, ഹൈഡ്രജൻ ഊർജ്ജത്തിൻ്റെ ഉൽപാദനത്തിനായി ഇവിടെയും നിരവധി നടപടികൾ കൈക്കൊള്ളുന്നുണ്ട്.
സുഹൃത്തുക്കളേ,
ഗ്രീൻ എനർജിയോടൊപ്പം ഒഡീഷയിലെ പെട്രോകെമിക്കൽ, പെട്രോകെമിക്കൽ മേഖലകൾ വിപുലീകരിക്കാനുള്ള മുൻകൈകളും എടുക്കുന്നുണ്ട്. പാരദീപിലും ഗോപാൽപൂരിലും പ്രത്യേക വ്യവസായ പാർക്കുകളും നിക്ഷേപ മേഖലകളും വികസിപ്പിക്കുന്നു. ഈ മേഖലയിലും നിക്ഷേപത്തിനുള്ള സാധ്യത ഏറെയാണ്. ഒഡീഷയുടെ വിവിധ പ്രദേശങ്ങളുടെ സാധ്യതകൾ നോക്കി, പെട്ടെന്നുള്ള തീരുമാനങ്ങൾ എടുക്കുകയും ഒരു പുതിയ ആവാസവ്യവസ്ഥ വികസിപ്പിക്കുകയും ചെയ്യുന്ന ഒഡീഷ ഗവൺമെന്റിനെ ഞാൻ അഭിനന്ദിക്കാൻ ആഗ്രഹിക്കുന്നു.
സുഹൃത്തുക്കളേ,
21-ാം നൂറ്റാണ്ടിലെ ഇന്ത്യയെ സംബന്ധിച്ചിടത്തോളം, ഇത് ബന്ധിപ്പിച്ച അടിസ്ഥാന സൗകര്യങ്ങളുടെയും മൾട്ടി മോഡൽ കണക്റ്റിവിറ്റിയുടെയും കാലഘട്ടമാണ്. ഇന്ന് ഇന്ത്യയിൽ പ്രത്യേക അടിസ്ഥാന സൗകര്യങ്ങൾ നിർമ്മിക്കപ്പെടുന്നതിൻ്റെ അളവും വേഗതയും ഇന്ത്യയെ നിക്ഷേപത്തിനുള്ള മികച്ച ലക്ഷ്യസ്ഥാനമാക്കി മാറ്റുന്നു. കിഴക്കും പടിഞ്ഞാറും തീരപ്രദേശങ്ങളെ പ്രത്യേക ചരക്ക് ഇടനാഴികളിലൂടെ ബന്ധിപ്പിക്കുന്നു. കരപ്രദേശത്താൽ ബന്ധിതമായ രാജ്യത്തിൻ്റെ വലിയൊരു ഭാഗത്തിന് ഇപ്പോൾ കടലിലേക്കുള്ള അതിവേഗ പ്രവേശനം സാധ്യമാകുന്നു. ഇന്ന്, അത്തരം ഡസൻ കണക്കിന് വ്യാവസായിക നഗരങ്ങൾ രാജ്യത്ത് നിർമ്മിക്കപ്പെടുന്നു, അതിൽ പ്ലഗ് ആൻഡ് പ്ലേ സൗകര്യങ്ങൾ സജ്ജീകരിക്കും. ഒഡീഷയിലും സമാനമായ സാധ്യതകൾ വർധിപ്പിക്കുകയാണ്. റെയിൽവേ, ഹൈവേ ശൃംഖലയുമായി ബന്ധപ്പെട്ട് ആയിരക്കണക്കിന് കോടി രൂപയുടെ പദ്ധതികളാണ് ഇവിടെ നടക്കുന്നത്. ഒഡീഷയിലെ വ്യവസായത്തിൻ്റെ ലോജിസ്റ്റിക് ചെലവ് കുറയ്ക്കുന്നതിന്, ഗവൺമെന്റ് ഇവിടത്തെ തുറമുഖങ്ങളെ വ്യാവസായിക ക്ലസ്റ്ററുകളുമായി ബന്ധിപ്പിക്കുന്നു. പഴയ തുറമുഖങ്ങളുടെ വിപുലീകരണത്തോടൊപ്പം പുതിയ തുറമുഖങ്ങളും ഇവിടെ നിർമിക്കുന്നുണ്ട്. അതായത് നീല സമ്പദ് വ്യവസ്ഥയുടെ കാര്യത്തിലും ഒഡീഷ രാജ്യത്തെ മുൻനിര സംസ്ഥാനങ്ങളിൽ ഉൾപ്പെടുത്താൻ പോകുന്നു.
സുഹൃത്തുക്കളേ,
ഗവൺമെൻ്റിൻ്റെ ഈ ശ്രമങ്ങൾക്കിടയിൽ, എല്ലാവരോടും എനിക്ക് ചില അഭ്യർത്ഥനകളുണ്ട്. അതിവേഗം മാറിക്കൊണ്ടിരിക്കുന്ന ഈ ലോകത്ത് ആഗോള വിതരണ ശൃംഖലയുമായി ബന്ധപ്പെട്ട വെല്ലുവിളികൾ നിങ്ങൾ കാണുന്നു. വിഘടിച്ച വിതരണ ശൃംഖലയിലും ഇറക്കുമതി അധിഷ്ഠിത വിതരണ ശൃംഖലയിലും ഇന്ത്യയ്ക്ക് അധികം ആശ്രയിക്കാനാവില്ല. ആഗോള ഏറ്റക്കുറച്ചിലുകൾ ഏറ്റവും കുറച്ച് ബാധിക്കുന്ന ഇന്ത്യയിൽ തന്നെ ശക്തമായ ഒരു വിതരണ മൂല്യ ശൃംഖല നമുക്ക് സൃഷ്ടിക്കേണ്ടതുണ്ട്. ഇത് ഗവൺമെന്റിന്റേയും വ്യവസായത്തിൻ്റെയും വലിയ ഉത്തരവാദിത്തമാണ്. അതിനാൽ, നിങ്ങൾ ഏത് വ്യവസായത്തിലാണെങ്കിലും, അതുമായി ബന്ധപ്പെട്ട എംഎസ്എംഇകളെ പിന്തുണയ്ക്കുക, അവർക്ക് കൈത്താങ്ങ് നൽകുക. ഇതോടൊപ്പം നിങ്ങൾ കഴിയുന്നത്ര യുവ സ്റ്റാർട്ടപ്പുകളെ പിന്തുണയ്ക്കുകയും വേണം.
സുഹൃത്തുക്കളേ,
പുതിയ സാങ്കേതിക വിദ്യയില്ലാതെ ഇന്ന് ഒരു വ്യവസായത്തിനും വളരാനാവില്ല. അത്തരമൊരു സാഹചര്യത്തിൽ, ഗവേഷണവും നവീകരണവും വളരെ പ്രധാനമാണ്. ഗവേഷണവുമായി ബന്ധപ്പെട്ട് വളരെ ഊർജ്ജസ്വലമായ ഒരു ആവാസവ്യവസ്ഥയാണ് ഗവൺമെന്റ് രാജ്യത്ത് സൃഷ്ടിക്കുന്നത്. ഇതിനായി പ്രത്യേക ഫണ്ടും രൂപീകരിച്ചിട്ടുണ്ട്. ഇൻ്റേൺഷിപ്പിനും നൈപുണ്യ വികസനത്തിനും പ്രത്യേക പാക്കേജ് പ്രഖ്യാപിച്ചിട്ടുണ്ട്. ഇതിലും വ്യവസായം തുറന്ന് മുന്നോട്ട് വരണമെന്നും ഗവൺമെന്റുമായി സഹകരിച്ച് പ്രവർത്തിക്കണമെന്നും എല്ലാവരും പ്രതീക്ഷിക്കുന്നു. ഇന്ത്യയുടെ ഏറ്റവും വലുതും മികച്ചതുമായ ഗവേഷണ ആവാസവ്യവസ്ഥ, വൈദഗ്ധ്യമുള്ള യുവസംഘം, നമ്മുടെ വ്യവസായത്തിന് അതിൽ നിന്ന് നേരിട്ട് പ്രയോജനം ലഭിക്കും. വ്യവസായത്തിലെ എല്ലാ സഹപ്രവർത്തകരോടും ഒഡീഷ ഗവൺമെന്റിനോടും ചേർന്ന് ഇവിടെ ഒരു ആധുനിക ആവാസവ്യവസ്ഥ സൃഷ്ടിക്കാൻ ഞാൻ അഭ്യർത്ഥിക്കുന്നു. ഒഡീഷയുടെ അഭിലാഷങ്ങൾക്കൊപ്പം പ്രവർത്തിക്കുന്ന ഒരു ആവാസവ്യവസ്ഥ ഇവിടത്തെ യുവാക്കൾക്ക് പുതിയ അവസരങ്ങൾ നൽകുന്നു. ഇതോടെ, ഒഡീഷയിലെ യുവാക്കൾക്ക് ഇവിടെ തന്നെ കൂടുതൽ കൂടുതൽ തൊഴിലവസരങ്ങൾ ലഭിക്കും, ഒഡീഷ അഭിവൃദ്ധിപ്പെടും, ഒഡീഷ ശാക്തീകരിക്കപ്പെടും, ഒഡീഷ അഭിവൃദ്ധിപ്പെടും.
സുഹൃത്തുക്കളേ,
നിങ്ങളെല്ലാവരും ലോകമെമ്പാടും സഞ്ചരിക്കുന്നു, ലോകമെമ്പാടുമുള്ള ആളുകളെ കണ്ടുമുട്ടുന്നു. ഇന്ന് ഇന്ത്യയെ അറിയാനും മനസ്സിലാക്കാനുമുള്ള ആകാംക്ഷ നിങ്ങൾക്ക്
എല്ലായിടവും അനുഭവപ്പെടും. ഇന്ത്യയെ മനസ്സിലാക്കാനുള്ള മികച്ച സ്ഥലമാണ് ഒഡീഷ. ആയിരക്കണക്കിന് വർഷങ്ങളുടെ പാരമ്പര്യം നമുക്ക് ഇവിടെയുണ്ട്, ചരിത്രം, വിശ്വാസം-ആത്മീയത, ഇടതൂർന്ന വനങ്ങൾ, മലകൾ, കടൽ, എല്ലാം ഒരിടത്ത് കാണാം. ഈ സംസ്ഥാനം വികസനത്തിൻ്റെയും പൈതൃകത്തിൻ്റെയും അത്ഭുതകരമായ മാതൃകയാണ്. ഈ വികാരത്തോടെ ഞങ്ങൾ ഒഡീഷയിൽ ജി-20 സാംസ്കാരിക പരിപാടികൾ സംഘടിപ്പിച്ചിരുന്നു. കൊണാർക്ക് സൂര്യക്ഷേത്രത്തിൻ്റെ ചക്രം G-20 ൻ്റെ പ്രധാന പരിപാടിയുടെ ഭാഗമാക്കിയിരുന്നു. ഉത്കർഷ് ഒഡീഷയിൽ, ഒഡീഷയുടെ ടൂറിസം സാധ്യതകളും നമുക്ക് പര്യവേക്ഷണം ചെയ്യേണ്ടതുണ്ട്. 500 കിലോമീറ്ററിലധികം നീളമുള്ള തീരപ്രദേശം, 33 ശതമാനത്തിലധികം വനപ്രദേശം, ഇക്കോ ടൂറിസത്തിൻ്റെ അനന്തമായ സാധ്യതകൾ, സാഹസിക ടൂറിസം എന്നിവ നിങ്ങളെ കാത്തിരിക്കുന്നു. ഇന്ന്, ഇന്ത്യയുടെ ശ്രദ്ധ - ഇന്ത്യയിൽ വിവാഹം, ഇന്ന് ഇന്ത്യയുടെ മന്ത്രം - ഇന്ത്യയിൽ സുഖപ്പെടുത്തുക എന്നതാണ്, ഇതിന് ഒഡീഷയുടെ പ്രകൃതി, പ്രകൃതി സൗന്ദര്യം വളരെ സഹായകരമാണ്.
സുഹൃത്തുക്കളേ,
ഇന്ന്, കോൺഫറൻസ് ടൂറിസവും ഇന്ത്യയിൽ വളരെയധികം സാധ്യതകൾ വികസിപ്പിക്കുന്നു. ഡൽഹിയിലെ ഭാരത് മണ്ഡപം, യശോഭൂമി തുടങ്ങിയ വേദികൾ ഇതിൻ്റെ പ്രധാന കേന്ദ്രങ്ങളായി മാറുകയാണ്. ഭുവനേശ്വറിന് വളരെ നല്ല കൺവെൻഷൻ സെൻ്റർ പ്രയോജനപ്പെടുത്താം. ഇതുമായി ബന്ധപ്പെട്ട മറ്റൊരു പുതിയ മേഖലയാണ് സംഗീത മേള (concert) സമ്പദ് വ്യവസ്ഥ. സംഗീത-നൃത്തത്തിൻ്റെയും കഥപറച്ചിലിൻ്റെയും സമ്പന്നമായ പാരമ്പര്യമുള്ള ഒരു രാജ്യത്ത്, സംഗീതമേളകളുടെ വലിയ ഉപഭോക്താവായ യുവാക്കളുടെ ഒരു വലിയ കൂട്ടം ഉള്ള രാജ്യത്ത്, സംഗീതമേളയുടെ സമ്പദ്‌വ്യവസ്ഥയ്ക്ക് ധാരാളം സാധ്യതകളുണ്ട്. കഴിഞ്ഞ 10 വർഷത്തിനിടയിൽ, ലൈവ് ഇവൻ്റുകളുടെ ട്രെൻഡും ആവശ്യവും വർധിച്ചതായി നിങ്ങൾ കാണുന്നു. കഴിഞ്ഞ ദിവസങ്ങളിൽ, മുംബൈയിലും അഹമ്മദാബാദിലും നടന്ന 'കോൾഡ്‌പ്ലേ സംഗീതനിശ'യുടെ അതിമനോഹരമായ ചിത്രങ്ങൾ നിങ്ങൾ കണ്ടിരിക്കണം. ലൈവ് സംഗീതമേളകൾക്ക് ഇന്ത്യയിൽ എത്രമാത്രം സാധ്യത ഉണ്ട് എന്നതിൻ്റെ തെളിവാണിത്. ലോകത്തിലെ പേരു കേട്ട വലിയ കലാകാരന്മാർ പോലും ഇന്ത്യയിലേക്ക് ആകർഷിക്കപ്പെടുന്നു. സംഗീതമേളയുടെ സമ്പദ്‌വ്യവസ്ഥ ടൂറിസം വർദ്ധിപ്പിക്കുകയും ധാരാളം തൊഴിലവസരങ്ങൾ സൃഷ്ടിക്കുകയും ചെയ്യുന്നു. സംഗീതമേള സമ്പദ്‌വ്യവസ്ഥയ്ക്ക് ആവശ്യമായ അടിസ്ഥാന സൗകര്യങ്ങളിലും കഴിവുകളിലും ശ്രദ്ധ കേന്ദ്രീകരിക്കാൻ ഞാൻ സംസ്ഥാനങ്ങളോടും സ്വകാര്യ മേഖലയോടും അഭ്യർത്ഥിക്കുന്നു. ഇവൻ്റ് മാനേജ്‌മെൻ്റ്, ആർട്ടിസ്റ്റുകളുടെ ഗ്രൂമിംഗ്, സുരക്ഷ, മറ്റ് ക്രമീകരണങ്ങൾ എന്നിവയിലെല്ലാം പുതിയ സാധ്യതകൾ സൃഷ്ടിക്കപ്പെടുന്നു.
സുഹൃത്തുക്കളേ,
അടുത്ത മാസം, ആദ്യത്തെ ലോക ഓഡിയോ വിഷ്വൽ ഉച്ചകോടി അതായത് WAVES ഇന്ത്യയിൽ നടക്കാൻ പോകുന്നു. ഇതും വളരെ വലിയ ഒരു സംഭവമായിരിക്കും, ഇത് ലോകത്തിൽ ഇന്ത്യയുടെ സർഗ്ഗാത്മക ശക്തിക്ക് ഒരു പുതിയ വ്യക്തിത്വം നൽകും. സംസ്ഥാനങ്ങളിലെ ഇത്തരം സംഭവങ്ങളിൽ നിന്ന് ലഭിക്കുന്ന വരുമാനം, സൃഷ്ടിച്ച ധാരണ, സമ്പദ്‌വ്യവസ്ഥയെ മുന്നോട്ട് കൊണ്ടുപോകുന്നു. ഒഡീഷയിലും ഇതിന് നിരവധി സാധ്യതകളുണ്ട്.
സുഹൃത്തുക്കളെ,
വികസിത ഇന്ത്യ കെട്ടിപ്പടുക്കുന്നതിൽ ഒഡീഷയ്ക്ക് വലിയ പങ്കുണ്ട്. സമൃദ്ധമായ ഒഡീഷ കെട്ടിപ്പടുക്കുമെന്ന് ഒഡീഷയിലെ ജനങ്ങൾ പ്രതിജ്ഞയെടുത്തു. ഈ പ്രതിജ്ഞയെടുക്കാൻ കേന്ദ്രഗവൺമെന്റ് എല്ലാവിധ പിന്തുണയും നൽകുന്നുണ്ട്. ഒഡീഷയോടുള്ള എൻ്റെ വാത്സല്യം നിങ്ങൾക്കെല്ലാവർക്കും നന്നായി അറിയാം. പ്രധാനമന്ത്രി എന്ന നിലയിൽ ഏകദേശം 30 തവണ ഞാൻ ഇവിടെ വന്നിട്ടുണ്ട്. സ്വാതന്ത്ര്യത്തിനു ശേഷം എല്ലാ പ്രധാനമന്ത്രിമാരും ഒന്നിച്ചതിനേക്കാൾ കൂടുതൽ തവണ ഞാൻ ഒഡീഷയിൽ വന്നിട്ടുണ്ട്, ഇതാണ് നിങ്ങളുടെ സ്നേഹം. ഞാൻ ഇവിടുത്തെ മിക്ക ജില്ലകളിലും സന്ദർശിച്ചിട്ടുണ്ട്, ഒഡീഷയുടെ സാധ്യതകളിൽ എനിക്ക് വിശ്വാസമുണ്ട്, ഇവിടുത്തെ ജനങ്ങളിൽ എനിക്ക് വിശ്വാസമുണ്ട്. നിങ്ങളുടെ എല്ലാവരുടെയും നിക്ഷേപം നിങ്ങളുടെ ബിസിനസിനെയും ഒഡീഷയുടെ പുരോഗതിയെയും പുതിയ ഉയരങ്ങളിലെത്തിക്കുമെന്ന് എനിക്ക് ഉറപ്പുണ്ട്.
ഈ അത്ഭുതകരമായ സംഭവത്തിന് ഒഡീഷയിലെ ജനങ്ങളെയും ഒഡീഷ ഗവൺമെന്റിനേയും ഞാൻ ഒരിക്കൽ കൂടി അഭിനന്ദിക്കുന്നു, വളരെ നന്ദി. ഒഡീഷയിൽ സാധ്യതകൾ തേടുന്ന മഹാന്മാരും ഒഡീഷ സർക്കാരും ഇന്ത്യൻ ഗവൺമെന്റും പൂർണ്ണ ശക്തിയോടെ നിങ്ങളോടൊപ്പം നിൽക്കുമെന്ന് ഞാൻ ഉറപ്പുനൽകുന്നു. ഒരിക്കൽ കൂടി, എല്ലാവർക്കും എൻ്റെ ആശംസകൾ, വളരെ നന്ദി.
