ಜಪಾನ್ ನ ಪ್ರಧಾನಿಯವರ ಭಾರತದ ಭೇಟಿ ಸಂದರ್ಭದಲ್ಲಿ ಪ್ರಧಾನಿ ಮೋದಿಯವರ ಪತ್ರಿಕಾ ಹೇಳಿಕೆ

ಸ್ನೇಹಿತರೇ,
ಜಪಾನ್ ದೇಶವು 2016-17ನೇ ಸಾಲಿನಲ್ಲಿ ಭಾರತದಲ್ಲಿ 4.7 ಶತಕೋಟಿ ಡಾಲರ್‍ಗಳಷ್ಟು ಹೂಡಿಕೆ ಮಾಡಿದ್ದು, ಹಿಂದಿನ ವರ್ಷಕ್ಕೆ ಹೋಲಿಸಿದರೆ ಇದು ಶೇಕಡ 80ರಷ್ಟು ಹೆಚ್ಚಾಗಿದೆ. ಜಪಾನ್ ಈಗ ಭಾರತದಲ್ಲಿ ಅತ್ಯಧಿಕ ಬಂಡವಾಳ ಹೂಡುತ್ತಿರುವ ದೇಶಗಳಲ್ಲಿ ಮೂರನೇ ಸ್ಥಾನ ಪಡೆದಿದೆ. ಇದು, ಭಾರತದ ಆರ್ಥಿಕ ಅಭಿವೃದ್ಧಿ ಮತ್ತು ನಾಳಿನ ಉಜ್ವಲ ಭವಿಷ್ಯ ಕುರಿತು ಜಪಾನ್ ಹೊಂದಿರುವ ವಿಶ್ವಾಸ ಮತ್ತು ಆಶಾವಾದವನ್ನು ಸ್ಪಷ್ಟವಾಗಿ ತೋರಿಸುತ್ತದೆ. ಅದು ಈಗ ತೊಡಗಿಸುತ್ತಿರುವ ಹೂಡಿಕೆಯನ್ನು ನೋಡಿದರೆ, ಮುಂಬರುವ ದಿನಗಳಲ್ಲಿ ಎರಡೂ ದೇಶಗಳ ನಡುವಿನ ಜನರ ನಡುವಿನ ಸಂಪರ್ಕವು ವೃದ್ಧಿಸಿ, ಅದರ ಜತೆಯಲ್ಲೇ ನಮ್ಮ ನಡುವಿನ ವಾಣಿಜ್ಯ ಸಂಬಂಧವೂ ಬೆಳೆಯಲಿದೆ ಎಂದು ಹೇಳಬಹುದು. ಈಗಾಗಲೇ ನಾವು, ಭಾರತಕ್ಕೆ ಬಂದಿಳಿಯುತ್ತಿರುವ ಜಪಾನೀಯರಿಗೆ ತತ್‍ಕ್ಷಣವೇ ವೀಸಾ ಕೊಡುತ್ತಿದ್ದೇವೆ. ಜತೆಗೆ, ಎರಡೂ ದೇಶದ ಅಂಚೆ ಇಲಾಖೆಗಳ ಸಹಭಾಗಿತ್ವದ ಮೂಲಕ `ಕೂಲ್ ಬಾಕ್ಸ್ ಸರ್ವೀಸ್’ ಎನ್ನುವ ಸೌಲಭ್ಯವನ್ನು ಸದ್ಯದಲ್ಲೇ ಜಾರಿಗೆ ತರಲಿದ್ದೇವೆ. ಇದರಿಂದಾಗಿ, ಭಾರತದಲ್ಲಿರುವ ಜಪಾನೀಯರು ತಮಗೆ ಇಷ್ಟವಾದ ತಿಂಡಿತೀರ್ಥಗಳನ್ನು ನೇರವಾಗಿ ತಮ್ಮ ದೇಶದಿಂದ ತರಿಸಿಕೊಳ್ಳುವುದು ಸಾಧ್ಯವಾಗಲಿದೆ. ಅಲ್ಲದೆ, ಜಪಾನಿನ ವ್ಯಾಪಾರು-ವಹಿವಾಟುದಾರರು/ಉದ್ಯಮಿ

ಗಳು ಭಾರತದಲ್ಲಿ ಹೆಚ್ಚುಹೆಚ್ಚು ಜಪಾನಿ ಹೋಟೆಲುಗಳನ್ನು ತೆರೆಯಬೇಕೆಂದು ನಾನು ಮನವಿ ಮಾಡಿಕೊಳ್ಳುತ್ತಿದ್ದೇನೆ! ಇಂದು ಭಾರತವು ಅನೇಕ ಹಂತಗಳಲ್ಲಿ ಭಾರೀ ಬದಲಾವಣೆಗಳಿಗೆ ಸಾಕ್ಷಿಯಾಗುತ್ತಿದೆ. ಇದು ಸುಗಮ ವ್ಯಾಪಾರ ವಹಿವಾಟು ಪರಿಸರ ನಿರ್ಮಾಣವೇ ಇರಬಹುದು ಅಥವಾ ಕೌಶಲ್ಯ ಭಾರತವೇ (ಸ್ಕಿಲ್ ಇಂಡಿಯಾ) ಇರಬಹುದು; ತೆರಿಗೆ ಸುಧಾರಣೆಗಳೇ ಇರಬಹುದು ಅಥವಾ `ಭಾರತದಲ್ಲೇ ನಿರ್ಮಿಸಿ’ (ಮೇಕ್ ಇನ್ ಇಂಡಿಯಾ) ಯೋಜನೆ ಇರಬಹುದು, ಒಟ್ಟಿನಲ್ಲಿ ಭಾರತವು ಸಂಪೂರ್ಣವಾಗಿ ಬದಲಾಗುತ್ತಿದೆ. ಇದು ಜಪಾನಿನ ಉದ್ಯಮಿಗಳಿಗೆ/ವಣಿಕ ಸಮುದಾಯದ ಪಾಲಿಗೆ ಉಜ್ವಲ ಅವಕಾಶವಾಗಿದೆ. ನಾವು ಕೈಗೆತ್ತಿಕೊಂಡಿರುವ ಅನೇಕ ಮಹತ್ತ್ವಾಕಾಂಕ್ಷಿ ಯೋಜನೆಗಳಿಗೆ ಜಪಾನಿನ ಹಲವು ಕಂಪನಿಗಳು ಕೈಜೋಡಿಸಿರುವುದು ನನಗೆ ಸಂತೋಷದ ವಿಚಾರವಾಗಿದೆ. ಇಂದು ಸಂಜೆ ನಡೆಯಲಿರುವ ಎರಡೂ ದೇಶಗಳ ಉದ್ಯಮಿಗಳ ಸಭೆಯಲ್ಲಿ ಇದರ ನೇರ ಲಾಭ ಏನೆಂಬುದನ್ನು ನೋಡಲಿದ್ದೇವೆ. ಅಲ್ಲದೆ, ಜಪಾನಿನ ಅಧಿಕೃತ ಅಭಿವೃದ್ಧಿ ನೆರವು ಕಾರ್ಯಕ್ರಮಗಳಲ್ಲಿ ಭಾರತವು ಅತ್ಯಂತ ದೊಡ್ಡ ಪಾಲು ಹೊಂದಿದೆ. ಹಲವು ಕ್ಷೇತ್ರಗಳಿಗೆ ಸಂಬಂಧಿಸಿದಂತೆ ಇಂದು ಮಾಡಿಕೊಳ್ಳಲಾಗಿರುವ ಒಪ್ಪಂದಗಳನ್ನು ನಾನು ಹೃತ್ಪೂರ್ವಕವಾಗಿ ಸ್ವಾಗತಿಸುತ್ತೇನೆ. 

ಸ್ನೇಹಿತರೇ,
ಇಂದು ನಾವು ನಡೆಸಿರುವ ಮಾತುಕತೆ ಮತ್ತು ಮಾಡಿಕೊಂಡಿರುವ ಒಪ್ಪಂದಗಳು ಎಲ್ಲ ರಂಗಗಳಲ್ಲೂ ಭಾರತ ಮತ್ತು ಜಪಾನ್ ನಡುವಿನ ಬಾಂಧವ್ಯವನ್ನು ಮತ್ತಷ್ಟು ಬಲಪಡಿಸಲಿದೆ ಎನ್ನುವ ವಿಶ್ವಾಸ ನನಗಿದೆ. ನನ್ನ ಈ ಮಾತುಗಳೊಂದಿಗೆ, ಪ್ರಧಾನಮಂತ್ರಿ ಶ್ರೀ ಅಬೆ ಅವರನ್ನೂ ಅವರೊಂದಿಗೆ ಆಗಮಿಸಿರುವ ಉನ್ನತ ಮಟ್ಟದ ನಿಯೋಗವನ್ನೂ ಮತ್ತೊಮ್ಮೆ ಹಾರ್ದಿಕವಾಗಿ ಸ್ವಾಗತಿಸುತ್ತೇನೆ.

ಜಿಯೋ ದೇ 
ಗೋಝೈಮಸ್ (ಸದ್ಯಕ್ಕೆ ಇಷ್ಟು ಸಾಕು)

ಅರಿಗಾತೊ
ಗೋಝೈಮಸ್ (ಧನ್ಯವಾದಗಳು)

ನಿಮ್ಮೆಲ್ಲರಿಗೂ ಧನ್ಯವಾದಗಳು.