প্ৰধানমন্ত্ৰী শ্ৰী নৰেন্দ্ৰ মোদীয়ে আজি নেপালৰ প্ৰধানমন্ত্ৰী শ্ৰী কে.পি অ’লীৰ সৈতে যুটীয়াভাৱে কাঠমাণ্ডুত পশুপতিনাথ ধৰমশালা উদ্বোধন কৰে৷
অনুষ্ঠানত প্ৰধানমন্ত্ৰীয়ে কয় যে তেওঁ কাঠমাণ্ডুলৈ যেতিয়াই আহে তেতিয়াই ইয়াৰ জনসাধাৰণৰ মৰম-চেনেহ অনুভৱ কৰে৷ পশুপতিনাথ আৰু নেপালৰ আন মন্দিৰ পূৰ্বেও দৰ্শন কৰাৰ কথা তেওঁ স্মৰণ কৰে৷
ভাৰত আৰু নেপালৰ মাজত আধ্যাত্মিক সম্পৰ্কই সময় আৰু দূৰত্বৰ সীমা অতিক্ৰম কৰিছে৷ সেই দিশৰ পৰা তেওঁ আজি এই ধৰমশালা উদ্বোধন কৰিবলৈ পাই অত্যন্ত আনন্দিত বুলি প্ৰধানমন্ত্ৰীয়ে ব্যক্ত কৰে৷
প্ৰধানমন্ত্ৰীয়ে কয় যে পশুপতিনাথ, মুক্তিনাথ আৰু জানকীধাম মন্দিৰে বৈচিত্ৰতাৰ মাজত নেপালৰ ঐক্য-সংহতিক প্ৰতিফলিত কৰে৷ ইয়ে ভাৰতৰ সৈতে নেপালৰ বান্ধোনো শক্তিশালী কৰে৷ তেওঁ হিন্দু আৰু বৌদ্ধ ধৰ্মৰ চহকী পৰম্পৰাৰ কথা উল্লেখ কৰি কয় যে কাঠমাণ্ডুত এই পৰম্পৰাৰ ধ্বনি অনুৰণিত হয়৷ তেওঁ এই কথাও উল্লেখ কৰে যে কিদৰে ভাৰত আৰু নেপালৰ মাজত বৌদ্ধ ধৰ্মৰ এক গুৰুত্বপূৰ্ণ সম্পৰ্ক আছে৷ দুয়োখন ৰাষ্ট্ৰ নিজৰ নিজৰ চহকী ঐতিহ্য-সংস্কৃতিক লৈ গৌৰৱান্বিত বুলিও প্ৰধানমন্ত্ৰীয়ে কয়৷
প্ৰধানমন্ত্ৰীয়ে সমাজৰ দূৰ্বল আৰু শোষিত-নিষ্পেষিত শ্ৰেণীৰ উন্নতিৰ ওপৰত গুৰুত্ব প্ৰদানতো জোৰ দিয়ে৷ তেওঁ কয় যে ভাৰতে অৰ্থনৈতিক উন্নয়নত নতুন উচ্চতা স্পৰ্শ কৰিছে৷ ‘সবকা সাথ সবকা বিকাশ’ নীতিৰ ভিতৰত নেপালৰ জনসাধাৰণকো অন্তৰ্ভুক্ত কৰা হৈছে বুলিও তেওঁ উল্লেখ কৰে৷ শ্ৰী মোদীয়ে কয় যে নেপালৰ ৰাজনৈতিক সুস্থিৰতা দেখিবলৈ পাই ভাৰতবৰ্ষ অত্যন্ত সুখী৷ নেপালে সদায় ভাৰতৰ শুভকামনা আৰু সহযোগিতা আশা কৰিব পাৰে৷
