આપણા મંદિરો, આપણા મઠો, આપણા પવિત્ર સ્થળો એક તરફ પૂજા અને સંસાધનોના કેન્દ્રો રહ્યા છે અને બીજી તરફ તે વિજ્ઞાન અને સામાજિક ચેતનાના કેન્દ્રો પણ રહ્યા છે: પીએમ
આપણા ઋષિમુનિઓએ આપણને આયુર્વેદનું વિજ્ઞાન, યોગનું વિજ્ઞાન આપ્યું, જે આજે વિશ્વભરમાં વખણાય છે: પીએમજ્યારે દેશે મને સેવા કરવાની તક આપી, ત્યારે મેં 'સબકા સાથ, સબકા વિકાસ' ના મંત્રને સરકારનો સંકલ્પ બનાવ્યો, અને 'સબકા સાથ, સબકા વિકાસ' નો આ સંકલ્પ - બધા માટે સારવાર, બધા માટે આરોગ્ય પર આધારિત છે: પીએમભાઈ બોલો, ભગવાન માતંગેશ્વરની જય, બાગેશ્વર ધામની જય, જટાશંકર ધામની જય, હું બંને હાથ જોડીને સૌને રામ રામ કહું છું. આ કાર્યક્રમમાં ઉપસ્થિત મધ્યપ્રદેશના રાજ્યપાલ શ્રી મંગુભાઈ પટેલ, મુખ્યમંત્રી ભાઈ મોહન યાદવજી, જગતગુરુ પૂજ્ય રામભદ્રાચાર્યજી, બાગેશ્વર ધામના પીઠાધીશ શ્રી ધીરેન્દ્ર શાસ્ત્રીજી, સાધ્વી ઋતંભરાજી, સ્વામી ચિદાનંદ સરસ્વતીજી, મહંત શ્રી બાલક યોગેશચરદાસજી, આ પ્રદેશના સંસદ સભ્ય વિષ્ણુદેવ શર્માજી, અન્ય મહાનુભાવો અને પ્રિય ભાઈઓ અને બહેનો.
ઘણા લાંબા સમયમાં બીજી વાર મને વીરોની ભૂમિ બુંદેલખંડની મુલાકાત લેવાનું સૌભાગ્ય મળ્યું છે અને આ વખતે તો બાલાજીએ બોલાવ્યા છે. હનુમાનજીની કૃપાથી આ શ્રદ્ધાનું કેન્દ્ર હવે સ્વાસ્થ્યનું પણ કેન્દ્ર બનવા જઈ રહ્યું છે. હમણાં જ મેં અહીં શ્રી બાગેશ્વર ધામ મેડિકલ સાયન્સ એન્ડ રિસર્ચ ઇન્સ્ટિટ્યૂટનું ભૂમિપૂજન કર્યું છે. આ સંસ્થા 10 એકરમાં બનાવવામાં આવશે. પ્રથમ તબક્કામાં જ 100 પથારીની સુવિધા તૈયાર થશે. આ ઉમદા કાર્ય માટે હું શ્રી ધીરેન્દ્ર શાસ્ત્રીને અભિનંદન આપું છું અને બુંદેલખંડના લોકોને પણ અભિનંદન આપું છું.
મિત્રો,
આજકાલ આપણે જોઈએ છીએ કે નેતાઓનો એક વર્ગ એવો છે જે ધર્મની મજાક ઉડાવે છે, લોકોને વિભાજીત કરવામાં વ્યસ્ત છે અને ઘણી વખત વિદેશી શક્તિઓ પણ આ લોકોને ટેકો આપીને દેશ અને ધર્મને નબળા પાડવાનો પ્રયાસ કરતી દેખાય છે. હિન્દુ ધર્મને નફરત કરનારા આ લોકો સદીઓથી એક યા બીજા વેશમાં જીવી રહ્યા છે. ગુલામ માનસિકતાથી ઘેરાયેલા લોકો આપણી માન્યતાઓ, શ્રદ્ધાઓ અને મંદિરો, આપણા સંતો, સંસ્કૃતિ અને સિદ્ધાંતો પર હુમલો કરતા રહે છે. આ લોકો આપણા તહેવારો, પરંપરાઓ અને રિવાજોનો દુરુપયોગ કરે છે. તેઓ એવા ધર્મ અને સંસ્કૃતિ પર કાદવ ઉછાળવાની હિંમત કરે છે, જે સ્વભાવે પ્રગતિશીલ છે. તેમનો એજન્ડા આપણા સમાજને વિભાજીત કરવાનો અને તેની એકતાને તોડવાનો છે. આ વાતાવરણમાં મારા નાના ભાઈ ધીરેન્દ્ર શાસ્ત્રીજી લાંબા સમયથી દેશમાં એકતાના મંત્ર વિશે લોકોને જાગૃત કરી રહ્યા છે. હવે તેમણે સમાજ અને માનવતાના હિતમાં બીજો સંકલ્પ લીધો છે. તેમણે કેન્સર સંસ્થા બનાવવાનું નક્કી કર્યું છે, એટલે કે હવે અહીં બાગેશ્વર ધામમાં દરેકને ભજન, ભોજન અને સ્વસ્થ જીવનના આશીર્વાદ મળશે.
મિત્રો,
આપણા મંદિરો, આપણા મઠો, આપણા પવિત્ર સ્થળો એક તરફ પૂજા અને ધ્યાનના કેન્દ્રો રહ્યા છે, અને બીજી તરફ તે વિજ્ઞાન, સામાજિક વિચાર અને સામાજિક ચેતનાના કેન્દ્રો પણ રહ્યા છે. આપણા ઋષિમુનિઓએ આપણને આયુર્વેદનું વિજ્ઞાન આપ્યું, આપણા ઋષિમુનિઓએ આપણને યોગનું વિજ્ઞાન આપ્યું, જેનો ધ્વજ આજે સમગ્ર વિશ્વમાં ઊંચો લહેરાતો રહે છે. આપણી માન્યતા છે - ભાઈ, બીજાઓને મદદ કરવા કરતાં મોટો કોઈ ધર્મ નથી. એટલે કે બીજાઓની સેવા કરવી અને બીજાના દુઃખ દૂર કરવા એ જ ધર્મ છે. તેથી નરમાં નારાયણ અને જીવમાં શિવ છે એવી ભાવના સાથે બધા જીવોની સેવા કરવી એ આપણી પરંપરા રહી છે. આજકાલ આપણે જોઈ રહ્યા છીએ કે મહાકુંભની ચર્ચા બધે થઈ રહી છે, મહાકુંભ હવે પૂર્ણતાના આરે છે, અત્યાર સુધીમાં કરોડો લોકો ત્યાં પહોંચી ચૂક્યા છે, કરોડો લોકોએ પવિત્ર ડૂબકી લગાવી છે અને સંતોના દર્શન કર્યા છે. જો આપણે આ મહાકુંભને જોઈએ તો એક સ્વાભાવિક લાગણી ઉત્પન્ન થાય છે કે આ એકતાનો મહાકુંભ છે. 144 વર્ષ પછી યોજાતો આ મહાકુંભ આવનારી સદીઓ સુધી એકતાના મહાકુંભ તરીકે પ્રેરણાદાયક રહેશે અને દેશની એકતાને મજબૂત બનાવવાનું અમૃત પીરસતો રહેશે. લોકો સેવાની ભાવનામાં રોકાયેલા છે. જે કોઈ કુંભમાં ગયું છે તેણે એકતા જોઈ છે. પરંતુ હું જેને પણ મળ્યો છું, ભારતના દરેક ખૂણામાં મહાકુંભમાં ગયેલા દરેક વ્યક્તિના મોઢેથી બે વાત સાંભળવા મળે છે. એક - તે સ્વચ્છતા કર્મચારીઓના હૃદયપૂર્વક વખાણ કરે છે. આજે એકતાના આ મહાન કુંભમાં હું તે બધા સ્વચ્છતા સાથીઓને આદરપૂર્વક વંદન કરું છું જે સેવાની ભાવના સાથે તેઓ 24 કલાક સ્વચ્છતા કાર્ય સંભાળી રહ્યા છે. એક બીજી ખાસિયત છે જેના વિશે આપણા દેશમાં ભાગ્યે જ સાંભળવા મળે છે અને આ વખતે હું જોઈ રહ્યો છું કે એકતાના આ મહાકુંભમાંથી આવતા દરેક યાત્રાળુ કહી રહ્યા છે કે એકતાના આ મહાકુંભમાં પોલીસકર્મીઓએ કરેલા કાર્ય દેશના લાખો લોકોની સાધકની જેમ સેવાવર્તીની જેમ અત્યંત નમ્રતાથી સંભાળ રાખીને, એકતાના આ મહાકુંભમાં દેશના લોકોના દિલ જીતનારા પોલીસકર્મીઓ પણ અભિનંદનને પાત્ર છે.
પણ, ભાઈઓ અને બહેનો,
પ્રયાગરાજના આ મહાકુંભમાં સેવાની સમાન ભાવના સાથે વિવિધ સામાજિક સેવા પ્રોજેક્ટ્સ ચલાવવામાં આવી રહ્યા છે. મીડિયા માટે આ તરફ ધ્યાન આપવું ખૂબ મુશ્કેલ છે પણ આ અંગે બહુ ચર્ચા પણ થઈ નથી. જો હું આ બધા સેવા પ્રોજેક્ટ્સની ચર્ચા કરીશ તો કદાચ મારો આગામી કાર્યક્રમ ખોરવાઈ જશે. પણ હું એક વાતનો ઉલ્લેખ કરવા માંગુ છું એકતાના આ મહાકુંભમાં નેત્રનો મહાકુંભ ચાલી રહ્યો છે. આ નેત્ર મહાકુંભમાં દેશના ખૂણે ખૂણેથી આવતા મુસાફરો, ગરીબ પરિવારોમાંથી આવતા લોકોની આંખોની તપાસ કરવામાં આવે છે અને તે પણ મફતમાં. દેશના પ્રખ્યાત આંખના ડોકટરો બે મહિનાથી ત્યાં બેઠા છે અને અત્યાર સુધીમાં આ નેત્ર મહાકુંભમાં મારા બે લાખથી વધુ ભાઈ-બહેનોની આંખોની તપાસ કરવામાં આવી છે. લગભગ 1.5 લાખ લોકોને મફત દવાઓ અને ચશ્મા આપવામાં આવ્યા છે. અને કેટલાક લોકોને મોતિયાના ઓપરેશનની જરૂર હોવાનું જાણવા મળ્યું છે. તેથી આ નેત્ર મહા કુંભ દ્વારા લગભગ 16,000 મોતિયાના દર્દીઓને ચિત્રકૂટ અને નજીકના સ્થળોએ મોકલવામાં આવ્યા હતા. જ્યાં સારી આંખની હોસ્પિટલો હતી અને તેમના બધા મોતિયાના ઓપરેશન એક પણ પૈસો ખર્ચ્યા વિના કરવામાં આવ્યા હતા. એકતાના આ મહાન કુંભમાં આવા અનેક ધાર્મિક વિધિઓ ચાલી રહી છે.
ભાઈઓ અને બહેનો,
આ બધું કોણ કરી રહ્યું છે? આપણા સંતો અને ઋષિઓના માર્ગદર્શન હેઠળ, હજારો ડોકટરો અને હજારો સ્વયંસેવકો સ્વયંભૂ, સમર્પણ અને સેવાની ભાવના સાથે આ કાર્યમાં રોકાયેલા છે. એકતાના આ મહાન કુંભમાં ભાગ લેવા જઈ રહેલા લોકો આ પ્રયાસોની પ્રશંસા કરી રહ્યા છે.
ભાઈઓ બહેનો,
તેવી જ રીતે ભારતમાં ઘણી મોટી હોસ્પિટલો પણ આપણી ધાર્મિક સંસ્થાઓ દ્વારા ચલાવવામાં આવી રહી છે. આરોગ્ય અને વિજ્ઞાન સંબંધિત ઘણી સંશોધન સંસ્થાઓ ધાર્મિક ટ્રસ્ટો દ્વારા ચલાવવામાં આવી રહી છે. આ સંસ્થાઓમાં કરોડો ગરીબ લોકોની સારવાર અને સેવા કરવામાં આવે છે. મારી દાદી મા અહીં બેઠાં છે. અનાથ છોકરીઓ માટે જે પ્રકારે સમર્પણ ભાવથી તેઓ સેવા કરે છે. પોતાનું જીવન દીકરીઓ માટે તેમણે સમર્પિત કરી દીધું છે.
મિત્રો,
આપણા બુંદેલખંડનું ચિત્રકૂટ ભગવાન રામ સાથે સંકળાયેલું આ પવિત્ર તીર્થસ્થળ પોતે જ દિવ્યાંગો અને દર્દીઓની સેવા માટે એક વિશાળ કેન્દ્ર છે. મને ખુશી છે કે બાગેશ્વર ધામના રૂપમાં આ ભવ્ય પરંપરામાં વધુ એક નવો અધ્યાય ઉમેરવા જઈ રહ્યો છે. હવે તમને બાગેશ્વર ધામમાં પણ સ્વાસ્થ્યના આશીર્વાદ મળશે. મને કહેવામાં આવ્યું છે કે બે દિવસ પછી મહા શિવરાત્રીના અવસર પર અહીં 251 દીકરીઓના સમૂહ લગ્ન સમારોહનું પણ આયોજન કરવામાં આવશે. આ ઉમદા કાર્ય માટે હું બાગેશ્વર ધામની પણ પ્રશંસા કરું છું. હું બધા નવદંપતીઓને, મારી દીકરીઓને અગાઉથી અભિનંદન આપું છું અને તેમને સુંદર અને સુખી જીવન માટે મારા હૃદયપૂર્વકના આશીર્વાદ આપું છું.
મિત્રો,
આપણા શાસ્ત્રોમાં કહેવાયું છે કે શરીર એ ધર્મ પ્રાપ્તિનું સાધન છે. એટલે કે આપણું શરીર, આપણું સ્વાસ્થ્ય એ આપણા ધર્મ, આપણી ખુશી અને આપણી સફળતાનું સૌથી મોટું સાધન છે. એટલા માટે જ્યારે દેશે મને સેવા કરવાની તક આપી ત્યારે મેં 'સબકા સાથ, સબકા વિકાસ'ના મંત્રને સરકારનો સંકલ્પ બનાવ્યો. અને 'સબકા સાથ, સબકા વિકાસ'ના આ સંકલ્પનો એક મુખ્ય આધાર પણ છે. બધા માટે સારવાર, બધા માટે આરોગ્ય! આ વિઝનને હાંસલ કરવા માટે અમે વિવિધ સ્તરે ધ્યાન કેન્દ્રિત કરી રહ્યા છીએ. અમારું ધ્યાન રોગ નિવારણ પર છે. મને કહો સ્વચ્છ ભારત અભિયાન હેઠળ દરેક ગામમાં શૌચાલય બનાવવામાં આવ્યા છે કે નહીં? આનાથી તમને મદદ મળી કે નહીં? તમે જાણો છો, શૌચાલય બનાવવાનો બીજો એક ફાયદો પણ છે. શૌચાલય બન્યા પછી ગંદકીથી થતા રોગોમાં પણ ઘટાડો થયો છે. એક અભ્યાસ કહે છે કે જે ઘરોમાં શૌચાલય બનાવવામાં આવ્યા છે ત્યાં બીમારી પર ખર્ચ થવાથી હજારો રૂપિયા બચી જાય છે.
મિત્રો,
2014માં અમારી સરકાર સત્તામાં આવી તે પહેલાં પરિસ્થિતિ એવી હતી કે દેશના ગરીબો બીમારી કરતાં સારવારના ખર્ચથી વધુ ડરતા હતા. જો પરિવારમાં એક પણ વ્યક્તિ ગંભીર બીમારીનો ભોગ બને તો આખો પરિવાર મુશ્કેલીમાં મુકાઈ જાય છે. તમારા બધાની જેમ હું પણ ગરીબ પરિવારમાંથી આવું છું. મેં પણ આ મુશ્કેલીઓ જોઈ છે. અને એટલા માટે મેં પ્રતિજ્ઞા લીધી છે - હું સારવારનો ખર્ચ ઘટાડીશ અને તમારા ખિસ્સામાં શક્ય તેટલા પૈસા બચાવીશ. હું તમને અમારી સરકારની કેટલીક કલ્યાણકારી યોજનાઓ વિશે વારંવાર માહિતી આપતો રહું છું જેથી એક પણ જરૂરિયાતમંદ વ્યક્તિ યોજનાઓથી વંચિત ન રહે. તેથી હું આજે અહીં ઘણી મહત્વપૂર્ણ બાબતોનું પુનરાવર્તન કરી રહ્યો છું અને મને આશા છે કે તમે આ યાદ રાખશો અને તમારા પરિચિતોને પણ જણાવશો. હું તમને કહીશ, હું તમને ચોક્કસ કહીશ આ પણ એક સેવાનું કાર્ય છે. તબીબી ખર્ચનો બોજ ઘટાડવો જોઈએ કે નહીં? એટલા માટે મેં દરેક ગરીબ વ્યક્તિ માટે મફત સારવારની વ્યવસ્થા કરી છે. 5 લાખ રૂપિયા સુધીની સારવાર કોઈપણ ખર્ચ વિના! કોઈપણ દીકરાને તેના માતા-પિતાની સારવાર માટે ₹500000 સુધીનો ખર્ચ કરવો પડશે નહીં. દિલ્હીમાં બેઠેલો તમારો દીકરો એ કામ કરશે. પરંતુ આ માટે તમારે આયુષ્માન કાર્ડ બનાવવું પડશે. મને આશા છે કે અહીં ઘણા લોકો હશે જેમણે ચોક્કસ પોતાનું આયુષ્માન કાર્ડ બનાવ્યું હશે. જેમણે નથી બનાવ્યું તેમણે પણ શક્ય તેટલી વહેલી તકે કાર્ડ બનાવી લેવું જોઈએ અને હું મુખ્યમંત્રીને એ પણ કહેવા માંગુ છું કે જો આ ક્ષેત્રમાં કોઈ કામ બાકી રહ્યું હોય, તો તેને ઝડપથી આગળ ધપાવવું જોઈએ.
મિત્રો,
તમારે બીજી એક વાત યાદ રાખવાની છે. હવે ગરીબ હોય, અમીર હોય, મધ્યમ વર્ગ હોય કે કોઈપણ પરિવાર હોય, પરિવારના 70 વર્ષથી વધુ ઉંમરના તમામ વૃદ્ધો માટે મફત સારવાર માટે આયુષ્માન કાર્ડ બનાવવામાં આવી રહ્યા છે. આ કાર્ડ ઓનલાઈન પણ બનાવવામાં આવશે. આ માટે તમારે કોઈને પૈસા ચૂકવવાની જરૂર નથી. અને જો કોઈ પૈસા માંગે તો તમારે સીધો મને પત્ર લખવો પડશે, બાકીનું કામ હું કરીશ. જો કોઈ પૈસા માંગે તો તમે શું કરશો? લખશો. હું આ સંતો મહાત્માઓને પણ કહું છું કે તમે પણ આયુષ્માન કાર્ડની વ્યવસ્થા કરો જેથી જ્યારે જો કોઈ વખત બીમાર પડો ત્યારે મને તમારી સેવા કરવાનો મોકો મળે. તમને કોઈ બીમારી તો થવાની નથી, પરંતુ જો બીમાર પડી જાવ તો.
ભાઈઓ બહેનો,
ક્યારેક સારવાર માટે હોસ્પિટલમાં દાખલ થવાની જરૂર હોતી નથી. ડૉક્ટર દ્વારા સૂચવવામાં આવેલી દવા ઘરે જ લેવી પડે છે. આવી સ્થિતિમાં મેં મેડિકલ સ્ટોર્સમાંથી સસ્તી દવાઓ મેળવવાની પણ વ્યવસ્થા કરી છે. આ ખર્ચ ઘટાડવા માટે, દેશમાં 14000 થી વધુ જન ઔષધિ કેન્દ્રો ખોલવામાં આવ્યા છે અને આ જન ઔષધિ કેન્દ્રો એવા છે કે જે દવા બજારમાં 100 રૂપિયામાં મળે છે, તે જ દવા જન ઔષધિ કેન્દ્રમાં માત્ર 15-20 રૂપિયામાં મળે છે. હવે તમારા પૈસા બચશે કે નહીં? તો શું તમારે જન ઔષધિ કેન્દ્રમાંથી દવા લેવી જોઈએ કે નહીં? હું એક બીજી વાત કહેવા માંગુ છું, આજકાલ આપણને વારંવાર સમાચાર મળે છે કે દરેક ગામમાં કિડનીનો રોગ ફેલાઈ રહ્યો છે. હવે જ્યારે કિડનીનો રોગ વધે છે ત્યારે ડાયાલિસિસ સતત કરાવવું પડે છે. નિયમિતપણે કરાવવું પડે છે. દૂર દૂર મુસાફરી કરવી પડે છે, તેમાં ઘણો ખર્ચ થાય છે. તમારી આ સમસ્યાને ઓછી કરવા માટે અમે દેશના 700થી વધુ જિલ્લાઓમાં 1500થી વધુ ડાયાલિસિસ કેન્દ્રો ખોલ્યા છે. અહીં મફત ડાયાલિસિસ સુવિધા પણ ઉપલબ્ધ છે. તમારે આ બધી સરકારી યોજનાઓથી પણ વાકેફ રહેવું જોઈએ અને તમારે તમારા જાણીતા દરેકને તેમના વિશે જણાવવું જોઈએ. તો શું તમે મારા માટે આટલું બધું કામ કરશો? તમે બધા હાથ ઊંચા કરો અને મને કહો કે શું તમે તે કરશો? તમને પુણ્ય મળશે, આ સેવાનું કાર્ય છે.
મિત્રો,
બાગેશ્વર ધામમાં કેન્સરના દર્દીઓ માટે આટલી મોટી હોસ્પિટલ ખુલવા જઈ રહી છે. કારણ કે કેન્સર હવે દરેક જગ્યાએ એક મોટી સમસ્યા બની રહ્યું છે. તેથી આજે સરકાર, સમાજ, સંતો, દરેક વ્યક્તિ કેન્સર સામેની લડાઈમાં સંયુક્ત પ્રયાસો કરી રહ્યા છે.
ભાઈઓ બહેનો,
મને ખબર છે કે ગામમાં કોઈને કેન્સર થઈ જાય તો તેની સામે લડવું કેટલું મુશ્કેલ છે. ઘણા દિવસો સુધી ખબર જ નથી પડતી કે કેન્સર થયું છે. લોકો સામાન્ય રીતે તાવ અને દુખાવા માટે ઘરેલું ઉપચાર કરે છે અને કેટલાક લોકો પૂજા અને જાપ માટે પણ જાય છે. કોઈ તાંત્રિકના હાથમાં ફસાઈ જાય છે, જ્યારે દુખાવો ખૂબ વધી જાય છે અથવા ગાંઠ દેખાવા લાગે છે, ત્યારે તેઓ તેને બહાર બતાવે છે, ત્યારે ખબર પડે છે કે તે કેન્સર છે. અને કેન્સરનું નામ સાંભળતા જ આખું ઘર દુઃખથી ભરાઈ જાય છે, બધા ગભરાઈ જાય છે, બધા સપના ચકનાચૂર થઈ જાય છે અને ક્યાં જવું અને ક્યાં સારવાર લેવી તે પણ સમજાતું નથી. મોટાભાગના લોકો ફક્ત દિલ્હી અને મુંબઈ વિશે જ જાણે છે. એટલા માટે અમારી સરકાર આ બધી સમસ્યાઓના ઉકેલમાં રોકાયેલી છે. આ વર્ષના બજેટમાં કેન્સર સામે લડવા માટે ઘણી જાહેરાતો કરવામાં આવી છે અને મોદીએ નક્કી કર્યું છે કે કેન્સરની દવાઓ સસ્તી કરવામાં આવશે. આગામી 3 વર્ષમાં દેશના દરેક જિલ્લામાં કેન્સર ડે કેર સેન્ટર ખોલવામાં આવશે. ડે કેર સેન્ટરમાં ચેકઅપ અને આરામની સુવિધાઓ હશે. તમારા પડોશમાં જિલ્લા હોસ્પિટલો અને તબીબી કેન્દ્રોમાં પણ કેન્સર ક્લિનિક્સ ખોલવામાં આવી રહ્યા છે.
પરંતુ ભાઈઓ અને બહેનો,
તમને મારા શબ્દો ગમે કે નાપસંદ હોય શકે છે, પરંતુ તમારે તેના વિશે કંઈક કરવું પડશે, તેને યાદ રાખવું પડશે અને તેને તમારા જીવનમાં લાગુ કરવું પડશે; કેન્સરથી પોતાને બચાવવા માટે, તમારે પણ સાવચેત અને જાગૃત રહેવું પડશે. પહેલી સાવચેતી એ છે કે સમયસર કેન્સર શોધી કાઢવું, કારણ કે એકવાર કેન્સર ફેલાય પછી તેને હરાવવું ખૂબ મુશ્કેલ બની જાય છે. એટલા માટે અમે 30 વર્ષથી વધુ ઉંમરના તમામ લોકોના પરીક્ષણ માટે એક ઝુંબેશ ચલાવી રહ્યા છીએ. આપ સૌએ આ અભિયાનનો લાભ લેવો જોઈએ અને તેનો ભાગ બનવું જોઈએ. બેદરકાર ન બનો. જો સહેજ પણ શંકા હોય તો, કેન્સરનું તાત્કાલિક પરીક્ષણ કરાવવું જોઈએ. બીજી વાત એ છે કે કેન્સર વિશે સાચી માહિતી પણ ખૂબ જ મહત્વપૂર્ણ છે. આ કેન્સર કોઈને સ્પર્શ કરવાથી થતું નથી, તે ચેપી રોગ નથી, સ્પર્શ કરવાથી ફેલાતો નથી, બીડી, સિગારેટ, ગુટખા, તમાકુ અને મસાલાથી કેન્સરનું જોખમ વધે છે, મારી વાત સાંભળીને માતાઓ અને બહેનો વધુ ખુશ થઈ રહી છે. તેથી તમારે આ બધા કેન્સર ફેલાવતા વ્યસનોથી દૂર રહેવું પડશે અને બીજાઓને પણ તેનાથી દૂર રાખવા પડશે. તમારે તમારા શરીર અને સ્વાસ્થ્યનું ધ્યાન રાખવું પડશે. અને મને આશા છે કે. જો આપણે સાવધાન રહીએ. તો બાગેશ્વર ધામના કેન્સરના દર્દીઓ હોસ્પિટલ પર બોજ નહીં બનીએ. અહીં આવવાની જરૂર જ નહીં પડે, તો શું તમે સાવચેતી રાખશો ને? તમે બેદરકાર તો નહીં દાખવોને?
મિત્રો,
મોદી તમારો સેવક તરીકે તમારી સેવા કરવામાં વ્યસ્ત છે. ગઈ વખતે જ્યારે હું છતરપુર આવ્યો હતો, ત્યારે મેં હજારો કરોડ રૂપિયાની યોજનાઓનું ઉદ્ઘાટન અને શિલાન્યાસ કર્યો હતો અને હમણાં જ મુખ્યમંત્રીએ તેનું વર્ણન પણ કર્યું. તમને યાદ હશે કે આમાંનો કેન બેતવા લિંક પ્રોજેક્ટ 45000 કરોડ રૂપિયાનો હતો. આ પ્રોજેક્ટ ઘણા દાયકાઓથી પેન્ડિંગ હતો. ઘણી સરકારો આવી અને ગઈ, દરેક પક્ષના નેતાઓ પણ બુંદેલખંડ આવતા હતા. પરંતુ અહીં પાણીની અછત વધતી જ ગઈ. તમે મને કહો, શું અગાઉની કોઈ સરકારે પોતાનું વચન પૂરું કર્યું હતું? આ કામ પણ ત્યારે શરૂ થયું જ્યારે તમે મોદીને આશીર્વાદ આપ્યા. પીવાના પાણીની સમસ્યાના ઉકેલ માટે પણ ઝડપી ગતિએ કામ ચાલી રહ્યું છે. જળ જીવન મિશન એટલે કે હર ઘર જળ પ્રોજેક્ટ હેઠળ, બુંદેલખંડના દરેક ગામમાં પાઈપ દ્વારા પાણી પહોંચાડવામાં આવી રહ્યું છે. ગામડાઓ સુધી પાણી પહોંચે અને આપણા ખેડૂત ભાઈ-બહેનોની સમસ્યાઓ દૂર થાય અને તેમની આવક વધે તે માટે અમે દિવસ-રાત સખત મહેનત કરી રહ્યા છીએ.
ભાઈઓ બહેનો,
બુંદેલખંડ સમૃદ્ધ બને તે માટે આપણી માતાઓ અને બહેનો પણ સમાન રીતે સશક્ત બને તે જરૂરી છે. આ માટે અમે લખપતિ દીદી અને ડ્રોન દીદી જેવી યોજનાઓ શરૂ કરી છે. અમે ૩ કરોડ બહેનોને લખપતિ દીદી બનાવવાના લક્ષ્ય સાથે કામ કરી રહ્યા છીએ. બહેનોને ડ્રોન ઉડાડવાની તાલીમ પણ આપવામાં આવી રહી છે. સિંચાઈનું પાણી બુંદેલખંડ પહોંચશે, બહેનો ડ્રોનનો ઉપયોગ કરીને પાક પર છંટકાવ કરશે અને ખેતીમાં મદદ કરશે તો આપણું બુંદેલખંડ સમૃદ્ધિના માર્ગ પર ઝડપથી આગળ વધશે.
ભાઈઓ બહેનો,
ડ્રોન ટેકનોલોજીની મદદથી ગામમાં બીજું એક ખૂબ જ મહત્વપૂર્ણ કાર્ય થઈ રહ્યું છે. માલિકી યોજના હેઠળ ડ્રોનનો ઉપયોગ કરીને જમીન માપ્યા પછી મજબૂત દસ્તાવેજો પૂરા પાડવામાં આવી રહ્યા છે. અહીં મધ્યપ્રદેશમાં આ અંગે ઘણું સારું કામ થયું છે. હવે લોકો આ કાગળોના આધારે બેંકોમાંથી સરળતાથી લોન લઈ રહ્યા છે. આ લોનનો ઉપયોગ વ્યવસાય અને રોજગારમાં થઈ રહ્યો છે અને લોકોની આવક વધી રહી છે.
મિત્રો,
બુંદેલખંડની આ મહાન ભૂમિને વિકાસની નવી ઊંચાઈઓ પર લઈ જવા માટે ડબલ એન્જિન સરકાર દિવસ-રાત સખત મહેનત કરી રહી છે. હું બાગેશ્વર ધામની મુલાકાત લેવા માંગુ છું. બુંદેલખંડ સમૃદ્ધિ અને વિકાસના માર્ગ પર આગળ વધતું રહેવું જોઈએ અને આજે જ્યારે હું હનુમાન દાદાના ચરણોમાં આવ્યો ત્યારે મને વિચાર આવ્યો કે ધીરેન્દ્ર શાસ્ત્રી જ કાપલી કાઢશે, હું કાઢી શકીશ? તો મેં જોયું કે આજે હનુમાન દાદા મને આશીર્વાદ આપશે કે નહીં. તો હનુમાન દાદાજીએ મને આશીર્વાદ આપ્યા અને આજે મેં પહેલી કાપલી કાઢી, તેમની માતાજીની કાપલી કાઢી અને જે વાત શાસ્ત્રીજીએ તમને લોકોને જણાવી દીધી.
ઠીક છે સાથીઓ,
આ એક મોટી તક છે, એક મોટું કાર્ય છે. જો સંકલ્પ મોટો હોય, સંતોના આશીર્વાદ હોય અને ભગવાનની કૃપા હોય તો બધું સમયમર્યાદામાં પૂર્ણ થાય છે અને તમે કહ્યું છે કે મારે તેના ઉદ્ઘાટનમાં આવવું જોઈએ. બીજાએ કહ્યું છે કે મારે તેમના લગ્ન સમારોહમાં આવવું જોઈએ. હું આજે જાહેરમાં વચન આપું છું કે હું બંને કામ કરીશ. ફરી એકવાર આપ સૌને મારી શુભકામનાઓ. ખૂબ ખૂબ આભાર, હર હર મહાદેવ.
