ছাৰ্ক নেতৃত্ব আৰু প্ৰতিনিধিসকলৰ সৈতে অনুষ্ঠিত হোৱা বৈঠকত প্ৰধানমন্ত্ৰী নৰেন্দ্ৰ মোদীয়ে ক’ভিড-১৯ আপাতকালীন পুঁজি গঠনৰ প্ৰস্তাৱ দাঙি ধৰে৷ এই পুঁজি ছাৰ্ক দেশসমূহৰ স্বেচ্ছামূলক অৱদানৰ ওপৰত নিৰ্ভৰ কৰিব৷ প্ৰাৰম্ভিক পৰ্যায়ত ভাৰতে ১০ মিলিয়ন ডলাৰৰ অৰ্থ এই পুঁজিলৈ আগবঢ়োৱাৰ কথা ঘোষণা কৰে৷
যিকোনো ছাৰ্ক সদস্যই তৎকালীন ব্যয়ৰ বাবে পুঁজিৰ পৰা ধন ব্যয় কৰিব পাৰিব৷ ইয়াৰোপৰি প্ৰধানমন্ত্ৰী মোদীয়ে কয় যে চৰকাৰে ভাৰতত পৰীক্ষণ কিট আৰু অন্যান্য উপকৰণৰ সৈতে চিকিৎসক তথা বিশেষজ্ঞৰ এটা দ্ৰুত প্ৰতিক্ৰিয়াশীল দল গঠন কৰিছে৷
প্ৰধানমন্ত্ৰী মোদীয়ে কয় যে আমি আপোনালোকৰ আপাতকালীন প্ৰতিক্ৰিয়াশীল দলৰ বাবে অতি শীঘ্ৰেই অনলাইন প্ৰশিক্ষণ কেপচুলৰ ব্যৱস্থাও কৰিব পাৰো৷ এয়া আমাৰ নিজৰ দেশত প্ৰয়োগ কৰা মডেলৰ ভিত্তিত হ’ব যাৰ দ্বাৰা আমাৰ সকলো আপাতকালীন কৰ্মচাৰীৰ ক্ষমতা বৃদ্ধি হ’ব৷
প্ৰধানমন্ত্ৰী মোদীয়ে ভাৰতে প্ৰণয়ন কৰা একীকৃত ৰোগ নিৰীক্ষণ প’ৰ্টেলৰ বিষয়ে উল্লেখ কৰে৷ ইয়াৰ জৰিয়তে সম্ভাৱনাপূৰ্ণ ভাইৰাছ বাহক আৰু তেওঁলোকৰ সম্পৰ্কলৈ অহা ব্যক্তিসকলৰ সন্ধান কৰাটো সহজ হ’ব৷ তেওঁ কয় যে ভাৰতে এই ৰোগ নিৰীক্ষণ ছফ্টৱেৰটো ছাৰ্ক সদস্যসকলক বিনিময় কৰাৰ লগতে ইয়াৰ প্ৰশিক্ষণো প্ৰদান কৰিব পাৰে৷
