আজি বিশ্বই কৈছে যে ভাৰতৰ শক্তি হৈছে আমাৰ যুৱ শক্তি, আমাৰ উদ্ভাৱনী যুৱক, আমাৰ প্ৰযুক্তিয়ে শক্তি: প্ৰধানমন্ত্ৰী
যোৱা ৭ বছৰত যিবোৰ হেকাথন সম্পন্ন হৈছে তাৰ বহু সমাধান আজি দেশবাসীৰ বাবে অতি উপযোগী বুলি প্ৰমাণিত হৈছে: প্ৰধানমন্ত্ৰীআমি ছাত্ৰ-ছাত্ৰীৰ বৈজ্ঞানিক মানসিকতা লালন-পালন কৰিবলৈ নতুন ৰাষ্ট্ৰীয় শিক্ষা নীতি ৰূপায়ণ কৰিছো: প্ৰধানমন্ত্ৰী‘এক দেশ এক ছাবস্ক্ৰিপচন’ আঁচনিৰ অধীনত চৰকাৰে আগশাৰীৰ আলোচনীৰ ছাবস্ক্ৰিপচন লৈছে যাতে ভাৰতৰ কোনো যুৱক-যুৱতী কোনো তথ্যৰ পৰা বঞ্চিত নহয়: প্ৰধানমন্ত্ৰীদেশৰ ৫১টা ন’ডেল চেণ্টাৰত অনুষ্ঠিত হ’বলগীয়া এছ আই এইচ, ২০২৪ৰ গ্ৰেণ্ড ফিনালেত অংশগ্ৰহণ ১৩০০ৰো অধিক শিক্ষাৰ্থীৰ দলৰশ্ৰী মোদীয়ে অংশগ্ৰহণকাৰীসকলৰ বিষয়ে অধিক জানিবলৈ আগ্ৰহ প্ৰকাশ কৰি আদান-প্ৰদান আৰম্ভ কৰে।তেওঁ সমগ্ৰ দলটোক তেওঁলোকৰ নতুন প্ৰচেষ্টাৰ বাবে অভিনন্দন জনায়বন্ধুসকল,
মই সদায় লালকিল্লাৰ পৰা উল্লেখ কৰি অহা এটা কথা চাগৈ আপোনালোক সকলোৱে মনত ৰাখিছে। মই কৈ অহা কথাষাৰ হৈছে 'সব কা প্ৰয়াস' (সকলোৰে প্ৰচেষ্টা) হৈছে মূল চাবিকাঠি- আজিৰ ভাৰতে কেৱল সকলোৰে সামূহিক প্ৰচেষ্টাৰ জৰিয়তেহে দ্ৰুত গতিত আগবাঢ়িব পাৰিব। এই নীতিৰ এক উদাহৰণ হৈছে আজি। মই ‘স্মাৰ্ট ইণ্ডিয়া হেকাথন’ৰ এই বৰ্ণাঢ্য সামৰণিৰ বাবে আগ্ৰহেৰে অপেক্ষা কৰি আছোঁ। যেতিয়াই মই আপোনালোকৰ দৰে যুৱ উদ্ভাৱকসকলৰ মাজত থকাৰ সুযোগ পাওঁ মই নতুন অন্তৰ্দৃষ্টি শিকিবলৈ, বুজিবলৈ আৰু প্ৰাপ্ত কৰাৰ সুযোগ পাওঁ। আপোনালোক সকলোৰে পৰা মোৰ অপাৰ প্ৰত্যাশা আছে। একবিংশ শতিকাৰ ভাৰতখনক চোৱাৰ ক্ষেত্ৰত আপোনালোকৰ দৰে যুৱ উদ্ভাৱকসকলৰ এক অনন্য দৃষ্টিভংগী আছে, আৰু সেয়েহে আপোনালোকৰ সমাধানবোৰো অনন্য হয়। যেতিয়া আপোনালোকে নতুন প্ৰত্যাহ্বানৰ সন্মুখীন হয়, আপোনালোকে নতুন আৰু সৃজনশীল সমাধানৰে সঁহাৰি দিয়ে। মই আগতে কেবাটাও হেকাথনত অংশগ্ৰহণ কৰিছিলোঁ, আৰু আপোনালোকে মোক কেতিয়াও হতাশ কৰা নাই। আপোনালোকে সদায় আপোনালোকৰ ওপৰত থকা মোৰ বিশ্বাসক শক্তিশালী কৰি আহিছে। আগতে অংশগ্ৰহণ কৰা দলবোৰে সমাধান প্ৰদান কৰিছে, যিবোৰ এতিয়া বিভিন্ন মন্ত্ৰালয়ত কাৰ্যকৰীভাৱে ব্যৱহাৰ কৰা হৈছে। এতিয়া, এই হেকাথনত মই জানিবলৈ আগ্ৰহী যে দেশৰ বিভিন্ন প্ৰান্তৰ দলবোৰে কি কি প্ৰসংগত কাম কৰি আছে। মই আপোনালোকৰ উদ্ভাৱনৰ বিষয়ে শিকিবলৈ বাৰুকৈয়ে আগ্ৰহী। গতিকে, আৰম্ভ কৰোঁ আহক! কোনে প্ৰথমে আমাৰ সৈতে কথা পাতিব বিচাৰিব?
প্ৰধানমন্ত্ৰীঃ নমস্তেজী।
অংশগ্ৰহণকাৰী: নমস্তে ছাৰ। মই টীম ‘বিগ ব্ৰেইনছ’-ৰ চাহিদা, ‘স্মাৰ্ট ইণ্ডিয়া হেকাথন’ত অংশগ্ৰহণ কৰিবলৈ আহিছোঁ। আমি কৰ্ণাটকৰ বেংগালুৰুৰ। ছাৰ, এই মুহূৰ্তত আমি ‘এনআইটি শ্ৰীনগৰ’ৰ ‘নোডেল কেন্দ্ৰ’ত আছোঁ, আৰু ইয়াত বৰ ঠাণ্ডা পৰিছে। সেয়েহে, মই কথা কওঁতে যদি সৰু-সুৰা ভুলো কৰোঁ অনুগ্ৰহ কৰি মোক ক্ষমা কৰি দিব।
প্ৰধানমন্ত্ৰীঃ নহয়, নহয়, আপোনালোক সকলোৱে অতি সাহসী। ঠাণ্ডাই আপোনালোকক প্ৰভাৱিত নকৰে। একেবাৰেই চিন্তা নকৰিব।
অংশগ্ৰহণকাৰী: ধন্যবাদ, ছাৰ। আমি সামাজিক ন্যায় আৰু সৱলীকৰণ মন্ত্ৰালয়ে প্ৰদান কৰা সমস্যা বিৱৰণীৰ অধীনত অংশগ্ৰহণ কৰিছোঁ। আমি ‘অ’টিজম স্পেকট্ৰাম’ বিকাৰ আৰু বৌদ্ধিক অক্ষমতা থকা শিশুসকলৰ বাবে এটা ‘ভাৰ্চুৱেল ৰিয়েলিটী ফ্ৰেণ্ড’ নিৰ্মাণ কৰি আছোঁ। এই সঁজুলিটোৱে এক ‘ইন্টাৰেক্টিভ’ দক্ষতা বঢ়োৱাৰ কাম কৰিব। আমাৰ দেশত ‘অ’টিজম স্পেকট্ৰাম’ত প্ৰায় ৮০ নিযুত লোক আক্ৰান্ত হৈ আছে, আৰু প্ৰতি ১০০টা শিশুৰ ভিতৰত ১ টি শিশু বৌদ্ধিক প্ৰত্যাহ্বানৰ সন্মুখীন হৈছে। ইয়াৰ সমাধান উলিয়াবলৈ আমি এটা উপকৰণ বিকশিত কৰি আছোঁ যি 'দোষ্ট' (বন্ধু)- তেওঁলোকে তেওঁলোকৰ স্মাৰ্টফোনত কঢ়িয়াব পৰা বন্ধু হিচাপে কাম কৰিব। এই ‘ভাৰ্চুৱেল ৰিয়েলিটী’ সমাধানটো ব্যৱহাৰ কৰিবলৈ তেওঁলোকক কোনো বিশেষ উপকৰণৰ প্ৰয়োজন নহ'ব। ইয়াত তেওঁলোকৰ ফোন, লেপটপ, বা তেওঁলোকৰ যিকোনো উপকৰণৰ জৰিয়তে প্ৰৱেশ কৰিব পাৰি। উদাহৰণ স্বৰূপে, তেওঁলোকে সংগ্ৰাম কৰা দৈনন্দিন ৰুটিন সম্পাদন কৰা, নতুন ভাষা শিকা, আনৰ সৈতে যোগাযোগ কৰা, বা সামাজিক আদান-প্ৰদানৰ দক্ষতা বিকাশ কৰা, উপকৰণটোৱে প্ৰতিটো কামকে সৰু, নিয়ন্ত্ৰণযোগ্য পদক্ষেপত বিভক্ত কৰিব...
প্ৰধানমন্ত্ৰীঃ বৰ ভাল কথা। আপোনালোকে কৰি থকা কামটো নিতান্তই প্ৰশংসনীয়। আপোনালোকে মোক ক'ব পাৰিবনে যে এই শিশুসকলৰ সামাজিক জীৱনত ইয়াৰ ইতিবাচক প্ৰভাৱ কেনেদৰে পৰিব?
অংশগ্ৰহণকাৰী: কি কৰা উচিত, সামাজিক বাৰ্তালাপত কিবোৰ নাথাকে, আৰু তেওঁলোকে কেনেদৰে মানুহৰ কাষ চাপিব পাৰে সেই কথা তেওঁলোকে এই ‘ভাৰ্চুৱেল বন্ধু’ৰ সহায়ত শিকিব। তেওঁলোকে এই দক্ষতাবোৰ এক সুৰক্ষিত পৰিৱেশত অনুশীলন কৰিব পাৰিব আৰু পিছত সেইবোৰ তেওঁলোকৰ বাস্তৱ-পৃথিৱীখনৰ পৰিস্থিতিত প্ৰয়োগ কৰিব পাৰিব। এই সঁজুলিটোৱে তেওঁলোকক বাস্তৱ পৃথিৱীত স্বাভাৱিক কাৰ্যকলাপ সম্পাদন কৰিবলৈ সক্ষম কৰি তেওঁলোকৰ জীৱন উন্নত কৰাত সহায় কৰিব। বিশেষ প্ৰয়োজনীয়তা থকা শিশুসকলৰ শিকাৰ ক্ষেত্ৰত অতুলনীয় প্ৰয়োজনীয়তা থাকে, সেয়েহে আমি তেওঁলোকক ব্যৱধানটো দূৰ কৰিবলৈ এই সঁজুলিটো প্ৰদান কৰাৰ লক্ষ্য গ্ৰহণ কৰিছোঁ। এনেদৰে, সাধাৰণ ব্যক্তি আৰু বিশেষ প্ৰয়োজনীয়তা থকা শিশুসকলৰ দৈনন্দিন জীৱনৰ মাজত নিয়মীয়াকৈ কাম কৰাৰ ক্ষেত্ৰত কোনো গুৰুত্বপূৰ্ণ পাৰ্থক্য নাথাকিব।
প্ৰধানমন্ত্ৰীঃ বৰ্তমান আপোনালোকৰ দলত কিমান গৰাকী সদস্যই কাম কৰি আছে?
অংশগ্ৰহণকাৰী: ছাৰ, আমি ছজনে কামটো কৰি আছোঁ, আৰু দৰাচলতে, মোৰ দলটো বহুত বৈচিত্ৰ্যপূৰ্ণ। আমাৰ মাজত বিভিন্ন কাৰিকৰী আৰু ভৌগোলিক পৃষ্ঠভূমিৰ সদস্য আছে, আৰু আনকি আমাৰ এজন সদস্য আছে যি এজন অনা-ভাৰতীয়ও।
প্ৰধানমন্ত্ৰীঃ আপোনালোকৰ মাজত এনে কোনোবা আছে নেকি যিয়ে আগতে এনে শিশুৰ সৈতে বাৰ্তালাপ কৰিছে? আপোনালোকে তেওঁলোকৰ প্ৰত্যাহ্বানবোৰ বুজিবলৈ চেষ্টা কৰিছে নে আৰু তাৰ পিছত সমাধান বিচাৰিবলৈ আগবাঢ়িছে নে বাৰু?
অংশগ্ৰহণকাৰী: হয়, ছাৰ। আমাৰ দলৰ এগৰাকী সদস্যৰ পৰিয়ালৰ এজন আত্মীয় আছে যি অ’টিজমত ভুগি আছে। ইয়াৰ উপৰিও, ইয়ালৈ অহাৰ আগতে আমি এই শিশুসকলে সন্মুখীন হোৱা প্ৰকৃত অসুবিধাবোৰ বুজিবলৈ বিভিন্ন কেন্দ্ৰৰ সৈতে কথা পাতিছিলোঁ। এইটোৱে আমাক তেওঁলোকৰ প্ৰত্যাহ্বানবোৰ সঠিক ধৰণে মোকাবিলা কৰাৰ ক্ষেত্ৰত মনোনিৱেশ কৰাত সহায় কৰিছিল।
প্ৰধানমন্ত্ৰীঃ আপুনি কিবা কৈ আছিল। এনেকুৱা লাগিছে যে আপোনাৰ এজন সতীৰ্থই কিবা কথা ক’ব বিচাৰিছে।
অংশগ্ৰহণকাৰী: হয়, ছাৰ। আমাৰ দলত, আমাৰ এজন সদস্য আছে যি ভাৰতীয় নহয়- তেওঁ ভাৰতত অধ্যয়ন কৰি থকা এজন বিদেশী শিক্ষাৰ্থী।
অংশগ্ৰহণকাৰী (মহম্মদধালী): নমস্কাৰ, প্ৰধানমন্ত্ৰী ডাঙৰীয়া। মোৰ নাম মহম্মদধালী, আৰু মই য়েমেন গণৰাজ্যৰ এজন আন্তৰ্জাতিক ছাত্ৰ। মই কম্পিউটাৰ বিজ্ঞানত মোৰ অভিযান্ত্ৰিক স্নাতক পাঠ্যক্ৰম গ্ৰহণ কৰিবলৈ ভাৰতলৈ আহিছোঁ, আৰু মই ‘বিগ ব্ৰেইনছ’ দলৰো এক অংশ। আমি এই বিশেষ শিশুসকলৰ বাবে বিশেষভাৱে আৰ্হি কৰা ‘এআই-সঞ্চালিত ভাৰ্চুৱেল ৰিয়েলিটী’ অভিজ্ঞতা এটা বিকশিত কৰি আছোঁ।
প্ৰধানমন্ত্ৰীঃ এনে এটা দলৰ অংশীদাৰ হোৱাটো আপোনাৰ বাৰু প্ৰথম অভিজ্ঞতা নেকি?
অংশগ্ৰহণকাৰী (মহম্মদধালী): মই বাংগালোৰত স্থানীয়ভাৱে বিভিন্ন হেকাথনত অংশগ্ৰহণ কৰিছোঁ, কিন্তু ইমান বৃহৎ পৰিসৰৰ কাৰ্যক্ৰমত এই প্ৰথম বাৰ অংশগ্ৰহণ কৰিছোঁ। এই বৃহৎ প্ৰচেষ্টাৰ অংশীদাৰ হোৱা বাবে মই বাৰুকৈয়ে কৃতজ্ঞ। মোক এই সুযোগ দিয়াৰ বাবে মই আপোনাক, প্ৰধানমন্ত্ৰী মহোদয় আৰু ভাৰত চৰকাৰক ধন্যবাদ জনাইছোঁ। এই মঞ্চৰ পৰা মই মোৰ সকলো সহযোগী য়েমেনী শিক্ষাৰ্থী আৰু অন্যান্য আন্তঃৰাষ্ট্ৰীয় শিক্ষাৰ্থীসকলক উদ্ভাৱক হ'বলৈ আৰু ভাৰতৰ প্ৰাণোচ্ছল উদ্ভাৱন পৰিস্থিতিতন্ত্ৰত যোগদান কৰিবলৈ আমন্ত্ৰণ জনাইছোঁ। ধন্যবাদ!
প্ৰধানমন্ত্ৰীঃ প্ৰতিটো শিশুৱেই বিশেষ বুলি, এই গুৰুত্বপূৰ্ণ ধাৰণাটো বুজি পোৱাৰ বাবে আপোনালোক সকলোকে অভিনন্দন জনাইছোঁ। সকলোৱে বিকাশ আৰু উত্তৰণৰ সুযোগ পোৱা উচিত; সমাজত কোনেৱেই পিছ পৰি থাকিব নালাগে বা বাদ পৰিছে বুলি অনুভৱ কৰিব নালাগে। ইয়াক প্ৰাপ্ত কৰিবলৈ আমাক নিৰন্তৰ উদ্ভাৱনী সমাধানৰ প্ৰয়োজন। আপোনালোকৰ দলটোৱে কাম কৰি থকা সমাধানটোৱে লাখ লাখ শিশুৰ জীৱন সহজ কৰি তুলিব। আপোনালোকে দেশৰ বাবে বিকশিত কৰি থকা এই সমাধানবোৰ ভাৰতৰ প্ৰয়োজনীয়তাৰ বাবে স্থানীয়- প্ৰয়োজনীয়তা-আধাৰিত সমাধান হ'ব পাৰে- কিন্তু সেইবোৰৰ প্ৰয়োগ আৰু প্ৰভাৱ বিশ্বজোৰা। ভাৰতৰ প্ৰয়োজনীয়তাৰ সৈতে খাপ খোৱা কথাবোৰেই পৃথিৱীৰ যিকোনো দেশৰ প্ৰয়োজনীয়তাৰ সৈতে খাপ খাব পাৰে। মই আপোনাক আৰু আপোনালোকৰ দললৈ শুভেচ্ছা জনাইছোঁ। ইয়াৰ পাছত কোন আহিব?
ধৰ্মেন্দ্ৰ প্ৰধানজী: পৰৱৰ্তী দলটো হৈছে ‘ড্ৰীমাৰ্ছ’, তেওঁলোক খড়গপুৰত আছে। টীম খড়গপুৰ!
অংশগ্ৰহণকাৰী (লাৱণ্য): ধন্যবাদ, মাননীয় প্ৰধানমন্ত্ৰী জী! মই ‘ড্ৰীমাৰ্ছ’-ৰ দলৰ নেতা লাৱণ্য, আৰু আমি আমাৰ ‘নোডেল কেন্দ্ৰ’, ‘আইআইটি খড়গপুৰ’, পশ্চিম বংগত আছো। আমি তামিলনাডুৰ ‘চেন্নাই ইনষ্টিটিউট অব টেকন'লজী’ৰ পৰা আহিছোঁ। আমি বাছনি কৰা সমস্যাৰ বিবৃতিটো ‘ৰাষ্ট্ৰীয় কাৰিকৰী গৱেষণা সংস্থা’ (এনটিআৰঅ')ৰ দ্বাৰা প্ৰদান কৰা হৈছে। প্ৰযুক্তিগত উদ্ভাৱন দিনক দিনে বৃদ্ধি হোৱাৰ লগে লগে চাইবাৰ আক্ৰমণৰ সংখ্যাও বৃদ্ধি পাইছে। আমাৰ তথ্য অনুসৰি, ভাৰতত ৭৩ নিযুত চাইবাৰ আক্ৰমণ সংঘটিত হৈছে, এয়া হৈছে বিশ্বৰ তৃতীয় সৰ্বধিক আক্ৰমণৰ পৰিসংখ্যা। এই পৰিস্থিতিৰ মোকাবিলা কৰিবলৈ আমি এক অভিনৱ, অনন্য আৰু পৰিমাপযোগ্য সমাধান উলিয়াইছোঁ। ছাৰ, সমাধানটোৰ বিষয়ে মোৰ সতীৰ্থ শ্ৰীমতী কালপ্ৰিয়াই ব্যাখ্যা আগবঢ়াব।
অংশগ্ৰহণকাৰী (কালপ্ৰিয়া): মাননীয় প্ৰধানমন্ত্ৰী মহোদয়, নমস্তে!
প্ৰধানমন্ত্ৰীঃ নমস্তেজী!
অংশগ্ৰহণকাৰী (কালপ্ৰিয়া): নমস্তে! ‘সংক্ৰমিত ফাইল’ চিনাক্ত কৰিবলৈ আৰু ‘চাইবাৰ ভাবুকি’ৰ বিৰুদ্ধে আমাৰ প্ৰতিৰক্ষা শক্তিশালী কৰিবলৈ আমি একাধিক ‘এণ্টিভাইৰাছ ইঞ্জিন’ ব্যৱহাৰ কৰি আছো। আমাৰ সমাধানত আমি তিনিটা ‘এণ্টিভাইৰাছ ইঞ্জিন’ ব্যৱহাৰ কৰিছোঁ: ‘মাইক্ৰছফ্ট ডিফেণ্ডাৰ’, ‘ইএছইটি’, আৰু ‘ট্ৰেণ্ড মাইক্ৰ' মেক্সিমাম ছিকিউৰিটী’। ‘আৰ্কিটেক্সাৰেল ডিজাইন’ আৰু ‘ভাবুকি চিনাক্তকৰণ প্ৰক্ৰিয়া’ দুয়োটাকে ধৰি আমাৰ সমাধান সম্পূৰ্ণৰূপেই ‘অফলাইন’। আমি জানো, কোনো এটা এণ্টিভাইৰাছেই নিখুঁত নহয়- প্ৰতিটো এণ্টিভাইৰাছৰ নিজা শক্তি আৰু দুৰ্বলতা থাকে। সেয়েহে, আমি এই প্ৰত্যাহ্বানৰ মোকাবিলা কৰিবলৈ ‘মাইক্ৰছফ্ট ডিফেণ্ডাৰ’, ‘ইএছইটি’, আৰু ‘ট্ৰেণ্ড মাইক্ৰ' মেক্সিমাম ছিকিউৰিটী’ ব্যৱহাৰ কৰি আহিছোঁ। সমান্তৰালভাৱে তিনিওটা এণ্টিভাইৰাছ ইঞ্জিনৰ সৈতে স্কেন কৰি, আমি দক্ষতাৰে ভাবুকি চিনাক্তকৰণ সম্ভৱ কৰিব পাৰোঁ। এই পদ্ধতিটোৱে প্ৰণালীটোক সুৰক্ষিত অৱস্থাত ৰাখি যিকোনো সাম্ভাৱ্য ভাবুকিকে ধৰা নপৰাকৈ নথকাটো নিশ্চিত কৰাত সহায় কৰে।
প্ৰধানমন্ত্ৰীঃ মোৰ 'মন কী বাত'ত মই সাধাৰণ মানুহে কেনেদৰে ভূগি আছে আৰু ‘চাইবাৰ প্ৰৱঞ্চনা’ৰ দ্বাৰা প্ৰভাৱিত হৈছে সেই বিষয়ে বিতংভাৱে আলোচনা কৰিছোঁ। ‘চাইবাৰ প্ৰৱঞ্চনা’ৰ জৰিয়তে মানুহক কেনেকৈ লুণ্ঠন কৰা হৈছে? আপোনালোক সকলোৱে বাৰু এই বিষয়ে জানেনে?
অংশগ্ৰহণকাৰী (কালপ্ৰিয়া): নাই, ছাৰ!
প্ৰধানমন্ত্ৰীঃ আপোনালোকে অৱগত হোৱা উচিত, কিয়নো আপোনালোকে কাম কৰি থকা সমাধানটোৱে এটা অতি প্ৰকৃত সমস্যাৰ সমাধান কৰিছে। সমাজৰ এটা বৃহৎ অংশ আজি এনে সংকটৰ বলি হৈছে। এই যুৱকজনে কিবা ক'ব বিচাৰিছে।
অংশগ্ৰহণকাৰী: হয়, ছাৰ! নমস্তে, ছাৰ!
প্ৰধানমন্ত্ৰীঃ নমস্তে!
অংশগ্ৰহণকাৰী: হয়, ছাৰ। প্ৰযুক্তি নিৰন্তৰ বিকশিত হৈ আছে, আৰু ই আগবাঢ়ি যোৱাৰ সময়ত আমি চাইবাৰ আক্ৰমণ বৃদ্ধিৰে মোকাবিলা কৰিব লাগিব। এই ক্ষেত্ৰত, আমি আমাৰ সমাধানটো অধিক দক্ষ কৰি তুলিবলৈ আৰু ইয়াক উন্নত কৰাৰ বাবে কাম কৰি আছো। বিদ্যমান সমাধান বৃদ্ধি কৰি, আমি বিশ্বাস কৰোঁ যে আমি বিকশিত কৰি থকা সমাধানটো বৰ্তমানৰ সমাধানবোৰতকৈ অধিক কাৰ্যকৰী হ'ব।
প্ৰধানমন্ত্ৰীঃ আপোনালোক সকলোৱে জানেনে যে যিকোনো চাইবাৰ নিৰাপত্তা প্ৰচেষ্টাৰ জীৱনকাল অতি কম? সেই বিষয়ে আপোনালোকৰ কোনো ধাৰণা আছে নে বাৰু?
অংশগ্ৰহণকাৰী: হয়, ছাৰ!
প্ৰধানমন্ত্ৰীঃ আপোনালোকৰ অনুমান কি বাৰু? আপুনি আপোনালোকৰ মতামত সহভাগ কৰিব খুজিবনে?
অংশগ্ৰহণকাৰী: আমি আমাৰ সমাধানটো নিৰন্তৰ ‘আপডেট’ কৰি থাকিব লাগিব কিয়নো প্ৰযুক্তি দ্ৰুতগতিত বিকশিত হৈ আছে। এই পৰিৱৰ্তনবোৰৰ সৈতে তাল মিলাই থকাৰ বাবেই আমি ‘আপডেট’ হৈ থাকিব লাগিব...
প্ৰধানমন্ত্ৰীঃ হয়, আপুনি ঠিকেই কৈছে। চাইবাৰ আক্ৰমণকাৰীসকল ইমান অভিনৱ যে যদি আপুনি আজি এটা সমাধান বিচাৰি পায়, আপোনাক মাত্ৰ কেইঘণ্টামানৰ ভিতৰতে আন এটা নতুন সমাধানৰ প্ৰয়োজন হ'ব। আপুনি সদায়ে ‘আপডেট’ কৰি থাকিব লাগিব। চাওক, ভাৰত হৈছে বিশ্বৰ এখন আগশাৰীৰ ‘ডিজিটেল অৰ্থনীতি’। আমাৰ দেশখন বৃহৎ পৰিমাণত ডিজিটেল ভাৱে সংযুক্ত হৈ আছে। এনে পৰিস্থিতিত আপুনি কোৱাৰ দৰে চাইবাৰ ক্ৰিয়াৰ ভাবুকি নিৰন্তৰ বৃদ্ধি হৈ আছে। সেইকাৰণে আপোনালোকে কাম কৰি থকা সমাধানটো ভাৰতৰ ভৱিষ্যতৰ বাবে অতিকে গুৰুত্বপূৰ্ণ। কিন্তু মই কোৱাৰ দৰে, এয়া এককালীন সমাধান নহয়। এইটো প্ৰতিবাৰ বৰষুণ হ'লে ছাতি মেলি লোৱাৰ দৰে! আপুনি সদায় ‘আপডেট’ হৈ থাকিব লাগিব। কিন্তু মই আপোনালোকক শুভকামনা জনাইছোঁ। আপোনালোকে এটা অতি গুৰুত্বপূৰ্ণ বিষয়ত কাম কৰি আছে, আৰু আপোনালোকৰ সমাধান নিশ্চিতভাৱে সন্মুখলৈ আহিব। এইটো চৰকাৰৰ বাবেও বহুত লাভজনক হ'ব পাৰে। মই দেখিছোঁ গোটেই দলটোৱেই উৎসাহেৰে ভৰি আছে, আৰু সকলোৱে তেওঁলোকৰ মোবাইল ফোনত ৰেকৰ্ডিংত ব্যস্ত হৈ আছে। আগবাঢ়ি যাওঁ আহক। পৰৱৰ্তী দল কোন হ’ব?
ধৰ্মেন্দ্ৰ প্ৰধানজীঃ এতিয়া আমি আহমেদাবাদৰ ‘গুজৰাট কাৰিকৰী বিশ্ববিদ্যালয়’ত বহি থকা টীম ‘ব্ৰোকোড’ৰ সৈতে বাৰ্তালাপ কৰিম। আহমেদাবাদলৈ আগবঢ়াই দিছোঁ।
অংশগ্ৰহণকাৰী: নমস্তে, প্ৰধানমন্ত্ৰীজী!
প্ৰধানমন্ত্ৰীঃ নমস্তেজী!
অংশগ্ৰহণকাৰী (হৰ্ষিত): হয়, ছাৰ হাই, মোৰ নাম হৰ্ষিত, আৰু মই টীম ‘ব্ৰোকোড’ক প্ৰতিনিধিত্ব কৰি আছোঁ। ইয়াত, আমি ‘ইছৰো’ৱে প্ৰদান কৰা সমস্যাৰ বিবৃতিত কাম কৰি আছো। সমস্যাৰ বিবৃতিটোত দক্ষিণ মেৰুত অৱস্থিত সৌৰ পাত আৰু সৌৰ কোষৰ গাঢ় প্ৰতিচ্ছৱিৰ প্ৰসাৰক অন্তৰ্ভুক্ত কৰা হৈছে। আমি ‘চান্দ বৰ্তনি’ নামৰ এটা সমাধান বিকশিত কৰি আছো। ‘চান্দ বৰ্তনি’ হৈছে এনে এক সমাধান যি নিম্ন-মানৰ গাঢ় প্ৰতিচ্ছবিবোৰ উচ্চ-মানৰ ছবিলৈ উন্নত কৰিব। কিন্তু ই কেৱল ছবিৰ মানেই উন্নত নকৰে; ই সিদ্ধান্ত লোৱাৰ দক্ষতাকো উন্নত কৰিব। সিদ্ধান্ত লোৱাৰ বাবে, আমি ভূতাত্ত্বিক চন্দ্ৰ অন্বেষণ চিনাক্ত কৰিবলৈ প্ৰয়াস কৰি আছোঁ আৰু আমি বাস্তৱ-সময়ৰ স্থান বাছনিত সহায় কৰিম।
প্ৰধানমন্ত্ৰীঃ আপোনালোকে কেতিয়াবা ক্ষেত্ৰখনত কাম কৰা লোকসকলৰ সৈতে মহাকাশ সম্পৰ্কীয় প্ৰত্যাহ্বানসমূহৰ বিষয়ে আলোচনা কৰাৰ সুযোগ পাইছে নে বাৰু, বিশেষকৈ আপোনালোক যিহেতু আহমেদাবাদত আছে, য'ত এটা বৃহৎ মহাকাশ কেন্দ্ৰ আছে? আপোনালোকে তাত কাৰোবাৰ সৈতে তেওঁলোকে সন্মুখীন হোৱা সমস্যাবোৰৰ বিষয়ে বা ফলাফলৰ মান উন্নত কৰিবলৈ কি কৰিব লাগিব সেই বিষয়ে কথা পাতিছে নেকি?
অংশগ্ৰহণকাৰী (হৰ্ষিত): মই পৰামৰ্শদাতাসকলৰ সৈতে আৰু হায়দৰাবাদৰ বিজ্ঞানীসকলৰ সৈতেও কথা পাতিছোঁ। অৱশ্যে, মই তেনে কোনো কেন্দ্ৰ পৰিদৰ্শন কৰিবলৈ সক্ষম হোৱা নাই, কিয়নো আমি অন্ধ্ৰ প্ৰদেশৰ পৰা বহু দূৰত আছোঁ, আৰু আমাৰ দলটো হৈছে...
প্ৰধানমন্ত্ৰীঃ হয়, মই দেখিছোঁ। আপুনি ভাবেনে যে এই প্ৰকল্পটোৰ জৰিয়তে আমি চন্দ্ৰৰ ভূতাত্ত্বিক আৰু পাৰিপাৰ্শ্বিক পৰিস্থিতি ভালদৰে বুজিবলৈ সক্ষম হ'ম?
অংশগ্ৰহণকাৰী (হৰ্ষিত): হয় ছাৰ! আমি নিশ্চিতভাৱে ভূতাত্ত্বিক বৈশিষ্ট্যসমূহ ধৰা পেলাব পাৰিম আৰু চন্দ্ৰ অন্বেষণৰ গোপন দিশসমূহ উন্মোচন কৰিবলৈ সক্ষম হ’ম। উদাহৰণস্বৰূপে আমি তথা থকা পানী ধৰা পেলাব পাৰো আৰু লগতে চন্দ্ৰৰ পৃষ্ঠত থকা শিল, ডাঙৰ শিল বা ডাঙৰ কণাও চিনাক্ত কৰিব পাৰো। ইয়াৰ দ্বাৰা আমি এই বাধাসমূহ চিনাক্ত কৰি আৰু ৰভাৰখন মসৃণভাৱে অৱতৰণ কৰাত সহায় কৰিব।
প্ৰধানমন্ত্ৰীঃ আপোনালোকৰ দলত বৰ্তমান কিমানজনে কাম কৰি আছে?
অংশগ্ৰহণকাৰী (হৰ্ষিত): দলটোত ছয়জন সদস্যই কাম কৰি আছে।
প্ৰধানমন্ত্ৰীঃ আপোনালোক সকলোৱে বিভিন্ন ঠাইৰ নে সকলো একে অঞ্চলৰ, একেলগে পঢ়া-শুনা কৰিছে?
অংশগ্ৰহণকাৰী (হৰ্ষিত): সমস্যাৰ বিবৃতিত আমি সকলো সদস্যৰ মাজত কামবোৰ ভাগ কৰিলোঁ। তিনিজন সদস্যই মিছন লাৰ্নিং মডেলৰ কাম কৰি আছে আৰু দুজন সদস্যই ইমেজ ফিল্টাৰত গুৰুত্ব দিছে, সেই ছবিবোৰক উন্নত কৰিছে ছাৰ। এতিয়া মোৰ দলৰ সতীৰ্থ সুনীলে বাকীখিনি ক’ব ছাৰ।
প্ৰধানমন্ত্ৰীঃ আপুনি এটা অতি গুৰুত্বপূৰ্ণ বিষয় বাছি লৈছে। আন কোনো যুৱ সদস্যই কিবা কৈছিল নেকি বা মাইক্ৰ’ফোন ল’বলৈ চেষ্টা কৰিছিল নেকি?
অংশগ্ৰহণকাৰী (সুনীল ৰেড্ডী): ছাৰ, আমি অন্ধ্ৰ প্ৰদেশৰ। হিন্দী বেছি নাজানো৷
প্ৰধানমন্ত্ৰীঃ অন্ধ্ৰ গাৰু।
অংশগ্ৰহণকাৰী (সুনীল ৰেড্ডি): তাৰবাবে দুঃখিত...
প্ৰধানমন্ত্ৰীঃ হয় কোৱা!
অংশগ্ৰহণকাৰী (সুনীল ৰেড্ডী): নমস্তে, প্ৰধানমন্ত্ৰী জী, মই অন্ধ্ৰপ্ৰদেশৰ সুনীল ৰেড্ডী। আমি এটা মিছন লাৰ্নিং মডেলৰ কাম কৰা এটা দল য’ত আমি চন্দ্ৰৰ দক্ষিণ মেৰুৰ পৰা লোৱা ছবিসমূহ উন্নত কৰাৰ লক্ষ্য ৰাখিছো। এই ছবিবোৰ মিছন লাৰ্নিং মডেল ব্যৱহাৰ কৰি উন্নত কৰিব পাৰি য’ত আমি দুটা আৰ্কিটেকচাৰ ব্যৱহাৰ কৰিছো: এটা হৈছে ডাৰ্কনেট আৰু আনটো হৈছে ফটোনেট। ছবিখনত থকা ছাঁবোৰ আঁতৰাবলৈ ডাৰ্কনেট ব্যৱহাৰ কৰা হয়, আনহাতে শব্দ কমোৱাৰ বাবে ফটোনেট ব্যৱহাৰ কৰা হয়। যিহেতু চন্দ্ৰৰ দক্ষিণ মেৰুৰ পৰা লোৱা ছবিসমূহত পোহৰ কম থাকে আৰু কম প্ৰ’টনৰ বাবে অধিক শব্দৰ সন্মুখীন হয়, গতিকে আমি নিউট্ৰেল নেটৱৰ্ক ব্যৱহাৰ কৰি এই ছবিসমূহ উন্নত কৰিছো। এই নেটৱৰ্কসমূহত ১০২৪টাকৈ নিউৰন থাকিব। হৰ্ষিতে আগতে উল্লেখ কৰা মতে আমি জমা হোৱা জলভাগো ধৰা পেলাব পাৰো। আপোনালোকৰ লগত কথা পাতি বহুত সুখী অনুভৱ কৰিছো ছাৰ। আপোনালোকৰ লগত এনেদৰে কথা পাতিবলৈ পোৱাটো মোৰ সদায় সপোন আছিল। মনত আছে যেতিয়া আপুনি নেল্লোৰ ভ্ৰমণ কৰিছিল, তেতিয়া মই ভিৰৰ মাজত বহু দূৰত আছিলো, কিন্তু মই উল্লসিত হৈছিলোঁ আৰু চিঞৰি আছিলো, যিহেতু মই আপোনালোকৰ আটাইতকৈ ডাঙৰ অনুৰাগী। আমাক এই সুযোগ দিয়াৰ বাবে ধন্যবাদ ছাৰ।
প্ৰধানমন্ত্ৰীঃ চাওক বন্ধুসকল, মহাকাশ প্ৰযুক্তিবিদ্যাত ভাৰতৰ যাত্ৰা বিশ্বই বহু আশাৰে চাই আছে। যেতিয়া আপোনালোকৰ দৰে ডেকা মগজু জড়িত হৈ পৰে, তেতিয়া সেই আশা আৰু অধিক বাঢ়ি যায়। আপোনালোকৰ দৰে যুৱ উদ্ভাৱকক দেখি স্পষ্ট হৈ পৰিছে যে ভাৰতে বিশ্ব মহাকাশ শক্তি হিচাপে নিজৰ ভূমিকা দ্ৰুতগতিত সম্প্ৰসাৰিত কৰিছে। আন্তৰিক শুভেচ্ছা জ্ঞাপন কৰিলো। এতিয়া, পৰৱৰ্তী দললৈ আগবাঢ়ো।
ধৰ্মেন্দ্ৰ প্ৰধান জী: পৰৱৰ্তী দলটো হৈছে মুম্বাইৰ ইনষ্টিটিউট অৱ মেনেজমেণ্ট ডেভেলপমেণ্ট এণ্ড ৰিচাৰ্চৰ মিষ্টিক অৰিজিনেলছ। মুম্বাইৰ আমাৰ বন্ধুসকলে, মাননীয় প্ৰধানমন্ত্ৰী মহোদয়ৰ লগত কথা পাতিব।
অংশগ্ৰহণকাৰী: নমস্তে, মাননীয় প্ৰধানমন্ত্ৰী জী।
প্ৰধানমন্ত্ৰীঃ নমস্তে জী।
অংশগ্ৰহণকাৰী (মহক বৰ্মা): মোৰ নাম মহক বৰ্মা আৰু মই মিষ্টিক অৰিজিনেলছৰ দলৰ নেতা। আমি কোটাৰ ভাৰতীয় তথ্য প্ৰযুক্তি প্ৰতিষ্ঠানৰ। মোৰ দলটোৰ সৈতে স্মাৰ্ট ইণ্ডিয়া হেকাথন ২০২৪ৰ অংশ হোৱাটো এক সুকীয়া সন্মান, য’ত আছে অক্ষিত জাংৰা, কৰ্তন আগৰৱালা, সুমিত কুমাৰ, অবিনাশ ৰাথোৰ, তুষাৰ জৈন আৰু আমাৰ গুৰু অনন্যা শ্ৰীবাস্তৱ। আমি ভাৰত ইলেক্ট্ৰনিক্স লিমিটেডে উপস্থাপন কৰা নিৰাপত্তাজনিত প্ৰত্যাহ্বানৰ সৈতে মোকাবিলা কৰিছো, যিটো হৈছে মাইক্ৰ’ ডপলাৰভিত্তিক লক্ষ্যৰ শ্ৰেণীবিভাজন। প্ৰত্যাহ্বানটো হ’ল কোনো এটা বস্তু ড্ৰোন নে চৰাই সেইটো চিনাক্ত কৰা, কাৰণ ড্ৰোন আৰু চৰাই দুয়োটা ৰাডাৰত প্ৰায়ে একেধৰণৰ দেখা যায়। ইয়াৰ ফলত বিশেষকৈ সামৰিক অঞ্চল, বিমানবন্দৰ, জটিল আন্তঃগাঁথনিৰ দৰে স্পৰ্শকাতৰ অঞ্চলত ভুৱা এলাৰ্ম, অদক্ষতা আৰু সম্ভাৱ্য নিৰাপত্তাৰ ভাবুকিৰ সৃষ্টি হ’ব পাৰে। আমাৰ লক্ষ্য হৈছে এনে এটা সমাধান বিকশিত কৰা যিয়ে মেচিন লাৰ্নিং এলগৰিদম ব্যৱহাৰ কৰি উন্নত তথ্য প্ৰক্ৰিয়াকৰণ কৰি বস্তুটো ড্ৰোন নে চৰাই সঠিকভাৱে চিনাক্ত কৰে। সমাধানৰ বিষয়ে অধিক জনাবলৈ মই মোৰ সতীৰ্থ অক্ষিতক আহ্বান জনাইছো।
অংশগ্ৰহণকাৰী (অক্ষিত): নমস্তে, প্ৰধানমন্ত্ৰী জী!
প্ৰধানমন্ত্ৰীঃ নমস্তে জী!
অংশগ্ৰহণকাৰী (অক্ষিত): মোৰ নাম অক্ষিত আৰু মই টিম মিষ্টিক অৰিজিনেলছৰ সদস্য। আমাৰ সমাধানে মাইক্ৰ’ ডপলাৰ স্বাক্ষৰ ব্যৱহাৰ কৰি কাম কৰে, যিবোৰ হৈছে বিভিন্ন বস্তুৰ দ্বাৰা সৃষ্টি কৰা অনন্য আৰ্হি। চৰাইৰ পাখিৰ স্পন্দন বা ড্ৰোনৰ ৰ’টাৰ প্লেটৰ গতিবিধিৰ বাবে এইবোৰ হ’ব পাৰে। এই স্বাক্ষৰবোৰ আমি আঙুলিৰ ছাপৰ দৰে ভাবিব পাৰো। প্ৰতিজন মানুহৰ যেনেকৈ এটা সুকীয়া আঙুলিৰ ছাপ থাকে, প্ৰতিটো বস্তুৱেই এক অনন্য মাইক্ৰ’ ডপলাৰ স্বাক্ষৰ নিৰ্গত কৰে। ইয়াক ব্যৱহাৰ কৰি আমি বস্তুটো ড্ৰোন নে চৰাই সেইটো পাৰ্থক্য কৰিব পাৰো। বিমানবন্দৰ, সীমান্ত আৰু সামৰিক অঞ্চলত ব্যাঘাত জন্মাবলৈ এই পাৰ্থক্য অতি গুৰুত্বপূৰ্ণ, য’ত নিৰাপত্তাৰ যথেষ্ট প্ৰয়োজনীয়তা আছে।
প্ৰধানমন্ত্ৰীঃ আপোনালোকে পাৰ্থক্য কৰিব পাৰে যে ই চৰাই নহয় ড্ৰোনহে। কিন্তু ই কিমান দূৰ, কোন দিশত গতি কৰিছে, কিমান বেগেৰে আগবাঢ়িছে, সেইটোও চিনাক্ত কৰিব পাৰিবনে? এই সকলোবোৰ সবিশেষ মেপ কৰিব পাৰিবনে?
অংশগ্ৰহণকাৰী (অক্ষিত): হয় ছাৰ, আমি এই দিশত কাম কৰি আছো আৰু আমি অতি সোনকালে এই ক্ষেত্ৰত সফল হ’বলৈ সক্ষম হ’ম।
প্ৰধানমন্ত্ৰীঃ আপোনালোক সকলোৱে ড্ৰোন ধৰা পেলোৱা ব্যৱস্থাৰ কাম কৰি আছে। ড্ৰোনৰ বহু ইতিবাচক ব্যৱহাৰ আছে যদিও কিছুমান বিশেষ শক্তিৰ দ্বাৰা ইয়াৰ অপব্যৱহাৰে নিৰাপত্তাজনিত প্ৰত্যাহ্বানৰ সৃষ্টি কৰিছে। আপোনালোকৰ দলটোৱে এই প্ৰত্যাহ্বান কেনেকৈ মোকাবিলা কৰিব?
অংশগ্ৰহণকাৰী (অক্ষিত): ছাৰ, আমাৰ ব্যৱস্থাটো কেনেকৈ চলে অলপ বুজাই দিওঁ। প্ৰথমে আমি ৰাডাৰৰ পৰা তথ্য লওঁ আৰু আমি সকলো শব্দ ফিল্টাৰ কৰি পৰিষ্কাৰ আৰু সঠিক তথ্য পাওঁ। তাৰ পিছত আমি মাইক্ৰ’-ডপলাৰ আৰ্হি সৃষ্টি কৰিবলৈ সময়-কম্পাঙ্ক ৰূপান্তৰ প্ৰয়োগ কৰো। তাৰ পিছত এই আৰ্হিবোৰ মেচিন লাৰ্নিং মডেলত ভৰোৱা হয়, যিয়ে আমাক কয় যে বস্তুটো ড্ৰোন নে চৰাই। আমি এই ব্যৱস্থাটো কমপেক্ট আৰু খৰচ-বহনক্ষম ডিভাইচত ব্যৱহাৰ কৰিব পাৰো। ই অতি মাপযোগ্য আৰু বিভিন্ন পৰিৱেশৰ সৈতে খাপ খোৱা, যাৰ ফলত ই বিমানবন্দৰ আৰু সীমান্ত অঞ্চলত ব্যৱহাৰৰ বাবে উপযোগী৷ আমি এই সমস্যাটো কিয় বাছি লৈছিলো সেই কথা বুজাবলৈ মই মোৰ সতীৰ্থ সুমিতৰ হাতত মাইক্ৰফোন গতাই দিব বিচাৰিছো।
অংশগ্ৰহণকাৰী (সুমিত): নমস্তে, প্ৰধানমন্ত্ৰী জী।
প্ৰধানমন্ত্ৰীঃ হয় নমস্তে।
অংশগ্ৰহণকাৰী (সুমিত): আমি এই সমস্যা বাছি লোৱাৰ কাৰণ হ’ল মই ৰাজস্থানৰ শ্ৰী গংগানগৰৰ পৰা আহিছো, যিটো সীমান্তৰ অতি ওচৰত। সঘনাই সেই অঞ্চলটোৰে ড্ৰোন পাৰ হৈ যায়। পুলৱামা আক্ৰমণৰ পিছত ড্ৰোনৰ চলাচল যথেষ্ট বৃদ্ধি পালে। পুৱা ৪ বজাত বা মাজনিশা এণ্টি ড্ৰোন ব্যৱস্থা সক্ৰিয় হৈ উঠিব আৰু গুলীচালনা আৰম্ভ হ’ব। সেই সময়ত অঞ্চলটোৰ লোকসকলৰ বাবে পঢ়া-শুনাও, শুই থকাটোও সম্ভৱ নাছিল। অসুবিধা হৈ পৰিল। সেই সময়ত মোৰ মনলৈ আহিছিল যে এই বিষয়টোৰ ওপৰত কিবা এটা কৰিব পৰা যাব। এই বছৰ যেতিয়া আমাৰ দলটোৱে সমস্যাৰ বিবৃতি বিচাৰিছিল আৰু এই সমস্যাটো আমাৰ ওচৰলৈ আহিছিল, মই মোৰ দলৰ সৈতে শ্বেয়াৰ কৰিলোঁ আৰু আমি ইয়াৰ ওপৰত কাম কৰিবলৈ পৰামৰ্শ আগবঢ়ালোঁ। আমি এই সমস্যাবোৰ সমাধানত সহায় কৰিব বিচাৰিছিলো আৰু মানুহৰ জীৱন সহজ কৰি তুলিব বিচাৰিছিলো। অৱশেষত আমাৰ দলটোৱে ইয়াৰ ওপৰত কাম কৰিলে আৰু আমি গ্ৰেণ্ড ফিনালেত উপনীত হ’লোঁ। বহুত বহুত ধন্যবাদ ছাৰ!
প্ৰধানমন্ত্ৰীঃ বন্ধুসকল, আজিকালি দেশৰ বিভিন্ন খণ্ডত ড্ৰোনৰ ব্যাপক ব্যৱহাৰ হৈছে। নমো ড্ৰোন দিদি যোজনাৰ কথা নিশ্চয় শুনিছে। দুৰ্গম অঞ্চললৈ ঔষধ আৰু অত্যাৱশ্যকীয় সামগ্ৰী যোগান ধৰাৰ বাবে ড্ৰোন ব্যৱহাৰ কৰা হৈছে। অৱশ্যে আমাৰ শত্ৰুপক্ষই ভাৰতত অস্ত্ৰ-শস্ত্ৰ আৰু ড্ৰাগছ সৰবৰাহ কৰাৰ বাবেও ড্ৰোন ব্যৱহাৰ কৰি আছে। এনে প্ৰেক্ষাপটত আপোনালোক সকলোৱে এনে প্ৰত্যাহ্বানৰ মোকাবিলা কৰিবলৈ গুৰুত্বসহকাৰে কাম কৰা দেখি মই অতিশয় আনন্দিত হৈছো। আপোনালোকৰ প্ৰচেষ্টাই এই সমস্যাসমূহ সমাধান কৰাই নহয়, প্ৰতিৰক্ষা প্ৰযুক্তি ৰপ্তানিৰ বাবেও নতুন মাত্ৰা মুকলি কৰিব পাৰে। সেয়ে আপোনালোক সকলোকে অভিনন্দন জনাইছো। আপোনালোকৰ এজন সতীৰ্থ সীমান্তৰ ওচৰতে থাকে, গতিকে তেওঁ সমস্যাটো আৰু সমাধান বিচাৰি উলিওৱাৰ প্ৰয়োজনীয়তাক গভীৰভাৱে বুজি পায়। কিন্তু আগবাঢ়ি যোৱাৰ লগে লগে আপুনি উপলব্ধি কৰিব যে এই বিষয়টোৰ একাধিক দিশ আছে৷ বহু কামৰ প্ৰয়োজন হ’ব কাৰণ ধ্বংসৰ বাবে ড্ৰোনৰ অপব্যৱহাৰ কৰাসকলে নতুন প্ৰযুক্তিৰ সৈতে উদ্ভাৱন কৰি থাকে আৰু নতুন প্ৰৱেশ পইণ্ট বিচাৰি থাকে। অৰ্থাৎ আমাৰ বাবেও অবিৰতভাৱে নতুন প্ৰত্যাহ্বানৰ সৃষ্টি হ’ব। কিন্তু আপোনালোকৰ এই প্ৰচেষ্টাৰ বাবে আন্তৰিকতাৰে অভিনন্দন জ্ঞাপন কৰিছোঁ আৰু আন্তৰিক শুভেচ্ছা জনাইছো। এতিয়া চাওঁ আহক দেশৰ কোনটো অংশৰ সৈতে আমি পৰৱৰ্তী সংযোগ স্থাপন কৰিছো!
ধৰ্মেন্দ্ৰ প্ৰধান জী: এতিয়া, আমি বেংগালুৰুৰ নিউ হৰাইজন কলেজ অৱ ইঞ্জিনিয়াৰিঙত বহি থকা নিৰ্বাণ ৱানৰ সৈতে সংযোগ স্থাপন কৰিম। বেংগালুৰুৰ সৈতে সংযোগ স্থাপন কৰোঁ আহক। অভাৰ টু বেংগালুৰু!
প্ৰধানমন্ত্ৰীঃ আপোনালোকৰ মাত শুনি পোৱা নাই।
অংশগ্ৰহণকাৰী: ছাৰ, এতিয়া মোৰ কথা শুনিব পাৰিছেনে?
প্ৰধানমন্ত্ৰীঃ হয়, এতিয়া শুনিব পাৰিছো।
অংশগ্ৰহণকাৰী: নমস্তে, মাননীয় প্ৰধানমন্ত্ৰী!
প্ৰধানমন্ত্ৰীঃ নমস্তে!
অংশগ্ৰহণকাৰী (দেৱ পুৰ্ণী): মোৰ নাম দেৱ পুৰ্ণী আৰু মই টিম নিৰ্বাণ ৱানৰ নেতৃত্ব দিছো। মোৰ দলত আছে আদিত্য চৌধুৰী, আশ্বেৰ আইজাজ, তনৱী বংশাল, নমন জৈন আৰু সনিধ্যা মালুমীয়া। ছাৰ, আমি জয়পুৰ গ্ৰাম্যৰ পৰা বেংগালুৰুলৈ আহিছো জল শক্তি মন্ত্ৰালয়ে প্ৰদান কৰা এটা অতি গুৰুত্বপূৰ্ণ সমস্যাৰ বিবৃতিৰ কাম কৰিবলৈ। আমাৰ গৱেষণাৰ সময়ত আমি জানিব পাৰিলোঁ যে ভাৰত চৰকাৰে নদীৰ প্ৰদূষণ হ্ৰাস আৰু নদীৰ সজীৱতা উন্নত কৰাৰ বাবে যোৱা কিছু বছৰত কেইবাটাও উন্নত প্ৰচেষ্টা হাতত লৈছে। গতিকে, আমি এনে এক বিস্তৃত ব্যৱস্থা সৃষ্টি কৰাৰ কথা ভাবিলোঁ যিয়ে নদী প্ৰদূষণ নিৰীক্ষণ বৃদ্ধি কৰে, ইয়াক অধিক কাৰ্যক্ষম কৰি তোলে আৰু নদীৰ পৰিস্থিতিতন্ত্ৰৰ সামগ্ৰিক স্বাস্থ্য উন্নত কৰাৰ বাবে পৰামৰ্শ আগবঢ়ায়। ইয়াৰ জৰিয়তে আমি এক অৰ্থপূৰ্ণ অৱদান আগবঢ়োৱাৰ লক্ষ্য ৰাখিছো।
অংশগ্ৰহণকাৰী: নমস্তে, ছাৰ।
প্ৰধানমন্ত্ৰীঃ নমস্তে।
অংশগ্ৰহণকাৰী: আমি চিনাক্ত কৰিলোঁ যে আমাৰ দেশত বহু লোকৰ আয় আৰু জীৱন নদীৰ সৈতে ওতঃপ্ৰোতভাৱে জড়িত আৰু আমি তেওঁলোকৰ জীৱন উন্নত কৰি ইতিবাচক পৰিৱৰ্তন আনিব বিচাৰিছিলো। এই প্ৰকল্পৰ বাবে আমি গংগা নদী বাছি লৈছিলো কাৰণ ই আমাৰ ইতিহাসত এক উল্লেখযোগ্য সাংস্কৃতিক ভূমিকা পালন কৰে আৰু লগতে আমাৰ মাননীয় প্ৰধানমন্ত্ৰীৰ হৃদয়ত স্থান পাইছে। আমাৰ প্ৰকল্পটো আৰম্ভ হৈছিল নমামি গংগা কাৰ্যসূচী আৰু গংগা পৰিস্কৰণৰ ৰাষ্ট্ৰীয় মিচন (এনএমচিজি)ৰ বিষয়ে পঢ়ি আৰু গৱেষণা কৰি। ইয়াৰ জৰিয়তে আমি চিনাক্ত কৰিলোঁ যে এনএমচিজিৰ দুটা অতি স্পষ্ট উদ্দেশ্য আছে: প্ৰথম, প্ৰদূষণ হ্ৰাস– গংগা নদীত প্ৰদূষণ হ্ৰাস কৰা আৰু দ্বিতীয়তে, গংগা নদীৰ সংৰক্ষণ আৰু সজীৱতা– গংগাৰ গুণগত মান ইয়াৰ মূল অৱস্থালৈ ঘূৰাই অনা।
আমি এইটোও জানিব পাৰিলোঁ যে গংগাৰ সৈতে জড়িত বিপুল পৰিমাণৰ উচ্চমানৰ তথ্য ৰাজহুৱাভাৱে উপলব্ধ কৰা হৈছে। এই তথ্যৰ পৰা আমি গভীৰভাৱে অনুপ্ৰাণিত হৈছিলো আৰু ভাবিছিলো যে যদি আমি এই তথ্যৰ ভিত্তিত সিদ্ধান্ত সমৰ্থন ব্যৱস্থা সৃষ্টি কৰিব পাৰো তেন্তে ই গংগাৰ আশে-পাশে বাস কৰা লোকসকলক উন্নত সিদ্ধান্ত লোৱাত সহায় কৰিব। ইয়াৰ ফলত তেওঁলোকৰ জীৱনত যথেষ্ট প্ৰভাৱ পৰিব পাৰে আৰু ইতিবাচক পৰিৱৰ্তন আনিব পাৰে।
অংশগ্ৰহণকাৰী: ছাৰ, যিহেতু গংগা এখন বিশাল নদী, গতিকে ইয়াৰ বাবে ডিজাইন কৰা যিকোনো ব্যৱস্থা সঁচাকৈয়ে মাপযোগ্য হোৱাটো প্ৰয়োজনীয় হৈ পৰে। ইয়াৰ বাবে আমি ফেডাৰেটেড লাৰ্নিং নামৰ এক উন্নত প্ৰযুক্তি ব্যৱহাৰ কৰিছো। আমি তথ্য বিশ্লেষণ কৰিলোঁ আৰু ৩৮টা মূল স্থান চিনাক্ত কৰিলোঁ। ফেডাৰেটেড লাৰ্নিং ব্যৱহাৰ কৰি আমি এই স্থানসমূহত স্থানীয় মডেল তৈয়াৰ কৰিলোঁ, যিবোৰ স্থানীয়কৃত তথ্যৰ ওপৰত প্ৰশিক্ষণ দিয়া হয়। এই স্থানীয় মডেলসমূহে এটা মূল মডেলৰ সৈতে যোগাযোগ কৰে, তেওঁলোকৰ তথ্যসমূহ ভাগ-বতৰা কৰে। এই পদ্ধতিৰ জৰিয়তে এই ব্যৱস্থাই নতুন মডেল সংযোজন, পূৰ্বতে থকা মডেলসমূহ আঁতৰোৱা আৰু বৰ্তমানৰ মডেলসমূহৰ সঠিকতা আৰু কাৰ্যক্ষমতাৰ যথেষ্ট উন্নতিৰ অনুমতি দিয়ে। কাৰিকৰী দিশবোৰ আঁতৰাই ৰাখি নমামি গংগে আমাক দেখুৱাইছে যে গংগা সংৰক্ষণ, সজীৱতা আৰু প্ৰদূষণ নিয়ন্ত্ৰণৰ মূল অৰিহণা যোগোৱাসকলেই হৈছে মানুহ। অংশীদাৰ আৰু তথ্যৰ মাজৰ ব্যৱধান দূৰ কৰিবলৈ আমি এটা উন্নত ডেচব’ৰ্ড প্ৰস্তুত কৰিছো। এই ডেচবোর্ড বিভিন্ন ধৰণৰ অংশীদাৰৰ প্রয়োজন পূৰণ হোৱাকৈ ডিজাইন কৰা হৈছে...
প্ৰধানমন্ত্ৰীঃ গংগাৰ পাৰত হ’বলগীয়া বিশাল কুম্ভমেলাত ৪০-৪৫ কোটি লোক সমবেত হ’ব। এই অনুষ্ঠানৰ সময়ত আপোনালোকৰ উদ্ভাৱন কেনেকৈ লাভৱান হ’ব পাৰে?
অংশগ্ৰহণকাৰী: ছাৰ, আমি জনা মতে, আমি যদি পানীৰ গুণাগুণৰ পৰিমাপসমূহ বিশ্লেষণ কৰো, তেন্তে আমি মানুহক কেনেকৈ বীজাণুমুক্ত কৰি নিজৰ স্বাস্থ্য নিশ্চিত কৰিব পাৰে, লগতে আনৰ স্বাস্থ্যও নিশ্চিত কৰিব পাৰো সেই বিষয়ে অৱগত কৰিব পাৰো। ইয়াৰ বাবে আমি এটা পৰ্টেল প্ৰদান কৰিম য’ত আমি বিভিন্ন দিশৰ ওপৰত পথ প্ৰদৰ্শন কৰিব পাৰিম। উদাহৰণস্বৰূপে, আমি ঔদ্যোগিক পানী, নলা পৰিশোধন আন্তঃগাঁথনি আৰু জৈৱ বৈচিত্ৰ্য ব্যৱস্থাপনাৰ বাবে নিৰীক্ষণ সেৱা আগবঢ়াম। আমি কৃষক, মাছমৰীয়া, আনকি পৰ্যটকসকলকো তেওঁলোকে কেনেকৈ নিজৰ ভ্ৰমণসূচী পৰিকল্পনা কৰিব পাৰে, কি কি মূল স্থান ভ্ৰমণ কৰিব লাগে, ক’লৈ যোৱাটো এৰাই চলিব লাগে, আৰু নিৰ্দিষ্ট স্থানত কাৰ্য্যকলাপসমূহ কেনেদৰে আগবাঢ়িছে সেই বিষয়ে অৱগত কৰিম।
প্ৰধানমন্ত্ৰীঃ গতিকে, চহৰসমূহতো খোৱাপানী যোগান শৃংখলৰ বাবে আপোনালোকৰ কাম সহজে উপযোগী হ’ব পাৰে।
অংশগ্ৰহণকাৰীঃ হয় ছাৰ। আমি গংগা বা আন নদীৰ সমীপৱৰ্তী চহৰসমূহৰ অক্ষাংশ আৰু দ্ৰাঘিমাংশ চিনাক্ত কৰিছোঁ। আমি আমাৰ ষ্টেচনসমূহক আগুৰি থকা উদ্যোগসমূহৰো মেপিং কৰিছোঁ। যিহেতু আমি জানো যে কিছুমান বিশেষ উদ্যোগ যেনেঃ ৰাসায়নিক পদাৰ্থ, কাগজ, বস্ত্ৰশিল্প, টেনাৰী আদিয়ে নিৰ্দিষ্ট ধৰণৰ এফ্লুৱেন্ট নিৰ্গত কৰে, গতিকে আমাৰ এলগৰিদমে আমাক পিছুৱাই যাবলৈ অনুমতি দিয়ে। যদি আমি পানীত কিছুমান প্ৰদূষকৰ স্পাইক ধৰা পেলাওঁ, তেন্তে কোনটো খণ্ড ইয়াৰ কাৰণ হৈছে সেয়া নিৰ্ণয় কৰিব পাৰোঁ। তাৰ পিছত আমি নদীসমূহ পৰিচালনা কৰা সংস্থা বা কৰ্তৃপক্ষক জনাব পাৰোঁ আৰু তেওঁলোকক তৎক্ষণাত "ৰিপ'ৰ্ট" বুটাম এটা দিব পাৰোঁ, যাতে তেওঁলোকে তৎক্ষণাত ‘গ্ৰছলী’ প্ৰদূষণকাৰী উদ্যোগ (GPI)ৰ পৰিদৰ্শন আৰম্ভ কৰিব পাৰে।
প্ৰধানমন্ত্ৰীঃ এই বৈঠকৰ পিছত আৰু কিমান ঘন্টা এই বিষয়ত কাম কৰিব লাগিব?
অংশগ্ৰহণকাৰীঃ ছাৰ, কমেও আৰু ২০ ঘন্টা।
প্ৰধানমন্ত্ৰীঃ বাৰু! মা গংগাই হওঁক বা আমাৰ দেশৰ আন নদীবিলাকেই হওঁক, কেৱল আধ্যাত্মিক আৰু সাংস্কৃতিক ঐতিহ্যৰ দৃষ্টিকোণৰপৰাই নহয়, বৰঞ্চ পৰিবেশৰ ক্ষেত্ৰতো সেইসমূহ অতিশয় গুৰুত্বপূৰ্ণ। মই আনন্দিত যে আপোনাসৱে এই বিষয়ত কাম কৰি আছে। আপোনালোকলৈ মোৰ শুভেচ্ছা জ্ঞাপন কৰিলোঁ। আৰু জয়পুৰৰ লোকে সঁচা অৰ্থত পানীৰ মূল্য আৰু তাৎপৰ্য্য বুজি পায়। আন্তৰিক শুভেচ্ছা জ্ঞাপন কৰিলোঁ।
অংশগ্ৰহণকাৰীঃ বহু-বহু ধন্যবাদ ছাৰ।
প্ৰধানমন্ত্ৰীঃ
বন্ধুসকল,
আপোনালোক সকলোৰে সৈতে কথা পাতি সঁচাকৈয়ে ভাল লাগিল। আপোনালোকৰ গোটটো দেখি মই দেখিবলৈ পালোঁ যে এয়া কিমান ভালদৰে গঠন হৈছে। ই সঁচাকৈয়ে "এক ভাৰত শ্ৰেষ্ঠ ভাৰত"ৰ দৃষ্টিভংগীক প্ৰতিনিধিত্ব কৰে। উত্তৰৰ ছাত্ৰ-ছাত্ৰী দক্ষিণত, দক্ষিণৰ ছাত্ৰ-ছাত্ৰী উত্তৰত, পূবৰ ছাত্ৰ-ছাত্ৰী পশ্চিমত আৰু পশ্চিমৰ ছাত্ৰ-ছাত্ৰী পূবত। মই বিশ্বাস কৰোঁ যে এয়া আপোনালোক সকলোৰে বাবে এক অতিশয় সমৃদ্ধিশালী অভিজ্ঞতা আৰু ই আমাৰ দেশৰ বিশালতা আৰু বৈচিত্ৰ্যক প্ৰতিফলিত কৰিছে। আপোনালোকৰ হেকাথনৰ থিমৰ বাহিৰেও বহু কথা শিকিব পাৰে।
বন্ধুসকল,
আপোনালোক সকলোৰে জ্ঞাত যে ভৱিষ্যতৰ বিশ্বখন জ্ঞান আৰু উদ্ভাৱনৰদ্বাৰা পৰিচালিত হ’ব। আৰু এই প্ৰেক্ষাপটত আপোনাসৱ ভাৰতৰ আশা আৰু আকাংক্ষা। আপোনাসৱৰ দৃষ্টিভংগী অনন্য, আপোনালোকৰ চিন্তা বেলেগ আৰু শক্তিৰ মাত্ৰা অতুলনীয়। কিন্তু চূড়ান্ত লক্ষ্য একেইঃ ভাৰতক বিশ্বৰ আটাইতকৈ উদ্ভাৱনীমূলক, প্ৰগতিশীল আৰু সমৃদ্ধিশালী দেশ হিচাপে পৰিগণিত কৰা। আজি বিশ্বই ভাৰতৰ শক্তিক স্বীকাৰ কৰিছে, যি ভাৰতৰ ‘যুৱ শক্তি’, উদ্ভাৱনী মন আৰু প্ৰযুক্তিগত দক্ষতাত নিহিত হৈ আছে। ভাৰতৰ এই শক্তি স্মাৰ্ট ইণ্ডিয়া হেকাথনত অংশগ্ৰহণ কৰা আপোনালোক সকলোৰে মাজত স্পষ্টকৈ এনে মনোভাৱ দেখা গৈছে। মই আনন্দিত যে স্মাৰ্ট ইণ্ডিয়া হেকাথনে ভাৰতৰ যুৱক-যুৱতীসকলক বিশ্বজুৰি প্ৰতিযোগিতামূলক কৰি তুলিবলৈ এখনি উৎকৃষ্ট মঞ্চ প্ৰশস্ত কৰিছে। স্মাৰ্ট ইণ্ডিয়া হেকাথন আৰম্ভ হোৱাৰ পিছৰেপৰা প্ৰায় ১৪ লাখ ছাত্ৰ-ছাত্ৰীয়ে অংশগ্ৰহণ কৰিছে। এই ছাত্ৰ-ছাত্ৰীসকলে ২ লাখৰো অধিক দল গঠনেৰে প্ৰায় ৩ হাজাৰ সমস্যাৰ ওপৰত কাম কৰিছে। ৬,৪০০ৰো অধিক প্ৰতিষ্ঠান জড়িত হৈ আছে। এই হেকাথনৰ বাবেই শ-শ নতুন ষ্টাৰ্ট-আপৰ জন্ম হৈছে। মই আন এটা কথাও লক্ষ্য কৰিছোঃ ২০১৭ত ছাত্ৰ-ছাত্ৰীয়ে ৭ হাজাৰৰো অধিক আইডিয়া জমা দিছিল। এইবাৰ আইডিয়াৰ সংখ্যা ৫৭ হাজাৰৰো অধিকলৈ বৃদ্ধি পাইছে। ৭ হাজাৰৰপৰা ৫৭ হাজাৰলৈ — ইয়াৰ পৰাই বুজা যায় যে ভাৰতৰ যুৱক-যুৱতীসকলে আমাৰ দেশৰ প্ৰত্যাহ্বানসমূহ সমাধানৰ বাবে কেনেদৰে সাজু হৈছে।
বন্ধুসকল,
বিগত ৭ বছৰত হেকাথনৰপৰা লাভ কৰা বহু সমাধান দেশবাসীৰ বাবে অত্যন্ত উপযোগী বুলি প্ৰমাণিত হৈছে। এই হেকাথনসমূহে বহু ডাঙৰ সমস্যা সমাধান কৰিছে। উদাহৰণস্বৰূপে, ২০২২ৰ হেকাথনত আপোনালোকৰ দৰে যুৱক-যুৱতীৰ এটা দলে ঘূৰ্ণীবতাহৰ তীব্ৰতা জুখিব পৰা ব্যৱস্থা এটাৰ ওপৰত কাম কৰিছিল। হেকাথনৰ সময়ত বিকশিত কৰা ব্যৱস্থাটো এতিয়া ইছৰ’ই বিকশিত কৰা প্ৰযুক্তিৰ সৈতে একত্ৰিত কৰা হৈছে। ইয়াৰ বাবে আপোনালোকে নিশ্চয় গৌৰৱ অনুভৱ কৰিব। ৪-৫ বছৰ পূৰ্বে হেকাথনৰ আন এটা দলে ভিডিঅ’ জিঅ’টেগিং এপ তৈয়াৰ কৰিছিল, যাৰ ফলত তথ্য সংগ্ৰহ বহু সহজ হৈ পৰিছিল। ইয়াৰ ব্যৱহাৰ এতিয়া মহাকাশ সম্পৰ্কীয় গৱেষণাত কৰা হৈছে। হেকাথনৰ আন এটা দলে বাস্তৱ সময়ৰ ৰক্ত ব্যৱস্থাপনা প্ৰণালীৰ কাম কৰিছিল। এই ব্যৱস্থাই প্ৰাকৃতিক দুৰ্য্যোগৰ সময়ত ব্লাড বেংকৰ সবিশেষ প্ৰদান কৰিব পাৰে আৰু ই এনডিআৰএফৰ দৰে সংস্থাসমূহৰ বাবে অসীম সহায়ক হৈছে। কেইবছৰমান পূৰ্বে আন এটা দলে ভিন্ন ক্ষমতাসম্পন্ন ব্যক্তিৰ বাবে এটা প্ৰডাক্ট তৈয়াৰ কৰিছিল, যিয়ে তেওঁলোকৰ অসুবিধাসমূহ লাঘৱত সহায় কৰি আহিছে। এইসমূহ মাত্ৰ কেইটামান উদাহৰণ, কিন্তু হেকাথনৰ এনে শ-শ সফল কেছ ষ্টাডি আছে, যিয়ে আজি অংশগ্ৰহণ কৰা আপোনালোক সকলোৰে বাবে প্ৰেৰণা হিচাপে কাম কৰে। এই উদাহৰণসমূহে দেখুৱাইছে যে ভাৰতৰ যুৱক-যুৱতীসকলে চৰকাৰৰ সহযোগত দেশৰ উন্নয়নৰ দিশত কেনেদৰে কাম কৰি আছে আৰু সন্মুখীন হোৱা প্ৰত্যাহ্বানসমূহৰে মোকাবিলা কৰিছে। এই কাৰ্য্যই ৰাষ্ট্ৰীয় সমস্যা সমাধান আৰু দেশৰ প্ৰগতিত অৰিহণা যোগাইছে। আজি আপোনালোক সকলোৰে লগত কথা পতাৰ পিছত মোৰ আত্মবিশ্বাস বাঢ়িছে যে ভাৰত সঁচাকৈয়ে এখনি ‘বিকশিত ভাৰত’ (উন্নত ভাৰত) হোৱাৰ সঠিক পথত আগবাঢ়িছে। আপোনাসৱে যি উৎসাহ আৰু দায়বদ্ধতাৰে ভাৰতৰ সমস্যাৰ উদ্ভাৱনীমূলক সমাধান বিচাৰিছে, সেয়া সঁচাকৈয়ে উল্লেখযোগ্য।
বন্ধুসকল,
আজি আমাৰ দেশৰ আকাংক্ষাই দাবী কৰে যে আমি সন্মুখীন হোৱা প্ৰতিটো প্ৰত্যাহ্বানৰ বাবে আমি সীমাৰ বাহিৰত চিন্তা কৰিব লাগে। আমি এই আউট অৱ দ্য বক্স চিন্তাধাৰাক প্ৰতিটো খণ্ডতে অন্তৰ্ভুক্ত কৰিব লাগিব আৰু ইয়াক আমাৰ অভ্যাসৰ অংশ কৰি তুলিব লাগিব। এই হেকাথনৰ সাৰমৰ্ম এয়াই হৈ আহিছে। প্ৰক্ৰিয়া আৰু সামগ্ৰী দুয়োটা গুৰুত্বপূৰ্ণ। দেশৰ সমস্যাৰ সমাধান অকল চৰকাৰৰ হাতত আছে বুলি দাবী কৰা হৈছিল পূৰ্বে। কিন্তু এতিয়া তেনেকুৱা নহয়। আজি এনে ধৰণৰ হেকাথনৰ জৰিয়তে ছাত্ৰ-ছাত্ৰী, শিক্ষক, গুৰুসকলকো এই সমাধানসমূহৰ সৈতে সংযোগ কৰা হৈছে। এয়া ভাৰতৰ নতুন শাসন আৰ্হি আৰু ‘সবকা প্ৰয়াস’ (সকলোৰে প্ৰচেষ্টা) এই আৰ্হিৰ প্ৰাণ।
বন্ধুসকল,
পৰৱৰ্তী ২৫ বছৰৰ প্ৰজন্ম হৈছে ভাৰতৰ ‘অমৃত প্ৰজন্ম’। এখনি ‘বিকশিত ভাৰত’ গঢ়াৰ দায়িত্ব আপোনালোক সকলোৱে বহন কৰে। আমাৰ চৰকাৰ এই প্ৰজন্মক উপযুক্ত সময়ত সকলো সম্ভৱপৰ সম্পদ যোগান ধৰিবলৈ অংগীকাৰবদ্ধ। আমি ভিন্ন বয়সৰ বাবে বিভিন্ন স্তৰত কাম কৰি আছোঁ। ছাত্ৰ-ছাত্ৰীৰ মাজত বৈজ্ঞানিক মানসিকতা গঢ়ি তুলিবলৈ আমি নতুন ৰাষ্ট্ৰীয় শিক্ষা নীতি ৰূপায়ণ কৰিছোঁ। বিদ্যালয়সমূহত উদ্ভাৱনৰ বাবে পৰৱৰ্তী প্ৰজন্মক সম্পদেৰে সজ্জিত কৰিবলৈ আমি ১০,০০০ৰো অধিক অটল টিংকাৰিং লেব স্থাপন কৰিছোঁ। আজি এই লেবসমূহ এক কোটিৰো অধিক ছাত্ৰ-ছাত্ৰীৰ পৰীক্ষা-নিৰীক্ষা আৰু গৱেষণাৰ কেন্দ্ৰবিন্দু হৈ পৰিছে। ইয়াৰ উপৰিও ১৪,০০০ ৰো অধিক পিএম শ্ৰী বিদ্যালয়ে ছাত্ৰ-ছাত্ৰীৰ একবিংশ শতিকাৰ দক্ষতা গঢ়ি তোলাৰ কাম কৰি আছে। ছাত্ৰ-ছাত্ৰীৰ উদ্ভাৱনী চিন্তাধাৰা বৃদ্ধিৰ বাবে আমি মহাবিদ্যালয় পৰ্য্যায়ত ইনকিউবেচন চেন্টাৰ স্থাপন কৰিছোঁ। ব্যৱহাৰিক শিক্ষণৰ বাবে আমি উন্নত ৰবটিক্স আৰু এআই লেবৰ সহায় লৈছোঁ। যুৱ মনৰ প্ৰশ্নৰ সমাধানৰ বাবে আমি জিজ্ঞাসা প্লেটফৰ্মো যুগুত কৰিছোঁ। এই মঞ্চই যুৱক-যুৱতীসকলক বিজ্ঞানীসকলৰ সৈতে পোনপটীয়াকৈ মত-বিনিময় কৰিবলৈ আৰু তেওঁলোকৰ ধাৰণাসমূহৰ বিষয়ে আলোচনা কৰিবলৈ পথ প্ৰশস্ত কৰিছে।
বন্ধুসকল,
আজি প্ৰশিক্ষণৰ উপৰিও ষ্টাৰ্ট আপ ইণ্ডিয়া অভিযানৰ জৰিয়তে যুৱক-যুৱতীসকলক আৰ্থিক সাহায্যও আগবঢ়োৱা হৈছে। লগতে তেওঁলোকক কৰ ৰেহাই দিয়া হৈছে। মুদ্ৰা আঁচনিৰ অধীনত যুৱ উদ্যোগীসকলে ২০ লাখ টকা পৰ্য্যন্ত ঋণ লাভৰ ব্যৱস্থা কৰা হৈছে। উদীয়মান কোম্পানীসমূহৰ বাবে সমগ্ৰ দেশতে নতুন প্ৰযুক্তি উদ্যান আৰু আইটি হাব স্থাপন কৰা হৈছে। এক লাখ কোটি টকাৰ গৱেষণা পুঁজিও সৃষ্টি কৰিছে চৰকাৰে। অৰ্থাৎ তেওঁলোকৰ কেৰিয়াৰৰ প্ৰতিটো পৰ্য্যায়তে চৰকাৰে সকলোৰে সৈতে থিয় হৈ আছে, আপোনাসৱৰ প্ৰয়োজন অনুসৰি কাম কৰি আছে। এনে হেকাথনে আমাৰ যুৱক-যুৱতীসকলৰ বাবেও নতুন সুযোগৰ সৃষ্টি কৰিছে। আৰু এইসমূহ কেৱল আনুষ্ঠানিক অনুষ্ঠান নহয়; এয়া এক স্থায়ী প্ৰতিষ্ঠান গঢ়ি তোলাৰ প্ৰক্ৰিয়াৰ অংশ। এয়া আমাৰ জনপন্থী শাসন আৰ্হিৰ এক অবিচ্ছেদ্য অংগ।
বন্ধুসকল,
যদি আমি অৰ্থনৈতিক মহাশক্তি হ’ব বিচাৰোঁ, তেন্তে অৰ্থনীতিৰ নতুন খণ্ডত আমি ব্যাপকভাৱে মনোনিৱেশ কৰিব লাগিব। আজি ভাৰতে ডিজিটেল কন্টেন্ট ক্ৰিয়েচন আৰু গেমিংৰ দৰে ভিন্ন ক্ষেত্ৰত আগবাঢ়িছে, যিসমূহ এদশক আগতেও উচ্চ বিকশিত হোৱা নাছিল। ভাৰতে এতিয়া নতুন কেৰিয়াৰ পথ প্ৰশস্ত কৰিছে, যুৱক-যুৱতীসকলক এই পথসমূহ অন্বেষণ আৰু পৰীক্ষা-নিৰীক্ষাৰ সুযোগ প্ৰদান কৰিছে। যুৱক-যুৱতীসকলৰ কৌতূহল আৰু দৃঢ়তাক স্বীকাৰেৰে চৰকাৰে তেওঁলোকৰ আগ্ৰহক উৎসাহিত কৰিছে। সংস্কাৰ সাধনেৰে ই তেওঁলোকৰ বাটৰপৰা বাধা আঁতৰাইছে। শেহতীয়াকৈ কন্টেন্ট ক্ৰিয়েটৰসকলৰ কঠোৰ পৰিশ্ৰম আৰু সৃজনীশীলতাক স্বীকৃতি দিবলৈ প্ৰথম ৰাষ্ট্ৰীয় ক্ৰিয়েটৰ্ছ বঁটাৰ আয়োজন কৰা হৈছে। আমি ক্ৰীড়াক কেৰিয়াৰৰ এক কাৰ্য্যক্ষম পছন্দ হিচাপে গঢ়ি তোলাৰ বাবেও কাম কৰিছোঁ। গাঁও পৰ্য্যায়ৰ প্ৰতিযোগিতাৰপৰা আৰম্ভ কৰি অলিম্পিকৰ বাবে খেলুৱৈক সাজু কৰালৈকে খেল' ইণ্ডিয়া আৰু ‘টপছ’ (TOPS-Target Olympic Podium Scheme)ৰ দৰে পদক্ষেপসমূহ আগবঢ়াই নিয়া হৈছে। নেচনেল চেন্টাৰ অৱ এক্সেলেন্স ফৰ এনিমেচন, ভিজুৱেল ইফেক্টছ, গেমিং, কমিক্স আৰু এক্সটেণ্ডেড ৰিয়েলিটিৰ প্ৰভাৱো স্পষ্ট হৈ পৰিছে। ফলত গেমিঙে কেৰিয়াৰৰ আশাব্যঞ্জক পছন্দ হিচাপে আত্মপ্ৰকাশ কৰিছে।
বন্ধুসকল,
শেহতীয়াকৈ চৰকাৰে এক উল্লেখযোগ্য সিদ্ধান্ত গ্ৰহণ কৰিছে, যাক সমগ্ৰ বিশ্বই প্ৰশংসা কৰিছে। এই সিদ্ধান্ত ভাৰতৰ যুৱক-যুৱতী, গৱেষক আৰু উদ্ভাৱকসকলৰ বাবে আন্তঃৰাষ্ট্ৰীয় আলোচনীসমূহ লাভৰ সুবিধা প্ৰদানেৰে সম্পৰ্কীয়। ওৱান নেচন-ওৱান চাবস্ক্ৰিপচন আঁচনিখন বিশ্বজুৰি অন্যতম। এই আঁচনিৰ অধীনত চৰকাৰে প্ৰতিষ্ঠিত আলোচনীসমূহৰ চাবস্ক্ৰাইব কৰিছে, যাতে ভাৰতৰ কোনো যুৱক-যুৱতী কোনো তথ্যৰপৰা বঞ্চিত নহয়। এই পদক্ষেপে হেকাথনত অংশগ্ৰহণ কৰা আপোনালোক সকলোকে যথেষ্ট উপকৃত কৰিব। চৰকাৰী প্ৰতিটো প্ৰচেষ্টাৰ লক্ষ্য হৈছে আমাৰ যুৱক-যুৱতীসকলক বিশ্বৰ শ্ৰেষ্ঠ মনৰ সৈতে প্ৰতিযোগিতাত অৱতীৰ্ণ হ’বলৈ সক্ষম কৰা। আমাৰ যুৱ প্ৰজন্মই কেতিয়াও অনুভৱ কৰা উচিত নহয় যে তেওঁলোকৰ কোনো ধৰণৰ সহায় বা আন্তঃগাঁথনিৰ অভাৱ। মোৰ বাবে যুৱক-যুৱতীসকলৰ দৃষ্টিভংগীয়েই চৰকাৰৰ মিছন। সেইবাবেই আমি চৰকাৰ হিচাপে আমাৰ যুৱক-যুৱতীসকলৰ প্ৰতিটো প্ৰয়োজনীয়তাক সকলো ধৰণেৰে পূৰণৰ বাবে অদম্যভাৱে কাম কৰি আছোঁ।
বন্ধুসকল,
আজি হাজাৰ-হাজাৰ যুৱক-যুৱতী এই হেকাথনৰ সৈতে সংযুক্ত হৈ আছে। সেইবাবেই আপোনালোক সকলোলৈকে আন এক গুৰুত্বপূৰ্ণ বাৰ্তা প্ৰেৰণ কৰিব বিচাৰিছোঁ। আপোনালোক সকলোৰে জ্ঞাত যে মই লালকিল্লাৰপৰাই ঘোষণা কৰিছিলোঁ যে মই এনে এক লাখ যুৱক-যুৱতীক দেশৰ ৰাজনীতিৰ মজিয়ালৈ আদৰাৰ লক্ষ্য ৰাখিছোঁ, যাৰ পৰিয়াল আগতে কেতিয়াও ৰাজনীতিত জড়িত হোৱা নাছিল—সম্পূৰ্ণ নতুন মুখ। ৰাষ্ট্ৰৰ ভৱিষ্যতৰ বাবে এয়া অতিশয় গুৰুত্বপূৰ্ণ। ইয়াৰ বাবে ভিন্ন পদক্ষেপ গ্ৰহণ কৰা হৈছে। তেনে এক উল্লেখযোগ্য অনুষ্ঠান অহা মাহত অনুষ্ঠিত হ'বঃ বিকশিত ভাৰত - ইয়ুথ লিডাৰ ডায়লগ। দেশৰ ভিন্ন প্ৰান্তৰ লাখ-লাখ যুৱক-যুৱতীয়ে এই অনুষ্ঠানত অংশগ্ৰহণেৰে এখনি ‘বিকশিত ভাৰত’ৰ বাবে তেওঁলোকৰ ধাৰণাসমূহ ব্যক্ত কৰিব। নিৰ্বাচিত ধাৰণা আৰু যুৱসকলক অহা ১১ আৰু ১২ জানুৱাৰীত স্বামী বিবেকানন্দ জীৰ জন্ম বাৰ্ষিকী উপলক্ষে ইয়ুথ লিডাৰ ডায়লগৰ বাবে দিল্লীলৈ আমন্ত্ৰণ জনোৱা হ'ব। এই অনুষ্ঠানত ভাৰত আৰু বিদেশৰ বিশিষ্ট ব্যক্তিসকলৰ সৈতে আলোচনা হ’ব আৰু মই আপোনালোক সকলোৰে কথা শুনিবলৈ আৰু সৈতে জড়িত হ’বলৈ উপস্থিত থাকিম। এই হেকাথনত অংশগ্ৰহণ কৰা আপোনালোক সকলোকে বিকশিত ভাৰত - ইয়ুথ লিডাৰ ডায়লগত যোগদান কৰিবলৈয়ো আহ্বান জনাইছোঁ। আপোনালোকৰ বাবে ৰাষ্ট্ৰ নিৰ্মাণত অৰিহণা যোগোৱাৰ আন এক কল্পনাতীত সুযোগ এয়া।
বন্ধুসকল,
আগন্তুক সময় আপোনালোক সকলোৰে বাবে এক সুযোগ আৰু দায়িত্ব উভয়ে।
স্মাৰ্ট ইণ্ডিয়া হেকাথনৰ দলসমূহে কেৱল ভাৰতৰ প্ৰত্যাহ্বানসমূহৰ ওপৰত কাম কৰাই নহয়, বিশ্বজনীন সমস্যাসমূহেৰে উন্নত ধৰণেৰে মোকাবিলা কৰাটোও মই বিচাৰিম। অহা বছৰ যেতিয়া আমি এই হেকাথনৰ বাবে গোট খাম, তেতিয়া এনে এটা সমাধানৰ উদাহৰণ দিয়া হ’ব বুলি আশা কৰিছোঁ যিয়ে বিশ্ব সংকট দূৰ কৰাত সহায় কৰিব পাৰে। উদ্ভাৱক আৰু সমস্যা সমাধানকাৰী হিচাপে আপোনাসৱৰ সামৰ্থ্যৰ ওপৰত দেশৰ বিশ্বাস আছে আৰু ইয়াকে লৈ দেশখন গৌৰৱান্বিত। এটি সফল ভৱিষ্যতৰ বাবে আপোনালোকক আন্তৰিক শুভেচ্ছা জনাইছোঁ!
ধন্যবাদ...!
