"Chief Minister inaugurate Narayana Rudralaya Hospital in Easten Ahmedabad"
"Gujarat leads in preventive medicine, starts Chief Minister’s Amritam Yojna for poor patients: Narendra Modi"
નરેન્દ્રભાઇ મોદી
ગરીબમાં ગરીબ દરદીને નવી જીંદગી આપવા ‘‘મુખ્યમંત્રી અમૃતમ્ યોજના'' શરૂ કરી છે
પ્રિવેન્ટીવ હેલ્થકેરમાં પણ ગુજરાત અગ્રેસર
પૂર્વ-અમદાવાદમાં નારાયણા રુદ્રાલયા હોસ્પિટલનું મુખ્યમંત્રીશ્રીના હસ્તે ઉદ્ઘાટન
મુખ્યમંત્રી શ્રી નરેન્દ્રભાઇ મોદીએ અમદાવાદના પૂર્વ વિસ્તારમાં ખાનગી ક્ષેત્રની નારાયણા રૂદ્રાલયા હોસ્પિટલનું આજે ઉદ્ઘાટન કરતાં જણાવ્યું હતું કે, ગરીબમાં ગરીબ દરદીને સમયસર, સારામાં સારી સારવાર મળી રહે તે માટે રાજ્ય સરકારે વર્ષે રૂા.200 કરોડનું બજેટ ફાળવીને રૂા.બે લાખની સહાય મળે તે માટે ‘‘મુખ્યમંત્રી અમૃતમ્'' યોજના શરૂ કરી છે.
ગુજરાત સરકારે માત્ર દોઢ જ મહિનામાં 37 એકર જમીન આ હોસ્પિટલ સંકુલના નિર્માણ માટે ફાળવી હતી અને આજે માત્ર રૂા.10ની ફી લઇને 300 પથારીઓવાળી આ હોસ્પિટલમાં ગરીબ દરદીઓને સારવાર મળતી થઇ જશે. પૂર્વ અમદાવાદમાં આરોગ્યનું નવું નજરાણું ગરીબોની સેવામાં ઉપલબ્ધ થયું છે તેનો આનંદ વ્યકત કરતાં મુખ્યમંત્રીશ્રીએ જણાવ્યું હતું કે ગરીબના ઘરમાં માંદગી આવે ત્યારે આખા પરિવાર ઉપર મુસીબત અને આર્થિક દુર્દશાનો અનુભવ થાય છે ત્યારે ગુજરાત સરકારે માતા, બાળકના આરોગ્ય રક્ષણ માટે અનેક એવી યોજના હાથ ધરી છે જેના કારણે ગરીબ માતા અને બાળક ને નવજાત શિશુની જીંદગી બચી છે. સંસ્થાગત પ્રસુતિનો દર 97 ટકા ઉપર પહોચ્યો છે. ગરીબ દરદી, અકસ્માતના દરદીની ત્વરિત સારવાર કે ગરીબ સગર્ભાની પ્રસુતિ માટે 108 ઇમરજન્સી એમ્બ્યુલન્સની સેવા દુર દુરના વિસ્તારોમાં પહોંચી છે તેમ એમણે જણાવ્યું હતું.
ગરીબીરેખા હેઠળ જીવતા બી.પી.એલ. પરિવારોના ગંભીર રોગોની સારવાર માટે પણ સરકાર રૂા. 3 લાખની સહાય આપે છે અને આ વખતે રૂા.200 કરોડના ખર્ચે ગંભીર જીવલેણ રોગોથી પીડાતા ગરીબ દરદીને તત્કાલ સારવાર માટે રૂા.બે લાખની સહાયની યોજના શરૂ કરી છે. મુખ્યમંત્રીશ્રીએ આ હોસ્પિટલનું વિસ્તૃતિકરણ 5000 પથારીઓનું ઝડપથી થાય તેવી અભિલાષા વ્યકત કરતાં જણાવ્યું કે, અહીં મેડીકલ કોલેજ ઝડપથી બનવાની છે. ગુજરાત સરકારે આરોગ્ય સેવા ગરીબો સુધી પહોંચાડવાની માળખાકીય સુવિધાઓને ગુણવત્તાસભર બનાવી છે એટલું જ નહીં ચિરંજીવ હેલ્થ કેર માટે, સી.એન.જી ટ્રાન્સ્પોર્ટના કારણે અમદાવાદ વાયુ પ્રદર્શન મુકત બન્યું છે. નર્મદાનું પાણી સાબરમતીમાં વહેતુ કરીને પણ પીવાનું શુધ્ધ પાણી પહોંચાડયુ છે એટલું જ નહીં પોષણયુકત આહાર દ્વારા પણ કુપોષણ સામે જંગ આદર્યો છે. ગુજરાતના માનવીને સ્વસ્થ જીવન મળે તેવો સરકારનો પ્રયાસ રહેશે તેમ તેમણે જણાવ્યું હતું.
નારાયણા રુદ્રણાલયા હોસ્પિટલના ચેરમેન શ્રી દેવી શેટ્ટીએ નવનિર્મિત હોસ્પિટલની વિગતો આપતાં જણાવ્યું હતું કે, સામાન્ય નાગરિકને પોસાય તેવા દરે હોસ્પિટલ સુવિધા પુરી પાડવા સરકારે ખાનગી સાહસિકો સાથે પબ્લીક પ્રાઇવેટ પાર્ટનરશીપમાં હેલ્થકેર સીસ્ટમ વિકસાવી છે તેની પ્રસંશા કરતાં તેમણે કહ્યું કે આ હોસ્પિટલ દ્વારા આગામી બે વર્ષમાં ગરીબ બાળકો માટેની મેડીકલ સ્કુલ શરૂ કરવામાં આવશે. અમદાવાદના મેયર શ્રી આસિત વોરા, આરોગ્ય વિભાગના અગ્રસચિવ શ્રી રાજેષ કિશોર, વાઇસ ચેરમેન આષુતોશ રઘુવંશી તેમજ શ્રીમતી કિરણ શેટ્ટી તથા તબીબી ક્ષેત્રના આગેવાનો, તબીબો વગેરે ઉપસ્થિત રહ્યા હતા.
