ಗಯಾನಾ ರಾಷ್ಟ್ರಾಧ್ಯಕ್ಷ ಗೌರವಾನ್ವಿತ ಡಾ. ಮೊಹಮ್ಮದ್ ಇರ್ಫಾನ್ ಅಲಿ ಜೀ, ಸುರಿನಾಮ್ ರಾಷ್ಟ್ರಾಧ್ಯಕ್ಷ ಗೌರವಾನ್ವಿತ ಶ್ರೀ ಚಂದ್ರಿಕಾಪರ್ಸಾದ್ ಸಂತೋಖಿ ಜೀ, ಮಧ್ಯಪ್ರದೇಶದ ರಾಜ್ಯಪಾಲ ಗೌರವಾನ್ವಿತ ಶ್ರೀ ಮಂಗುಭಾಯಿ ಪಟೇಲ್ ಜೀ, ಮಾನ್ಯ ಮುಖ್ಯಮಂತ್ರಿ ಶಿವರಾಜ್ ಸಿಂಗ್ ಚೌಹಾಣ್ ಜೀ, ಮಾನ್ಯ ವಿದೇಶಾಂಗ ಸಚಿವ ಎಸ್. ಜೈಶಂಕರ್ ಜೀ, ಇತರ ಸಂಪುಟ ಸಹೋದ್ಯೋಗಿಗಳೇ ಮತ್ತು ನನ್ನ ಆತ್ಮೀಯ ಸಹೋದರರೇ ಮತ್ತು ಪ್ರವಾಸಿ ಭಾರತೀಯ ದಿವಸ್ ಸಮಾವೇಶದಲ್ಲಿ ಒಟ್ಟುಗೂಡಿದ ಪ್ರಪಂಚದಾದ್ಯಂತದ ಸಹೋದರಿಯರೇ!
ನಿಮ್ಮೆಲ್ಲರಿಗೂ 2023 ರ ಶುಭಾಶಯಗಳು. ಪ್ರವಾಸಿ ಭಾರತೀಯ ದಿವಸ್ ಸಮಾವೇಶವು ಸುಮಾರು ನಾಲ್ಕು ವರ್ಷಗಳ ನಂತರ ಮತ್ತೊಮ್ಮೆ ಅದರ ಮೂಲ ರೂಪದಲ್ಲಿ ಮತ್ತು ಅದರ ಎಲ್ಲಾ ವೈಭವದೊಂದಿಗೆ ನಡೆಯುತ್ತಿದೆ. ವರ್ಷಗಳ ನಂತರ ಪ್ರೀತಿಪಾತ್ರರೊಂದಿಗಿನ ಮುಖಾಮುಖಿ ಭೇಟಿಯು ತನ್ನದೇ ಆದ ವಿಶಿಷ್ಟ ಸಂತೋಷವನ್ನು ಹೊಂದಿದೆ ಮತ್ತು ಅದರ ಪ್ರಾಮುಖ್ಯತೆಯನ್ನು ಹೊಂದಿದೆ. 130 ಕೋಟಿ ಭಾರತೀಯರ ಪರವಾಗಿ ನಾನು ನಿಮ್ಮೆಲ್ಲರನ್ನು ಶುಭಾಶಯ ಕೋರುತ್ತೇನೆ ಮತ್ತು ಸ್ವಾಗತಿಸುತ್ತೇನೆ.
ಸಹೋದರ ಸಹೋದರಿಯರೇ,
ಇಲ್ಲಿರುವ ಪ್ರತಿಯೊಬ್ಬ ಅನಿವಾಸಿ ಭಾರತೀಯರೂ ತಮ್ಮ ತಮ್ಮ ಕ್ಷೇತ್ರಗಳಲ್ಲಿ ಅಸಾಧಾರಣ ಸಾಧನೆಗೈದು ತಮ್ಮ ದೇಶದ ಮಣ್ಣಿಗೆ ನಮನ ಸಲ್ಲಿಸಲು ಬಂದಿದ್ದಾರೆ. ಮತ್ತು ಈ ಪ್ರವಾಸಿ ಭಾರತೀಯ ದಿವಸ್ ಸಮಾವೇಶವನ್ನು ದೇಶದ ಹೃದಯ ಭಾಗ ಎಂದು ಕರೆಯಲಾಗುವ ಮಧ್ಯಪ್ರದೇಶದ ನೆಲದಲ್ಲಿ ನಡೆಸಲಾಗುತ್ತಿದೆ. ನರ್ಮದಾ ತಾಯಿಯ ನೀರು, ಕಾಡುಗಳು, ಬುಡಕಟ್ಟು ಸಂಪ್ರದಾಯಗಳು, ನಿಮ್ಮ ಭೇಟಿಯನ್ನು ಅವಿಸ್ಮರಣೀಯವಾಗಿಸುವ ಆಧ್ಯಾತ್ಮಿಕತೆಯಂತಹ ಅನೇಕ ವಿಷಯಗಳು ಮಧ್ಯಪ್ರದೇಶದಲ್ಲಿವೆ. ತೀರಾ ಇತ್ತೀಚೆಗೆ, ಉಜ್ಜಯಿನಿಯಲ್ಲಿಭಗವಾನ್ ಮಹಾಕಾಲ್ ನ ಮಹಾಲೋಕದ ಭವ್ಯವಾದ ಮತ್ತು ದೈವಿಕ ಕಾರ್ಯಕ್ರಮ ನಡೆಯಿತು. ನೀವೆಲ್ಲರೂ ಅಲ್ಲಿಗೆ ಹೋಗಿ ಮಹಾಕಲ್ ದೇವರ ಆಶೀರ್ವಾದವನ್ನು ಪಡೆದು ಆ ಅದ್ಭುತ ಅನುಭವದ ಭಾಗವಾಗುತ್ತೀರಿ ಎಂದು ನಾನು ಭಾವಿಸುತ್ತೇನೆ.
ಸ್ನೇಹಿತರೇ,
ಅಂದಹಾಗೆ, ನಾವೆಲ್ಲರೂ ಈಗ ಇರುವ ನಗರವು ಸ್ವತಃ ಅದ್ಭುತವಾಗಿದೆ. ಇಂದೋರ್ ಒಂದು ನಗರ ಎಂದು ಜನರು ಹೇಳುತ್ತಾರೆ, ಆದರೆ ನಾನು ಇಂದೋರ್ ಒಂದು ಕಾಲಾವಧಿ ಎಂದು ಹೇಳುತ್ತೇನೆ. ಇದು ಒಂದು ಕಾಲಾವಧಿಯಾಗಿ, ಸಮಯಕ್ಕಿಂತ ಮುಂದೆ ಚಲಿಸುತ್ತದೆ ಮತ್ತು ಜೊತೆಯಲ್ಲಿ ಪರಂಪರೆಯನ್ನು ಹಾಗೇ ಇರಿಸುತ್ತದೆ. ಇಂದೋರ್ ಸ್ವಚ್ಛತೆ ಕ್ಷೇತ್ರದಲ್ಲಿ ದೇಶದಲ್ಲಿಯೇ ವಿಶಿಷ್ಟ ಗುರುತನ್ನು ಸ್ಥಾಪಿಸಿದೆ. 'ನಮ್ಮ ಇಂದೋರ್ (ಅಪನ್ ಕಾ ಇಂದೋರ್)' ದೇಶದಲ್ಲಿ ಮಾತ್ರವಲ್ಲ, ಇಡೀ ವಿಶ್ವದಲ್ಲೇ ಆಹಾರ ಸಂಸ್ಕೃತಿಗೆ ಅದ್ಭುತವಾಗಿದೆ. ಪೋಹಾ, ಸಾಗು ಖಿಚಡಿ, ಕಚೋರಿ-ಸಮೋಸ-ಶಿಕಂಜಿಗೆ ಇಲ್ಲಿನ ಜನರ ಒಲವು. ಇಂದೋರಿ ನಮ್ಕೀನ್ ನ ರುಚಿ ಸದಾ ಬಾಯಲ್ಲಿ ನೀರೂರಿಸುತ್ತದೆ. ಮತ್ತು ಇವುಗಳ ರುಚಿ ನೋಡಿದವರು ಬೇರೇನನ್ನೂ ಹುಡುಕಲಿಲ್ಲ! ಅದೇ ರೀತಿ ‘ಛಪ್ಪನ್ ಭೋಗ್’ ಅಂಗಡಿ ಮತ್ತು ಸರಾಫಾ ಬಜಾರ್ ಕೂಡ ಬಹಳ ಫೇಮಸ್. ಕೆಲವರು ಇಂದೋರ್ ಅನ್ನು ಸ್ವಚ್ಛತೆ ಹಾಗೂ ರುಚಿಯ ರಾಜಧಾನಿ ಎಂದು ಕರೆಯಲು ಇವೆಲ್ಲಾ ಮುಖ್ಯ ಕಾರಣವಾಗಿದೆ. ಇಲ್ಲಿನ ನಿಮ್ಮ ಅನುಭವವನ್ನು ನೀವು ಎಂದೂ ಮರೆಯುವುದಿಲ್ಲ ಮತ್ತು ಹಿಂತಿರುಗಿದಾಗ ಅದರ ಬಗ್ಗೆ ಇತರರಿಗೆ ಹೇಳಲು ಮರೆಯುವುದಿಲ್ಲ ಎಂದು ನನಗೆ ಖಾತ್ರಿಯಿದೆ.
ಸ್ನೇಹಿತರೇ,
ಈ ಪ್ರವಾಸಿ ಭಾರತೀಯ ದಿವಸ್ ಹಲವು ವಿಧಗಳಲ್ಲಿ ವಿಶೇಷವಾಗಿದೆ. ಕೆಲವು ತಿಂಗಳ ಹಿಂದೆಯಷ್ಟೇ ಭಾರತಕ್ಕೆ ಸ್ವಾತಂತ್ರ್ಯ ಬಂದು 75 ನೇ ವರ್ಷಗಳನ್ನು ಸಂಭ್ರಮದಿಂದ ಆಚರಿಸಿದೆವು. ನಮ್ಮ ಸ್ವಾತಂತ್ರ್ಯ ಹೋರಾಟಕ್ಕೆ ಸಂಬಂಧಿಸಿದ ಡಿಜಿಟಲ್ ಪ್ರದರ್ಶನವನ್ನು ಇಲ್ಲಿ ಆಯೋಜಿಸಲಾಗಿದೆ. ಆ ವೈಭವದ ಯುಗವನ್ನು ಮತ್ತೆ ನಿಮ್ಮ ಮುಂದೆ ತರುತ್ತದೆ.
ಸ್ನೇಹಿತರೇ,
ರಾಷ್ಟ್ರವು ಮುಂದಿನ 25 ವರ್ಷಗಳ ‘ಅಮೃತ ಕಾಲ’ವನ್ನು ಪ್ರವೇಶಿಸಿದೆ. ಈ ಪಯಣದಲ್ಲಿ ನಮ್ಮ ಪ್ರವಾಸಿ ಭಾರತೀಯರಿಗೆ ಮಹತ್ವದ ಸ್ಥಾನವಿದೆ. ಭಾರತದ ಅನನ್ಯ ಜಾಗತಿಕ ದೃಷ್ಟಿ ಮತ್ತು ಜಾಗತಿಕ ಕ್ರಮದಲ್ಲಿ ಅದರ ಪ್ರಮುಖ ಪಾತ್ರವನ್ನು ನೀವು ಬಲಪಡಿಸುತ್ತೀರಿ.
ಸ್ನೇಹಿತರೇ,
ನಮ್ಮ ದೇಶದಲ್ಲಿ ಒಂದು ಮಾತಿದೆ - ‘ಸ್ವದೇಶೋ ಭುವಂತ್ರಯಂ’. ಅದೇನೆಂದರೆ, ‘ನಮಗೆ ಇಡೀ ಜಗತ್ತೇ ನಮ್ಮ ದೇಶ ಮತ್ತು ಮನುಷ್ಯರೆಲ್ಲರೂ ನಮ್ಮ ಸಹೋದರರು ಮತ್ತು ಸಹೋದರಿಯರು’. ಈ ಸೈದ್ಧಾಂತಿಕ ತಳಹದಿಯ ಮೇಲೆ ನಮ್ಮ ಪೂರ್ವಜರು ಭಾರತದ ಸಾಂಸ್ಕೃತಿಕ ವಿಸ್ತರಣೆಯನ್ನು ರೂಪಿಸಿದರು. ನಾವು ಪ್ರಪಂಚದ ವಿವಿಧ ಮೂಲೆಗಳಿಗೆ ಹೋದೆವು. ನಾಗರಿಕತೆಗಳ ಸಮ್ಮಿಲನದ ಅನಂತ ಸಾಧ್ಯತೆಗಳನ್ನು ನಾವು ಅರ್ಥಮಾಡಿಕೊಂಡಿದ್ದೇವೆ. ಶತಮಾನಗಳ ಹಿಂದೆ ಜಾಗತಿಕ ವ್ಯಾಪಾರದ ಅಸಾಮಾನ್ಯ ಸಂಪ್ರದಾಯವನ್ನು ನಾವು ಪ್ರಾರಂಭಿಸಿದ್ದೇವೆ. ಅಪರಿಮಿತವೆಂಬಂತೆ ತೋರುತ್ತಿದ್ದ ಮಹಾ ಸಮುದ್ರಗಳನ್ನು ದಾಟಿದೆವು. ವಿವಿಧ ದೇಶಗಳು ಮತ್ತು ವಿವಿಧ ನಾಗರಿಕತೆಗಳ ನಡುವಿನ ವ್ಯಾಪಾರ ಸಂಬಂಧಗಳು ಹಂಚಿಕೆಯ ಸಮೃದ್ಧಿಗೆ ಹೇಗೆ ದಾರಿ ತೆರೆಯಬಹುದು ಎಂಬುದನ್ನು ಭಾರತ ಮತ್ತು ಭಾರತೀಯರು ತೋರಿಸಿದ್ದಾರೆ. ಇಂದು, ನಾವು ಜಾಗತಿಕ ಭೂಪಟದಲ್ಲಿ ನಮ್ಮ ಕೋಟಿಗಟ್ಟಲೆ ಭಾರತೀಯರನ್ನು ನೋಡಿದಾಗ, ಹಲವಾರು ಚಿತ್ರಗಳು ಏಕಕಾಲದಲ್ಲಿ ಹೊರಹೊಮ್ಮುತ್ತವೆ. ಪ್ರಪಂಚದ ವಿವಿಧ ದೇಶಗಳಲ್ಲಿ ಭಾರತದ ಜನರು ಸಾಮಾನ್ಯ ಅಂಶವಾಗಿ ಕಾಣಿಸಿಕೊಂಡಾಗ, 'ವಸುಧೈವ ಕುಟುಂಬಕಂ' (ಇಡೀ ಜಗತ್ತು ಒಂದೇ ಕುಟುಂಬ) ಎಂಬ ಮನೋಭಾವವು ಗೋಚರಿಸುತ್ತದೆ. ಪ್ರಪಂಚದ ಯಾವುದೇ ದೇಶದಲ್ಲಿ ಭಾರತದ ವಿವಿಧ ಪ್ರದೇಶಗಳ ಜನರು ಭೇಟಿಯಾದಾಗ, ‘ಏಕ್ ಭಾರತ್, ಶ್ರೇಷ್ಠ ಭಾರತ’ ಎಂಬ ಆಹ್ಲಾದಕರ ಭಾವನೆ ಇರುತ್ತದೆ. ಜಗತ್ತಿನ ವಿವಿಧ ದೇಶಗಳಲ್ಲಿ ಅತ್ಯಂತ ಶಾಂತಿಪ್ರಿಯ, ಪ್ರಜಾಸತ್ತಾತ್ಮಕ ಮತ್ತು ಶಿಸ್ತಿನ ಪ್ರಜೆಗಳ ಬಗ್ಗೆ ಪ್ರಸ್ತಾಪಿಸಿದಾಗ, ಭಾರತವು ಪ್ರಜಾಪ್ರಭುತ್ವದ ತಾಯಿ ಎಂಬ ವೈಭವವು ಹಲವಾರು ಪಟ್ಟು ಹೆಚ್ಚಾಗುತ್ತದೆ. ಹಾಗೂ ನಮ್ಮ ಸಾಗರೋತ್ತರ ಭಾರತೀಯರ ಕೊಡುಗೆಯನ್ನು ಜಗತ್ತು ನಿರ್ಣಯಿಸಿದಾಗ, ಅದು 'ಬಲವಾದ ಮತ್ತು ಸಮರ್ಥ ಭಾರತ'ದ ಧ್ವನಿಯನ್ನು ಕೇಳುತ್ತದೆ. ಆದ್ದರಿಂದ, ನಾನು ನಿಮ್ಮೆಲ್ಲರಿಗೂ, ಎಲ್ಲಾ ಸಾಗರೋತ್ತರ ಭಾರತೀಯರನ್ನು, ವಿದೇಶಿ ನೆಲದಲ್ಲಿರುವ ಭಾರತದ ಬ್ರಾಂಡ್ ಅಂಬಾಸಿಡರ್ ಗಳನ್ನಾಗಿ ಉಲ್ಲೇಖಿಸುತ್ತೇನೆ. ಸರ್ಕಾರಿ ವ್ಯವಸ್ಥೆಯಲ್ಲಿ ರಾಯಭಾರಿಗಳಿದ್ದೀರಿ. ನೀವು ಭಾರತದ ಶ್ರೇಷ್ಠ ಪರಂಪರೆಯ ರಾಯಭಾರಿ.
ಸ್ನೇಹಿತರೇ,
ಭಾರತದ ಬ್ರಾಂಡ್ ಅಂಬಾಸಿಡರ್ ಆಗಿ ನಿಮ್ಮ ಪಾತ್ರ ವೈವಿಧ್ಯಮಯವಾಗಿದೆ. ನೀವು ಕೇವಲ ಭಾರತದ ಪ್ರತಿನಿಧಿ ಮಾತ್ರವಲ್ಲ, ಮೇಕ್ ಇನ್ ಇಂಡಿಯಾದ ಬ್ರಾಂಡ್ ಅಂಬಾಸಿಡರ್ ಆಗಿದ್ದೀರಿ. ನೀವು ಯೋಗ ಮತ್ತು ಆಯುರ್ವೇದದ ಬ್ರಾಂಡ್ ಅಂಬಾಸಿಡರ್ ಆಗಿದ್ದೀರಿ. ನೀವು ಭಾರತದ ಗುಡಿ ಕೈಗಾರಿಕೆಗಳು ಮತ್ತು ಕರಕುಶಲ ವಸ್ತುಗಳ ಬ್ರಾಂಡ್ ಅಂಬಾಸಿಡರ್‌ಗಳೂ ಆಗಿದ್ದೀರಿ. ಅದೇ ಸಮಯದಲ್ಲಿ, ನೀವು ಭಾರತದ ಸಿರಿಧಾನ್ಯ(ರಾಗಿ)ಗಳ ಬ್ರಾಂಡ್ ರಾಯಭಾರಿಗಳೂ ಆಗಿದ್ದೀರಿ. 2023 ಅನ್ನು ವಿಶ್ವಸಂಸ್ಥೆಯು ಅಂತರರಾಷ್ಟ್ರೀಯ ಸಿರಿಧಾನ್ಯ(ರಾಗಿ) ವರ್ಷ ಎಂದು ಘೋಷಿಸಿದೆ ಎಂದು ನಿಮಗೆ ಈಗಾಗಲೇ ತಿಳಿದಿರುತ್ತದೆ. ಹಿಂತಿರುಗುವಾಗ ನಿಮ್ಮೊಂದಿಗೆ ಕೆಲವು ಸಿರಿಧಾನ್ಯ(ರಾಗಿ) ಉತ್ಪನ್ನಗಳನ್ನು ತೆಗೆದುಕೊಂಡು ಹೋಗುವಂತೆ ನಾನು ನಿಮಗೆ ಮನವಿ ಮಾಡುತ್ತೇನೆ. ವೇಗವಾಗಿ ಬದಲಾಗುತ್ತಿರುವ ಈ ಕಾಲದಲ್ಲಿ ನಿಮಗೆ ಇನ್ನೊಂದು ಪ್ರಮುಖ ಪಾತ್ರ ಕೂಡಾ ಇಲ್ಲಿದೆ. ನೀವು ಭಾರತದ ಬಗ್ಗೆ ಹೆಚ್ಚು ತಿಳಿದುಕೊಳ್ಳುವ ಪ್ರಪಂಚದ ಬಯಕೆಯನ್ನು ಪರಿಹರಿಸುವ ಜನರು. ಇಂದು ಇಡೀ ವಿಶ್ವವೇ ಭಾರತವನ್ನು ಬಹಳ ಆಸಕ್ತಿ ಮತ್ತು ಕುತೂಹಲದಿಂದ ಕಾಯುತ್ತಿದೆ ಮತ್ತು ವೀಕ್ಷಿಸುತ್ತಿದೆ. ನಾನು ಇದನ್ನು ಏಕೆ ಹೇಳುತ್ತಿದ್ದೇನೆ ಎಂಬುದನ್ನು ಅರ್ಥಮಾಡಿಕೊಳ್ಳುವುದು ಬಹಳ ಮುಖ್ಯ
ಸ್ನೇಹಿತರೇ,
ಕಳೆದ ಕೆಲವು ವರ್ಷಗಳಲ್ಲಿ ಭಾರತ ಸಾಧಿಸಿದ ಅಭಿವೃದ್ಧಿಯ ವೇಗ, ಅದು ಮಾಡಿದ ಸಾಧನೆಗಳು ಅಸಾಧಾರಣ ಮತ್ತು ಅಭೂತಪೂರ್ವ. ಕೋವಿಡ್ 19 ಸಾಂಕ್ರಾಮಿಕದ ಮಧ್ಯೆ ಭಾರತವು ಕೆಲವೇ ತಿಂಗಳುಗಳಲ್ಲಿ ಸ್ಥಳೀಯ ಲಸಿಕೆಗಳನ್ನು ಅಭಿವೃದ್ಧಿಪಡಿಸಿದಾಗ, ಭಾರತವು ತನ್ನ ನಾಗರಿಕರಿಗೆ 220 ಕೋಟಿಗೂ ಹೆಚ್ಚು ಲಸಿಕೆ ಡೋಸ್‌ಗಳನ್ನು ಉಚಿತವಾಗಿ ನೀಡಿದ ದಾಖಲೆಯನ್ನು ಮಾಡಿದಾಗ, ಭಾರತವು ಮಧ್ಯದಲ್ಲಿಯೂ ಸಹ ವಿಶ್ವದ ಉದಯೋನ್ಮುಖ ಆರ್ಥಿಕತೆಯಾದಾಗ ಜಾಗತಿಕ ಅಸ್ಥಿರತೆ, ಭಾರತವು ವಿಶ್ವದ ದೊಡ್ಡ ಆರ್ಥಿಕತೆಗಳೊಂದಿಗೆ ಸ್ಪರ್ಧಿಸಿದಾಗ ಮತ್ತು ಅಗ್ರ-5 ಆರ್ಥಿಕತೆಗಳಿಗೆ ಸೇರಿದಾಗ, ಭಾರತವು ವಿಶ್ವದ ಮೂರನೇ ಅತಿದೊಡ್ಡ ಸ್ಟಾರ್ಟ್-ಅಪ್ ಪರಿಸರ ವ್ಯವಸ್ಥೆಯಾದಾಗ, 'ಮೇಕ್ ಇನ್ ಇಂಡಿಯಾ' ಎಲೆಕ್ಟ್ರಾನಿಕ್ ಉತ್ಪಾದನೆ ಮತ್ತು ಮೊಬೈಲ್‌ ನಂತಹ ಕ್ಷೇತ್ರಗಳಲ್ಲಿ ಮಿಂಚಿದಾಗ ಉತ್ಪಾದನೆ, ಭಾರತ ಸ್ವಂತವಾಗಿ ತೇಜಸ್ ಯುದ್ಧ ವಿಮಾನ, ವಿಮಾನವಾಹಕ ನೌಕೆ , ಐಎನ್‌ಎಸ್ ವಿಕ್ರಾಂತ್ ಮತ್ತು ಅರಿಹಂತ್‌ ನಂತಹ ಪರಮಾಣು ಜಲಾಂತರ್ಗಾಮಿ ನೌಕೆಗಳನ್ನು ನಿರ್ಮಿಸಿದಾಗ, ಭಾರತ ಏನು ಮಾಡುತ್ತಿದೆ ಮತ್ತು ಹೇಗೆ ಮಾಡುತ್ತಿದೆ ಎಂದು ಇಡೀ ಜಗತ್ತು ಅಚ್ಚರಿಪಡುತ್ತಿದೆ ಮತ್ತು ವಿಶ್ವದ ಜನರೆಲ್ಲಾ ಕುತೂಹಲದಿಂದ ಇರುವುದು ಸಹಜ.
ಭಾರತದ ವೇಗ, ಪ್ರಮಾಣ ಮತ್ತು ಭವಿಷ್ಯದ ಬಗ್ಗೆ ತಿಳಿಯಲು ಜನರು ಕುತೂಹಲದಿಂದ ಕೂಡಿರುತ್ತಾರೆ. ಅದೇ ರೀತಿ, ನಗದು ರಹಿತ ಆರ್ಥಿಕತೆ ಮತ್ತು ಫಿನ್‌ ಟೆಕ್ ವಿಷಯಕ್ಕೆ ಬಂದರೆ, ವಿಶ್ವದ ನೈಜ ಸಮಯದ ಡಿಜಿಟಲ್ ವಹಿವಾಟಿನ ಶೇಕಡಾ 40 ರಷ್ಟು ಭಾರತದಲ್ಲಿ ನಡೆಯುವುದನ್ನು ನೋಡಿ ಜಗತ್ತೇ ಆಶ್ಚರ್ಯ ಪಡುತ್ತದೆ. ಬಾಹ್ಯಾಕಾಶದ ಭವಿಷ್ಯದ ವಿಷಯಕ್ಕೆ ಬಂದಾಗ, ಬಾಹ್ಯಾಕಾಶ ತಂತ್ರಜ್ಞಾನದಲ್ಲಿ ಅತ್ಯಂತ ಮುಂದುವರಿದ ದೇಶಗಳಲ್ಲಿ ಭಾರತವನ್ನು ಚರ್ಚಿಸಲಾಗಿದೆ. ಭಾರತ ಒಂದೇ ಬಾರಿಗೆ 100 ಉಪಗ್ರಹಗಳನ್ನು ಉಡಾವಣೆ ಮಾಡಿ ದಾಖಲೆ ನಿರ್ಮಿಸುತ್ತಿದೆ. ಸಾಫ್ಟ್‌ವೇರ್ ಮತ್ತು ಡಿಜಿಟಲ್ ತಂತ್ರಜ್ಞಾನ ಕ್ಷೇತ್ರದಲ್ಲಿ ನಮ್ಮ ಸಾಮರ್ಥ್ಯವನ್ನು ಜಗತ್ತು ಗಮನಿಸುತ್ತಿದೆ. ನಿಮ್ಮಲ್ಲಿ ಅನೇಕರು ಇದಕ್ಕೆ ಉತ್ತಮ ಮೂಲವೂ ಹೌದು. ಭಾರತದ ಈ ಹೆಚ್ಚುತ್ತಿರುವ ಶಕ್ತಿ ಮತ್ತು ಸಾಮರ್ಥ್ಯವು ಭಾರತದ ಬೇರುಗಳೊಂದಿಗೆ ಸಂಪರ್ಕ ಹೊಂದಿದ ಪ್ರತಿಯೊಬ್ಬ ವ್ಯಕ್ತಿಯ ಎದೆಯನ್ನು ಹಿಗ್ಗಿಸುತ್ತದೆ. ಇಂದು ಭಾರತದ ಧ್ವನಿ, ಭಾರತದ ಸಂದೇಶ ಮತ್ತು ಭಾರತದ ಮಾತುಗಳು ಜಾಗತಿಕ ರಂಗದಲ್ಲಿ ವಿಭಿನ್ನ ಮಹತ್ವವನ್ನು ಹೊಂದಿವೆ. ಭಾರತದ ಈ ಬೆಳೆಯುತ್ತಿರುವ ಶಕ್ತಿ ಮುಂದಿನ ದಿನಗಳಲ್ಲಿ ಮತ್ತಷ್ಟು ಹೆಚ್ಚಾಗಲಿದೆ. ಹೀಗಾಗಿ ಭಾರತದೆಡೆಗಿನ ಕುತೂಹಲ ಮತ್ತಷ್ಟು ಹೆಚ್ಚಾಗಲಿದೆ. ಆದ್ದರಿಂದ, ವಿದೇಶದಲ್ಲಿ ವಾಸಿಸುವ ಭಾರತೀಯ ಮೂಲದ ಜನರಾದ ನಿಮ್ಮ ಜವಾಬ್ದಾರಿಯು ಬಹಳಷ್ಟು ಹೆಚ್ಚಾಗುತ್ತದೆ. ಇಂದು ನೀವು ಭಾರತದ ಬಗ್ಗೆ ಹೆಚ್ಚು ಸಮಗ್ರ ಮಾಹಿತಿಯನ್ನು ಹೊಂದಿರುವಿರಿ, ಸತ್ಯಗಳ ಆಧಾರದ ಮೇಲೆ ಭಾರತದ ಬೆಳೆಯುತ್ತಿರುವ ಸಾಮರ್ಥ್ಯದ ಬಗ್ಗೆ ನೀವು ಇತರರಿಗೆ ಹೇಳಲು ಸಾಧ್ಯವಾಗುತ್ತದೆ. ಸಾಂಸ್ಕೃತಿಕ ಮತ್ತು ಆಧ್ಯಾತ್ಮಿಕ ಮಾಹಿತಿಯೊಂದಿಗೆ ನೀವು ಭಾರತದ ಪ್ರಗತಿಯ ಬಗ್ಗೆ ನವೀಕರಿಸಿದ ಮಾಹಿತಿಯನ್ನು ಹೊಂದಿರಬೇಕು ಎಂದು ನಾನು ಒತ್ತಾಯಿಸುತ್ತೇನೆ.
ಸ್ನೇಹಿತರೇ,
ಈ ವರ್ಷ ವಿಶ್ವದ ಜಿ-20 ಗುಂಪಿನ ಶೃಂಗಸಭೆಗೆ ಭಾರತವು ಅಧ್ಯಕ್ಷತೆ ವಹಿಸುತ್ತಿದೆ ಎಂಬುದು ನಿಮಗೆಲ್ಲರಿಗೂ ತಿಳಿದಿದೆ. ಭಾರತವು ಈ ಜವಾಬ್ದಾರಿಯನ್ನು ಉತ್ತಮ ಅವಕಾಶವಾಗಿ ನೋಡುತ್ತಿದೆ. ಭಾರತವನ್ನು ಜಗತ್ತಿಗೆ ತಿಳಿಸಲು ಇದು ನಮಗೆ ಒಂದು ಅವಕಾಶ. ಭಾರತದ ಅನುಭವಗಳಿಂದ ಕಲಿಯಲು ಮತ್ತು ಹಿಂದಿನ ಅನುಭವಗಳಿಂದ ಸುಸ್ಥಿರ ಭವಿಷ್ಯದ ದಿಕ್ಕನ್ನು ನಿರ್ಧರಿಸಲು ಜಗತ್ತಿಗೆ ಇದು ಒಂದು ಅವಕಾಶವಾಗಿದೆ. ನಾವು ಜಿ-20 ಅನ್ನು ಕೇವಲ ರಾಜತಾಂತ್ರಿಕ ಕಾರ್ಯಕ್ರಮವನ್ನಾಗಿ ಮಾಡದೆ, ಜನರ ಸಹಭಾಗಿತ್ವದ ಐತಿಹಾಸಿಕ ಘಟನೆಯನ್ನಾಗಿಸಬೇಕು. ಈ ಸಮಯದಲ್ಲಿ, ಪ್ರಪಂಚದ ವಿವಿಧ ದೇಶಗಳು ಭಾರತದ ಜನರಲ್ಲಿ 'ಅತಿಥಿ ದೇವೋ ಭವ' (ನಿಮ್ಮ ಅತಿಥಿಯನ್ನು ದೇವರಂತೆ ನೋಡಿಕೊಳ್ಳಿ) ಎಂಬ ಮನೋಭಾವವನ್ನು ನೋಡುತ್ತವೆ. ನಿಮ್ಮ ದೇಶದಿಂದ ಬರುವ ಪ್ರತಿನಿಧಿಗಳನ್ನು ಸಹ ನೀವು ಭೇಟಿ ಮಾಡಬಹುದು ಮತ್ತು ಅವರಿಗೆ ನೀವು ಭಾರತದ ಬಗ್ಗೆ ಹೇಳಬಹುದು. ಇದು ಅವರು ಭಾರತವನ್ನು ತಲುಪುವ ಮೊದಲೇ, ನಿಮ್ಮ ಮೂಲಕ ಅವರಿಗೆ ಸೇರಿದವರ ಭಾವನೆಯನ್ನು ಮತ್ತು ಸ್ವಾಗತವನ್ನು ನೀಡುತ್ತದೆ.
ಸ್ನೇಹಿತರೇ,
ಹಾಗೂ ಜಿ-20 ಶೃಂಗಸಭೆಯಲ್ಲಿ ಸುಮಾರು 200 ಸಭೆಗಳು ನಡೆಯಲಿರುವಾಗ, ಜಿ-20 ಗುಂಪಿನ 200 ನಿಯೋಗಗಳು ಇಲ್ಲಿಗೆ ಬಂದು ಭಾರತದ ವಿವಿಧ ನಗರಗಳಿಗೆ ಭೇಟಿ ನೀಡಲಿರುವಾಗ, ಭಾರತೀಯ ವಲಸಿಗರು ಕರೆ ಮಾಡಬೇಕು ಎಂದು ನಾನು ಹೇಳಲು ಬಯಸುತ್ತೇನೆ. ಅವರು ಹಿಂದಿರುಗಿದ ನಂತರ ಅವರ ಅನುಭವಗಳನ್ನು ಆಲಿಸಿ. ಅವರೊಂದಿಗಿನ ನಮ್ಮ ಬಾಂಧವ್ಯವನ್ನು ಇನ್ನಷ್ಟು ಬಲಪಡಿಸಲು ಇದು ಒಂದು ಅವಕಾಶ ಎಂದು ನಾನು ಭಾವಿಸುತ್ತೇನೆ.
ಸ್ನೇಹಿತರೇ,
ಇಂದು, ಭಾರತವು ಪ್ರಪಂಚದ ಜ್ಞಾನ ಕೇಂದ್ರವಾಗಲು ಸಾಮರ್ಥ್ಯವನ್ನು ಹೊಂದಿದೆ, ಆದರೆ ಕೌಶಲ್ಯ ಬಂಡವಾಳವೂ ಆಗಿದೆ. ಇಂದು ಭಾರತವು ಹೆಚ್ಚಿನ ಸಂಖ್ಯೆಯ ಸಮರ್ಥ ಯುವಕರನ್ನು ಹೊಂದಿದೆ. ನಮ್ಮ ಯುವಕರಿಗೆ ಕೌಶಲ್ಯ, ಮೌಲ್ಯಗಳು ಮತ್ತು ಕೆಲಸ ಮಾಡಲು ಅಗತ್ಯವಾದ ಉತ್ಸಾಹ ಮತ್ತು ಪ್ರಾಮಾಣಿಕತೆ ಇದೆ. ಭಾರತದ ಈ ಕೌಶಲ್ಯ ಬಂಡವಾಳವು ಪ್ರಪಂಚದ ಅಭಿವೃದ್ಧಿಯ ಎಂಜಿನ್ ಆಗಬಹುದು. ಭಾರತದಲ್ಲಿನ ಯುವಕರ ಜೊತೆಗೆ, ಭಾರತದ ಆದ್ಯತೆಯು ಭಾರತದೊಂದಿಗೆ ಸಂಪರ್ಕ ಹೊಂದಿರುವ ವಲಸೆ ಯುವಕರು. ವಿದೇಶದಲ್ಲಿ ಹುಟ್ಟಿ ಅಲ್ಲಿಯೇ ಬೆಳೆದ ನಮ್ಮ ಮುಂದಿನ ಪೀಳಿಗೆಯ ಯುವಕರಿಗೆ ನಮ್ಮ ಭಾರತವನ್ನು ತಿಳಿಯಲು ಮತ್ತು ಅರ್ಥಮಾಡಿಕೊಳ್ಳಲು ನಾವು ಅನೇಕ ಅವಕಾಶಗಳನ್ನು ನೀಡುತ್ತಿದ್ದೇವೆ. ಮುಂದಿನ ಪೀಳಿಗೆಯ ವಲಸೆ ಯುವಕರಲ್ಲಿಯೂ ಭಾರತದ ಬಗ್ಗೆ ಉತ್ಸಾಹ ಹೆಚ್ಚುತ್ತಿದೆ. ಅವರು ತಮ್ಮ ಹೆತ್ತವರ ದೇಶದ ಬಗ್ಗೆ ತಿಳಿದುಕೊಳ್ಳಲು ಬಯಸುತ್ತಾರೆ, ಅವರ ಬೇರುಗಳೊಂದಿಗೆ ಸಂಪರ್ಕಿಸಲು ಬಯಸುತ್ತಾರೆ. ಈ ಯುವಕರಿಗೆ ದೇಶದ ಬಗ್ಗೆ ಆಳವಾಗಿ ತಿಳಿಸುವುದು ಮಾತ್ರವಲ್ಲದೆ ಅವರಿಗೆ ಭಾರತವನ್ನು ತೋರಿಸುವುದು ನಮ್ಮೆಲ್ಲರ ಜವಾಬ್ದಾರಿಯಾಗಿದೆ. ಸಾಂಪ್ರದಾಯಿಕ ಅರ್ಥದಲ್ಲಿ ಮತ್ತು ಆಧುನಿಕ ದೃಷ್ಟಿಕೋನದಿಂದ, ಈ ಯುವಕರು ಭವಿಷ್ಯದ ಜಗತ್ತಿಗೆ ಭಾರತದ ಬಗ್ಗೆ ಹೆಚ್ಚು ಪರಿಣಾಮಕಾರಿಯಾಗಿ ಹೇಳಲು ಸಾಧ್ಯವಾಗುತ್ತದೆ. ಯುವಕರಲ್ಲಿ ಕುತೂಹಲ ಹೆಚ್ಚಿದಷ್ಟೂ ಭಾರತಕ್ಕೆ ಸಂಬಂಧಿಸಿದ ಪ್ರವಾಸೋದ್ಯಮ ಹೆಚ್ಚುತ್ತದೆ, ಭಾರತಕ್ಕೆ ಸಂಬಂಧಿಸಿದ ಸಂಶೋಧನೆಗಳು ಹೆಚ್ಚುತ್ತವೆ ಮತ್ತು ಭಾರತದ ಹೆಮ್ಮೆಯೂ ಹೆಚ್ಚುತ್ತದೆ. ಈ ಯುವಕರು ಭಾರತದ ವಿವಿಧ ಉತ್ಸವಗಳಲ್ಲಿ, ಪ್ರಸಿದ್ಧ ಜಾತ್ರೆಗಳಲ್ಲಿ ಭಾಹವಹಿಸಬೇಕು, ಅಥವಾ ಬುದ್ಧ ಸರ್ಕ್ಯೂಟ್ ಮತ್ತು ರಾಮಾಯಣ ಸರ್ಕ್ಯೂಟ್ ನ ಲಾಭವನ್ನು ಪಡೆಯಬಹುದು. ಸ್ವಾತಂತ್ರ್ಯದ ಅಮೃತ ಮಹೋತ್ಸವದ ಅಡಿಯಲ್ಲಿ ವಿವಿಧ ಕಾರ್ಯಕ್ರಮಗಳನ್ನು ಆಯೋಜಿಸಲಾಗಿದೆ, ಅದರಲ್ಲೂ ಕೂಡ ಯುವಕರು ಸೇರಬಹುದು.
ಸ್ನೇಹಿತರೇ,
ನನಗೆ ಇನ್ನೂ ಒಂದು ಸಲಹೆ ಇದೆ. ಭಾರತದಿಂದ ವಲಸೆ ಹೋದವರು ಶತಮಾನಗಳಿಂದ ಹಲವು ದೇಶಗಳಲ್ಲಿ ನೆಲೆಸಿದ್ದಾರೆ. ಭಾರತೀಯ ಅಪಾರ ಜನಸಂಖ್ಯೆ(ಡಯಾಸ್ಪೊರಾ) ಅಲ್ಲಿನ ರಾಷ್ಟ್ರ ನಿರ್ಮಾಣಕ್ಕೆ ಅಸಾಧಾರಣ ಕೊಡುಗೆಗಳನ್ನು ನೀಡಿದ್ದಾರೆ. ಅವರ ಬದುಕು, ಹೋರಾಟ, ಸಾಧನೆಗಳನ್ನು ದಾಖಲಿಸಬೇಕು. ನಮ್ಮ ಹಿರಿಯರಲ್ಲಿ ಅನೇಕರು ಆ ಕಾಲದ ಹಲವಾರು ನೆನಪುಗಳನ್ನು ಹೊಂದಿರುತ್ತಾರೆ. ವಿಶ್ವವಿದ್ಯಾನಿಲಯಗಳು ಪ್ರತಿ ದೇಶದಲ್ಲಿರುವ ನಮ್ಮ ಅಪಾರ ಜನಸಂಖ್ಯೆಯ(ಡಯಾಸ್ಪೊರಾ) ಇತಿಹಾಸದ ಕುರಿತು ಆಡಿಯೋ-ವಿಡಿಯೋ ಅಥವಾ ಲಿಖಿತ ದಾಖಲಾತಿಗಾಗಿ ಪ್ರಯತ್ನಗಳನ್ನು ನಾವು ಮಾಡಬೇಕು ಎಂದು ನಾನು ನಿಮ್ಮಲ್ಲಿ ಒತ್ತಾಯಿಸುತ್ತೇನೆ.
ಸ್ನೇಹಿತರೇ,
ಯಾವುದೇ ರಾಷ್ಟ್ರವಾಗಿರಲಿ, ತನ್ನ ನಿಷ್ಠೆಯನ್ನು ಪ್ರತಿಜ್ಞೆ ಮಾಡುವ ಪ್ರತಿಯೊಬ್ಬ ವ್ಯಕ್ತಿಯ ಹೃದಯದಲ್ಲಿ ಆ ದೇಶದೊಳಗೆ ಭಾರತವೂ ಕೂಡಾ ಪೂರ್ತಿಯಾಗಿ ಬಸಿದಿರುತ್ತದೆ. ಭಾರತದ ಒಬ್ಬ ವ್ಯಕ್ತಿ ವಿದೇಶಕ್ಕೆ ಹೋದಾಗ ಅಲ್ಲಿ ಒಬ್ಬ ಭಾರತೀಯ ಮೂಲದ ವ್ಯಕ್ತಿಯನ್ನು ಕಂಡಾಗ ಅವನು ಇಡೀ ಭಾರತವನ್ನು ಕಂಡುಕೊಂಡಂತೆ ಅನಿಸುತ್ತದೆ. ಅಂದರೆ, ನೀವು ಎಲ್ಲಿ ವಾಸಿಸುತ್ತೀರೋ ಅಲ್ಲಿ ಭಾರತವನ್ನು ನಿಮ್ಮೊಂದಿಗೆ ಇರಿಸಿಕೊಳ್ಳಿ. ಕಳೆದ ಎಂಟು ವರ್ಷಗಳಲ್ಲಿ ದೇಶವು ತನ್ನ ವಲಸಿಗರಿಗೆ ಶಕ್ತಿ ನೀಡಲು ಸಾಧ್ಯವಿರುವ ಎಲ್ಲ ಪ್ರಯತ್ನಗಳನ್ನು ಮಾಡಿದೆ. ಇಂದು ನೀವು ಜಗತ್ತಿನಲ್ಲಿ ಎಲ್ಲಿಯೇ ವಾಸಿಸುತ್ತೀರೋ, ದೇಶವು ನಿಮ್ಮ ಆಸಕ್ತಿಗಳು ಮತ್ತು ನಿರೀಕ್ಷೆಗಳನ್ನು ಬೆಂಬಲಿಸುತ್ತದೆ ಎಂಬುದು ಭಾರತದ ಅಚಲ ಬದ್ಧತೆಯಾಗಿದೆ.
ನಾನು ಗಯಾನಾದ ಅಧ್ಯಕ್ಷರಿಗೆ ಮತ್ತು ಸುರಿನಾಮ್ ನ ಅಧ್ಯಕ್ಷರಿಗೆ ನನ್ನ ಹೃತ್ಪೂರ್ವಕ ಕೃತಜ್ಞತೆ ಮತ್ತು ಶುಭಾಶಯಗಳನ್ನು ವ್ಯಕ್ತಪಡಿಸುತ್ತೇನೆ. ಅವರು ಈ ಮಹತ್ವದ ಕಾರ್ಯಕ್ಕಾಗಿ ತಮ್ಮ ಮಹತ್ತರವಾದ ಸಮಯವನ್ನು ತೆಗೆದುಕೊಂಡರು ಮತ್ತು ಅವರು ಇಂದು ನಮ್ಮ ಮುಂದೆ ಇಟ್ಟಿರುವ ಸಮಸ್ಯೆಗಳು ನಿಜವಾಗಿಯೂ ತುಂಬಾ ಉಪಯುಕ್ತವಾಗಿವೆ. ಅವರ ಸಲಹೆಗಳನ್ನು ಭಾರತ ಖಂಡಿತವಾಗಿ ಪಾಲಿಸುತ್ತದೆ ಎಂದು ನಾನು ಅವರಿಗೆ ಭರವಸೆ ನೀಡುತ್ತೇನೆ. ಗಯಾನಾ ಅಧ್ಯಕ್ಷರು ಇಂದು ಉತ್ತಮ ನೆನಪುಗಳನ್ನು ಹಂಚಿಕೊಂಡಿದ್ದಕ್ಕಾಗಿ ನಾನು ಅವರಿಗೆ ತುಂಬಾ ಕೃತಜ್ಞನಾಗಿದ್ದೇನೆ, ಏಕೆಂದರೆ ನಾನು ಗಯಾನಾಕ್ಕೆ ಹೋದಾಗ ನಾನು ಯಾರೂ ಅಲ್ಲ, ಮುಖ್ಯಮಂತ್ರಿಯೂ ಅಲ್ಲ, ಮತ್ತು ಅವರು ಅಂದಿನ ಆ ಸಂಬಂಧವನ್ನು ಇಂದು ನೆನಪಿಸಿಕೊಂಡರು. ನಾನು ಅವರಿಗೆ ತುಂಬಾ ಕೃತಜ್ಞನಾಗಿದ್ದೇನೆ. ವರ್ಷಗಳ ನಂತರ ಇನ್ನೊಂದು ಪ್ರವಾಸಿ ಭಾರತೀಯ ದಿವಸ್ ನಲ್ಲಿ ನಾವು ಪುನಃ ಭೇಟಿಯಾಗೋಣ, ಮತ್ತೊಮ್ಮೆ ನಿಮಗೆ ಅನೇಕ ಶುಭಾಶಯಗಳು. ನೀವು ಅನೇಕ ಜನರನ್ನು ಭೇಟಿಯಾಗುತ್ತೀರಿ, ಅನೇಕ ಜನರಿಂದ ಅನೇಕ ವಿಷಯಗಳನ್ನು ತಿಳಿದುಕೊಳ್ಳುತ್ತೀರಿ ಮತ್ತು ನೀವು ಹಿಂದಿರುಗಿದ ನಂತರ ನಿಮ್ಮ ಆಯಾ ದೇಶಕ್ಕೆ ನೀವು ಕೊಂಡೊಯ್ಯುವ ನೆನಪುಗಳು ಅನಿವರತ ನಿಮ್ಮ ಜೊತೆ ಇರುತ್ತದೆ. ಭಾರತದೊಂದಿಗೆ ವಿಶ್ವವೇ ತವಕದಲ್ಲಿ ಪಾಲ್ಗೊಳ್ಳುವ ಹೊಸ ಯುಗ ಪ್ರಾರಂಭವಾಗಲಿದೆ ಎಂಬ ವಿಶ್ವಾಸ ನನಗಿದೆ. ನಾನು ನಿಮಗೆಲ್ಲರಿಗೂ ಇನ್ನೊಮ್ಮೆ ಶುಭ ಹಾರೈಸುತ್ತೇನೆ.
ಧನ್ಯವಾದಗಳು!
