প্ৰধানমন্ত্ৰী নৰেন্দ্ৰ মোদীয়ে ৩১ অক্টোবৰ ২০১৯ তাৰিখে গুজৰাটৰ কেৱাড়িয়াত ভাৰতৰ লৌহমানৱ চৰ্দাৰ বল্লভভাই পেটেলৰ জন্মবাৰ্ষিকী উপলক্ষে ষ্টেচু অব্ ইউনিটীত শ্ৰদ্ধাঞ্জলি জ্ঞাপন কৰিব৷
তাৰোপৰি প্ৰধানমন্ত্ৰীয়ে একতা দিৱসৰ পেৰেড, প্ৰযুক্তি প্ৰদৰ্শনী ক্ষেত্ৰ পৰিদৰ্শন কৰাৰ লগতে কেৱাড়িয়াত চিভিল ছাৰ্ভিচেছৰ শিক্ষানবিচসকলৰ সৈতেও সাক্ষাৎ কৰিব৷
২০১৪ চনৰ ৩১ অক্টোবৰৰ পৰা পালন কৰি অহা ৰাষ্ট্ৰীয় একতা দিৱসত দেশৰ বিভিন্ন প্ৰান্তৰ লোকে ৰাণ ফ’ৰ ইউনিটীত অংশগ্ৰহণ কৰে৷
২৭ অক্টোবৰ ২০১৯ তাৰিখে সম্প্ৰচাৰিত ‘মন কী বাত’ কাৰ্যসূচীত প্ৰধানমন্ত্ৰী নৰেন্দ্ৰ মোদীয়ে জনসাধাৰণক ‘‘এক ভাৰত শ্ৰেষ্ঠ ভাৰত’’ৰ লক্ষ্য প্ৰাপ্তিৰ বাবে বৃহৎ সংখ্যাত ‘‘ৰাণ ফ’ৰ ইউনিটী’’ত অংশগ্ৰহণ কৰিবলৈ আহ্বান জনাইছিল৷
‘‘বন্ধুসকল, আপোনালোকে জানে যে ২০১৪ চনৰ ৩১ অক্টোবৰ তাৰিখৰ পৰা ‘‘ৰাষ্ট্ৰীয় সংহতি দিৱস’’ হিচাপে পালন কৰি অহা হৈছে৷ এই দিনটোত আমি সকলোৱে যিকোনো মূল্যত দেশৰ সংহতি আৰু সুৰক্ষা ৰক্ষাৰ বাবে প্ৰতিশ্ৰুতিৱদ্ধ হও৷ পূৰ্বৰ বৰ্ষসমূহৰ দৰে এইবাৰো ‘‘ৰাণ ফ’ৰ ইউনিটী’’ কাৰ্যসূচী পালন কৰিবলৈ লোৱা হৈছে৷ ‘‘ৰাণ ফ’ৰ ইউনিটী’’ হ’ল সংহতিৰ প্ৰতীক য’ত ৰাষ্ট্ৰ ঐক্যৱদ্ধ হয়, এটা নিৰ্দিষ্ট দিশলৈ আগবাঢ়ে আৰু ‘‘এক ভাৰত শ্ৰেষ্ঠ ভাৰত’’ৰ লক্ষ্য নিৰ্ধাৰণ কৰে’’, তেওঁ এইদৰে কয়৷
‘‘মোৰ দেশবাসীসকল, চৰ্দাৰ পেটেলে দেশক একতাৰ ডোলেৰে বান্ধিছিল৷ একতাৰ এই মন্ত্ৰ আমাৰ জীৱনৰ সংস্কাৰৰ দৰে, আমি অহৰহ সকলো দিশতে এই মন্ত্ৰৰে উজ্জীৱিত হ’ব লাগে৷ মোৰ মৰমৰ দেশবাসীসকল, আমাৰ দেশে সদায়েই ঐক্যৱদ্ধ বৰ্তাই ৰখাত অগ্ৰণী ভূমিকা গ্ৰহণ কৰি আহিছে৷ যদি আমি নিজলৈ এপাক ঘূৰি চাও তেন্তে এনে বহু উদাহৰণ আমি প্ৰত্যক্ষ কৰিম য’ত বিভিন্ন লোকে ঐক্যতা বৰ্তাই ৰাখি কাম কৰি আছে৷’’
প্ৰধানমন্ত্ৰীয়ে কয়, ‘‘যোৱা পাঁচ বছৰত আমি প্ৰত্যক্ষ কৰিলো- কেৱল দিল্লীতেই নহয়, ভাৰতৰ শতাধিক চহৰ, কেন্দ্ৰীয় শাসিত অঞ্চল, ৰাজ্যৰ ৰাজধানী, জিলা, আনকি টায়াৰ-২ তথা টায়াৰ-৩ৰ অন্তৰ্গত চহৰসমূহৰ পুৰুষ, মহিলা, আবাল-বৃদ্ধ-বনিতা সকলোৱে বৃহৎ সংখ্যাত ‘‘ৰাণ ফ’ৰ ইউনিটী’’ত অংশগ্ৰহণ কৰি আহিছে৷
ফিট ইণ্ডিয়াৰ ওপৰত গুৰুত্ব প্ৰদান কৰি প্ৰধানমন্ত্ৰীয়ে কয় যে ‘‘ৰাণ ফ’ৰ ইউনিটী’’ এনে এক অনন্য পদক্ষেপ য’ত শৰীৰ, মন আৰু আত্মা, তিনিওটাই লাভান্বিত হয়৷ ৰাণ ফ’ৰ ইউনিটীত কেৱল আমি দৌৰাই নহয়, ইয়াৰ জৰিয়তে ফিট ইণ্ডিয়াৰ উদ্দেশ্যও সাধন হয়৷ আমি নিজকে এক ভাৰত-শ্ৰেষ্ঠ ভাৰতৰ সৈতে সংযোজিত অনুভৱ কৰো!
উল্লেখ্য, runforunity.gov.in শীৰ্ষক এক ৱেৱ প’ৰ্টেল মুকলি কৰা হৈছে য’ত সমগ্ৰ দেশতে উদযাপিত হ’বলগীয়া ৰাণ ফ’ৰ ইউনিটীৰ অৱস্থানসমূহ উল্লেখ আছে৷
