ശ്രേഷ്ഠരേ ,
നമസ്കാരം
ഈ ഉച്ചകോടിയിൽ ലോകത്തിലെ ഏറ്റവും വലിയ ജനാധിപത്യത്തെ പ്രതിനിധീകരിക്കുന്നതിൽ ഞാൻ അഭിമാനിക്കുന്നു. ജനാധിപത്യ മനോഭാവം നമ്മുടെ നാഗരികതയുടെ ധാർമ്മികതയുടെ അവിഭാജ്യഘടകമാണ്. തിരഞ്ഞെടുക്കപ്പെട്ട റിപ്പബ്ലിക്കൻ നഗര-സംസ്ഥാനങ്ങളായ ലിച്ചാവി, ശാക്യ എന്നിവ 2500 വർഷങ്ങൾക്ക് മുമ്പ് ഇന്ത്യയിൽ തഴച്ചുവളർന്നു. ജനാധിപത്യ പങ്കാളിത്തത്തിന്റെ തത്വങ്ങൾ ക്രോഡീകരിച്ച പത്താം നൂറ്റാണ്ടിലെ "ഉത്തരമേരൂർ" ലിഖിതത്തിലും ഇതേ ജനാധിപത്യ ചൈതന്യം കാണാം. ഈ ജനാധിപത്യ മനോഭാവവും ധാർമ്മികതയും പുരാതന ഇന്ത്യയെ ഏറ്റവും സമ്പന്നമായ ഒന്നാക്കി മാറ്റി. നൂറ്റാണ്ടുകൾ നീണ്ട കൊളോണിയൽ ഭരണത്തിന് ഇന്ത്യൻ ജനതയുടെ ജനാധിപത്യബോധത്തെ അടിച്ചമർത്താൻ കഴിഞ്ഞില്ല. ഇന്ത്യയുടെ സ്വാതന്ത്ര്യത്തോടെ അത് വീണ്ടും പൂർണ്ണമായ ആവിഷ്കാരം കണ്ടെത്തി, കഴിഞ്ഞ 75 വർഷമായി ജനാധിപത്യ രാഷ്ട്ര നിർമ്മാണത്തിന്റെ സമാനതകളില്ലാത്ത കഥയിലേക്ക് നയിച്ചു.
എല്ലാ മേഖലകളിലും അഭൂതപൂർവമായ സാമൂഹിക-സാമ്പത്തിക ഉൾപ്പെടുത്തലിന്റെ കഥയാണിത്. ആരോഗ്യം, വിദ്യാഭ്യാസം, മനുഷ്യന്റെ ക്ഷേമം എന്നിവയിൽ സങ്കൽപ്പിക്കാൻ കഴിയാത്ത അളവിൽ നിരന്തരമായ പുരോഗതിയുടെ കഥയാണിത്. ഇന്ത്യയുടെ കഥയ്ക്ക് ലോകത്തിന് വ്യക്തമായ ഒരു സന്ദേശമുണ്ട്. ജനാധിപത്യത്തിന് പ്രദാനം ചെയ്യാൻ കഴിയും, ജനാധിപത്യം പ്രദാനം ചെയ്തു കഴിഞ്ഞു , ജനാധിപത്യം പ്രദാനം ചെയുന്നത് തുടരും.
ശ്രേഷ്ഠരേ,
ബഹുകക്ഷി തിരഞ്ഞെടുപ്പുകൾ, സ്വതന്ത്ര ജുഡീഷ്യറി, സ്വതന്ത്ര മാധ്യമങ്ങൾ എന്നിങ്ങനെയുള്ള ഘടനാപരമായ സവിശേഷതകൾ - ജനാധിപത്യത്തിന്റെ പ്രധാന ഉപകരണങ്ങളാണ്. എന്നിരുന്നാലും, ജനാധിപത്യത്തിന്റെ അടിസ്ഥാന ശക്തി നമ്മുടെ പൗരന്മാരുടെയും നമ്മുടെ സമൂഹത്തിന്റെയും ഉള്ളിലുള്ള ചൈതന്യവും ധാർമ്മികതയുമാണ്. ജനാധിപത്യം എന്നത് ജനങ്ങളാൽ, ജനങ്ങൾക്ക് വേണ്ടി മാത്രമല്ല, ജനങ്ങളോടൊപ്പം, ജനങ്ങൾക്കുള്ളിൽ കൂടിയാണ്.
ശ്രേഷ്ഠരേ
ലോകത്തിന്റെ വിവിധ ഭാഗങ്ങൾ ജനാധിപത്യ വികസനത്തിന്റെ വിവിധ പാതകൾ പിന്തുടർന്നു. നമുക്ക് പരസ്പരം പഠിക്കാൻ ഏറെയുണ്ട്. നാമെല്ലാവരും നമ്മുടെ ജനാധിപത്യ രീതികളും സംവിധാനങ്ങളും നിരന്തരം മെച്ചപ്പെടുത്തേണ്ടതുണ്ട്. ഒപ്പം, നാമെല്ലാവരും ഉൾപ്പെടുത്തൽ, സുതാര്യത, മാനുഷിക അന്തസ്സ്, പ്രതികരിക്കുന്ന പരാതികൾ പരിഹരിക്കൽ, അധികാര വികേന്ദ്രീകരണം എന്നിവ തുടർച്ചയായി വർദ്ധിപ്പിക്കേണ്ടതുണ്ട്.
ഈ സാഹചര്യത്തിൽ, ഇന്നത്തെ യോഗം ജനാധിപത്യ രാജ്യങ്ങൾ തമ്മിലുള്ള സഹകരണം വർദ്ധിപ്പിക്കുന്നതിനുള്ള സമയോചിതമായ വേദി ഒരുക്കുന്നു. സ്വതന്ത്രവും നീതിയുക്തവുമായ തിരഞ്ഞെടുപ്പ് നടത്തുന്നതിലും നൂതന ഡിജിറ്റൽ സൊല്യൂഷനുകളിലൂടെ ഭരണത്തിന്റെ എല്ലാ മേഖലകളിലും സുതാര്യത വർദ്ധിപ്പിക്കുന്നതിലും ഇന്ത്യ തങ്ങളുടെ വൈദഗ്ധ്യം പങ്കിടുന്നതിൽ സന്തോഷമുണ്ട്. സോഷ്യൽ മീഡിയ, ക്രിപ്‌റ്റോ-കറൻസികൾ തുടങ്ങിയ ഉയർന്നുവരുന്ന സാങ്കേതികവിദ്യകൾക്കായുള്ള ആഗോള മാനദണ്ഡങ്ങളും നാം സംയുക്തമായി രൂപപ്പെടുത്തണം, അതുവഴി അവ ജനാധിപത്യത്തെ ശാക്തീകരിക്കാനാണ് , മരിച്ചു അതിനെ തുരങ്കം വയ്ക്കാനല്ല
ഉപയോഗിക്കുന്നത് എന്നുറപ് വരുത്തണം .
ഒരുമിച്ച് പ്രവർത്തിക്കുന്നതിലൂടെ, ജനാധിപത്യരാജ്യങ്ങൾക്ക്‌ നമ്മുടെ പൗരന്മാരുടെ അഭിലാഷങ്ങൾ നിറവേറ്റാനും മാനവികതയുടെ ജനാധിപത്യ ചൈതന്യം ആഘോഷിക്കാനും കഴിയും. ഈ മഹത്തായ ഉദ്യമത്തിൽ സഹ ജനാധിപത്യ രാജ്യങ്ങളുമായിചേർന്ന് പ്രവർത്തിക്കാൻ ഇന്ത്യ തയ്യാറാണ്.
നന്ദി. വളരെയധികം നന്ദി.
